Yoane 11
11
Yesu watutula Lazalo
1Nga untu umwi wali unwale, Lasalo wa ku Betania, uwa mu-nsi wi Malia nu nnina, Malita. 2Ali Malia wino wapakile uMwene amafuta, ampyila ni nyele uku mulu yaakwe, wino Lazalo kalume waakwe wali unwale. 3Nga asiche yaakwe yatuma kunali, yaati: “Mwene, unkundikwa wako unwale.”
4Nga Yesu pano wapulika, avwanga ukuti: “Ulwale u asi wa lufu, leelo uku utensyo wi Leesa, ukuti uMwana wi Leesa atensiwe kuliwo.”
5Na Yesu walile wakunda Malita nunsiche na Lazalo. 6Nga pano wapulika fino unwale, awikala manda yaili kuo kwene kuno watesi. 7Nga ichisila wanena alondeshi yaakwe, waati: “Tuyini uku Yudea kaili.” 8Alondeshi yao yannena, yaati: “Labi, wanda unji li kwene li, aYudea yakasi yakutame na mafinga; newe ukuno ulusita uye kaili?” 9Yesu wayanena, waati: “Chene! insaa sha nsanya sisi ikumi na siili? Untu ngi alupita unsanya atangi akumike, kuno alulola umwengelela wa nsi i. 10Leelo ndi ntu alupita usiku akukumika, kuno umwengelela usimo munali.” 11Wavwansile ifintu fi, na kaili ichisila wayanena, waati: “Katitu Lazalo awisi, leelo napita kuti nkannansye.” 12Chaleka alondeshi yannena, yaati; “Mwene, nga wisi wampola.” 13Leelo Yesu walandanga ulufu lwakwe; nayo yatangi alulanda ukulala utulo. 14Chaleka Yesu wayanena apatiswe, waati; “Lazalo watafwa, 15Nene nduchimba kuli mwemwe kuno nemwi nsi kweneko, ukuti. muzumile; leelo tuini kunali.” 16Nga Toma wino yatangi; “Ipasa.” wanena alondeshi yanina, waati; “Tuini neswe kwene ukuti tufwe ponga nawe.”
17Walangi pano Yesu wafika, wasana walinda umwilindi amanda yani. 18Nunsi wa Betania wali apipi ni Yelusalemu, ndi kuti kilometa sitatu. 19Na antu tupu aYudea yalile isa kwi Malita na Malia ukuyalema amakasa kuli kalume wao.
20Walangi Malita pano wapulika fino Yesu alwisa, waya ukuyunkomanya, leelo Malia watesi un-ng'anda. 21Apano Malita wanena Yesu, waati: “Mwene. ngi walipo pa ngali kalume wane atafwile. 22Leelo na li kwene manile fino choshi chino walomba Leesa, akukupa.” 23Yesu wannena, waati: “Kalume wako wantutuluka.” 24Malita wannena, waati: “Manile fino alututiduka apa wanda wa chisila.” 25Yesu wannena, waati: “Nene ndi ututuluko nupuma; wino wansumila nene nanti wafwa, aluwa umpuma. 26Na wensi umpuma wino ansumile, atalufwa nantu uche manda yoshi. Ali wazumila yao?” 27Wannena, waati: “Endita Mwene, nche nasumila fino wewe uli Klisto, Mwana wi Leesa, wino alwisa kuno ukunsi.”
28Nga pano wafwanga fiyo, apita, awita Malia unnina ukumbali, ati: “Kasambilisha atisa, alukwita.” 29Nawe pano wapulika, akatuka suwa ukuya kunali. 30Na Yesu walile achili awingile um-nsi, angachili, ali pano Malita wamkomenginye. 31Nga aYudea yano yali ponga na Malia un-ng'anda, yano yayile ukuyunnema makasa, pano yalola wakatuka suwa nu kufuma, yanndondela, yatangi palumwi waya ukwilindi akalilange.
32Nga pano Malia wafika pano Yesu ali, pano wannola, Wapona pa mulu yaakwe, wannena, waati: “Mwene, ngangi walipo pa ngali kalume wane atafwile.”
33Nga pano Yesu walola alulila, na aYudea yano yalondekine nawe yalulila, alola ichikonko um-mweso nu kusisinkila. 34Afwanga ukuti: “Mwamwika kwi?” Yannena, yaati: “Mwene, nguna ukalole.” 35Yesu walila misosi. 36Chaleka aYudea yaati: “Lolini, fino wankunda.” 37Leelo yamwi pali yeneyo yaati: “Chene! wi wino wayusile umpofu amanso, atalachite nawi atachifwa?”
38Chaleka Yesu wawa ni chikonko kaili um-mweso wakwe, nga waya ukwilindi Nalyo lyali ichele nifinga lyali penepo. 39Yesu waati: “Tisini finga.” Malita, unsiche waakwe wino wafwile, wannena, waati: “Mwene, alununka, kuno walali chala amanda yani.” 40Yesu wannena, waati: “Ntali nkunenile fino ndi wasumila wannola ukulu wi Leesa?” 41Nga yaatisha ifinga liyo. Yesu akatusha amaso yaakwe, alolekesha umwiyulu, afwanga ukuti: “Tata, nakusamalisha kuno wampulika. 42Nene manyile fino akulumpulika manda yoshi. Leelo uku nnandu wiumba li lino lili pa, ichino nafwanga fiyo, ukuti yasumile fino wewe uli wino wantumile.” 43Nga pano wafwanga fiyo, awita ukwiswi ikulu, ati: “Lazalo, fuma ukushi!” 44Afumila ukushi wino wafwile unfunde amulu na makasa imyenda ya mwilindi; nu ku maso unfunde ichitambala. Nga Yesu wayanena, waati: “Msapulini, lekini apite.”
Ayikolo yamba kumumola Yesu
(Mt 26:1-5; Mk 14:1-2; Lk 22:1-2)
45Ichaleka aYudea ainji, yano yisile kuli Malia pano yalola chino wachita, yasumila. 46Leelo yamwi yaya uku aFaliseo, yayanena ifintu fino Yesu wachita. 47Apano ayikolo iyakapela na aFaliseo yakonganya itengo, yaati: “Twanchita uli? Kuno untu wi aluchita ivipezha-mano tupu. 48Ndi twamta fi kwene, antu yoshi yakumsumila na aLoma yamwisa yatutisishe uwikalo witu, na antu yitu.” 49Untu wenga pali yeneyo, wino yatangi Kayafa, wino wali Kapela-nkulu mwaka ulye, wayanena, waati: “Umwemwe mutamanyile chimwi. 50Mutalwelengula nanti ukwelengula fino chilingine untu wenga afwe uku nnandu wa yantu, kuti antu yoshi yatafwilikanya.” 51Ni iswi liyo atali fwangile apa lwakwe, leelo kuno wali Kapela-nkulu mwaka ulye, walausha fino Yesu alufwa uku nnandu wa antu yao. 52Leelo asi ku antu yao sile, leelo ponga na yao akonganike ana yi Leesa yano yasambala, kuti yawe ali yonga.
53Nga ukufuma uwanda ulye yamba apali ponga fyakuti yamumole. 54Chaleka Yesu atapitananga kaili apatiswe um-aYudea, leelo atina kweneko, aya pamwi apipi nu lusanga, umunsi uno yatangi Eflaimu, ukuno; awikala ponga na alondeshi yaakwe.
55Ni Pasaka ya aYudea yalile itipalamila na inji yafuma um-vyalo yapita ukuya uku Yelusalemu, yakolelela iPasaka ukuti yauswefye. 56Chaleka yasita Yesu, nga yafwashana, angi yimilile un-ng'anda-nkulu-iyi-Leesa, yaati: “Mwalola uli? Atalwisa uku wanda ukulu uu?” 57Na yikolo iyakapela na aFaliseo yalile yafime ichilangaso, ukuti wensi wino wacha wamanya pano ali, awise ayanena kuti yakanneme.
S'ha seleccionat:
Yoane 11: FNT1988
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
New Testament in Fipa © United Bible Societies, 1988. Bible Society of Tanzania.