Génesis 9
9
Noéta Dios Yaya prometinqan
1Tsaypitanam Noéman y tsurinkunaman Dios Yaya bendicionninta churar nirqan: <<Mirayay kay patsaman juntäyanqaykiyaq.#Gén. 1.28. 2Llapan casta wätakuna, päriqkuna, lätaypa puriqkuna y lamarchö kawaqkunapis mantsayäshunkim. Tsaynöllam tsay llapan wätakuna mandäduykikunachö kayanqa. 3Llapan casta wätakunawan mikuykuna y verdürakunapis mikuyänaykipaqmi kanqa. 4Peru ama mikuyankitsu yawaryuq aytsata. Yawarninchömi kawaynin kaykan.#Lev. 7.26-27; 17.10-14; 19.26; Deut. 12.16, 23; 15.23.
5<<Pipis runa majinta wañutsiq kaqqa kikinpis wañutsishqam kanqa. Tsaynöllam runata wañutsiq kaq wätapis wañutsishqa kanqa. 6Kikïtanöllam runata kamashkä.#Gén. 1.26. Tsaymi pipis runa majinta wañutsiptinqa kikintapis wañutsiyanqa.#Éxo. 20.13.
7<<Qamkuna atskaman mirayay. Tsaynölla qampita miraqkunapis kay patsaman juntanqanyaq mirayätsun>>.
8Tsaypitam Noéta tsurinkunatawan Dios Yaya nirqan: 9<<Diluviuwan yapay mana ushakätsiyänaqpaqmi qamkunawan y qamkunapita miraqkunawan pactuta ruraykä. 10Tsaynöllam pactüta ruraykä paqtaykikuna arcapita yarqamuq llapan casta päriqkunawan, manshu y chucaru wätakunawan y entëru munduchö wätakunawanpis. 11Kay pactuta cumplirmi yapayqa diluviuwan ushakätsishaqnatsu kay patsatawan runakunata ni wätakunatapis. Kay diluviu kanqannöqa mananam ni imaypis kanqanatsu.
12<<Tukuyläya wätakunatawan y llapan runakunata pactuta ruranqäta imaypis yarpänäpaqmi 13pukutaychö turmanyayta rikakätsimushaq. Tsay turmanyaymi imaypis señal kanqa kay patsawan pactuta ruranqäta yarpänäpaq. 14Tsaymi patsa jananpa pukutay shamuptin turmanyayta rikakätsimushaq. 15Tsay turmanyay yuriptinmi yarpäshaq qamkunawan y kay patsachö kaq llapan casta wätakunawan pactuta ruranqäta. Tsaymi kay patsata yakuwan ni imaypis ushakätsishaqnatsu. 16Pukutaychö turmanyay rikakämuptinmi yarpäshaq llapan runakunawan y wätakunawanpis pactuta ruranqäta. Tsay pactutam imaypis cumplishaq. 17Tsaymi turmanyayta señalpaq churashkä qamkunawan y wätakunawanpis pactuta ruranqäta yarpänäpaq>>.
Tsaynömi Noéwan Dios Yaya parlarqan.
Tsurinkuna imanö kayänanpaq Noé ninqan
18Noépa tsurinkunam kayarqan Sem, Cam y Jafet. Tsay kimsan tsurinkunawanmi arcapita Noé yarqayämurqan. Cam karqan Canaánpa taytanmi. 19Noépa kimsan tsurinkunapitam kay patsachö llapan runakuna mirayashqa.
20Noéqa alli chakrata kichaykurmi üvata plantarqan. 21Üva poquskiptinnam machanqanyaq vïnuta upyarqan. Machaskirnam qalapätulla carpanchö jitaraykarqan. 22Taytan qalapätulla jitaraykaqta rikaykurmi Canaánpa taytan Cam ishkay kaq wawqinkunata willaq aywarqan. 23Tsaymi Semwan Jafet juk cäpata ashqurkur qepapa aywarlla taytankunata tsapäyarqan. Tsaynöqa tsapäyarqan taytankuna qalapätulla kaykaqta mana rikäyänanpaqmi.
24Mallaq shonquyashqana rikcharkamurmi Noé musyarqan qepa kaq tsurin wawqinkunata willanqanta. 25Tsaymi nirqan:
<<¡Canaán maldicionädu katsun!
¡Payqa wawqinkunapa serviqninmi kanqa!>>
26Tsaynam yapay nirqan:
<<Semtaqa Dios Yaya llapan imaykachöpis yanapaykullätsun.
Tsaynölla Sempita miraqkunapa serviqninkuna Canaánpita miraqkuna kayätsun.
27Jafetta Dios Yaya yanapaykutsun atskaman mirananpaq.
Sempita miraqkunawanpis paqta shumaq täkuyätsun.
Tsaynölla Jafetpita miraqkunapa serviqnin Canaánpita miraqkuna kayätsun>>.
28Diluviu kanqanpita Noé kawarqan kimsa pachak pitsqa chunka (350) wataraqmi. 29Noé wañurqan isqun pachak pitsqa chunka (950) watayuq kaykarmi.
S'ha seleccionat:
Génesis 9: qxn
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2011, Wycliffe Bible Translators, Inc. All rights reserved.