Jọn 8
8
Aye re Muru ro gbe Igberadja
1Ẹkẹvuọyo Jesu de kpo ugbenu rẹ Oliv. 2Vwẹ irhiọke ride ọ da rhoma rhe uwevwi rẹ ẹga na; ihwo na ejobi de bro rhe, o de tidia o de yono ayen. 3Isiẹbe na kugbe Farisi na da reyọ ayen ọvo re muru ro gbe igberadja bro rhe, ayen da reyọ phihọ uherevie. 4Ayen da ta kẹ, Oyono, e mu aye nana ro gbe igberadja. 5Askiephana vwẹ evun rẹ urhi na Mosis ta kẹ avwanre nẹ e phi ohwo ọtiọye hwe. Kidie wọ ta kpahọ? 6Ayen ta ọnana vwọ davwọ ni, rere ayen vwọ mrẹ emu keri muo obọ. Jesu rhuẹri kọ vwẹ urhiabọ siotọ. 7Rẹ ayen vwo dje ẹ nọ ẹ nọ re, o vrẹn mudia ọ da ta kẹ ayen, E jẹn ohwo ro ji ru umwemwu vwẹ ohri rẹ ovwan na dẹvo-o ka tọrọ ukpokpo vwo phio. 8Ọ da rhoma rhuẹ rọ vwẹ urhiabọ vwo siotọ. 9Ẹkẹvuọvo ọke rẹ ayen vwo nyo, ayen da yanran, ohwo ọvuọvo, nẹ okpako rhiri re te ọkẹ oba, Jesu ọvo kọye ri chekọ kugbe aye na ro mudia vwẹ obaro rọye. 10Jesu vwọ kpare opharo nẹ otọ rhe ọ da ta kẹ, Aye, kẹ ayen rhọ? Ohwo ọvuọvo rhe bruhwe we-e? 11Ọ da ta, Kaka ohwo, Ọrovwohwo. Jesu da ta, Yi mi ji bruhwe we rhe-e; kpo, wo gbi ru umwemwu ọfa-a.
Jesu hẹ Urhukpẹ rẹ Akpọ na
12Jesu da rhoma ta kẹ ayen, tanẹ, Mẹvwẹ hẹ urhukpe rẹ akpọ na; ohwo ro nene uvwe ọ gbe sa yan vwẹ evun rẹ ebrii, ẹkẹvuọvo ko vwo urhukpe rẹ arhọ. 13Etiyin ihwo ri Farisi da ta kẹ, Wọwẹ ọvo ri se oseri kẹ oma wẹn; iseri wẹn dia uyota-a. 14Jesu da kpahe, Ọ da tobọ dianẹ mi se oseri kẹ omaobọ mẹ, iseri mẹ o rẹ uyota, kidie mẹ riẹn asan ri mi nurhe me je riẹn asan re me ra, ẹkẹvuọvo ovwan riẹn asan ri mi nurhe-e eyẹ asan re me ra-a. 15Ovwan guẹdjọ nene ugboma, mi guẹdjọ rẹ ohwo-o. 16Yẹ me da tobọ guẹdjọ, edjọ mẹ ọ rẹ uyota, kidiẹ ọ dia o mẹvwẹ ọvo ri guẹdjọ na-a, ẹkẹvuọvo mẹvwẹ vẹ ọ ro ji vwẹ rhẹ. 17Vwẹ ẹvun rẹ urhi rẹ ovwan e siro nẹ oseri rẹ ihwo ivẹ uyota; 18Mi se oseri kẹ oma mẹ, Ọsẹ na ro ji vwe rhe na ji se oseri kẹ vwẹ. 19Ayen da ta kẹ, Tivọ Ọsẹ wẹn epha? Jesu da kpahe, Wa riẹn vwẹ vwo siẹvo kẹ Ọsẹ mẹ-ẹ; ọ dianẹ ovwan riẹn vwẹ, manẹ ovwan je riẹn Ọsẹ mẹ na rhe. 20Ọ ta eta nana vwẹ evun rẹ uwevwi rẹ efe, ro vwo yono vwẹ uwevwi rẹ ẹga na; ẹkẹvuọvo ohwo ọvuọvo muro-o, fikiridie ọke rọye ji te-e.
Asan re Me Ra na Ovwan se Te-e
21Ọ da rhoma ta kẹ ayen, Me yanran, kẹ ovwan cha guọnọ ovwẹ ku we ghwu vwẹ umwemwu rẹ ovwan; asan re me ra, ovwan che se te-e. 22Etiyin ihwo ri Ju na da ta, Ko che hwe oma rọye, rọ vwọ ta nẹ, Asan re me ra, ovwan che se te-e? 23Ọ da ta kẹ ayen, obotọ ovwan nurhe, obenu mi nurhe; ovwan hẹ ihwo rẹ akpọ nana, me dia ohwo rẹ akpọ nana-a. 24Me ta kẹ ovwan nẹ we che ghwu phihọ imwemwu rẹ ovwan, kidie we che ghwu phihọ imwemwu rẹ ovwan jokpa nẹ ovwan segbuyota nẹ mẹvwẹ hẹ ọye. 25Ayen da ta kẹ, Wẹ ono? Jesu da ta kẹ ayen, kọye hẹ obo re me ta kẹ ovwan notọrhe na. 26Mi vwo emu buebu re me ta kpahe ovwan kugbe emu buebu mi gu kpahe ovwan; ẹkẹvuọvo ọ ro ji vwe rhe na uyota, obo ri mi nyo mie kọye mi ghwoghwo kẹ akpọ na. 27Ọ rha ro ayen nẹ ota rẹ Ọsẹ na ọ ta kẹ ayen na-a. 28Ọtiọye na Jesu da ta, Ọke rẹ ovwan da kpare Ọmọ rẹ ohwo kpenu, etiyin kẹ ovwan riẹn nẹ mẹvwẹ hẹ ọye, nẹ mi vwẹ ogangan robọ mẹ ru emu ọvuọvo-o ẹkẹvuọvo me ta enẹ kirobo rẹ Ọsẹ na yono uvwe. 29Ọ ro ji vwe rhe na vẹ ovwẹ herọ; o che jẹ uvwe ọvo vwo-o, kidie mi ru obo ri je kọke kọke. 30Rọ vwọ ta ọnana nu, ihwo buebu de segbuyota.
Uyota na Ru Ovwan vwọ dia Ọmuvwiẹ
31Jesu da ta kẹ otu ri Ju ri sere gbuyota, Wo de phi obọ phihọ ota mẹ vwẹ ọ rẹ uyota ovwan ke dia idibo mẹ, 32ovwan ke riẹn uyota na, uyota na ko ru ovwan phihọ ọmuvwiẹ. 33Ayen da kpahe kẹ, avwanre uvwiẹ rẹ Ebraham, avwanre je dia ọviẹn rẹ ohwo dẹvo-o. Komavọ wọ vwọ ta nẹ, Ke ru ovwan ọmuvwiẹ?
34Jesu da kpahe kẹ ayen, Uyota, uyota, me ta kẹ ovwan, kohwo kohwo ro ru umwemwu ọye hẹ ọviẹn rẹ umwemwu. 35Ọviẹn na sa dia uwevwi na bẹdẹ-ẹ; ọmọ na dia bẹdẹ. 36Ọtiọye na ọ da dianẹ Ọmọ na ru uwe phihọ ọmuvwiẹ, ku wọ dia ọmwuvwiẹ rẹ uyota. 37Me riẹnre nẹ ovwan hẹ uvwiẹ rẹ Ebraham; yẹ ovwan guọnọ ovwẹ hwe, fikiridie ota mẹ mrẹ asan dia vwẹ evun rẹ ovwa-an. 38Me ta ota rẹ obo re me mrẹre vwẹ obọ rẹ Ọsẹ mẹ, yẹ ovwan ruẹ obo ru we nyo mie ọsẹ rẹ ovwan.
Ọsẹ rẹ Ovwan hẹ Idẹbono
39Ayen da kpahe kẹ, Ebraham hẹ ọsẹ rẹ avwanre. Jesu da ta kẹ ayen, Ovwan da dia emọ rẹ Ebraham, ku we ru obo rẹ Ebraham ruru, 40ẹkẹvuọvo asakiephana ovwan guọnọ ovwẹ hwe, ohwo rọ ta uyota ro nyo miẹ Ọghẹnẹ rhe; Ebraham ru ọtiọna-a. 41We ruẹ obo rẹ ọsẹ rẹ ovwan ruru. Ayen da ta kẹ, A vwẹ igberadja vwiẹ avwanre-e; avwanre vwo Ọsẹ ọvo, ọye Ọghẹnẹ. 42Jesu da ta kẹ ayen, Ọ da dianẹ Ọghẹnẹ hẹ Ọsẹ rẹ ovwan, kẹ ovwan a guọnọ ovwẹ, kidie obọ rẹ Ọghẹnẹ na mi nurhe; me vwẹ ọhorobọ mẹ rhe-e, ẹkẹvuọvo ọye ji vwe rhe. 43Kidie obo mẹ tare vwo jẹ ovwan ẹruọ? Fikiridie ovwan guọnọ ota mẹ nyo-o. 44Ovwan ọ rẹ ọsẹ rẹ ovwan idẹbono, ẹguọnọ rẹ ọsẹ rẹ ovwan ọye we ruẹ na. Ozighẹ o ruẹ nẹ otọrhe, kaka uyota rhere-e, fikiridie uyota na hẹ evun rọye-e. Ọke rọ da vwọnrọn ofian, ọ ta ota kirobo rẹ uruemu robọ rọye epha, kidie ọ vwọnrọn ofian o ruẹ ọye hẹ ọsẹ rẹ ofian. 45Ẹkẹvuọvo, fikiridie me ta uyota na, ovwan gbi se vwe gbuyota-a. 46Ono vwẹ usun rẹ ovwan na ri kere umwemwu ba vwẹ obọ? Ọ da dianẹ me ta uyota na, kidie ovwan gbi se vwe gbuyota-a? 47Ọ rọ dia ọ rẹ Ọghẹnẹ nyo eta rẹ Ọghẹnẹ; otọ rẹ obo rẹ ovwan gbi nyo aye-en na kọye sorọ rẹ ovwan vwo jẹ ọ rẹ Ọghẹnẹ ẹ dia.
Tavwe rẹ Ebraham ke rhe dia, je mẹ Herọ re
48Ihwo ri Ju da kpahe kẹ, Avwanre rha ta uyota rẹ avwanre vwọ tanẹ wẹ ohwo ri Sameria nẹ wo vwo idẹbono? 49Jesu da kpahe, Mi vwo idẹbono-o; ẹkẹvuọvo mi mu ọghọ kẹ Ọsẹ mẹ, yẹ ovwan mu ọghọ kẹ vwẹ-ẹ. 50Ye me guọnọ urinrin rẹ oma mẹ-ẹ; Ọvo herọ rọ guọnerọ, ọye re cha dia oguẹdjọ. 51Uyota, uyota, me ta kẹ ovwan, ohwo da sẹro rẹ eta mẹ, ọ gbe cha mrẹ ughwu bẹdẹ-ẹ. 52Ihwo ri Ju da ta kẹ, Asakiephana avwanre riẹnre nẹ wo vwo idẹbono. Ebraham ghwuru, ọtiọye je hẹ emraro na; yu wọ ta nẹ, Ohwo da sẹro rẹ eta mẹ, ọ gbe davwe ughwu bẹdẹ-ẹ 53Wọ rhonọ ọsẹ rẹ avwanre Ebraham, ro ghwuru? kugbe emraro na ri ji ghwu! Ono wọ vwẹ oma wẹn dje vwo? 54Jesu da kpahe, Me da vwẹ urinrin kẹ oma mẹ, yẹ urinrin mẹ kẹ odiodi; Ọsẹ mẹ re vwẹ urinrin kẹ ovwẹ, kọye ovwan tanẹ ọye hẹ Ọghẹnẹ rẹ ovwan na. 55Ẹkẹvuọvo ovwan je riẹ-ẹn; Me riẹnrẹ. Me da ta nẹ, Me riẹnrẹ-ẹ, mẹvwẹ kẹ ọvwọnrọn ofian kerẹ ovwan; ẹkẹvuọvo me riẹnrẹ me sẹro rẹ ota rọye. 56Ọsẹ rẹ ovwan Ebraham ghọghọre nẹ ọye mrẹ ẹdẹ mẹ; ọ mrẹrẹ ọ da ghọghọ. 57Ihwo ri Ju da ta kẹ, Wo ji te ikpe ujuvẹ gbẹ ihwe-e, kọye wọ da mrẹ Ebraham? 58Jesu da ta kẹ ayen, Uyota, uyota, me ta kẹ owẹ, Tavwe rẹ Ebraham ke herọ, ye me herọ nure. 59Ọtiọye ayen de tọrọ elalọ nẹ ayen vwo phio; ẹkẹvuọvo Jesu de sioma nu, ọ da yan nẹ uwevwi rẹ ẹga na.
S'ha seleccionat:
Jọn 8: UBV77
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bible in Urhobo © United Bible Societies, 1977.