Matayo 8
8
1Adi kasi kiralese dre di, dia lezolepi bi dii liki adi vuse. 2Mi no ka, karidia ali adi vuna dre, dre tandizo adi kandra, dre tazo, ki di, Miri, mi le di, mi kicoa ma lede. 3Adi dre ai dreka tejizo, dre akodi tabezo, dre tazo, ki di, Ma le; a kolede mi wa. Drañano akodi kari akeda. 4Yesu dre tazo adidre, ki di, Mi no ka, mi kota ta diadre tejia ko; mi kodo ami lati lizo, mi kotada mi koanidre, dre nga fele Mose dre togia tale di fezo, tandu tadazo aiidre di.
5Adi kosi Kapanaumana dre di, kendurioni alidre adi vuna dre adi ti lizizo we, 6Dre tazo, ki di, Miri, ama adremakandra aiyi jona dra dre ole abile di, adre lizale we. 7Adi dre tazo adidre, ki di, Ma kali, dre akodi tedrizo. 8Kendurioni dre ta akozo, dre tazo, ki di, Miri, su mi dre sizo ama jona ko: mi kota ta alokodia, ama adremakandra lederuda. 9Ma dre dia mi bale lanjilanji dise, ama mi lanjilanji tukutukuse: ma dre tazo tukutuku nididre, ki di, Mi koli, adi dre lizo; ma dre tazo azinadre, ki di, Mi kali, adi dre alizo; ama adremakandradre, ki di, Mi ko’o tai nidi, adi dre ozoa. 10Yesu koyi tai nidi dre di, lindrina gaga, adi dre tazo mundia alilepi i vuse dii dre, ki di, Ma ta amidre pati, ki di, Ta ka’ile murungu ngoro nitini di dia Yisarele diikia ketona ma kusu tejia ko. 11Ma dre tazo amidre, ki di, Mundia bi kali tabulese, kurulese be dreki lirizo Iburaimu e, Yisaka e, Yakobo be, mataya bu adea na: 12i dre mva mataya adea bezo tinimva amvele di na: tai ngozo mindrase di e, tai si cizo di be kadre nale. 13Yesu dre tazo kendurionidre, ki di, Mi kodo ami lati lizo; ngoro mi dre ka’ile di tini, a ko’o midre. Adremakandra tedriruda saa nadise.
14Yesu kosi Peteroni jona dre di, i no akodia adra aiyira’a ruba veve. 15Adi dre akodi dreka tabezo, rubana velepi di akedre; adi dre ngazo kuru, dre tai ozo adidre. 16Kitu kondi di, aii doki mundia teri konji dre rule dii adi vuna: adi dre teri drozo tai alo dise, dre dia drafulepi dii tedrizo o̱ei. 17A ko’oro tai Yesaya adea, nabi e, akele, tara’a, ki di, Adi do amaki ruba ta ozo lolo ko dii, dre amaki dra konji dii dozo.
18Yesu kono dia lezolepi we dii i lagase dre di, adi fe tai i dre njizo ta’ana di. 19Dia ta‐tisilepi di dre alizo, dre tazo adidre, ki di, Miri, ma koli mi vuse vo angodi ya mi dre lizo di. 20Yesu dre tazo adidre, ki di, Bu kalakia dii be, jo ariakia kuru dii be; vo dri bazo di Adamuni Mva se di yokodo. 21Dia tayilepi azina di dre tazo adidre, ki di, Miri, mi koka’i dridri ma li dre ama ata bazo buna. 22Yesu dre tazo adidre, ki di, Mi kali ma vuse; mi kota’i dia dralepi dii koba aiiki tandi dia dralepi dii buna.
23Adi kasi kaluṅbana dre di, dia ai tayilepi dii liki adi vuse. 24Mi no ka, lia vilepi ṅboṅbo dii ngadre yi murungu di na, kadre nitini yi nga kaluṅbana di, adi dre aiyizo. 25Aii dreki alizo adi vuna, dre adini torozo, dre tazo, ki di, Mi kotedri ama; ma are drale. 26Adi dre tazo aiidre, ki di, Mì ro tai roro adose ya, A mì tai ka’ile ca di be? Velero adi ngadre kuru, dre lia, yi murungu di be, ndrizo; nga dre gozo adrele si. 27Ago niiki lindri dreki gazo gaga, dre tazo, ki di, Ago nidi adre ngoro ado tini ya, lia, yi murungu di, aii dre akodi tai ka’izo ya?
28Adi kaca ta’ana la’u Gadarakia na dre di, dia iri teri konji dre rule dii, aii dre afora’a mogolese, kakaraka we, kadre nitini dia alo di kicoa lavule lati nadi ase tejia ko, kusuki adi. 29Mi no ka, aii treki kuli drase dre tazo, ki di, Amà adre ado tai o mi be ya? Mi Mva Nzambe adea. Mi ali nole kiono amaki o asuale ya? 30Kezia bi dii dreki adrera’a nga ña aii mvumvu. 31Teri konji dreki adi ti zizo we, dre tazo, ki di, Mi dro mà di, mi komu mà kezia a. 32Adi dre tazo aiidre, ki di, Mi koli. Aii dreki afozo, dre sizo kezia a: mi no ka, kezia o̱ei ra goloko ase yi murunguna, dreki todrazo yina. 33Akodi kezia likilepi dii lapalapa, dreki lizo ba murungu di na, dre tai acalepi dia daimona dreki rule diikia tazo. 34Mi no ka, dia o̱ei ba murungu di lese, afodre Yesuni kusu: aii kono adi dre di, aii ziki adi ti we adi konjiro aiiki kofula ase.
S'ha seleccionat:
Matayo 8: LOG
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
first printed by the British and Foreign Bible Society in 1924 and 1927.