Gha ta Wəshi 16
16
Ya ta Ismayɛl
1Ma Saray, male ta Abram ne, keyake wəzege nde we. Ama kwatera nya kawəzha ta ka Ɛzhipte ya ve, Agar sləa nta. 2Ma ke Saray sha Abram: «Newema nahe Mahwətə kefɛake ɗa kedzawa hwə. Ɓelahe le kwatera ta ɗa nda kwete kaŋ'wete wəzege 'ya laka ghenta.» Pa Abram yɛte ghena nya gezete Saray. 3Va meŋe kwa sebe ta nya dzete hɛɗia Kanan Abram ne, pa Saray kelete kwatera ta nta Agar, wəzha ta ka Ɛzhipte ba'a ndeke nda kamale ke za nta Abram. 4Ntake Abram kaɓelahe le Agar, njehe nde le hwə. Ma kwa nakɛ nde le hwə nde ne, ntake nde kaɓelama ntsə ta male nya kesleke ŋkɛ. 5Ma ke Saray sha Abram ɓiyitsa: «Gha nde vate deghale te 'ya. 'Ya nde ndeke ŋa kwatera ta ɗa kamale, ama ghala dzawa hwə nde ne, kaɓela ntsə ta ɗa nde we. Nza Mahwətə kande negha fete kwelɛ gha le 'ya!» 6Ma ke Abram shɛ: «Kwatera ta ŋa nde, mbe dzeve ta ŋa nde. Menete wəsə nya ɗe na le ghenta.»
Ntake Saray kasa nda yaka ke Agar, pa nde hwɛ nda. 7Pa nde ghwene ta Mahwətə sləyi ŋkɛ terasle yitea kwete ɗasle te ɓerama, kwa hweŋkwa ta Shəwr. 8Ma ke 'yɛwete ve: «Agar, kwatera ta Saray, tema se na? Kadzema dzema na wa?» Ma ke zhɛnete nda: «'Ya kahwɛ ɗa va male nya kesleke ɗa.» 9Ma ke nde ghwene ta Mahwətə shɛ: «Zhɛneghe geva kalə sha male nya kesleke ŋa shɛ na fate nda ghena.» 10Ma ke nde ghwene ta Mahwətə shɛ: «Kateve ŋa hwelefefi Mahwətə kwele kwele kapeslema mbeli kaɓelate hɛ.» 11Ma ke nde ghwene ta Mahwətə shɛ: «Wa nya na le hwə, kateya wəzege teza na. Kateheka nda slə na kaIsmayɛl, kwa nza ŋkɛ nahe Mahwətə kefate nehwene ta ŋa. 12Kala kwara gamba tenza wəzege ta ŋa shɛ. Katempa ŋkɛ le pɛtɛa mbeli, katempa pɛtɛa mbeli le. Kwetɛŋenyɛ tenza ŋkɛ, cakeɗake le ka kesaka yitenyɛ.»
13Ma ke Agar mbe ghəa nta: «Kaganda nakɛ Wəndə nya kenewe ɗa nya 'ya tse na?» Ma ke hekate nda slə ke Mahwətə nya kegezete nda ghena: «Gha ya kaShala nya kenewe ɗa.» 14Vatse hekate nda slə mbeli ke ghwa shɛ kaghwa ta Lahay-Roy, geze ta ŋkɛ, “Ghwa ta Nde nza le mpi nya kenewe ɗa.” Kwelɛ yɛ Kadɛs le Bɛrɛd ghwa shɛ. 15Pa Agar yake wəzege teza nya hekate nda slə yitenyɛ Abram kaIsmayɛl. 16Va ta Abram deghesemsə ŋkwaŋeghəmbe nda yake nda Ismayɛl Agar.
S'ha seleccionat:
Gha ta Wəshi 16: BEKDC12
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
La Bible en langue Kapsiki avec les livres deutérocanoniques © Alliance Biblique du Cameroun 2012.