Duk 18
18
Ñke ebekpa ye abiireikpe
1Ndin Yisọs atop ñke ami anọ mbed amọ adiwọt ammọ ufọn awo adibọñ akam afịd ini, iduọọhọ idodanyen tutu abọ se anye ayem. 2Anye akebo ammọ: “Ke abio keed, abiireikpe keed amaaba a-mmiikibaaha Abasi inyʌññọ iteeñe awo ndomokeed anyen. 3Ke abio ado, ebekpa keed amaaba ñko a-akesidieeghe abịne anye ye ebeeñe keed ate, ‘Kpe unen ikpe nnọ miin ye asua mmi.’
4 “Abọọñ ami ikikamma isọp ñkpe ikpe ami; ado akekpeene koo anye atọọñọ ibo ke esịd amọ ate, ‘Akpesʌk ado ami mmenteeñeke Abasi anyen, inyʌññọ iba awo ake ami mbaak, 5ado sia awonwaan ami amfịna miin abọhọ, ñyaakịt mbo ke anye anie unen amọ, mbaak anye adikappa amʌm miin anwan.’ ”
6Ndin Abọọñ Yisọs ate, “Kop se akpe ukwañ ikpe ami aketañ do. 7Nte Abasi idiikpeeghe unen ikpe inọ mme andimek ikọd amọ e-eseemeke ekood anye uweeme ye akoneyo? Me anye ayaasʌk itre ukpe unen nnọ ammọ? 8Ami ntañ inọ ndufo, anye ayaakịt ke ebọ ibọọrọ unen ammọ usọp-usọp. Ñkpọ keed ado, me ini se Ayịn Awo adidi, ayaadikịt mme awo ye mbuọdidem ke iso isọñ?”
Ñke awo Farisi ye abọ taksi
9Yisọs ndin atop ñke ami anọ mbon e-ekeebatta ke mmimọ imifọn ikan mbon mfen, ekappa esịn mbon mfen ke ndek. 10“Ideen iba ekeka ke tembịd adibọñ akam, keed awo Farisi, anye ako abọ taksi. 11Awo Farisi amaada ke idem amọ abọñ akam: ‘Abasi mmukọọm fiin sia ami membaaha naña mbon mfen ebañña: mme inọ, mme anañña ndiọi, mme asịn efịbe, me nte abọ taksi ami. 12Ami nse ntre udia akañ iba ke udua keed, ñnyʌñ ñkpe ayọhọ ubaak keed ke itie duob ke afịd se ami nnie nnọ Abasi.’
13 “Abọ taksi ado amaasanna ada anyanusʌñ, idịppeke anyen ukpọk ise anyọñ, abenne ubọk atuak ke esịd amọ aseeme ate, ‘Abasi ntua miin anam idiọọkñkpọ mbọm.’
14 “Ami ntañ inọ ndufo, abọ taksi ami amaanyọñ ufọk amọ, anie utoppo ikpe ke iso Abasi. Sia awo ake adodo a-adịppeke idem, eyaesuuhọ anye, ado eyaebenne awo a-asuuhọke idem.”
Ntəkayịn ye Yisọs
15Mme awo emaekoono ntəkayịn edi ete Yisọs atuuk ammọ. Ado mbed amọ ekekịt ami, esua enọ ammọ. 16Ado Yisọs amaakood ntəkayịn ado adat, anyʌñ abo, “Iyak ntəkayịn eñkeene miin, ikiikpan ammọ, sia abio ubọọñ Abasi anie utọ mbon ami. 17Ke akpanikọ ke ntañ inọ ndufo, awo ake adodo a-mmiidiidatta abio ubọọñ Abasi ye utọ mbuọdidem ntəkayịn ami, idiikanna idʌk do.”
Imọ awo ye abio ubọọñ Abasi
18Abọọñ keed amaabịp Yisọs ate, “Eti andikpeeb, nso-o ke ami ndinam nọ nnie uwem nsi-nsi?”
19Yisọs ate anye, “Nsinam afo añkood miin eti? Ibaaha awo adooho eti ke mmiibọhọke Abasi. 20Afo amediọọñọ mme ibed: ‘Kuusịn efịbe, kuwot awo, kuuyịp inọ, kuutie ntiense nsu, kuutʌk awo. Kpono usọ ye uka.’ ”
21Anye abọọrọ Yisọs ate, “Ami mmenịm afịd ibed ami tọọñọ ke uyịn mmi.”
22Yisọs akekop ibọọrọ ami, adọkkọ anye ate, “Afo amenana ñkpọ keed. Kaa ke nyam afịd se afo anie, kpọñ akʌk ado nọ nditọ uwueene, ndin afo ayaanie inie ke abio Abasi. Ndin di diñkeene miin.”
23Awo ami akekop ikọ ami, esịd abʌññọ anye, sia anye akedo ata awo inie. 24Yisọs abenne iso ase anye, ate, “Ado ataa akpọsọñ ñkpọ awo inie adidʌk abio ubọọñ Abasi! 25Ado mmem-mmem enañ adiboiyo ke adu abiaween akan awo inie adidʌk abio ubọọñ Abasi.”
26Mbon se ikikop ikọ ami emaebịp Yisọs ete, “Anie ndin ikeme adinie adinyaaña?”
27Anye amaabọọrọ ammọ, “Ñkpọ se isọñ ke ubọkawo ado mmem-mmem ke ubọk Abasi.”
28Bita ate anye, “Ñnyịn imikpọñ afịd se ñnyịn ikinie ukeene fiin.”
29Anye ate ammọ, “Ke akpanikọ ke idọkkọ ndufo, ibaaha ndomo awo keed akpọññọ ufọk amọ, me anwaan, me nditọeka, me ete ye eka, me nditọ, ke ntak abio ubọọñ Abasi, 30a-adiitre adibọ se iwak ikan ado ke emana ami, ndin ke emana mfen nsi-nsi uwem.”
Yisọs atañ abaña ñkpa amọ ayọhọ ñke nta
31Yisọs ndin akood ibed amọ duob ye iba asịkke ada, adọkkọ ammọ ate, “Ñnyịn iyaika abio Yerusedem, ndin afịd se mme Brọfed ekewet ebaña Ayịn Awo ayaatịppe anọ anye. 32Eyaeyaak anye esịn ke ubọk mme Yentaid. Ammọ eyaesuenne anye, esaha, enyʌñ etọọñ anye etab; 33eyaemia anye enyʌñ ewot anye. Ndin ke ayọhọ usen ita, anye ayaaset ke ñkpa.”
34Mme ikọ ami ikinwañake mbed amọ, ammọ ikinyʌññọ idiọọñọ se anye aketañ abaña; akeba ammọ usem-usem.
Yisọs anam abeeñe-ebeeñe nnan akịt usʌñ
35Yisọs akesaña akpere Yeriko, anye amaakịt nnan keed naña atie ke mben usʌñ abeeñe mme awo ñkpọ. 36Nnan ami akekop uyom ato mme atu awo naña efịt ediboiyo, anye abịp se ido. 37Ammọ ete anye, “Yisọs ake Nasared asʌk asaña aboiyo.”
38Anye abọọñ akood ate, “Yisọs Ayịn Defid, ntua miin mbọm.”
39Mbon se ikida ke iso ado eduad anye ete akʌp inua, ado anye adiọdiọñ abọọñ, “Ayịn Defid, ntua miin mbọm.”
40Yisọs amaatuak ada, ate eben anye isọk. Emaekeben anye idikpere, Yisọs amaabịp anye, 41“Nso-o ke ayem nnam unọ fiin?”
Anye amaabọọrọ ate, “Abọọñ, ñyem adimọọnọ usʌñ.”
42Yisọs ate anye, “Mọọnọ usʌñ; mbuọdidem mfo unyaaña fiin.” 43Ukem-ukem idahado anye amaamọọnọ ñkpọ, adakka akeene anye; asaña atooro Abasi. Atu awo ado ñko e-ekekịtte ñkpọ ami emaekeene etooro Abasi.
S'ha seleccionat:
Duk 18: NAAM
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.