Mateo 15
15
Intaambi shi yatata-kulu
(Mk 7:1-13)
1Apano aFaliseo na yakaandika yafumile uku Yelusalemu, yaya kuli Yesu, yaati: 2“Nga fino aloondeshi yaako yatalondiile intaambi sha yikolo, kuno yatalufulala amakasa apa kulya ichakulya.” 3Wayaneena, waati: “Nga fino neemwe kweene mutaloondile ichilangaaso chi Lessa uku ntaambi shino? 4Kuno Leesa wafwashile, waati: ‘Uchindike so na nyoko, nu walafya isi naanti nyina, ndukufwa andukufwa.’ 5Leelo mweemwi muluti: ‘Uwacha wanena isi naanti inya: chonsi chino ungaswilisiwa neene, chapiwa Leesa. Nga atachindika isi na nyina. 6Mwasenulula iswii li Leesa uku ntaambi shiino. 7Ya ufi mwe, ifino Isaya walawishe kuli mweemwe, ati:
8‘Aantu ya yanchindika uku milomo,
leelo imyeeso yao ilu kutali neene.
9Nayo yalumpepa chaaka,
yalusambilisha amasambilisho
amatume na aantu.’ ”
Ifiintu fino filulyikisha untu
(Mk 7:14-23)
10Awita amaumba, ayanena, ati: 11“Pulikini mumanye, asi chikulwingila un-nndomo chingalyikisha untu, leelo ichikufuma unu nndomo ichikulyikisha untu.”
12Apano alondeshi yaakwe yaya kunalii, yannena, yaati: “Umanyile fino aFaliseo pano yapulika iswii liili, yafwitokile?” 13Wayanena, waati: “Ichipeelwa chooshi chino Taata uwa mwiyulu atapeshile, chilwiipwa. 14Yaatini yao, aya kakoleela apofu uku yapofu. Nu mpofu ndi wakolelela umpofu nnina, yamponela un-chilina yooshi yayili.”
15Nga Petlo wannena, waati: “Tuyulile unnduumbe uo.” 16Yesu wafwaanga, waati: “Na li kweene neemwe kweene muushi na maano? 17Muchili mumanye fino ichikuluya umu nndomo, chikupita un-nda, ichisuumbwa uku nsalaani? 18Leelo fino filufuma umu nndomo fikufuma um-mweso, navyo ifikululyikisha untu. 19Kuno um-mweeso mukulufuma amelengushi amayiipe, uumoshi, ifya upuundu, umalaya, iwifi, ukufwaanga ufi ni misalula. 20Ifiintu fiyo ifino fikulyikisha untu, leelo ukulya naanti kufulala amakasa kutakulyikisha untu.”
Usumilo wi mama umwi
(Mk 7:24-30)
21Yesu atina kweneko, ayu ku mbali ya Tilo ni Sidoni. 22Nga lolini, umwanachi mKananeo uwa n-nsi iyo, awisa awangula ukwiswi, ati: “Unkumbukile, Mweene, Mwaana wi Daudi, umwanane kachi ichiwa channeema nkaani.” 23Leelo weene atachili annene chimwi. Na alondeshi yaakwe yaya kunalii, yanndomba, yaati: “Leka apite, kuno alutumila ichoongo uku chisila.” 24Nga ayanena, ati: “Ntatumilwe, leelo uku fweele shi shalowa isha ng'anda ya Islaeli.” 25Nawe aya amwinamila, ati: “Mweene, untuule!” 26Leelo walaanda, waati: “Chitasifile ukutoola ichakulya cha yaana nu kusumbila imbwa.” 27Nawe aati: “Ee, Mweene, leelo nimbwa kweene, shikulya ifikunyolwa fino fifipona apa mesa pa ene yao.” 28Apano Yesu wannena, waati: “Mama, usumilo wako wakula; chiwe kuli weewe ndi fino ukasiime!” Mwanakwe kachi ampola fuma liyo kweene.
Yesu wayapa antu ielfu shini ifyakulya
29Nga Yesu atina kweneko, ayu mbali yi yeemba wi Galilea. Nga kweda uku mwamba. aikala kweneko. 30Nga yaya kunalii amaumba tupu, yantwalila yano yikala amatenda, apofu, yachinuunu, alemala naaniina ainji, yayawiika apa muulu yaakwe. Nga ayaposha. 31Chaleka iumba lyasunguka, pano lyalola yachinunu yalufwaanga, alemala yaluwa apuma, aikala amateenda yalupita napofu yalulola. Yalumbanya Leesa wa Islaeli.
32Nga Yesu awita alondeshi yaakwe, aati: “Nakumbukila iumba, kuno yikala ponga neene amaanda yawa yatatu, na yatakwiite chimwi ichakuti yalye; kayili ukuyalambalika yataliile ntakashime, yaatiza yashenguke un-nsila.” 33Alondeshi yaakwe yannena, yaati: “Tukufumya kwi imikaate tupu na pa inyika, ukuti likuute iumbo ndi li?” 34Nga Yesu ayanena ati: “Muli ni mikaate yiinga?” Yaati: “Saba. Ninswi siche.” 35Wayanena iumba likale apaasi. 36Atoola ilye imikaate saba ninswi shiyo, asamalisha, akunyoola, apa alondeshi yaakwe, nayo alondeshi yapa maumba. 37Yalya yooshi yikuta, yasola ifyashala ifikunyolwa fya mikaate, ifiyo saba fishushile. 38Na yano yaliile yaali imyaanda amakumi yani ayooshi, nanti kusolosha aanachi na aanche. 39Nga alambalika amaumba, akweela um-waato, ayu ku mbali ya Magadani.
S'ha seleccionat:
Mateo 15: FNT1988
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
New Testament in Fipa © United Bible Societies, 1988. Bible Society of Tanzania.