EVASELIO A LUKA 1
1
1O tupu nee kaugamalie natou ae nee faiga ke natou fau he fakamatala o te u mea nee hoko ia matou, 2o mulimuli ki te mea nee tuku mai kia matou e natou ae nee sisio mata ki ai, pea kua natou liliu ko ni tagata faifekau a te folafola, talu mai te kamataaga, 3nee au manatu leva, i te osi o taku kumikumi lelei te u mea fuli talu mai te kamataaga, ke tohi fakahoahoa atu natou kia koe, oi Teofile lelei osi, 4o tupu ke ke iloi te mooni o te u akonaki ae kua ke tali.
Fakaha o te tupu o Soane-Patita
5I te temi o Helote, hau o Sutea, nee i ai he tagata faisakilifisio, nee higoa ko Sakalia, mai te kalasi o Apia; nee kau tona ohoana ki te u ofafine o Alone, pea nee higoa ia ia ko Elisapeta. 6Nee na agatonu toko lua ia mua o te Atua, o tauhi lelei te u lao fuli mo te u fakatotonu fuli a te Aliki. 7Nee mole hana fanau, koteuhi nee paa ia Elisapeta; pea nee kua na matutua toko lua foki.
8Kae, i te lolotoga o tana fai ona maua ia mua o te Atua, o mulimuli ki te lakaga o tana kalasi, nee kalagai leva ia ia e te filifili, 9o mulimuli ki te lekula o te gaue fakapelepitelo, ke ulu ki te fale tapu o te Aliki o momoli te mea fakamagoni. 10Nee nonofo te hahai katoa i tua o faikole i te hola o te mea fakamagoni. 11Pea nee ha leva he aselo o te Aliki kia Sakalia, pea nee tuu leva ia ia i te fahai matau o te aletale o te u kaloni. 12Nee manavahe leva ia Sakalia i tana sio ki te aselo, pea nee kaku leva kia ia he mataku lahi osi. 13Kae nee ui leva e te aselo kia ia: Aua naa ke mataku, Sakalia, koteuhi kua tali tau kole. E fanaui anai e tou ohoana ko Elisapeta he foha kia koe, pea e ke foaki anai kia ia te higoa ko Soane. 14E liliu anai ia ia kia koe ko he tupuaga o he fiafia mo he nekenekea, pea e fakafiafia anai he kaugamalie i tana tupu. 15Koteuhi e lahi anai ia ia ia mua o te Aliki. E mole ina inu anai he vino, pee ko he kava malohi, pea e fonu anai ia ia i te Laumalie Maonioni i te fatu o tana fae; 16e ina toe taki mai anai he kaugamalie i te u foha o Iselaele ki te Aliki, tonatou Atua; 17e haele anai ia ia ia mua o te Atua mo te laumalie pea mo te malohi o Elia, ke toe taki mai ai te u loto o te u tamai ki te u fanau, pea mo te kau talagataa ki te poto o te kau agatonu, o tupu ke teuteui ki te Aliki he hahai kua loto lelei. 18Nee ui leva e Sakalia ki te aselo: Pe e au iloi fefeai anai te mea aia? Koteuhi kua au matua, pea kua lahi te u tau o toku ohoana. 19Nee tali leva e te aselo kia ia: Ko au Kapeliele, e au tuu ia mua o te Atua; nee fekaui mai au ke au palalau atu kia koe, pea ke au fakaha atu kia koe te logo lelei aena. 20Pea koeni, e ke gutu mate anai, pea e mole feala anai tau palalau o kaku ki te aho ae e hoko ai anai te u mea aena, koteuhi nee mole ke tui ki aku folafola, ae e hoko anai i tonatou temi.
21Kae nee talitali te hahai kia Sakalia, o natou punamauli i tana nofo fualoa i te fale tapu. 22I tana hu age leva ki tua, nee mole feala leva tana palalau kia natou, pea nee natou mahino leva nee sio ia ia ki he mea i te fale tapu, koteuhi nee kamokamo ia ia kia natou, pea nee nofo fakalologo leva ia ia.
23I te osi o ona aho gaue, nee alu leva ia ia ki tona api. 24I te hili o te temi ki ai, nee faitama leva ia Elisapeta, tona ohoana. Nee nono leva ia ia ia mahina e nima, o ui: 25Kua tuku e te Aliki tona kalasia kia au, i te aho nee sio ai ona mata kia au, pea kua ina too ia au toku ufiufi ia mua o te u tagata.
Fakaha o te tupu o Sesu
26I tona mahina ono, nee fekaui leva e te Atua te aselo ko Kapeliele ki he kolo o Kalilea nee higoa ko Nasaleti, 27ki he taahine taupoou kua fakapapau ohoana ki he tagata mai te fale o Tavite, nee higoa ko Sosefo. Ko te higoa o te taupoou ko Malia. 28Nee ulu leva te aselo ki te fale o Malia, o ui: E au fakaalofa atu kia koe, ia koe ae kua fai ki ai he kalasia; e nofo te Aliki mo koe. 29I tana punamauli i te palalau aia, nee fakakaukau leva ia ia ki te uhiga o te fakaalofa aena. 30Kae nee ui leva e te aselo kia ia: Aua naa ke mataku, Malia; koteuhi kua ke mau te kalasia ia mua o te Atua. 31Pea koeni, e ke faitama anai, pea e ke fanaui anai he tama, pea e ke foaki anai kia ia te higoa ko Sesu. 32E lahi anai ia ia, pea e fakahigoa anai ia ia ko te Alo o te Maoluga, pea e foaki anai e te Aliki Atua kia ia te hekaaga o Tavite, tana Tamai. 33E hau anai ia ia i te fale o Sakopo o heegata, pea e mole anai he gata o tana pule.
Tupu fakamilakulo i te fatu o Malia
34Nee ui leva e Malia ki te aselo: Pe e hoko feafeai anai te mea aia, koteuhi e mole au iloi pe he tagata? 35Nee tali leva e te aselo kia ia: E hau anai te Laumalie Maonioni kia koe, pea e fakamalumalu anai ia koe e te mafimafi o te Maoluga. Koia e fakahigoa ai anai te fanau maonioni ae ka tupu anai maia koe ko te Alo o te Atua. 36Koeni Elisapeta, tou kaiga, kua faitama foki mo ia, ko he toe tagata, i tona vaivai matua, pea ko ia ae nee fakahigoa ko te fafine paa kua nofo ia ia i tona mahina ono. 37Koteuhi e mole pe he mea e mole fealagia ki te Atua. 38Nee ui leva e Malia: Ko au ko te fafine faifekau a te Aliki; ke fai kia au o mulimuli ki tau folafola! Pea nee mavae leva te aselo ia ia.
Ahiahi a Malia kia Elisapeta
39I te temi aia, nee tuu ake leva ia Malia o alu fakavilivili ki te u mouga, ki he kolo o Suta. 40Nee hu leva ia ia ki te fale o Sakalia, o fakaalofa kia Elisapeta. 41I te logo pe a Elisapeta ki te fakaalofa a Malia, nee hopohopo leva tana toe i tona fatu, pea nee fonu leva ia Elisapeta i te Laumalie Maonioni. 42Nee kalaga leva ia ia o leo lahi: E ke manuia ia koe i te u fafine fuli, pea e manuia te fua o tou fatu. 43Pe e feafeai kua foaki mai ai kia au ke hau te fae o toku Aliki kia au? 44Koteuhi koeni, i te lakaga pe nee lave ai te leo o tau fakaalofa ki toku taliga, nee hopohopo te toe i te fiafia lahi i toku fatu. 45Manuia ia ae nee tui, koteuhi e fakahoko anai te u mea fuli ae nee fakaha kia ia mai te Aliki.
Katiko o Malia
46Nee ui leva e Malia:
E fakavikiviki toku loto ki te Aliki,
47Pea e fakafiafia toku laumalie i te Atua, toku Fakamauli.
48Koteuhi kua tuku mai ona mata ki te malalo o tana fafine faifekau.
Koteuhi koeni, e lau anai e te u taitupu fuli pe kia au ko te fafine manuia,
49Koteuhi kua fai e te Mafimafi ni mea lalahi kia au.
E maonioni tona huafa,
50Pea e mafola tona manavaofa i te taitupu ki te taitupu
Kia natou ae e mataku kia te ia.
51Kua ina fakaha te malohi o tona nima; kua ina fakamavetevete natou nee nonofo mo ni manatu fialahi i onatou loto.
52Kua ina fakahifo te kau lalahi i onatou hekaaga fakahau,
Pea kua ina hiki ki oluga natou e malalo.
53Kua ina fakamakona aki te u mea lelei natou e fia kai,
Pea kua ina fakamavae te kau maukoloa mo nima atea.
54Kua ina haofaki ia Iselaele, tana tagata faifekau,
Pea kua ina manatui tona manavaofa,
55O hage ko tana fakaha ki atatou tamai,
Kia Apalahamo mo tona hakoga o heegata.
56Nee nofo leva ia Malia mo Elisapeta i ni mahina e tolu ape, pea nee toe liliu leva ia ia ki tona api.
Tupu a Soane-Patita
57Nee hoko leva te temi ae nee tonu ke fanau ai ia Elisapeta, pea nee ina fanaui leva he tama. 58Nee logo leva ona vahaa fale mo ona kaiga kua fakaha e te Aliki tona manavaofa kia ia, pea nee natou fiafia leva mo ia. 59I tona valu aho, nee natou omai leva ke silikosisioi te toe, pea nee natou fakahigoa leva ia ia ko Sakalia, ki te higoa o tana tamai. 60Kae nee ui age leva e tana fae kia natou: Kailoa, e higoa anai ia ia ko Soane. 61Nee natou ui leva kia ia: E mole higoa he tahi i tou famili ki te higoa aena. 62Pea nee natou fai leva ni kamokamo ki tana tamai ke iloi pe kotea tona loto o uhiga mo te higoa o te toe. 63Nee kole leva e Sakalia ni laui maka, pea nee ina tohi leva: Ko Soane tona higoa. Nee natou punamauuli fuli leva. 64I te lakaga pe aia, nee ava leva tona gutu, mo matala tona alelo, pea nee palalau leva ia ia o fakafetai ki te Atua. 65Nee to leva te mataku ki te hahai katoa e mauli i onatou tafatafa, pea nee palalaui leva te u mea fuli aena i te u mouga fuli o Sutea. 66Ko natou fuli ae nee logo ki te u mea fuli aena nee natou taupau leva natou i onatou loto, o ui: Pe e feafeai anai te toe aena? Pea nee ia ia te nima o te Aliki.
Katiko a Sakalia
67Ko Sakalia, tana tamai, nee fonu leva ia ia i te Laumalie Maonioni, pea nee folafola fakakikite leva ia ia, o ui:
68Ke fakafetai ki te Aliki, te Atua o Iselaele, koteuhi kua ahiahi ia ia ki tana hahai pea kua ina totogi ia ia,
69Pea kua ina lagai ake he Fakamauli mafimafi kia tatou i te fale o Tavite, tana tagata faifekau,
70O hage ko tana fakaha i te gutu o ana polofeta maonioni i te temi afea,
71Ko he Fakamauli ae e ina haofaki tatou mei otou fili pea mo te nima o natou fuli ae e fehihia mai kia tatou!
72E ina fakaha i ai tona manavaofa ki atatou tamai,
Pea e ina manatui tana hai maonioni,
73O mulimuli ki te fakapapau ae nee ina fai kia Apalahamo, tatatou tamai,
74Ke fakagafua mai kia tatou, i te osi o totatou haofaki mai te u nima o otatou fili,
Ke tou tauhi kia ia hala mataku,
75Pea ke tou haele i ona mua i te maonioni mo te faitotonu i te u aho fuli o totatou mauli.
76Pea ko koe, kii toe, e fakahigoa anai ia koe ko te polofeta o te Maoluga.
Koteuhi e ke haele anai ia mua o te Aliki, o teuteui ona ala,
77O tupu ke foaki ki tana hahai te iloilo o te fakamauli
Aki te fakamolemole o ana agahala,
78O tupu ko te manavaofa mo te agalelei o totatou Atua,
Ae nee mu ai te laa kia tatou mai oluga,
79Ke fakamalamai natou ae e nonofo i te fakapouli mo te malu o te mate,
Ke taki otatou vae i te ala o te tokalelei.
80Koeni nee tupu te toe o lahi, pea nee fakamalohii ia ia i tona laumalie. Pea nee nofo leva ia ia i te toafa o kaku ki te aho ae nee ha ai leva ia ia ia mua o Iselaele.
S'ha seleccionat:
EVASELIO A LUKA 1: WB2011
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland