EVASELIO A LUKA 4
4
Fakahalai o Sesu i te toafa
1Nee fonu ia Sesu i te Laumalie Maonioni, i tana liliu mai te Solotane, pea nee taki leva ia e te Laumalie Maonioni ki te toafa, 2i ai nee fakalakahalai leva ia ia e te tiapolo ia aho e fagofulu. Nee mole ina kai leva he mea ia aho aena; pea i te hili o te u aho aia, nee fia kai leva ia ia. 3Nee ui leva e te tiapolo kia ia: Kapau ko te Alo ia koe o te Atua, fakatotonu ki te foi maka aeni ke liliu ia ia ko he pane. 4Pea nee tali leva e Sesu kia ia: E kua tohi: E mole gata pe ki te pane e mauli ai anai te tagata.
5Nee ave leva ia ia e te tiapolo ki he potu maoluga, o fakaha kia ia i he temi e tahi te u puleaga fuli o te kele, 6pea nee ina ui leva kia ia: E au foaki atu anai kia koe te mafimafi katoa aena, pea mo te kololia o te u puleaga aena, koteuhi kua tuku mai ia kia au, pea e au foaki anai ia ki ae e au loto ki ai. 7Koia kapau e ke atolasio mai kia au, e ke mau anai ia ia katoa. 8Nee tali leva e Sesu kia ia: E kua tohi: E ke atolasio anai ki te Aliki, tou Atua, pea e ke tauhi anai kia ia toko tahi.
9Nee toe taki leva ia e te tiapolo ki Selusalemi, o fakatuu i te potu maoluga o te fale tapu, pea nee ina ui leva kia ia: Kapau ko te Alo ia koe o te Atua, fakato ia koe i heni ki lalo, koteuhi e kua tohi:
10 E ina tuku anai ni fakatotonu ki tana kau aselo o uhiga mo koe,
O tupu ke natou taupau ia koe; 11pea:
E natou amo anai ia koe i onatou nima,
Ke aua naa i tou vae i he maka. 12Nee tali leva e Sesu kia ia: Kua fakaha: Aua pe naa ke ahiahii anai te Aliki, tou Atua.
13I te osi o tona fakahalai aki te u fahiga fuli aena, nee fakamamao leva te tiapolo ia ia o kaku ki he tahi temi faigamalie.
Kamata o te gaue a Sesu i Kalilea
14Ko Sesu, nee kofu leva e te Laumalie Maonioni, nee toe liliu leva ia ki Kalilea, pea nee mafola leva tona logologona i te fenua katoa. 15Nee akonaki ia ia i te u sinakoka, pea nee fakakololia kia ia te hahai katoa.
Sesu i te sinakoka o Nasaleti
16Nee alu leva ia Sesu ki Nasaleti, ae nee lahi age ai ia ia, pea, o hage ko tana fai mahani, nee hu leva ia ia ki te sinakoka i te aho o te sapato. Nee tuu leva ia ia ki oluga ke lautohi, 17pea nee fakatoo age leva kia ia te tohi a te polofeta ko Esaia. I tana folahi te tohi, nee ina mau leva te kogamea ae nee tohi ai:
18 E ia te au te Laumalie o te Aliki,
Koteuhi kua ina takai lolo au ke au fakaha te logo lelei ki te kau masiva;
Nee ina fekaui mai au ke au fakamauli natou ae e natou mau he loto kua fasifasii,
19 Ke fakaha ki te kau pilisoni te ateaina,
Pea ki te kau kivi te ava o te u mata,
Ke fekau ke olo i te lauatea te kau popula,
Ke fakaha he tau o te kalasia o te Aliki. 20Pea osi, nee ina pupunu leva te tohi, o fakatoo ki te tagata faifekau, pea nofo leva ia ia ki lalo. Ko natou fuli ae nee nonofo i te sinakoka, nee sisio fakamamau kia ia.
21Pea nee ina kamata leva te fakaha kia natou: I te aho nei kua hokosia te folafola aeni o te tohi, ae nee kotou logo ki ai. 22Pea nee fakamooni fuli te hahai kia ia; nee natou punamauli i te u folafola o te kalasia nee mavae mai tona gutu, pea nee natou ui: Pe e mole ko te foha ia ia o Sosefo? 23Nee ui leva e Sesu kia natou: E lagi kotou fakauhiga anai kia au te taagalea aeni: Toketa, fakamauli mua ia koe totonu; pea e kotou ui mai anai kia au: Fai i heni, i tou fenua totonu, te u mea fuli ae nee matou logo nee ke fai i Kafanaume. 24Kae, nee ina toe ui leva, e au fakaha mooni atu kia koutou, e mole he polofeta e tali lelei i tona fenua. 25E au fakaha mooni atu kia koutou: nee kaugamalie te u finetaka i Iselaele i te temi o Elia, i te temi ae nee tapunu ai te lagi o tau tolu mo mahina ono pea nee to ai leva he hoge lahi i te kele katoa; 26kae nee mole fekau Elia ke alu ki he tahi o natou, gata tahi ki he finetaka i Salepeta, i te fenua o Sitone. 27Nee kaugamalie foki te kau kilia i Iselaele i te temi o te polofeta ko Eliseo; kae nee mole fakamaa he tahi o natou, gata pe kia Naamane, te tagata Silia.
28Nee natou itaita fuli leva i te sinakoka, i tanatou logo ki te u mea aena. 29Pea nee natou tutuu leva ki oluga, o kapu ia ia mai te kolo, pea nee natou taki leva ia ia o kaku ki te tumutumu o te mouga ae nee fakatuu ai tonatou kolo, o tupu ke natou li ifo ia ia ki lalo. 30Kae nee fakalaka leva ia Sesu i te lotomalie o natou, o alu.
Kapu o te u temonio i Kafanaume
31Nee hifo leva ia ia ki Kafanaume, kolo o Kalilea; pea nee akonaki ia ia i te aho o te sapato. 32Nee natou punamauuli i tana akonaki, koteuhi nee palalau ia ia mo he pule.
33Nee nofo foki i te sinakoka he tagata ae nee nofo ai he laumalie o he temonio uli, pea nee kalaga leva ia ia mo he leo lahi: 34Oie! pe e i ai he mea ia matou mo koe, Sesu mai Nasaleti? Nee ke hau o fakapulii matou? E au iloi pe ko ai ia koe: ko te Maonioni a te Atua. 35Nee pupulai leva ia ia e Sesu, o ui kia ia: Fakalogologo, pea ke mavae i te tagata aena. Pea nee li leva e te temonio te tagata ki lotomalie o te fakatahi, pea nee mavae leva ia ia maia ia, o mole ina fai he mea kovi ki te tagata. 36Nee natou mataku fuli leva, o natou feuiaki: Kotea te folafola aeni? E lagiaki foki ia ia i te pule mo te malohi ki te u laumalie uli, pea e natou mavae! 37Pea nee mafola leva tona logologona i te u potu fuli o te fenua.
Fakamauli o te fae o te ohoana o Petelo
38I tana mavae mai te sinakoka, nee alu leva ia ia ki te api o Simone. Nee fiva lahi te fae o te ohoana o Simone, pea nee natou kole leva kia Sesu o uhiga mo ia. 39Nee punou leva ia Sesu ki te fafine, pea nee ina munai leva te fiva, pea nee mavae leva te fiva ia ia. I te temi pe aena, nee tuu ake leva te fafine ki oluga, o selevisi kia natou.
Ni ihi fakamauli o te u mahaki
40I te to o te laa, ko natou fuli ae nee natou mau ni hahai nee mahaki i he fahiga mahaki pe, nee natou taki age leva natou kia Sesu. Nee hili leva e Sesu ona nima kia natou taki toko tahi, pea nee ina fakamauli leva natou. 41Nee mavae foki ni temonio mai ni hahai kaugamalie, o kalaga mo ui: Ko te Alo ia koe o te Atua. Kae nee pupulai natou e Sesu pea nee mole ina fakagafua age kia natou ke palalau, koteuhi nee natou iloi ko te Kilisito ia ia.
42I te mafoa leva o te aho, nee mavae leva ia Sesu o alu ki he kogamea toafa. Nee kumi leva ia ia e he hahai kaugamalie, pea i tanatou kaku kia ia, nee natou fia taofi leva ia ia ke aua naa toe mavae ia natou. 43Kae nee ina ui leva kia natou: E tonu foki ke au fakaha ki te u kolo ake ae te logo lelei o te puleaga o te Atua; koteuhi ko te tupuaga aia o toku fekaui mai ai. 44Pea nee akonaki ia ia i te u sinakoka o Kalilea.
S'ha seleccionat:
EVASELIO A LUKA 4: WB2011
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland