Amatiyu 13
13
Egŋe ba arekyeŋ la a ta edgo agbi
1Onda he lo nga, Eyesu a zgi odne he lo nga a gre akaŋ atam, a dzu ahe lo nga a nye moare. 2Moare nzenze a ta ŋa a kpaŋ. Moa a wo nzenze a gre eshri, okyku eka he, Eyesu a kso nga a gre a yi a gre amgblami, moare a ra a tspi oshyi. 3Aŋa a nye moare ayakplo nzenze la egŋe nzenze.
A lu mi le, Arekyeŋ a wo ma, a gre okyku o yi o ta edgo agbi baŋ. 4Omba baŋ a ta edgo lo nga, eyiebze e gro e gbu akaŋ ozhẽ, nga awunu a ba a ri lo. 5Eyiebze e gro e gbu awro ezhim ba obiŋ o wo ma nzenze mbo. Okyku eka he nga, eyi lo e zgi shoshoŋ okyku eshi obiŋ o shpi ma mbo. 6Omba ba olum o tra nga, eyi la e zgi lo e kpu, okyku ba e ta emgbʼbo e gre obiŋ ogyugyuŋ mbo, nga obiŋ o bmye ovo. 7Eyiebze nga e gro e gbu okũ asĩ afpu, asĩ afpu a hlu nga a kha eyi la e zgi lo, okyku eka he e hlu e kpo ashri mbo. 8Ambo eyiebze la e gro e gbu obiŋ odzi, alo e hlu nga, e kpo ashri adzadzi. Ashriabze a kpo eyi endgaekyeŋ, abze a kpo eyi ekʼpoefĩ abze nga a kpo eyi ekʼpoetra. 9Eyesu a sa a lu mi le, Agimi e ngli atuŋ e gno o wo bimi e wo la atuŋ ba o gno odlo ma!
Ekplo la e da Eyesu a nye la egŋe
10Ambla he nga, moanwyeotum a ba okro Eyesu a zhĩ ŋa a lu mi le, Okyku eshi aŋo o la o kpo otum la egŋe omba boŋ o nye moare? 11Eyesu a tno mo ma a lu mi le, Ahogbrẽ a sheŋ a hwile gimi eshyẽ ba Oreŋ Ongyeŋ, ambo a hwile mo alo o ko mbo. 12Agimi e ka, are la a wo emakyeŋ ma le, moa á shri á ta ŋa ma okyku o daŋ a wo la alo ma nzenze, ambo are la a wo la emakyeŋ ma mbo le, ofi baŋ a wo la alo ma a mbo, moa á ngʼga lo á sku ŋa. 13Ame e lu odlo la egŋe pa la mo okyku eka he angyiŋ. Okyku eshi moa a la a ka, ambo moa a ka a bmye mbo. Nga moa a la a ngli atuŋ a gno ambo moa a gno a bmye mbo. 14Okyku eka he nga, okaolu ba Eshaya a lu o bli eshri mo. Aŋa a lu mi le, Agimi é ngli atuŋ é gno, nga é ngli atuŋ é gno, ambo agimi é gno é bmye mbo.
Agimi é ka, nga é ka, ambo agimi é ka é bmye mbo.
15Alo o wo eka he okyku ba esõ mo e sheŋ e zhĩ.
Moa a sheŋ a tsom atuŋ mo,
Nga a bʼbu ayi mo,
O mbo e mbi, moa a ka a gbu,
Nga a gno a gbu.
Nga a sa a ka a bmye,
Nga moa á ba a zhiŋ á ba okro me Ahogbrẽ,
Ame nga é ba e shaŋ mo.
16Eyesu a lu mi le, Agimi e raŋ eshri e gre eshri! Okyku eshi agimi e la e ka la ayi bimi, nga e gno la atuŋ bimi. 17Agimi e ka! Moare nzenze ba Ahogbrẽ a hom mo otum, pa la moarehwĩ ba Ahogbrẽ nzenze, moa a klo o ka edgu aya-kplo bimi e la e ka, nga o gno edgu odlo bimi e la e gno, ambo moa a hwiŋ ozhẽ mbo.
Eyesu a wre egŋe ba are la a ta eyi
18Eyesu a nyuŋ mo a lu mi le, Agimi a ngli atuŋ e gno eka ba ame é ba e wre egŋe he lo é da gimi, okyku o da gimi e yi ekplo ba alo e nye. 19Moare la a gno oshpa eshri ba Oreŋ Ongyeŋ, nga a ka a bmye mbo, moa a wo eka eyi la e gbu akaŋ ozhẽ nga ba Areabi a ba a tslo eyi ba moa a ta esõ mo. 20Eyi la e gro e gbu awro ezhim, e dzu eka moare la a gno odlo ba Ahogbrẽ, nga moa a yga lo la ovyevye. 21Ambo moa a yga lo la osheshye esõ mo mbo, okyku eka he omba ba ewu e ba eshri lo, nga moa a tla lo a ta. 22Eyi la e gro e gbu okũ asĩ afpu e dzu eka ba moare la a gno oshpa lo ambo moa a da aga ba obiŋ hi, ta la oklo angyiŋ ba obiŋ hi, ta la okayiogro ba anzho obiŋ hi o nyom odlo lo o kpo ashri. 23Eyi la e gro e gbu obiŋ la o wo odzadzi, e dzu eka moare la a gno odlo lo nga a ka lo a bmye, nga a kpo ashri. Ashriabze a kpo eyi endgaekyeŋ, abze a kpo eyi ekʼpoefĩ, nga abze a kpo eyi ekʼpoetra.
Egŋe eshri agbagba#Aso akyeŋ la a zgi aglu-agbi engboŋ.
24Eyesu a sa a ta egŋekyeŋ nganga, a lu mi le, Oreŋ Ongyeŋ o wo eka ba are la a yi a fu edgo edzi agbi baŋ. 25Okyukyku ondakyeŋ, omba ba areyaŋ a mbo a ndze enu, nga, afpu ŋa a shri agbagba a shri a yi a fu agbi aglu-agbi shu, nga a zhiŋ ogbu a gre eŋa. 26Omba ba aglu-agbi a hlu a kpo ashri a mo, moa a ka agbagba a bmye. 27Moanwye-odne are-agbi lo a ba okro baŋ nga a lu mi le, Andakʼpo, aŋo o fu eyi aglu-agbi edzi angyiŋ mbo? Ambo, agbagba a zgi ayaŋ a ba a dzum ta la aglu-agbi? 28Aŋa a tno mo ma a lu mi le, O wo eka bimi e lu he lo angyiŋ, afpu gi akyeŋ angyiŋ a shri agbagba a ba a dzum ta la aglu-agbi. Moa a zhĩ ŋa a lu mi le, Aŋo o klo bi e yi e gʼbu lo? 29Aŋa a tno ma a lu mi le, Agimi é gʼbu lo mbo, okyku eshi agimi é sla lo sha é gbu mbo, nga agimi e gʼbu aglu-agbi a mbo. É pu lo ta la agbagba. 30Agimi e dzu lo e zga e da lo a hlu otsotse eka he o tsa ba omba ba alo a bmye. Omba he lo, ame é da moa la a yla a sla agbagba sha a yla ayga, nga a bʼbu lo ababgo nga á shri á ygi ovo, nga moa á yla aglu-agbi á shri á ygi anjygu me.
Egŋe eshri eyi ba amastad
31Eyesu a sa a ta egŋekyeŋ a da mo a lu mi le, Oreŋ Ongyeŋ o wo eka ba eyi amastad angyiŋ. E wo etsitsi e gre eyi ehwõ pyeŋ. 32Are a sko lo nga a fu lo, ambla ba alo e zgi e khwo nga e hlu, e zhiŋ e dzu esĩ aki, nga awunu nzenze a ba a ta eygu ma.
Egŋe eshri ba eyist#Eyist he lo e wo eyi amakyeŋ ba moa a la a kŋe a bga otsotse pa la ebrodi okyku o da lo e nyom.
33Eyesu a ta egŋekyeŋ a lu mi le, Oreŋ Ongyeŋ o wo eka eyist angyiŋ. Ashekyeŋ a sko lo nga a kŋe lo a bga ta la angwongwo ekõ atra moa a kpo agbrotsa. Nga ekõ lo e kŋe e bga mvye nga e nyom nzenze.
Eyesu a kpo otum ta la egŋe
34Eyesu a nye moare la egŋe, nga a kpo otum ta la egŋe sha omba baŋ a nye mo. 35Aŋa a kpo eka he okyku o da ekplo ba arehwĩ ba Ahogbrẽ a hom otum a lu e bli. A lu mi le,
Ame é kpo otum ta la egŋe omba ba ame é ba e lu odlo pa la mo.
Ame é lu ekployaŋ a mbo ba moa a yi lo ondakyeŋ mbo é da mo.
Eyesu a wre egŋe ba agbagba
36Ambla he nga Eyesu a dzu eshki a zga nga a gre odne eshyẽ. Moanwyeotum baŋ a ba okro baŋ nga a lu mi le, Aŋo o wre egŋe boŋ o ta eshri agbagba o da gi e gno. 37Eyesu a tno mo ma a lu mi le, Are la a fu aglu-agbi edzi, a wo Anwye Arehwĩ angyiŋ. 38Agbi nga a dzu eka ba obiŋ hi. Eyi edzi nga e dzu eka moare la a wo a ba Oreŋ Ongyeŋ. Eyi ebi nga e dzu eka moare la a wo a ba Eshitaŋ. 39Afpu la a ba a fu eyi lo, aŋa a wo Areabi ababgo baŋ. Oyoyla nga o dzu eka onda ba obiŋ hi ó khwo. Moa la a yla algo lo nga, moa angyiŋ a wo moanwyeadga ba Ahogbrẽ. 40Eka ba moa a sla agbagba a bʼbu ababgo a shri a ygi ovo, ekakahelo moa á ba a kpo onda ba obiŋ hi ó ba o khwo. 41Anwye Arehwĩ á kpo nga á hom moanwyeadga baŋ otum á da mo a sla moa la a da moare a kpo odlobi, pa la pyeŋ moa la a kpo odlobi la a wo Oreŋ baŋ. 42Á kpo nga á shri mo á ygi embili ovo la e bmye ovo nzenze. Ahe lo, moa á wu okũ nga á taŋ azhga anyu. 43Omba he lo moarehwĩ ba Ahogbrẽ, moa á shka ayi leleŋ eka olum Oreŋ Ongyeŋ ba Adigi. Agimi e ngli atuŋ e gno o wo ba agimi e wo la atuŋ ma!
Egŋe eshri angyiŋ la a ghre
44Oreŋ Ongyeŋ o wo eka ba angyiŋ la a ghre agbi. Are-kyeŋ a hwiŋ lo, ambo a bla alo a ghre ma, okyku baŋ a gno oraŋ a gre eshri. Okyku eka he aŋa a gre a yi a sko ekployaŋ a mbo baŋ a wo la alo ma a gbmo a khwo nga, a gre a yi a gbmo agbi lo.
Egŋe eshri epal#Edgu ezhim etsitsi la e wo rerereŋ ba moa a hwiŋ alo egʼba edgu ebyikyeŋ la e dzu okũ anyuŋ ondzu. Alo e shka ayi.
45Oreŋ Ongyeŋ o sa o wo eka ba are la a shri anzho a gbmo a klo epal la e wo edzadzi. 46Ombayaŋ a mbo baŋ a hwiŋ epal la e wo edzi nzenze le, aŋa á yi á shri anzho baŋ pyeŋ á shri á gbmo nga á ba a gbmo lo.
Egŋe eshri ekyeŋ
47Oreŋ Ongyeŋ o sa o wo eka ekyeŋ ba moa a ngla lo a shri a ta ami atam, nga e vu edgu atsa andandandim. 48Ambla ba ekyeŋ lo e bli nga, moare la a vu atsa, a kom lo a dra a ba oshyi, nga moa a sla atsa adzi a shri a ygi afre mo, nga moa a ra atsa abi a shri a ygi a bi. 49Moa á kpo eka he angyiŋ onda ba obiŋ hi ó ba o khwo. Moanwyeadga ba Ahogbrẽ, moa á gʼba moareabi, pa la moareadzi eka he lo angyiŋ. 50Nga moa á shri moareabi á ygi embili ovo la e bmye ovo e gre eshri, nga moa á wu okũ á taŋ azhga anyu.
Angyiŋ ahe ta la angyiŋ agbyi
51Eyesu a zhĩ mo a lu mi le, Agimi e ka ayakplo he lo e bmye ma? Moa a bmi ba moa a ka lo a bmye. 52Eyesu a tno mo ma a lu mi le, O wo ba alo o wo eka he angyiŋ le, areyaŋ a mbo la a nye odaŋ, la a dzu anwyeotum ba Oreŋ ba Ongyeŋ, a dzu eka adaŋ-odne la a se anzho agbyi, ta la anzho ahe a sku osoto.
Moa a tla Eyesu osku ba Anazarata
53Ambla ba Eyesu a lu odlo la egŋe eka he a khwo nga, a kso okro he lo. 54Aŋa a zgi ahe lo a gre osku ba Anazarata. A nye moare anwyeakulu mo, moare la a wo ma nga, moa a ka egbregbre eka baŋ a la a nye moare. Okyku eka he nga moa a zhĩ a lu mi le, Aŋa a hwiŋ edgu onyenye he ayaŋ eka he? Ayakplo egbregbre baŋ a la a kpo nga, a kpo anyu a kpo? 55Aŋa angyiŋ a wo anwyealom la a tsẽ amgbla mbo? Emeri angyiŋ a wo anaŋ mbo? Nga Eyakubu, ta la Oyusufu, ta la Esima, ta la Eyahuda, moahi lo angyiŋ a wo moanáŋ mbo? 56Nga moanáŋ-alashle mvye, moa a wo ahe ka la gi mbo? Aŋa a hwiŋ edgu ayakplo he ayaŋ? 57Okyku eka he moa a tla ŋa. Eyesu nga a nyuŋ mo a lu mi le, Moa a la a ka are ba Ahogbrẽ a hom otum la olbi ayaŋ a mbo, o wo le osku baŋ dne moa a ka ŋa la olbi mbo. Moa ba ogu baŋ a mbo moa a ka ŋa la olbi mbo. 58Eyesu a kpo ayakplo ba egbregbre ahe nzenze mbo, okyku eshi moare a bmi ba adlidzi mbo.
S'ha seleccionat:
Amatiyu 13: EGONT74
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Eggon New Testament © United Bible Societies, 1974. Bible Society of Nigeria