Senesi 11
11
Tule o Papele
1Na masau tasi le malama nei katoa, mo kupu tatau.
2Na lotou mavae loa mei le potu esite, o lotou maua loa se kele laumalie i le fenua ko Sinea, ti na lotou nonofo loa i ai. 3Na lotou pati loa : Tou tutuu ki aluga ! Tou fai ni piliki, ti tou tao latou i le afi. Ti na lotou fakaaoga loa le piliki ko le fatu, ti mo le kele pupulu ko le sima. 4Na lotou toe pati loa : Tou tutuu ki aluga, ti tou fakatuu se kolo mo se tule leia e tau lona tumutumu ki le lagi ; ke logo ai lotatou igoa, ti ke aua na tou mavetevete loa i aluga o le malama nei katoa. 5Na ifo loa le Eteleno o tio ki le kolo mo le tule leia na fakatuu e vosa o tagata. 6Ti na pati loa le Eteleno : Ko leinei, e lotou nofo ko se kakai e tasi, ti e lotou masau ki se pati e tasi, ti ko leinei le nea kua lotou kamata fau ; i le temi nei e leaise nea leia e toe taofi ia loa latou i le fakasoko o nea fuli ala e lotou loto loa ki ai. 7Koia tou ifo o veuki ai lalatou masau, ke aua na lotou toe felogoi ia latou. 8Ti na fakamavetevete loa latou e le Eteleno i aluga o le malama nei katoa ; ti na lotou taofi loa i ai le fakatuu o le kolo. 9Koia leia na tuku ai loa ki le kolo lena le igoa ko Papele, talie ko le ganea lena na veuki ai e le Eteleno le masau o le malama nei katoa, ti ko le ganea lena na fakamavetevete ai latou e le Eteleno i aluga o le malama nei katoa.
Tamana o Apalaamo
10Ko leinei le sakoga o Semi. Ko Semi, i lona fetuu kau lelau, na fakatupu ia loa Alepakesate, i le sili o fetuu e lua ki le lomaki. 11Na mauli loa Semi, i le oki o le tupu o Alepakesate i fetuu e kau lelau lima ; ti na fakatupu loa e ia ni vosa mo ni taineliki. 12Ko Alepakesate, i lona fetuu kau tolu tupu lima, na fakatupu ia loa Selake. 13Na mauli loa Alepakesate, i le oki o le tupu o Selake i fetuu e kau lelau fa tupu tolu ; ti na fakatupu loa e ia ni vosa mo ni taine.
14Ko Selake, i lona fetuu kau tolu, na fakatupu ia loa Epele. 15Na mauli loa Selake, i le oki o le tupu o Epele i fetuu e kau lelau fa tupu tolu ; ti na fakatupu loa e ia ni vosa mo ni taineliki.
16Ko Epele, i lona fetuu kau tolu tupu fa, na fakatupu ia loa Peleke. 17Na mauli loa Epele, i le oki o le tupu o Peleke i fetuu e kau lelau fa kau tolu ; ti na fakatupu loa e ia ni vosa mo ni taineliki.
18Ko Peleke, i lona fetuu kau tolu, na fakatupu ia loa a Leu. 19Na mauli loa Peleke, i le oki o le tupu o Leu i fetuu e kau lelau lua tupu iva ; ti na fakatupu loa e ia ni vosa mo ni taineliki.
20Ko Leu, i lona fetuu kau tolu tupu lua, na fakatupu ia loa Seluki. 21Na mauli loa Leu, i le oki o le tupu o Seluki i fetuu e kau lelau lua tupu fitu ; ti na fakatupu loa e ia ni vosa mo ni taine.
22Ko Seluki, i lona fetuu kau tolu, na fakatupu ia loa Nakole. 23Na mauli loa Seluki, i le oki o le tupu o Nakole i fetuu e kau lelau lua ; ti na fakatupu loa e ia ni vosa mo ni taineliki.
24Ko Nakole, i lona fetuu kau lua tupu iva, na fakatupu ia loa Telake. 25Na mauli loa Nakole, i le oki o le tupu o Telake i fetuu e kau lelau kau agafulu tupu iva ; ti na fakatupu loa e ia ni vosa mo ni taineliki.
26Ko Telake, na fetuu kau fitu, na fakatupu ia loa Apalamo, mo Nakole, mo Alane.
27Ko leinei le sakoga o Telake : Ko Telake na fakatupu ia loa Apalamo, mo Nakole, mo Alane. Na fakatupu loa e Alane a Lote. 28Ti na mate loa Alane i mua o lona tamana ko Telake, i le fenua leia na tupu ai, i Ulu i Kaletea. 29Na avaga loa Apalamo ti mo Nakole : Ko le igoa o le avaga o Apalamo ko Salai, ti ko le igoa o le avaga o Nakole ko Milika, taine o Alane. Ko Alane ko le tamana foki a ia o Siseka. 30Na paa Salai ; na leaise maua sana fanau.
31Na too loa e Telake lona vosa ko Apalamo, mo Lote, vosa o Alane, vosa o lona vosa, ti mo Salai, lona fugao, avaga o Apalamo lona vosa. Ti na lotou mavae fakatasi loa mei Ulu i Kaletea, o ano ki le fenua o Kanaane. Na lotou kaku loa ki Salani, ti na lotou nofo loa i ai.
32Ko aso o Telake ko fetuu e kau lelau lua tupu lima ; ti na mate loa Telake i Salani.
S'ha seleccionat:
Senesi 11: FB2000
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© Société Biblique de Genève, 2000-2020