Yoane 20
20
Yesu watatutuluka
(Mt 28:1-8; Mk 16:1-8; Lk 24:1-12)
1Nga apa wanda wa ntangulo uwa juma, Malia wa ku Magdala waile ukwilindi usiku-siku, angi kuchili kufisile, alola ifinga itisye apilindi. 2Nga wituka ulwilo waya kuli Simoni Petlo nu ku nnondezi wiwi wino Yesu walile wakunda, wayanena, waati: “Iyaatisya uMwene tunwiindi nga tutamanyile kuno iyamwika.”
3Nga Petlo nu nnondezi unnina yafuma, yalondela inzila ya kwilindi. 4Yachonchomala ulwilo yoshi yaili. Ngu nnondezi wiwi witukisya nkani ukulusya Petlo, wawa uwa ntangulo ukufika ukwilindi. 5Nga winama wasungamila, walola ivitambala ivitiswe vitulikwe; leelo atachili awingile. 6Nga Simoni Petlo awiza angi annondile, wingila umwilindi, walola ivitambala fino vitulikwe. 7Nileso yino yali ukuntwe wakwe, itatulikwe ponga ni vitambala, leelo yatulikwe ukumbali yonga. 8Nga pano unndondeshi wiwi unnina wino walile uwa ntangulo ukufika ukwilindi wingila nawe, walola nu kuzumila. 9Kimo yalile yachili yamanye Ilyandiko lino litile: Aluzyuka. 10Nga alondeshi yao yapita kaili yaya ukumwao.
Yesu na Malia wa ku Magdala
(Mt 28:9-10; Mk 16:9-11)
11Leelo Malia asyala awimilile pipi nilindi apanzi angalulila. Nga pano alulila, winama nu kusungamila umwilindi. 12Walola yamalaika yaili aya myenda imitiswe, yatenzi wenga ukuntwe na wenga uku mulu, apantu pano Yesu wawizi ichala. 13Nayo yannena, yaati: “Mama, ululila chani?” Wayanena, waati: “Kuno iyaatisya umwene wane, nga ntamanyile kuno iyamwika.”
14Nga pano wavwanga fiyo, asenuka uku chisila, alola Yesu awimilile, atamanyile fino iYesu. 15Yesu wannena, waati: “Mama, ululila chani? Ulusita wini?” Nawe watangi kunde ikalima wa chalo, nga wannena, waati: “Nkombe, ngu kumsenda wewe, undange kuno ukumwika, nene nkumtisya,” 16Yesu wannena, waati: “Malia!” Nawe waseleuka, wannena uku chiEblania, waati: “Laboni!” (alikuti: Kasambilizya wane.) 17Yesu wannena, waati: “Utandema, kuno nchili mpite ukuya kuli Tata; leelo pita uku yachane, ukayanene fino: napita ukuya kuli Tata, nawe iSo wino, kuli Leesa wane, nawe iLeesa wino.” 18Nga Malia Mandalena ampita, aya anena alondeshi ukuti: “Nalola uMwene, nawe wanena amaswi yao.”
Yesu waloleka uku mitume
(Mt 28:16-20; Mk 16:14-18; Lk 24:36-49)
19Pano yawa amanguzi uwanda wuwo kwene uwa ntangulo ya juma, pano alondeshi yali, yalile iyayala imilyango yopanga aYudea, Yesu aya awimilila apakasi, ayanena, ati: “Uwelezyo uwe nemwe.” 20Nga pano wavwanga fiyo, wayalanga amakasa yaakwe nu luwazu lwakwe. Alondeshi yachimba kuno yalola uMwene. 21Nga Yesu wayanena kaili, waati: “Uwelezyo uwe nemwe! Ndi fino Tata wantumile nene, nene namutuma mwemwe.” 22Nga pano wavwanga vi, ayaputila umpu, ati: “Pokelelini uMweeso Nswefu. 23Yoshi yano mwelela amaifyo, yalwelelwa, na yoshi yano mwanyepela amaifyo, angi yanyepelwa.”
Yesu waloleka kuli Toma
24Leelo wenga uwi kumi na yaili, Toma wino yatangi Ipasa, atalipo ponga nanina, pano Yesu wizile. 25Nga alondeshi yanina yannena, yaati: “Twali twalola uMwene!” Nawe wayanena, waati: “Nemwi ngi ntawine amayamba ya mizumali um-makasa yaakwe nu kutela unwe wane un-chipongo cha mizumali nu kutela ikasa lyane unduwazu, ntangi nzumile.”
26Nga ichisila cha manda nnane, alondeshi yali unkasi kaili, na Toma walipo. Yesu awiza, ni milyango angi imiyale, wimilila apakasi yao, waati: “Uwelezyo uwe nemwe.” 27Nga wanena Toma, waati: “Leta pa unwe wako, ulole amakasa yane, ulete ikasa lyako, ulitele unduwazu lwane, utawa untazumila, leelo wino aluzumila.” 28Toma wannena, waati: “Mwene wane na Leesa wane!” 29Yesu wannena, waati: “Uwewe wazumila kuno wandola? Yali ni nkata yano yaluzumila nanti kulola.”
30Nga kuli ivipezya-mano ivinji tupu fino Yesu wachisile apa maaso ya alondeshi yaakwe, fino vitaandikwe un-chitabu chi. 31Leelo vi vyandikwe ukuti mumanye fino Yesu i Klisto, Mwana wi Leesa, nu kukuzumila, muwe nu upuma ukwizina lyaakwe.
S'ha seleccionat:
Yoane 20: FNT1988
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
New Testament in Fipa © United Bible Societies, 1988. Bible Society of Tanzania.