Jọn 5
5
Esivwo rẹ ohwo rẹ ọmuọga vwẹ asan Ẹtẹrhe na
1Rẹ ọnana vwọ wan nu orẹ ri Ju ko te otọ, Jesu de kpo Jerusalẹm. 2Asakiephana vwẹ asan eki rẹ igegede vwi Jerusalẹm na ẹtẹrhe ọvo herọ, ra vwẹ unu ri Hibru se nẹ Bẹtzata, ro vwo ẹguan iyori. 3Eguan nana keye urogho rẹ ehonvwo dia, irhuẹro, ikpono, kugbe otu ri ghwoma re hẹrhẹ ọke rẹ ame na dẹ che kpogho. 4Kidie amakashe ruẹ ẹtẹrhe na ọkeọvo o mi kpogho ame na ohwo kohwo rọ karo she teyọ ame na vwẹ ọke ro de kpogho nu, emiavwe kemiavwe rọ hẹ oma rọye ejobi mi ghwe kpo. 5Ọshare ọvo hẹ etiyin, rọ họnvwa ẹgbukpe ọgban gbẹ ẹrenre re. 6Ọke ri Jesu vwọ mrẹ rọ vwọ riẹn nẹ o shevwerhẹ etiyin krekri re, ọ da ta kẹ, Wọ guọnọre nẹ esivwi uwe? 7Ọhonvwo na da kpahe kẹ, Ọga, mi vwo ohwo ọvuọvo ro mu vwe phihọ evun rẹ ẹtẹrhe na vwẹ ọke rẹ ame na de kpogho-o, ọke me da yanran ohwo ọfa me ghwa djẹ karo kẹ vwẹ re she teyọ. 8Jesu da ta kẹ, Vrẹn, tọrọ eruẹ wẹn, wọ yan. 9Siẹvuọvo na e de ghwe sivwi ohwo na, ọ da tọrọ eruẹ rọye ọ da yan.
Asakiephana ẹdẹ yena kẹ ẹdidjala. 10Ọtiọye na ihwo ri Ju da ta kẹ ọ re sivwiri na, Ọnana ẹdidjala, o rhe fo rere wọ ghwa eruẹ wẹ-ẹn. 11Ẹkẹvuọvo ọ da kpahe kẹ ayen. Ohwo ro sivwi uvwe na re ta kẹ vwẹ nẹ, Tọrọ eruẹ wẹn, re wọ yan. 12Ayen da nọ, Ono hẹ ohwo rọ ta kẹ owẹ nẹ, Tọrọ eruẹ wẹn, re wọ yan? 13Asakiephana ohwo re sivwiri na gbe riẹn ohwo rọ e pha-a, kidie yi Jesu sioma reyọ nure, yẹ ihwo buebu hẹ asan na. 14Ukuko rọye re, Jesu da mrẹ vwẹ evun rẹ uwevwi rẹ ẹga na, ọ da ta kẹ, Nighe, oma wẹ kpo re. Wo gbi ruẹ imwemwu ọfa-a, rere emu ro miovwi nọ ọtiọna vwo jẹ uwe ẹvwa. 15Ohwo na da yanran ra ta kẹ otu ri Ju nẹ Jesu hẹ ohwo ro sivwi ọye. 16Ọnana kọye sorọ rẹ ihwo ri Ju vwo kpokpo Jesu, fikiridie o ru ọnana vwẹ ẹdidjala. 17Ẹkẹvuọvo Jesu da kpahe kẹ ayen, Ọsẹ mẹ ji ru iruo te ọke na, kọye mi ji vwo ruẹ. 18Kọye sorọ rẹ ihwo ri Ju na vwọ rhoma guọnọ hwe, fikiridie ọ dia urhi rẹ ẹdidjala ọvo ọ chọre-e, ẹkẹvuọvo o ji se Ọghẹnẹ Ọsẹ rọye, ọ vwẹ oma rọye vwavwẹ Ọghẹnẹ.
Ogangan rẹ Ọmọ na
19Jesu da ta kẹ ayen, Uyota, uyota, me ta kẹ ovwan, Ọmọ na sa vwẹ ọhọrobọ rọye ru emuọvo-o, ẹkẹvuọvo obo rọ mrẹ Ọsẹ na ro ruẹ ọvo ọye o se ru; kidie obo ro ruẹ, ọye Ọmọ na ji ru rhe. 20Kidie Ọsẹ na guọnọ Ọmọ na, o de dje obo rẹ ekpuyovwi rọye ruẹ ejobi vwọ kẹ; iruo re rhonọ ọtiọna eye o che dje kẹ, rere o vwo gbe ovwan unu. 21Kidie kirobo rẹ Ọsẹ na kpare irivwi vrẹn na ọ da vwẹ arhọ kẹ ayen na, ọtiọye rhe Ọmọ na je vwẹ arhọ kẹ ayen otu ri jere. 22Ọsẹ na gu ohwo ọvuọvo-o, ẹkẹvuọvo ọ da vwẹ ẹdjọeguo na vwọ kẹ Ọmọ na, 23rere ayen ejobi vwo mu ọghọ kẹ Ọmọ na, kirobo rẹ ayen ji mu ọghọ kẹ Ọsẹ na. Ohwo ro rhe mu ọghọ kẹ Ọmọ na-a yo ji mu ọghọ kẹ Ọsẹ na ro jiro rhe-e. 24Uyota, uyota, me ta kẹ owẹ, ohwo ro nyo eta mẹ rọ de se ọ ro ji vwe rhe gbuyota, ko vwo arhọ ri bẹdẹ; e gbi vwo guẹdjọ ọfa-a, ẹkẹvuọvo yo nẹ ughwn kpo arhọ nure.
25Uyota, uyota, me ta kẹ owẹ, ọke cha, o te nu vwẹ asakiephana rẹ irivwi de che nyo urhuru rẹ Ọmọ rẹ Ọghẹnẹ, otu ri nyori ke rhọ. 26Kidie kirobo rẹ Ọsẹ na vwo arhọ vwẹ oma rọye, ọtiọye ọ je vwẹ arhọ na kẹ oma rọye rhe, 27ọ da vwẹ ogangan kẹ ro vwo guẹdjọ, fikiridie Ọmọ rẹ ohwo o ruẹ. 28Wo jẹ ọnana gbe ovwan unu-u; kidie ọke na cha rẹ irivwi rẹ hẹ evun rẹ ishi ejobi che vwo nyo urhuru rọye. 29Ke cha yan phia, otu ri ru ọ rẹ esiri, ki vrẹn kpo arhọ, otu ri ru umwemwu, ki vrẹn kpo ẹdjọeguo.
Ihwo ri se Iseri Ki Jesu
30Me sa vwẹ ogangan ru emuọvo-o; kirobo ri mi nyori, ọye mi guẹ nene; yẹ ẹdjọeguo mẹ ọ rẹ ọsoso, fikiridie mi ruẹ ọhọrobọ mẹ-ẹ ẹkẹvuọvo ọhore rẹ ọ ro ji vwe rhe. 31O da dianẹ mi se oseri kẹ omaobọ mẹ, yẹ iseri mẹ dia uyota-a; 32ọfa herọ ro se iseri kẹ vwẹ, ye me riẹnre nẹ iseri ro se kpahe ovwẹ na uyota. 33We ji ohwo bru Jọn, o de se iseri rẹ uyota na. 34Ọ dianẹ iseri ri mi vwori kẹ obọ rẹ ohwo o nurhe-e; ẹkẹvuọvo me ta ọnana rere wan vwọ rhọ. 35Ọye hẹ urhukpẹ rọ la ro lo, ovwan da rhọvwe ghọghọ emerha vwẹ urhukpẹ rọye. 36Ẹkẹvuọvo iseri ri mi vwori rhonọ ọ ri Jọn; kidie iruo rẹ Ọsẹ mẹ vwọ kẹ vwẹ ni mi ru gba, iruo nana dẹn ri mi ruẹ na, se oseri kẹ vwẹ nẹ Ọsẹ na ri ji vwe rhe. 37Ọsẹ na ro ji vwe rhe na ekpuyovwi rọye ji se oseri kẹ vwẹ. We nyo urhuru rọye dẹvo-o, wa je mrẹ ugboma rọye dẹvo-o; 38wa guọnọ nẹ ota rọye dia evun rẹ ovwaan, kidie we se ọ rọ ji rhe na gbuyota-a. 39Wa guọnọ ẹbe efuanfon na, fikiridie we rori nẹ evun rẹ ayen we de vwo arhọ ri bẹdẹ na; ayen ri se oseri kpahe ovwẹ na; 40Dede na wa rhovwe bru uvwe rhe re we vwo arhọ na-a. 41Me guọnọ ejiro rẹ ihwo-o. 42Ẹkẹvuọvo me riẹnre nẹ we vwo ẹguọnọ rẹ Ọghẹnẹ vwẹ evun rẹ ovwa-an. 43Me rhere vwẹ odẹ rẹ Ọsẹ mẹ, ovwan reyọ ovwẹ-ẹ; ọfa da rhe vwẹ ode robọ rọye, ọye ovwan cha reyọ. 44Mavọ ovwan vwo vwo segbuyota kpahe otu re guọnọ urinrin rẹ ohwohwo yọ gbe rha guọnọ urinrin ro nẹ obọ rẹ Ọghẹnẹ ọvuọvo rhe-e? 45We roro nẹ mi rhi gu ovwan vwọ kẹ Ọsẹ na-a; Mosis ri guẹ ovwan, ohwo re wa vwẹ ẹro so. 46Ọ da dianẹ we se Mosis gbuyota, ku we se vwe gbuyota, kidie o siro kpahe ovwẹ. 47Ẹkẹvuọvo we rhe se obo ro siri gbuyota-a na, komavọ we se se eta mẹ gbuyota.
S'ha seleccionat:
Jọn 5: UBV77
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bible in Urhobo © United Bible Societies, 1977.