Yoane 14
14
Yesu inzila ya kuya kuli Tata
1“Mutachisima um-myeso yino; mwasumila Leesa, nsumilini nene kwene. 2Un-ng'anda yi Tata muli umwakwikala mwavula; ngi kusi nali munena, kuno naya ukuyumuteyanyisisha apa kwikala, 3Nga ngi napita ukuyumuteyanyisisha apa kwikala, nduwela kaili ngise mutwale ukwane, ukuti panondi nene, angi nemwe mulipo. 4Nene kuno njile, insila muimanile.”
5Toma wannena, waati. “Mwene, usweswe tutamanile kuno, wanja, nga tumanyile uli insila?” 6Yesu wannena, waati: “Nene ndi nsila, ni chumi, nu upuma; untu atalwisa kuli Tata, ngi atapitile kuli nene. 7Ngangi mumanile nene, ngangi mumanile na Tata; ukufuma li kwene mummanile na kaili mwannola.”
8Filipo wannena, waati: “Mwene, utulange Tata, kuno chingatusipila.” 9Yesu wannena, waati: “Inene nikala ponga nemwe amanda yoshi ya, newe utammanyile, Filipo? Wino wandola nene, walola Tata; nga wewe watuli ukuti: ‘Utulange Tata?’ 10Utasumile fino nene ndi muli Tata, na Tata ali muli nene? Amaswi ya yano ndumunena nene, ntaluyafwanga apa lwane, leelo Tata wino ali muli nene, aluomba imilimo yaakwe. 11Sumilini fino nene ndi muli Tata na Tata ali muli nene; ngi mutasumile fiyo, sumilini nanti milimo kwene. 12Umwenemo, umwenemo, ndumunena: wino wansumila nene, imilimo yino nduomba nene, nawe kwene wanjiomba, endita, ni mikulu ukuluta yi aluomba, kuno nemwi naya kuli Tata. 13Nemwe ngi mwalomba chimwi ukwizina lyane, ngamupa, ukuti Tata atensiwe umMwana. 14Ngi mwalomba chimwi ukwisina lyane, ngamupa.
Ulanyo wa Mwaswilisi
15“Ngi mwankunda, mwannema ivilangaso vyane. 16Nene ndulomba Tata, nawe alumupa uMwaswilisi unji, kuti awe ponga nemwe manda yoshi, 17Ali Mweso wa Chumi, uno aya mu nsi yatangi yampokelele, kuno yatalunnola nanti ukummanya awe. Leelo mwemwi mummanyile, kuno alwikala nemwe, aluwa muno muli. 18“Ntalumusya ulanda, ndwisa kuno muli. 19Kwasyala manda mache na yakunsi yatalundola kaili; leelo mwemwi mulundola, na kuno ndi nupuma, nemwe kwene muluwa nao. 20Uwanda uo mulumanya fino ndi muli Tata, nemwe muli nene, nene muli mwemwe. 21Wino ali ni filangaso vyane nu kufilema, wiyo uwino wankunda nene, alukundikwa na Tata, nene ndunkunda nu kuuswelula kunali.”
22Yuda (wino asi Iskaliote) wannena, waati: “Mwene, chawa uli fino ulusita ukuuswelula kuli sweswe, leelo asi ku ya munsi?” 23Yesu wannena, waati: “Untu wino wankunda, akulema iswi lyane, na Tata alumkunda, neswe tulwisa kunali nu kwikala munali. 24Untu wino atankunsile, atalemile amaswi yane; niswi lino mulupulika lisi lyane, leelo ilyi Tata wino wantumile.
25“Ala fiyo ifino namunenile pano nchili ntensi ponga nemwe. 26Leelo uMwaswilisi wiyo, uMweso Nswefu, wino Tata aluntuma ukwisina lyane, alumusambilisha fyoshi nu kumwelengusha fyoshi fino namunenile.
27“Namushile uwelesho, uwelesho wane namupa; fino namupa nene asi fino amunsi yakulupa. Mutachisima ummyeso yino nanti ukuwa ni ngofi. 28Mwapulika fino namunenile, ukuti: ‘Napita, kaili ndwisa kuno muli.’ Ngangi mwankunda, ngangi muluchimba kuno naya kuli Tata, kuno Tata unkulu andusile. 29Nga li kwene namunena pano chichili chiloleke, kuti pano chaloleka, musumile. 30Inene ntalufwanga nemwe amaswi tupu kaili, kuno alwisa unndâsi wa nsi i; nawe asi na maka kunondi. 31Leelo akuno ukunsi yamanye fino nakunda Tata, na fino Tata wampa ichilangaso, ifino nduchita. Katukini, tupite.
S'ha seleccionat:
Yoane 14: FNT1988
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
New Testament in Fipa © United Bible Societies, 1988. Bible Society of Tanzania.