Mateo 13
13
Kapela wa mbesu
(Mk 4:1-9; Lk 8:4-8)
1Uwaanda uo kweene Yesu afuma un-ng'anda awikala umbali mwi yeemba. 2Amaumba tupu yakongaana kunalii, apalinji wakweela um-waato, wikala na liili iumba lyooshi lyimilile uku luseleseenga. 3Ayaneena ifiintu tupu uku miluumbe, ati: “Lolini, kapela wafumile ukuyupela. 4Pano wapelaanga, imbesu shimwi shaponile apiipi ni shila, ifyuuni fisa fyakoompa 5Shimwi shapona apa mafiinga, pano pashi unsili tupu, nga shamela suwa, shakuno unsili utafushile. 6Unsanya pano wawala, shapya fino sisi ni misishi, shanyala. 7Shimwi shapona apa myoonga, imyoonga yamela yashifyeenka, 8Simwi shapona pamfundo, shasêka, yoonga umwaanda, yoonga makumi shita, yoonga makumi yatatu. 9Uwa makutwi, apulike!”
Lunga lya miluumbe
(Mk 4:10-12; Lk 8:9-10)
10Nga yiisha alondeshi yaakwe, yanneena, yaati: “Uku chani uluvwanga nayo uku milumbe?” 11Wayanena, waati: “Mwemwi mwapiwa ukumanya melengwe ya wene-wamwiyulu, leelo yao yatapiwe. 12Kuno wensi uli na chimwi, alupiwa nu kongeleziwa tupu, leelo wino atakwite chimwi, alupokwa na chino ali nacho. 13Ichino fiyo ndufwanga nayo uku milumbe, kuno ngi yalola, yatalulola, nga ngi yapulika, yatalupulika nantu kumanya. 14Ichino iswii li kalausha Isaya lyawa nu kuwa kuno yali, lino litile:
‘Ukupulika mwampulika, leelo musumanya;
ukulolekesha, mululolekesha, leelo mutalulola.
15Kuno imyeeso ya antu ya iminwamu,
nu ku makutwi yao yatalupulika niingo.
Yashiyata amaaso yao,
yaatiza yalole uku maaso yao,
nu kupulika uku makutwi yao,
yamanye ukumyeeso yao,
yasenuke njaposhe.’
16Leelo inkata ya maaso yiino, kuno yalulola, na makutwi yiino, kuno yalupulika. 17Kuno umweenemo ndumuneena: yakalausha tupu na ya chuumi yakashime ukulola ifiintu fino mululola mweemwe, leelo yatafilola, nu kupulika ifiintu fino mulupulika mweemwe, leelo yataafipulike.
Kumanyisha unnduumbe wi kapela
(Mk 4:13-20; Lk 8:11-15)
18“Ichino mweemwi pulikini unnduumbe weeshi kapela. 19Untu weeshi pano wapulika iswii lya weene, atalimanya niingo, akulwiisa wiilye unjifu, anyompola lino lipeshilwe um-mweeso waakwe wiyo, wino apeshilwe pipi ni isila. 20Na wino apeshilwe apa mafiinga, wiyo uwino alupulika liili iswii, liyo kweene alipokeleela uku kuchiimba. 21Leelo unkasi asi ni mishishi, akulwikala akashimbo; ndi kwaloleku kusunywa naanti amachuulo ukwiswii liyo, ashaala waata. 22Nawe wino apeshilwe apa myoonga, wiyo uwino alupulika liili iswii; ni fya kuno ukuushi nu uchenjeshi wa usafi fikulufyeenka lili iswii, litasêka. 23Na wino apeshilwe apa nsili wafuunda, wiyo uwino alupulika liili iswii nu kulimanya, wino wene alusêka ifisêke, alawi umwaanda, nawi amakumi shita, nawi amakumi yatatu.”
Imiluumbe miniina
24Ayumila unnduumbe unnina, ati: “Uweene-wa-mwiyulu ukoliine nu ntu uwapela imbesu nsiipe un-chaalo chaakwe. 25Nga pano aantu yalala, aya siluweembu waakwe apela amasote apakasi un-ngano, ampita. 26Pano amafwa ya ngano yamela nu kukula, ifiloleka ni fikoona kweene. 27Aomfi ya nkola-ng'anda yaya yanneena, yaati: ‘Mweene, utapeshile imbesu nsiifu un-chalo chaako? Ngi ifikoona fyafuma kwi?’ 28Wayaneena, waati: ‘Unjiipe uwachisile fi’ Aomfi yanneena, yaati: Leelo ulushita tuye tukayakonganike? 29Waati: ‘Awe, mutiise mukasakule isote nu kwiipa ingano poonga nayo. 30Fitini fyooshi fikule kufika na pa kusakaata; na pa kusakaata nduunena alusakaata, nti: Mutangule mukonganike ifikoona, mufinyepe inyengele mukafyoche, leelo ingano yikonganikini un-ntanta yaane.’ ”
31Wayumile unnduumbe unniina, waati: “Uweene-wa-mwiyulu ukoline nu lupeche lwa Aladadi, luno watoshile untu, apela un-chalo chaakwe. 32Nalo ulunoono ukuluta imbesu shooshi, leelo ndi lwamela, lukukula ukuluta inyenyi shooshi, uluwa ichiti, ni fyuuni vya mwiyulu ifiisa ukwisu tulila um-saasa yaakwe.”
33Wayumila unnduumbe unniina, waati: “Uweene-wa-mwiyulu ukoliine ni nasho, sino umwanachi wuminkanya nusu wa ntowa zitatu, na wooshi wasasa.”
34Ifiintu fiyo fyooshi Yesu wanenile amaumba uku milumbe, na pasi unnduumbe atafyaansile chimwi. 35Kuti liwe iswii lino kalausha watasile, waati:
“Ndufwaanga imiluumbe uku nndomo waane.
Ndulaanda ifyafisama ukufuma ukulengwa kwa nsi.”
Kumanyisha unnuumbe wa fikoona
36Apano Yesu walambalike amaumba, awingila un-ng'anda. Alondeshi yaakwe yaya yannena, yaati: “Tulangilile niingo unnduumbe wa fikoona fya un-chalo.” 37Wayaneena, waati: “Kapela wa mbesu nsiifu, uMwaana-ntu. 38Ichalo chiyo iisi; nimbesu nsiipe shiyo a yaana ya weene; ni fikoona a yaana yi wilye unjiipe. 39Siluweembu uwino wapesile uwiwi Chiwa; ukusakata apa mpelelekezyo yaasi; na lusakaata ayamalaika. 40Ndi fino ifikoona fikulusholwa nu kwoochwa um-mooto, ifino chiluuwa apa mpelelekesho ya nsi. 41uMwaana-ntu alutuma yamalaika yaakwe, nayo yalukonganika ukufuma um-weene waakwe ifintu vyonsi iviipe, na antu yano yaluchita ukakasi, 42nu kuyasumbila un-chilinkwe cha mooto; ukuno kuluuwa ukulila nu kuchecheta amiino. 43Apano achumi yalwaaka wi laashi um-weene wisi wao. Uwa makutwi apulike.
Imiluumbe kayili
44Kayili uweene-wa-mwiyulu ukoliine ni insao yino yafisama un-chalo, na pano untu wayilola, wayifisa nu kukuchimba kwaakwe waaya wakasha fyooshi fino ali nafyo, wakali chalo chiyo.
45Kayili uweene-wa-mwiyulu ukoliine nu nchulusi, wino alushita ilulu shino shili niingo. 46Nawe pano walola ilulu yoonga iya mpia tupu, waaya wakazya fyooshi fino ali nafyo, wayikala.
47Kayili uweene-wa-mwiyulu ukoliine nu nkwao wuno yasuumba muli yeemba, ukonganya ifiintu na ifiintu. 48Na pano washuula yaukwesela ukuushi, yikala nu kukonganika ifyiifu um-fifya, ni ifiyiifu yafisumba. 49Ifino chiluuwa pa kushila kwaasi; yamalaika yalwiisa nu kupaalula ayiifu sha nasipe ya chuumi. 50Nu kuyasumbila un-chilinkwe cha moto; ukuno kuluuwa ukulila nu kuchecheta amiino.”
51Yesu wayatondosya, waati: “Mwamanyi ifintu fi fyooshi?” Yannena, yaati: “Endita!” 52Wayanena, waati: “Ichino fiyo kaandika weeshi wino ali unndondeshi wa weneewa-mwiyulu, akoline nu ntu wa ng'anda, wino alufumya um-usafi waakwe ifiintu ifipyaa ni fya kali.”
Yesu wakaanwa uku Nasaleti
(Mk 6:1-6; Lk 4:16-30)
53Nga pano Yesu wamala imilumbe yiyo, afuma apita. 54Nga pano wafika umunsi wa kumwao, ayasambilisha un-ng'anda yao iyi Leesa; apalinji yasunguka, yaati: “Alawi wafumya kwi amaano ya ni fipesha-maano fi? 55Alawi asi umwaana wi kawasa? Na anina si Malia? Nanina asi Yakobo na Yosefu na Simoni na Yuda? 56Na siche yaakwe yooshi yatali kuno tuli? Nga wi wafumya kwi fyoonsi fi?” 57Yanndaakalikila. Leelo Yesu ayanena, ati: “Kalausha asuula unchiishi, siko un-nsi ya kumwao, nu ku ng'anda ukwaakwe.” 58Chaleka waula ukuchita ifipesha-maano tupu kweneko, ukii kuntasumila kwao.
S'ha seleccionat:
Mateo 13: FNT1988
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
New Testament in Fipa © United Bible Societies, 1988. Bible Society of Tanzania.