Génesis 10
10
Noépa tsurinkunapita miraqkuna
1 Crónicas 1.5-23
1Kaychömi qellqashqa kaykan Noépa tsurinkunapaq y paykunapita miraqkunapaqpis.
Noépa tsurinkunam kayarqan Sem, Cam y Jafet. Diluviu päsaskiptinraqmi paykunapa tsurinkuna kayarqan.
2Jafetpa tsurinkunam kayarqan Gomer, Magog, Madai, Javán, Tubal, Mesec y Tiras.
3Gomerpa tsurinkunam kayarqan Askenaz, Rifat y Togarma.
4Javánpa tsurinkunam kayarqan Elisa, Tarsis, Quitim y Dodanim. 5Lamar kuchunpa aywarmi tsay runakuna nacionkuna kayänanpaq atskaman mirayarqan. Cada nacionninchömi kikinkunapa idiömankunata parlayaq.
6Campa tsurinkunam kayarqan Cus, Mizraim, Fut y Canaán.
7Cuspa tsurinkunam kayarqan Seba, Havila, Sabta, Raama y Sabteca. Raamapa tsurinkunam kayarqan Seba y Dedán.
8Nimrodpis Cuspa tsurinmi karqan. Paymi kay patsachö mas puntata poderninchö runakunata katsirqan. 9Nimrodmi Dios Yaya yanapaptin chucaru wätakunata achkuyta yachaq karqan. Tsaymi pipis chucaru wätakunata alli achkuq kaptin niyaq: <<Nimrodnömi chucaru wätakunata achkuyta yachan>>.
10Nimrod mandakunqan jatusaq markakunam kayarqan Babilonia, Erec, Acad y Calne. Tsay markakunam Sinarchö kayarqan. 11Tsaypitam Asur partiman aywar shäritsirqan Nínive, Rehobot y Cala markakunata. 12Tsaynöllam shäritsirqan Resén jatun markata. Tsay Resén markam karqan Nínivipita Calaman päsaq nänichö.
13Mizraimpita miraqkunam kayan ludeo runakuna, anameo runakuna, lehabita runakuna, naftuhita runakuna, 14patruseo runakuna, casluhíta runakuna y caftorita runakunapis. Caftorita runakunapitam filisteo runakuna mirayarqan.
15Canaánpa mayor kaq tsurinmi karqan Sidón. Qepan wawqinnam karqan Het. 16Canaánpita miraqkunam kayan jebuseo runakuna, amorreo runakuna, gergeseo runakuna, 17heveo runakuna, araceo runakuna, sineo runakuna, 18arvadeo runakuna, zemareo runakuna y hamateo runakunapis. Tsay llapan runakunaqa cananeo runakunam kayarqan. Paykunam atskaman mirarnin maytsayman witsikäyarqan. 19Tsaymi cananeo runakunapa mujunninkuna karqan Sidón markapita Gaza cercanchö kaq Gerar markayaq. Tsaynöllam mujunninkuna päsarqan Sodoma, Gomorra, Adma y Zeboim markakunapa hasta Lasa markayaq.
20Paykunam kayarqan Campa tsurinkunapita miraqkuna. Tsay runakunam nacionkuna kananpaq atskaman mirayarqan. Cada nacionninchömi kikinkunapa idiömankunata parlayaq.
21Jafetpa mayor wawqin Sempapis tsurinkunam kayarqan. Semqa Heberpa y Heberpita miraqkunapa unay ayllunmi karqan. 22Sempa tsurinkunam kayarqan Elam, Asur, Arfaxad, Lud y Aram.
23Arampa tsurinkunam kayarqan Uz, Hul, Geter y Mas.
24Arfaxadpa tsurinmi karqan Sala. Salapa tsurinmi karqan Heber. 25Heberpa tsurinkunam ishkaq kayarqan. Mayor tsurinpa shutinmi karqan Peleg.#10.25 Peleg ninanqa rakikashqa ninanmi. Tsaynö shutin karqan pay kawanqan witsay runakuna chikinakurnin wakpa kaypa aywakuyanqanpitam. Qepa kaq tsurinpa shutinmi karqan Joctán.
26Joctánpa tsurinkunam kayarqan Almodad, Selef, Hazar-mavet, Jera, 27Adoram, Uzal, Dicla, 28Obal, Abimael, Seba, 29Ofir, Havila y Jobab. Paykunam Joctánpa tsurinkuna kayarqan. 30Paykunam täkuyarqan Mesapita Sefaryaq. Sefarqa rupay yarqamunan lädu jallqakunachömi kaykan.
31Paykunam kayarqan Sempa tsurinkunapita miraqkuna. Tsay runakunam nacionkuna kayänanpaq atskaman mirayarqan. Cada nacionchömi kikinkunapa idiömankunata parlayaq.
32Tsaynömi karqan Noépa tsurinpita miraqkuna. Diluviupitaraqmi paykuna maytsaypa aywarnin nacionninkuna rurayarqan.
S'ha seleccionat:
Génesis 10: qxn
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2011, Wycliffe Bible Translators, Inc. All rights reserved.