Matiu 25
25
NA SOPENA 25.
1Me na rani hina ra sanu hi na tailahi tipala, ra uluo hajae na havulatea, telavi ra pulara tau, tevano sura varipahoi me na tajua taha talahia. 2Molima hira temuhamuha, molima hira telolorani. 3Suria ra taha muha telavi ra pulara tau, tesalavi na vurai hira: 4maa ra taha lolorani telavi na vurai me na pilara huro valui ra pulara. 5Na tajua taha talahia motohotoho taiti reji, hire vunuvunu tenavu toho. 6Maa me na pohitupu teroho na ore, Mo! na tajua taha talahia! Otonumai sura varipahoi mea. 7Tau ra uluo hajae vunuvunu nee telije, tehoroti susuhi ra pulara. 8Tau ra taha muhamuha teaso ta me ra taha lolorani, teaso, Otorahu ta meamamu te pilamiu vurai ivuraiamamu; suria vahatea ra pulamamu timate. 9Maa ra taha lolorani tetami, teaso, Mosatavere usu suriamamu suriamiu mono: motahonae otovano me ra taha ua, otovolivoli suriamiu. 10Telaho toho sura volivoli, na tajua taha talahia monumai; tau hire ra taha vavanao tau, teruhusahe valuia me na hanihani hi na talahia: tau na matana pea motirihoro. 11Taupa ra uluo hajae itatea tenumai, teaso, Moli, Moli, oinuni na tirihoro ta meamamu. 12Maa motami, moaso, Aaso taharahu ta meamiu, asapinisiamiu. 13Otomataamiu suria, otosapinisi na pohi hi Matu i tajua inumai pa, otosapinisi na matana maso hina.
14Suria mopala tajuamotear, vahatea ivano me na vanua motatea, moore ra pilana tajua, morahu ra pilana sanu ta mera. 15Morahu na mane molima ta me motea, na mane morua ta me motea, na mane motea ta me motea; morahu ta mera pala ra sera pinisi; tau molaho. 16Tau vilevileahi na tajua neeno taha lavi na mane molima movano, movolivoliahi, movarao nie, tau movera na mane molima maa. 17Palahi mono na tajua taha lavi na mane morua movera moruamaa. 18Maa na tajua taha lavi na mane motea hasa movano, moheli na tano, mojapovihoro na mane pilana moli hina. 19Tau, minemine hina, na moli hi ra tajua naa monumai, motuhara. 20Tau na tajua taha lavi na mane molima monumai, molavi na mane molima maa, moaso, Moli, orahu mine ta meau na mane molima: orenia, atalavi na mane molima maa. 21Na moli hina moaso ta mea, Iniho ovei susuhia, iniho na taha tahonae, na taha taharahu: otaharahu mine suri ra sanu satavere, aiveho oimata ra sanu ra tari: oiejieji me na ejieji hi na moli himu. 22Tau na tajua taha lavi na mane morua inie mono monumai, moaso, Moli, orahu mine ta meau na mane morua: orenia, atalavi na mane morua maa. 23Na moli hina moaso ta mea, moaso, Iniho ovei susuhia, iniho na taha tahonae, na taha taharahu: otaharahu mine suri ra sanu satavere, aiveho oimata ra sanu ra tari: oiejieji me na ejieji hi na moli himu. 24Tau na tajua taha lavi namane motea hasa inie monumai, moaso, Moli, inau apinisiho, iniho na taha lolohauhaua, omeje na heli na sanu iniho osalavoe, omeje na ari huhurera sanu iniho osajalara: 25inau aine, avano, ajapovihoro na pilamu mane me na tano: orenia, oilavi na pilamu mane. 26Maa na moli hina motami, moaso ta mea, Iniho na taha oso, na taha vueraho, iniho opinisiau ameje na heli na sanu asalavoe, ameje na ari huhurera sanu asajalara; 27motahonae ojuri na pilau ihane me na tajua taha mata na mane suria, tau inau atanumai tau, asitalavi na pilau sanu me na sopena maa morio. 28Otolavituhe na mane mea suria, otorahu ta me na taha na mane na havulatea ae. 29Suria itea va na pilana sanu ae, tirahu ra sanu maa ta mea, tau ra pilana sanu itavere: maa itea va na pilana sanu mojoa ae, tilavituhe na sipilana sanu mea. 30Tau otoputuhe na tajua oso me na pohipohitupu: na tahi me na mamahanu itoho ae. 31Maa me na rani hi Matu i tajua inumai pa me na majamajana, ra enjel vunuvunu mono valuia, isihe me na sihesihe hi na majamajana: 32ra tanoho me ra vanua vunuvunu tinumai huhurahi me na pahona: ivileileira, pala tajua taha mata ra sip movileileira sip ture ra nane: 33ijuri ra sip me na matuana havena, ijuri ra, nane me na marauna. 34Tau Na Moli iaso ta mera me na matuana havena, iaso, Otonumai, amiu ra taha tahonae hi Tamau, otoruhusahe me na vanua taha vavanao suriamiu me na mamjiha: 35suria inau amarohati, amiu otorahu hau: inau aarorou, amiu otorahu mau pei: inau na tariesao, amiu otolaviau: 36inau alaho malamala, amiu otovisiau: inau arojo, amiu otonumai meau: inau atoho me na ima hi na hajihajiri, amiu otonumai meau. 37Tau ra taha tataholo titami mea, tiaso, Moli, me na hisa amamareniho omarohati, amamarahu hamu? iniho omarorou, amamarahu mamu pei? 38Me na hisaamamareniho na tariesao, amamalaviho? iniho olaho malamala, amamavisiho? 39Me na hisa amamareniho orojo, otoho me na ima hi na hajihajiri, amamanumai meho? 40Tau Na Moli itami mera, iaso, Aaso taharahu ta meamiu, Pala amiu otovea me motea hi ra tuau naa, io, me na taiti hira, palahi otovea meau. 41Tau iaso ta mera, me na marauna havena mono, iaso, Otolaho tureau, amiu ra taha oso, otovano me na hapu taha hani tuitui tuitui, na hapu taha vavanao suri na tamate me ra pilanaenjel: 42suria, inau amarohati, amiu otosarahu hau: inau amarorou, amiu otosarahu mau pei: 43inau na tariesao, amiu otosalaviau; inau alaho malamala, amiu otosavisiau; inau arojo, atoho me na ima hi na hajihajiri, amiu otosanumai meau. 44Tau hire mono titami, tiaso, Moli, me na hisa amamareniho omarohati, e omarorou, e otariesao, e olaho malamala, e orojo, e otoho me na ima hi nahajihajiri, amamasamata iniho? 45Tau itamimera, iaso, Aaso taharahu ta meamiu, Pala amiu otosavea me motea hi ra taha taiti naa, palahi otosavea meau. 46Tau hire naa tivano me na vanua oso tuitui tuitui: maa ra taha tataholo tivano me na mauri tuitui tuitui.
S'ha seleccionat:
Matiu 25: TLM9109
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
This is a historic text maintained by the British and Foreign Bible Society.