San Juan 5
5
Jesús reonie ttu unbiyuu daa yatti niꞌa náni
1Dequide lania nna bisía ttu laní gue ca benni Israel. Jesús diattebe Jerusalén. 2Lheꞌe yiesi Jerusalén gaxxaba atta do roꞌo puerta atta ritaꞌa ca carneꞌe, nía re ttu pozo inda te láni Betesda leni tisa hebreo. Sa biꞌaba pozoha nna daa corredori sia gayu roꞌo puerta xxeni gueni. 3Lheꞌe corredoriha te ixeru ca benni rani, nu xua loni lhe nu xi lhe nu daa yatti niꞌa náni lhe ribedacana ita lo indaha. 4Cumu ttu ingeli daa iyyabaaha nna guadú guadúba riyinnibi lheꞌe pozoha ruttábi lo indaha. Benni riyúbani ritaꞌaxxi lheꞌe indaha dequide rebe si loe nna, reríatteba bixaba isagüe yuꞌu cuerpu gueni. 5Nía sela ttu unbiyuu chi uca rerua yuꞌu xxunu ida (38) ranina. 6Atti biláni Jesús nua tena nía, bine dequi isá chi uca ranina lhe lee nna ráttebe na:
—¿Si gua rdacalu eyacalu?
7Unbiyuu raniha nna becabina ráne:
—Benni bananie neti, tsa läganu teti neti qui ugaꞌana neti lheꞌe pozo-na gansi chi ritá lo inda-na. Cadaba runia gaꞌaya nna attu nu subila riubinna ritaꞌana.
8Jesús re na:
—Guadha nna bodaxxutte nu rattalu loenna udátte.
9La uratteba nna beaca unbiyuuha, atti bodaxxuttebana nu uttána loniha, udána requina nía. Ttiaca la sá-na ancana sá redí le ca benni Israel. 10Ca nu lo gue ca benni Israel nna rácana unbiyuu beacaha:
—Nasá anca sá redí leri. Bittu dica eyojalu nu uttalu loen-na.
11Unbiyuuha nna becabina rána:
—Cuinaba Benni beonie netiha re neti: “Ulhidha nu uttalu loen-na nna udá tte.”
12Ca unnuha nna ráttebacan na:
—¿Nú nua rán lu: “Ulhidha nu uttalu loen-na nna udátte”?
13Unbiyuu beacaha nna ni lä yuna nú benni nua re na anía, cumu Jesús nucala benitti lo benniha lagüi gue ca benni seꞌe nía. 14Dequila nna guattiꞌa Jesús nua lheꞌeliꞌa gue yotuha, nianna ráttebe na:
—Begüiarga, urgabi chi beacalu. Bittu eyequilu edeonlu ttu nu lä anca tsee, qui lä satelu attu nu lä anca tsee xxenru.
15Unbiyuuha nna güiattebana guattixxiꞌenna ca nu lo gue ca benni Israel dequi Jesúsba Benniha beonie na.
Jesús rixxiꞌe, lee anque Xiꞌini Tata Do Iyyabaaha
16Lo niꞌa gue unnuha nna besía le ca nu lo gue ca benni Israel Jesús de runie nua sá redí letu. 17Ttiaca Jesús becabie guecani re cana:
—Tata quia nna satíaba riben Benniha sina, axtaba nasá ribenie. Denuala nna neti nna renguaba.
18Lo niꞌa gue unnuha nna ca nu lo gue ca benni Israel nna adíla bedona lecani utticane. Cumu läga sunru bittu rudoe tisa edí lee sá redí le ca nu Israel, ráguabe anque ttuba leni Tata Do Iyyabaaha de re raca tata guee Benniha.
19Nianna becabi Jesús re cana:
—Neti Xiꞌini Tata Do Iyyabaaha gualíbatia ria le: Läga aca quia unia ttu bixa suntteba neti. Nu rugüiaba runi Tataha nna runia. Iyába nu runi Tataha nna runia. 20Cumu Tataha nna racanie quia neti Xiꞌinie-ni, denuala nna ruleꞌenie neti iyába nu runie. Nu xxenirla atti ca unní chi uleꞌe len neti, nu unna ebanin lele gansi chi bilenle na. 21Cumu attiba Tataha runie reacani ca nu yatti-na rote elha nabani guecani, aníaguaba neti Xiꞌinie-ni rutea elha nabani gue ca benni raca lasia utea elha nabani guecani. 22Tataha nna läganu benni runie elha uxtisi gueni, las nába, neti Xiꞌinie-ni, chi bocaꞌane iyá qui unia elha uxtisi. 23Anáchu nna iyá ca benni rapacana Tataha respeto nna gapaguabacana neti Xiꞌinie-ni respeto. Nu bittuba rapana neti respeto nna bittuguaba rapa nua respeto Tata quia do iyyabaaha. Lee udhelhe neti benni anca Xiꞌinie-ni.
24’Neti nna gualíbatia ria, benni rudo nagani gue nu ria nna riaguaba leni benni udhelhe neti, unnuha nna guateba elha nabani gueni ttu dia lii, läga tsia nittina. Benni yattiba uca nua lo Tata Do Iyyabaaha, nnanna nna yuꞌu elha nabani gueni lo Ben-na. 25Neti nna gualíbatia ria le chi daa isía ura ria-ni, nnanna nna uraba Benni chi bisía, atti iyienini ca benni anca attiba nu yatti lo Tata Do Iyyabaaha tsiꞌa, neti Xiꞌinie-ni, ca nu udo nagacani quia nna guaca banbacana. 26Cumu attiba Tata quia do iyyabaaha lee rute elha nabani, aníaguaba neti Xiꞌinie-ni benguabe aca benni rute elha nabani. 27Chiguaba bocaꞌane las náya qui unia elha uxtisi de anca Benni unbiyuu daa iyyabaaha. 28Bittu ebaninle gue nu ria-ni, cumu chi isía ura atti iyienini iyába ca nu yatti yuꞌu lheꞌe ca baa-na tsiꞌa. 29Ca nu beni nu anca lhatsiru nna eyadhacana qui aca bancana ttu dia lii iyyabaaha, ca nu beni nu lä anca tsee nna eyadhacana qui tsiacana atta lexúaha.
Jesús rixxiꞌe gaxasiná tte daani ca benni nuxa anque
30’Neti nna läga aca quia unia ttu bixa suntteba neti. Runba elha uxtisi attiba rába Tata quia neti. Elha uxtisi runia-ni nna ancana ttu elha uxtisi lhixxa, cumu neti läga reguila unia nu ruꞌu lasia, runba nu ruꞌu le benni udhelhe neti. 31Cumu gansi la netiba rixxiꞌaya gue nuxa anca nna nu rixxiꞌaya nna lägabi daca nua. 32Attu benni subi liba rixxiꞌe nu anca quia, neti nna yua nna nu re nna ancana nu gualí. 33Juan utixxiꞌababi nu anca gualí leni ca nu udhelhale güia güennaba tisaha. 34Neti lägabi reasatia nuxa benni quixxiꞌana quia, suna rorexxaba lele gue nu rá Juan qui lhále, bittu tsia nittile. 35Juan ancabi attiba ttu gui ralhana riguꞌuna xieni. Lebiꞌi nna ttu sattirba bebe itta lele de bieninle nu rábi. 36Ttiaca te attu nu rixxiꞌarna gue nuxa anca atti nu utixxiꞌa Juan, delába ca elha ban lasi runia-ni, cumu laba Tata quia do iyyabaaha rute ca ben-na len neti. La ca ben-naba rixxiꞌaque dequi gualí lee udhelhe neti. 37Anáguaba Tata quia Benni udhelhe neti, rixxiꞌaguabe nuxa anca, masquiba lebiꞌi nna bittu chi bieninle tsiꞌe, niguaba lä chi bilenle lhe. 38Bittuguaba yuꞌu ca tisa gue Ben-na lheꞌe lastoole lhe cumu de bittu ria lele neti Benni udhelha Benna. 39Lebiꞌi nna tsitsiba rudhetile ca tisa dia lo ca sitsi gue Tata Do Iyyabaaha, cumu ruxxen lele sattiꞌale lo ca benna elha nabani gatta ttu dia liiba guele. Gua liba ca ben-na unná rixxiꞌaque quia, 40ttiaca lebiꞌi nna bittu raca lele itale len neti qui gatta elha nabani guele ttu dia lii.
41’Neti nna lägabi reasatia nuxa innána dequi neti anca Benni ra xxeni leni, 42cumu chiba anca biatia le, gua yuxeaba lebiꞌi nna läga raquinle gue Tata Do Iyyabaaha. 43Neti daya cuenta gue Tata quia, lebiꞌi nna bittu raca uyúle neti. Lala ttirca attu nuxa dana cuenta gue la labana nna unnuha liba raca ruyúle. 44Gaga nua tsia lele quia, cumu la lebiꞌiba rá loesle dequi ancale nu ra xxeni leni, läga runle qui Tata Do Iyyabaaha Benni tturbe do anque Dios innee ancale nu ra xxeni leni. 45Bittu aquinle dequi netiba udienni loa le lo Tata quia do iyyabaaha, Moisés biꞌini xen lele gue nu unnebiha liba udienni lobi le. 46Ttirca ria lele gue nu unne Moisés, tsiaguaba lele quia, cumu quionna rixxiꞌa Moisés lo ca sitsi-na. 47Ttiaca gansi bittuba ria lele gue nu rá lo ca sitsi benbi-na, ¿gasná tsia lele gue nu rpea le-ni?
S'ha seleccionat:
San Juan 5: zaq
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2021, Wycliffe Bible Translators, Inc. All rights reserved.