Yoane 8
8
Mwanachi walemulwa
[1Yapisile chila untu uku ng'anda ukwakwe; Yesu nawe wapita uku mwamba wa Mizeituni.
2Nu ntondo pano kwacha awingila kaili un-ng'anda-nkulu-iyi-Leesa, na antu yoshi yaya kunali, nawe awikala angi aluyasambilisha. 3Yakaandika na aFaliseo yannetela umwanachi wino watalemulwa uku upundu, yamwika apakasi. 4Yannena, yaati: “Kasambilisha, umwanachi wi walemulwa pano walaluchita upundu. 5Nga un-Ntambi, Mose watunenile ukuyatama na mafinga anachi ya fi; wemwi watuli?” 6Nayo yafwasile fiyo ukumwesha, kuti yapate apa kunnemela. Leelo Yesu awinama, awaandika nimwe waakwe apasi. 7Nayo pano yantondosha nkani, wakatuka, wayanena, waati: “Pali mwemwe, wino asi na maifyo, atangule ukumtama nifinga.” 8Awinama kaili, awaandika nunwe waakwe apasi. 9Nayo pano yapulika, yatampa ukufuma wenga wenga, yatangwila uku yikolo, kufika nu wa chisila chao; washala Yesu wenga nu mwanachi wilye awimilile apakasi. 10Nga Yesu awinuluka, wanena umwanachi, waati: “Yalikwi yano yakutakilile? Kusi wino ayangwile fino ukonona?” 11Wannena, waati: “Kusi, Mwene.” Yesu wannena, waati: “Nene kwene nsuputula. Pitanga, leelo utache uchite iifyo kaili.”]
Mwengelela wa nsi
12Nga Yesu wayanena kaili, waati; “Nene ndi mwengelela wa ya kusi; wino andondile, ataluya un-chanda nanti uche, leelo aluwa nu mwengelela wa upuma.” 13Nga aFaliseo yannena, yaati: “Uwewe uluwimikila wenkola, ushuta wako usi weneo.” 14Yesu wayanena, waati: “Nemwi nanti nduwimikila nenkola, ushuta wane uli wampomfu, kuno manyile kuno nafumile na kuno njile; leelo mwemwi mutamanile kuno nafumile nanti kuno njile. 15Mwemwi muluputula ukulondela ifintu fya mwili, nemwi ntaluputwila untu unnandu. 16Leelo nanti naputwila untu unnandu, uputusi wane uwa mpomfu, kuno nemwi insi nenga, leelo inene na wino wantumile. 17Na kaili uku Ntambi yino chaandikwe fino ushuta wa yantu yaili uwampomfu. 18Nemwi nduwimikila nenkola, nawe Tata wino wantumile alungimikila.” 19Nga yannena, yaati: “So alikwi?” Yesu wayanena, waati: “Inene mutamanile, nanti Tata kwene mutammanile; ngangi mumanile nene, ngangi mummanyile na Tata kwene.”
20Amaswi yao wayatasile pano wasambilishanga un-ng'anda-nkulu-iyi-Leesa, uku wisho wa mpia; leelo kutali untu wa kunnema, kuno amanda yaakwe yalile yachili yafike.
Kuno njile mutangi mukwise
21Nga wayanena kaili, waati: “Nemwi napita, nemwe mulunsita, nemwe mulufwa um-maifyo yino. Inene kuno njile umwemwe mutangi mukwise.” 22Nga aYudea yaati: “Chene! wambomola kuno aluti: inene kuno njile mutangi mukwise?” 23Wayanena, waati: “Umwemwe, mwe ya pansi, nemwi ne wa mwiyulu; mwemwi mwe ya kimo ukunsi, nemwi asi ne wa kuno ukunsi. 24Chaleka, namunena, nati: Mulufwa um-maifyo yino; kuno ndi mutasumile fino nene ndi wenewe, mulufwa um-maifyo yino.” 25Nga yannena, yaati: “Ifyo we weni?” Yesu wayanena, wati: “Ndi kuti iswi kwene liyo lino ndumunena. 26Indi ni ifintu tupu ifya kulanda nu kuputula kuli mwemwe, leelo wino wantumile uwa chumi; nene yano napulika uku nkola, ayano ndulanda kuno ukunsi.” 27Leelo yatamanyile fino aluyatakila Tata. 28Nga Yesu wayanena, waati: “Pano mwacha mwakatusha uMwana-ntu, apano mulumanya fino nene ndi wenewe, nukuti ntaluomba chimwi, apa lwane nenkola, leelo ndi fino Tata wandangilile ifino ndufwanga. 29Nawe wino wantumile ali ponga nene; atantile nenga, kuno nduchita manda yoshi fino fimsipile.”
Chumi chamupa ukauwele
30Nawe pano wafwanga fiyo, ainji yamsumila. 31Nga Yesu wanena aYudea yalye yano yamsumila, waati: “Umwemwe ngi mwikala umwiswi lyane, muluwa yalondeshi yane aya kapanga. 32Kaili mulumanya ifya chumi, ni chumi chilumutisha um-usha.” 33Yannena, yaati: “Sweswe yana yi Ablahamu, tutachili tuwe yasha yantu nanti limwi. Newe ulutuli, ukuti: Muluwa yakauwele?” 34Yesu wayanena, waati: “Umwenemo, umwenemo, ndumunena: untu wino aluchita amaifyo, uusha wa maifyo. 35Kuno uusha atakwikala un-ng'anda manda yoshi; umwana akulwikala manda yoshi. 36Ichino Mwana ndi wankulula, mwamwa yakauwele ya ningo.
37“Manyile fino mwemwe luko lwi Ablahamu, leelo mulusita ukungumola, kuno iswi lyane lisimo muli mwemwe. 38Fino nawine kuli Tata ifino ndulanda; nemwe kwene ndi fino mwapulike kuli yaso ino, ifino muluchita.”
39Yannena, yaati: “Tata witu ali Ablahamu.” Yesu wayanena, waati: “Nga ngi mwe yana yi Ablahamu, ngangi muluomba imilimo yi Ablahamu. 40Leelo kaili mulusita ukungumola nene, ne ntu ntimunena ilya chumi, lino napulika kuli Leesa. Ablahamu atachisile fiyo. 41Mwemwe muluomba imilimo yiso wino.” Yannenile, yaati: “Swemwi tutafilwe uku upundu, swemwi tuli na Tata wenga, nawi Leesa.” 42Yesu wayanena, waati: “Ndi Leesa wangawe iso wino, ngali munkasime nene, kuno nafumile kuli Leesa, nisa kuno; leelo ntisile uku lwane, leelo unkola uwino wantumile. 43Kuno ichani mutalumanya chino ndufwanga? Ukuno mwemwi mutangi mulipulike iswi lyane. 44Mwemwe yana yi Shetani, ni tama yi so wino isino mwakasama ukuchita. Wino wali umumosi fuma intangulo, atimilile icha chumi, kuno musi chumi um-nkola. Pano alufwanga intumpu, akuluufwangila apa lwakwe, kuno wene uwa ufi, ali isi wa ufi. 45Nene, kuno ndulanda ilya chumi, mutansumila. 46Uwini pali mwemwe wino angangimikila ukuti indi ni ifyo? Nene ngi nalanda icha chumi, nga fino mutalunsumila? 47Uwi Leesa, akulupulika amaswi yi Leesa.”
48aYudea yannena, yaati: “Chene! usweswe tutafwanzile ningo fino twati: we unSamalia, newe uli ni chiwa?” 49Yesu afwanga, ati: “Inene ntakwite ichiwa, leelo nemwi namchindika Tata, nemwe mulungononela unchishi wane. 50Leelo nemwi ntalusita ukulu wane; aliko wino alusita nu kuputula imilandu. 51Umwenemo, umwenemo, ndumunena: untu ndi walema iswi lyane, atalulola ifwa manda ti.” 52Nga aYudea yannena, yaati: “Fwandi, nga twamanya fino uli ni chiwa; Ablahamu wafwa na malau yafwa; newe uluti: untu ndi walema iswi lyane, atalulola ifwa nanti uche. 53We wikolo ukuluta tata witu Ablahamu, wino wafwa? Na malau kwene yafwa. Uluuchita we weni?” 54Yesu wafwanga, waati: “Ngi naikusha nenkola, ukulu wane chisi chimwi; wino alunkusha i Tata, wino mwemwe muluti: i Leesa witu. 55Leelo mwemwi mutammanile, leelo nemwi immanile; ngi nalanda ukuti: “Ntammanile, namwa wa ntumpu wi mwemwe; leelo mmanile niswi lyaakwe ndilemile. 56Ablahamu, so wino, wachimfile kuno alulola uwanda wane, nawe waulola, wachimba.” 57Nga aYudea yannena, yaati: “Uwewe uchili uwe ni myaka amakumi yasano, newe walola Ablaamu?” 58Yesu wayanena, waati: “Umwenemo, umwenemo, ndumunena: Ablahamu wiyo achili aloleke, nemwi angi ndiko.” 59Nga yasola amafinga kuti yantame, leelo Yesu afisama, nga afuma un-ng'anda-nkulu-iyi-Leesa.
S'ha seleccionat:
Yoane 8: FNT1988
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
New Testament in Fipa © United Bible Societies, 1988. Bible Society of Tanzania.