SENESI 2
2
Malolo a te Atua i te fitu aho
1Ko te fakaosi aia o te fakatupu o te atu lagi mo te kele, pea mo te u mea fuli ae nee mau i ai. 2Nee fakaosi leva e te Atua tana gaue i te fitu aho, pea nee malolo leva ia ia i ana gaue fuli ae nee ina fai. 3Nee tapuaki leva te Atua ki te fitu aho, pea nee ina vahei kehe leva te aho aia, koteuhi nee malolo leva ia ia i te aho aia i ana gaue fuli ae nee ina fai.
4Koeni te kamataaga o te atu lagi mo te kele, i te temi ae nee fakatupu ai naua.
5I te fakatupu e te Eteleno te kele mo te atu lagi, nee mole homo he akau siisii o te vao i te kele, pea nee mole ha he luna i oluga o te kele: koteuhi nee heeki tuku e te Eteleno Atua he ua ke to ki te kele, pea nee heeki mau he tagata ke gaue ki te kele. 6Kae nee mapuna ake leva he matapuna vai e tahi i te kele o fakavai ai te fuga o te kele katoa. 7Nee fau leva e te Eteleno Atua te tagata mai te efu o te kele, pea nee ina pupuhi leva ki ona pogaihu he tukumanava o te mauli, pea nee liliu leva te tagata ko he laumalie mauli.
8Pea nee to leva e te Eteleno Atua he oloto i Eteni, i te potu esite, pea nee ina tuku leva ki ai te tagata ae nee ina fakatupu. 9Pea nee fakahohomo leva e te Eteleno Atua i te kele te u akau kehekehe fuli e matalelei ki te mata pea mo lelei ki te kai. Pea nee ina fakatuu leva, i lotomalie o te oloto, te akau o te mauli mo te akau o te iloilo o te lelei mo te kovi. 10Pea nee mapuna leva he vaitafe i Eteni o fakavai ai te oloto, pea nee mavaevae leva mai ai ni magai vai e fa. 11Ko te higoa o te uluaki vaitafe ko Pisoni; ko ia ae e ina takatakai te fenua katoa o Avila, ae e mau ai te aulo. 12Ko te aulo o te fenua aia e maa; pea e toe mau foki i te fenua aia te pului akau magoni ko te piteliomi*, pea mo te maka mauhiga ko te onise*. 13Ko te higoa o te lua vaitafe ko Kioni; ko ia ae e ina takatakai te fenua katoa o Kusi. 14Ko te higoa o te tolu vaitafe ko Itekele; ko ia ae e tafe i te potu esite o Asilia. Ko te vaitafe ko te Eufalate.
15Nee too leva e te Eteleno Atua te tagata o tuku ki te oloto o Eteni, ke tauhi mo leoleo ki ai. 16Nee tuku leva e te Eteleno Atua te fakatotonu aeni ki te tagata: E feala anai ke ke kai ki te u akau fuli o te oloto; 17kae e mole ke kai anai ki te akau o te iloilo o te lelei mo te kovi, koteuhi ko te aho ae e ke kai ai anai ki te akau aena, e ke mate anai.
18Nee ui leva e te Eteleno Atua: E mole lelei ke nofo toko tahi te tagata; e au fai anai he tokoni ke tatau mo ia. 19Pea nee fau leva e te Eteleno Atua mai te kele te u manu fuli o te vao, mo te u manulele fuli o te lagi, pea nee ina aumai leva natou ki te tagata, koteuhi ke sio ia ia pe e feafeai anai te haga a te tagata o fakahigoa te u manu, pea ke mau e te u mea fuli ae e mauli te higoa ae e tuku age anai e te tagata. 20Pea nee tuku leva e te tagata ni higoa ki te u manu fuli o te kele, mo te u manulele fuli o te lagi. Kae nee mole ina mau leva he tokoni ae e tatau mo ia. 21Koia nee tuku ai leva e te Eteleno Atua he fia moe lahi ki te tagata, pea nee moe leva ia ia. Pea nee ina too leva hona hui vakavaka e tahi, kae nee ina toe mapunui leva te kakano. 22Pea nee fau leva e te Eteleno Atua he fafine aki te hui vakavaka ae nee ina too mai te tagata, pea nee ina aumai leva te fafine ki te tagata. 23Pea nee ui leva e te tagata: I te faiaga leva aeni, koeni ae e hui ki oku hui pea kakano ki toku kakano! E higoa anai ia ia ko te fafine! Koteuhi nee too ia ia mai te tagata. 24Koia ae e tonu ai ke mavae leva te tagata i tana tamai mo tana fae, pea ke pipiki leva ia ia ki tona ohoana, pea e na liliu anai ko he sino e tahi.
25Nee na telefua toko lua, te tagata mo tona ohoana, pea nee mole na ufiufi i ai.
S'ha seleccionat:
SENESI 2: WB2011
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland