Jɔ̃́ɔ́ 14
14
Jízɛ̀ mɔ̀ hwìè mu ɖé Ɓǎɔ̀ gboɛ
1Ké Jízɛ̀ cɛ̃ɛ ma ɔ ɖeín-nà-nyɔ̀ ɓěɔ̀ gbo, ké ɔ ɖá, “Ɓěǐn ɖá ɓɛ́ ɓěɛ̀ hwòɖǒ ké ɖé ɖei kpá. Ɓě taɓa Gèɖèpɔ́ɔ̀ hwìɖǐǐ, ɓɛ́ ɓě ké mɔ́ún hwìɖǐǐ taɓa ɖekè. 2Ɓí-dyù ɓáún-ɓáún nì ɖé ḿ Ɓǎ ɓíɖí-gbǒǔn, ké ḿ nì muɛń, ɓɛ́ ḿ ké ɓě bìì pá ɖò naɓaà. Ɔ seɔ́ má ná nìǐn, ḿ seɔ́ ɓě ɖɛ nìà kɛ gbo cɛ̃ɛ́ mu. 3Ké ɔ jǔ ké ḿ dyi mu, ké ḿ dyi ɓě bìì pá ɖò naɓaà ní, nìí, ní mu ɖe dyiìn, ɓɛ́ ḿ ké ɓě ḿ mìɔùn gbo dyà, ɓɛ́ ɓě ké dɛ̀ ní muà nììn nyɛɛ nì ɖekè. 4Ɓě dyuò kà ɓɛ́ ɓě ké dɛ̀ ḿ nìà muɛń nyɛɛ nyiniɛ nyuɛ.”
5Hwɛ̀ ké Tɔ̀mɔ́sì cɛ̃ɛ ma ɔ gbo, ké ɔ ɖá, “Bounɓo, à se dɛ̀ m̀ nìà muɛń nyɛɛ dyuò. Nìí, xwɛ̌ à ɓɛ́ìn hwìè mu ɖéɛɛ dyuòɛ̀ kɛ́?”
6Ké Jízɛ̀ cɛ̃ɛ ma ɔ gbo, ké ɔ ɖá, “Mɔ̄ mɔ̀ hwìèɔ̀. Mɔ̄ mɔ̀ jǎàɔ̀. Mɔ̄ mɔ̀ fɛ̀ɛ̀ɔ̀. Nyɔ ɖò se ɖé Ɓǎɔ̀ gbo muɛ ɓɛ́ìn, ɔ mùìn dyɛ ɖé ḿ mú hwɛ̀. 7Kà ɓɛ́ ɓě ɖǎà ḿ dyí dyuòɛɛ, ɓě mu ḿ Ɓǎ dyí dyuòùn ɖekè. Sɔ̀ìn dà ké dyúa muɛɛ, ɓě dyuò ɔ dyí, ké ɓě ɖǎ ɔ dyé.”
8Hwɛ̀ ké Féɖò cɛ̃ɛ ma ɔ gbo, ké ɔ ɖá, “Bounɓo, tɛ̀mɛ̀ìn à Ɓǎɔ̀ dyí. Ɖɛ séín à mɔ́ɛɛ nìàǒ wɛ̀.”
9Ké Jízɛ̀ zà ma ɖé wuɖu, ké ɔ ɖá, “Ḿ ɖǎ ɓě gbo hwèɖèìn, ké m̀ séè ḿ dyí dyuò keè, Féɖò? Nyɔ ɓě ɓɛ́ wa ɖǎ ḿ dyéɛɛ, wa ɖǎ Ɓǎɔ̀ dyé. Nìí, ɖɛ́ kɔ̃̀ jè m̀ ɖá ḿ mɛ tɛ̀mɛ̀ìn kà Ɓǎɔ̀ m̀ dyíɛ́? 10M̀ seɛ jǎà po kà ɓɛ́ ḿ nì ɖé Ɓǎɔ̀ mú, ké Ɓǎɔ̀ nì ɖé mɔ́ún múɛɛ̀? Wuɖu ɓě ɓɛ́ ḿ cɛ̃à ɓě gboɛɛ se ɖé ḿ mìɔùn mú sɔ̀ìn. Ɓǎ mɔ̀ nyɔ cĩ́à ɖé ḿ múɛɛ mɔ̀ nyɔ nìà ɔ nììn kũ̀à ɓě nyuɛń nyɛ̀. 11Ɓě mɛ po ní wuɖuɔ̀ jǎà kà ɓɛ́ ḿ nì ɖé Ɓǎɔ̀ mú, ké Ɓǎɔ̀ nì ɖé mɔ́ún múɛ. Ɓě se ɖɛa jǎà po ní, nìí, ɓě mɛ po ní wuɖuɔ̀ jǎà ɓó kũ̀à ɓě nìà kɛ jè. 12Ḿ cɛ̃ ɓě jǎà gbo, nyɔ ɓɛ́ ɔ taɓa ḿ hwìɖǐǐɛɛ mu kũ̀à ɓě ɓɛ́ ḿ nyuà kɛɛ nyuùn. Ké ɔ mu kũ̀à kpa ɖɛ ɓě ɓɛ́ wa zi nyɔ ɓě nìà kɛ dyíɛɛ nyuùn, sepóɛɖé ḿ nì ɖé Ɓǎɔ̀ gbo muɛń. 13Ní mu ɖɛ séín ɓɛ́ ɓě zɔ̀ ɖé ní nyɛ́nɛ́ múɛɛ nyuùn, ɓɛ́ nyɔǔn ɓě ké Gèɖèpɔ́ɔ̀ dĩ́ín-dĩ̀ìnɔ̀ dyé dyììn ɖé mɔ̄ mɔ̀à Dyúɔ̀ kɛɛ mú. 14Ɓě dyi ɖɛ ɖò zɔ̀ ɖé ní nyɛ́nɛ́ múín, ní muɛ nyuùn.
Zùù Hwɛ̀ǐn-Hwɛ̀ǐnɔ̀ mu dyiìn
15“Ɓě dyi ḿ mú ɖɛ̀ɓɛ̀ǐn, nìí, ɓě mu ɖɛ ɓě ɓɛ́ ḿ cɛ̃ ɓě gboɛɛ nyuùn. 16Ké ní mu Ɓǎɔ̀ dyi dièìn, ké ɔ mu ɓě Gbo-kpá-nyɔ̀ ɖò gbo tòùn. Ɔ mɔ̀ jǎà Zùùɔ̀, ké ɔ mu ɓě gbo nììn kánáá pū. 17Ɓóɖóɛ̀ nyɔ ɓě se ɔ jè dyi kpɔ̃ɔ ɓɛ́ìn, sepóɛɖé wa se ɔ dyéɛ ɓɛ́ìn, ké wa se ɔ dyí dyuò. Kɛɛ ɓě mɔ̀ùn dyuò ɔ dyí, sepóɛɖé ɔ nì ɓě gbo, ké ɔ cĩ́ ɖé ɓě mú.
18“Ḿ se ɓě xwíè sèɛ̌ mu. Ní mu ɓě gbo ɖe dyiìn. 19Ɔ ɖǎǒ nì kpã́ún ní, ɓóɖó-kpàà nyɔ ɓě se ḿ dyéɛ mu ɖe, kɛɛ ɓě mɔ̀ùn mu ḿ dyéìn. Ké ḿ nì cĩ́ɛń jèɛɛ, ɓě mɔ̀ùn mu cĩ́ìn ɖekè. 20Wéa dyi dyiín, ɓě muɛ dyuòùn kà ɓɛ́ ḿ nì ɖé ḿ Ɓǎ múɛ, ké ɓě muɛ dyuòùn kà ɓɛ́ ɓě nì ḿ mú kà ḿ nìà ɖé ɓě mɔ̀ùn múɛ.
21“Nyɔ mɔ̀ nyɔ ɓɛ́ ɔ kpɔ̃ ɖɛ ɓě ɓɛ́ ḿ cɛ̃à kɛɛ dyi, ké ɔ nyu waa, ɔ mɔ̀ nyɔ ɖɛ̀ɓɛ̀ ḿ múɛ. Ḿ Ɓǎ mu nyɔ mɔ̀ nyɔ ɖɛ̀ɓɛ̀ ḿ múɛɛ mú ɖɛ̀ɓɛ̀ìn, ké mɔ́ún mu ɔ mú ɖɛ̀ɓɛ̀ìn ɖekè, ké ní mu ḿ mìɔùn ɔ dyí tɛ̀mɛ̀ìn.”
22Ké Júdà cɛ̃ɛ ma ɔ gbo, ké ɔ ɖá, “Bounɓo, xwɛ̌ m̀ ɓɛ́ìn m̀ mìɔùn à dyí tɛ̀mɛ̀ìn, ɓɛ́ m̀ ké se m̀ mìɔùn ɓóɖó-kpàà nyɔ ɓě dyí tɛ̀mɛ̀ìn nyɛ́?” (Nyɔ diè ma kà ɖɛa dyiɛɛ, ɔ se ma Júdàà nyɔ mɔ̀ ma kà Ɛ́sìkáɖìɔ̀ kɛ.)
23Ké Jízɛ̀ jǔ ma ɔ gɔ̃̌, ké ɔ ɖá, “Nyɔ ɓɛ́ ɔ ɖɛ̀ɓɛ̀ ḿ múɛɛ mu ní wuɖu nyuùn. Ḿ Ɓǎ mu ɔ mú ɖɛ̀ɓɛ̀ìn, ké ḿ kè ḿ Ɓǎ mu ɔ gbo dyiìn, ké à mu ɔ gbo cĩ́ìn. 24Nyɔ ɓɛ́ ɔ se ḿ mú ɖɛ̀ɓɛ̀ɛ se ní wuɖu ɓěɔ̀ nyuɛ́ mu. Wuɖu ɓɛ́ ɓě wɔ̃́à kɛɛ, ɔ se ḿ mú sɔ̀ìn, kɛɛ ɔ sɔ̀ìn ɖé Ɓǎ mɔ̀ nyɔ ɖoɓoà ḿ wɛ̃ɛ gbo.
25“Ḿ nì nɔ̄ ɓě gbo ke, ké ḿ nì ɓě ɖɛ nìà kɛ gbo cɛ̃iń. 26Nyɔ-gbo-kpá-nyɔ̀ ɓɛ́ ɔ mɔ̀à Zùù Hwɛ̀ǐn-hwɛ̀ǐn ɓɛ́ ḿ Ɓǎ muà tòùn ɖé ní nyɛ́nɛ́ múɛɛ mu ɓě ɖɛ séín tɛ̀mɛ̀ìn. Ké ɔ mu ɖɛ séín ɓě ɓɛ́ ḿ ɖǎ ma ɓě gbo cɛ̃ɛ ɓě hwìɖǐi dyàùn.
27“Ḿ sè ɓě gìɖìǐ gbo. Ḿ mìɔùn nììn gìɖìǐɔ̀, ɖéɛ̀ ḿ nyíà ɓěɛ̀. Ḿ seɛ ɓě nyí kà ɓóɖó-kpàà nyɔ ɓě nyíà nyɔǔn gìɖìǐɛ. Ɓěǐn ɖá ɓɛ́ ɓěɛ̀ hwòɖǒ ké ɖé ɖei kpá. Ɓěǐn ɖá ɓɛ́ ɓě ké fɛ̃̀ìn. 28Ɓě wɔ̃́ɔ, ké ḿ cɛ̃ɛ ma ɓě gbo, ké ḿ ɖá, ‘Ḿ nì muɛń, ké ní mu ɓě gbo ɖe dyiìn ɖeɛ.’ Ɓě dyi ḿ mú ɖɛ̀ɓɛ̀ ní, nìí, ɓě mu múàǔn kpáùn kà ɓɛ́ ḿ nì ɖé Ɓǎɔ̀ gbo muɛń nyɛ, sepóɛɖé ɔ kpé ɓúá dyí ké ɔ zi ḿ níǐnɔ̀ dyí. 29Ḿ ɖǎ ɓě ɖɛ ɓěa gbo cɛ̃, hwɛ̀ ɓɛ́ wa ké kpá, ɓɛ́ ɔ jǔ ké wa dyi kpáín, ɓě ké hwìɖǐǐ-taɓa-taɓa ɓéɖé. 30Ḿ se ɓě gbo wùɖùɛ̌n hwèɖèɛ̀n ɓɛ́ìn ɖe, sepóɛɖé ɓóɖó-kpà nìà kɛ wuɖuí-kɔ̃̀-nyɔ̀ɔ̀ nì dyiɛń. Kɛɛ ɔ se ḿ kpé kɔ̃ún ɓéɖé. 31Ɓóɖó-kpàà nyɔ ɓě ɓéɖé ɓɛ́ wa kéɛ dyí dyuò kà ɓɛ́ ḿ ɖɛ̀ɓɛ̀ Ɓǎɔ̀ múɛ. Ɔ jèɛɛ, kà ɔ nyu ma ḿ ɖɛ ɓě gbo cɛ̃ɛ kɛɛ, kǎà ḿ nìà wa nyuɛń nyɛ̀.
“Ɓě sɔ̀ dyí, ɓɛ́ ɓěà ké dà ɓó sɔ̀.
S'ha seleccionat:
Jɔ̃́ɔ́ 14: ƁB02
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bassa Bible © Bible Society Liberia, 2002.