Jɔ̃́ɔ́ 17
17
Jízɛ̀ ɓaà ɔ ɖeín-nà-nyɔ̀ ɓěɔ̀ bìì
1Ti Jízɛ̀ ɖǎ ma ɖɛa cɛ̃ɛ hwɔɛɛ, ɔ gmɔ̀ ma ɖé dyií, ké ɔ ɖá, “Ḿ Ɓǎ, tiɔ̀ ɖǎ dyi. Nyuɛ ɓɛ́ mɔ̄ mɔ̀à nì Dyúɔ̀ kɛɛ ké dĩ́ín-dĩ̀ìn ɓéɖé, ɓɛ́ mɔ́ún kéɛ nyu ɓɛ́ mɔ̀ùn ké dĩ́ín-dĩ̀ìn ɓéɖé. 2Sepóɛɖé m̀ nyí ḿ kpé nyɔǔn séín kɔ̃in, ɓɛ́ ḿ ké nyɔǔn séín ɓě ɓɛ́ m̀ nyíín nyɛɛ sè-ná-sèɛ̀ fɛ̀ɛ̀ nyí. 3Ké sè-ná-sèɛ̀ fɛ̀ɛ̀ɔ̀ kɛà kɛ̀. Ɔ mɔ̀, ɓɛ́ nyɔǔn ɓě ké mɔ̀ mɔ̀à jǎà Gèɖèpɔ́ɔ̀ dyúáɖòɔ̀ kɛɛ dyí dyuò, ɔ kè ɓɛ́ wa ké mɔ̄ mɔ̀à Jízɛ̀ Kɛ́ɖɛ́ì ɓɛ́ m̀ ɖoɓoà kɛɛ dyí dyuò. 4Ḿ tɛ̀mɛ̀ìn nì dĩ́ín-dĩ̀ìnɔ̀ nyɔǔn dyí nɔ̄ ɓóɖó-kpàà kɔ̃. Ḿ ɖǎ kũ̀à ɓɛ́ m̀ nyí ma ḿ, ɓɛ́ ḿ ké ma nyuɛɛ nyuɛ hwɔ. 5Ḿ Ɓǎ, nyuɛ ɓɛ́ ḿ ké dĩ́ín-dĩ̀ìn ɓéɖé ɓó m̀ dyúa kàǔn. Ɔ mɔ̀ dĩ́ín-dĩ̀ìn dyúáɖò ɓɛ́ ḿ kè mɔ̀ ɓéɖé ma hwɛ̀ ɓɛ́ ɓóɖó-kpàà dyi ma gbɔ dèɛ.
6“Ḿ ɖǎa nyu ké nyɔ ɓě ɓɛ́ m̀ nyí ma ḿ nɔ̄ ɓóɖó-kpàà kɔ̃ɛɛ ɖǎ m̀ dyí dyuò. Mɔ̀ kɔ̃̀ ma wa, ké m̀ nyí ma wa ḿ. Wa ɖǎ nì wuɖu nyu. 7Ké wa dyuòɛ̀ dyí kàǔn kà ɓɛ́ ɖɛ séín ɓě ɓɛ́ m̀ nyí ma kà ḿ wɛ̃ɛ sɔ̀ìn ma ɖé m̀ gboɛ. 8Ḿ nyí ma wa wuɖu ɓě ɓɛ́ m̀ nyí ma ḿ wɛ̃, ké wa kpɔ̃ ma wa dyi. Ké wa dyuòɛ̀ dyí kà ḿ sɔ̀ ma ɖé m̀ gbo jǎà kɛ, ké wa poɛ jǎà kà ɓɛ́ m̀ ɖoɓo ma ḿ wɛ̃.
9“Ḿ nì m̀ ɓaàǔn ɓó wa jè. Ḿ se ɓóɖó-kpàà nyɔ ɓěɔ̀ jè ɓaàǔn nì. Kɛɛ ḿ nì nyɔ ɓě ɓɛ́ m̀ nyí ma ḿ wɛ̃ɛ jè ɓaàǔn, sepóɛɖé mɔ̀ kɔ̃̀ wa. 10Nyɔ séín ɓě ɓɛ́ ḿ kɔ̃̀à kɛɛ, mɔ̀ kɔ̃̀ wa. Ké nyɔ séín ɓě ɓɛ́ m̀ kɔ̃̀ kɛɛ, mɔ̄ kɔ̃̀ wa ɖekè. Nyɔǔn-dyù ɓɛ́ìn ní dĩ́ín-dĩ̀ìnɔ̀ dyéɛ dyììn ɖé wa mú. 11Ké kàǔn wɛ̃ɛ, ḿ nì ɖé m̀ gbo dyiɛń. Ḿ se ɓóɖó-kpàà kɔ̃ nì ɖe, kɛɛ wa mɔ̀ùn nì ɓóɖó-kpàà kɔ̃ ke. Ḿ Ɓǎ, mɔ̀ mɔ̀à Mú-hwɛ̀-nyɔ̀ɛɛ, gmɔ̀ wa dyí dyììn ɖé nì nyɛ́nɛ́ ɓɛ́ m̀ nyí ma ḿ wɛ̃ɛ mú, ɓɛ́ wa ké nyɔ dyúáɖò jǔ kà ḿ kè mɔ̀ mɔ̀à nyɔ dyúáɖò kɛ. 12Ti ḿ nì ma ɖé wa gboɛɛ, ḿ gmɔ̀ ma wa dyí dyììn ɖé nì nyɛ́nɛ́ ɓɛ́ m̀ nyí ma ḿ wɛ̃ɛ mú. Ḿ ɖǎ ma wa dyí gmɔ̀, ké waà nyɔ dyúáɖò se ma xwáɖáún sè, ɔ sèìn nyɔ ɓɛ́ ɔ ɓéɖé ɓɛ́ ɔ ké ma kà xwáɖáún sè kɛɛ ɖòùn, ɓɛ́ ɖɛ céèà ɖé nì céè-ɖɛ̀ɔ̀ múɛɛ ké jǎà kpá. 13Ké kàǔn wɛ̃ɛ, ḿ nì ɖé m̀ gbo dyiɛń. Ḿ nì ɓóɖó-kpàà kɔ̃, ké ḿ nì ɖɛ ɓě nìà kɛ cɛ̃iń, ɓɛ́ ní múàɔ̀ ké gbɔ hwɛ̀ ɖé wa hwòɖǒ bũ̌. 14Ḿ ɖǎ nì wuɖuɔ̀ wa nyí, ké ɓóɖó-kpàà nyɔ ɓěɔ̀ nyɛ́ wa mú, sepóɛɖé wa se ɓóɖó-kpàà nyɔ ɓě kà ɓɛ́ mɔ́ún seà ɓóɖó-kpàà nyɔ kɛ. 15Ḿ seɛ cɛ̃iń nì, ɓɛ́ m̀ ké wa ɓóɖó-kpàà kɔ̃ zà, kɛɛ ḿ nìɛ̀ cɛ̃iń, ɓɛ́ m̀ ké wa dyí gmɔ̀, ɓɛ́ Ɖɛ-gbà-nyu-nyɔ̀ɔ̀ ní kɔ̃̀ ɖà wa ɖɛ ɖò bũ̌ nyu. 16Kà ɓɛ́ mɔ́ún seà ɓóɖó-kpàà nyɔ kɛɛ, kǎà wa mɔ̀ùn se ɓóɖó-kpàà nyɔ ɓě. 17Nyuɛ ɓɛ́ wa ké nì nyɔ ɓě jǔ dyììn ɖé jǎàɔ̀ mú. Nì wuɖuɔ̀ mɔ̀ jǎà. 18Ḿ tò wa ɖé ɓóɖó-kpàà nyɔ ɓě gbo kà ɓɛ́ m̀ tò ma kà ḿ ɓóɖó-kpàà kɔ̃ɛ. 19Ḿ zàìn ḿ mìɔùn m̀ xwáɖáún ɓó wa jè, ɓɛ́ wa mɔ̀ùn ké nì nyɔ ɓě jǔ jǎà.
20“Ḿ se wa ɖòùn jè ɓaà, kɛɛ ḿ ɓaà ɓó nyɔ ɓě ɓɛ́ wa taɓa ḿ hwìɖǐǐ dyììn ɖé waà wuɖu ɓěɔ̀ múɛɛ jè ɖekè. 21Ḿ ɓaà ɓɛ́ wa séín ké nyɔ dyúáɖò jǔ. Ḿ Ɓǎ, wa mɛ nì ɖé à mú kà ɓɛ́ m̀ nìà ɖé mɔ́ún mú, ké ḿ nìà ɖé mɔ̀ùn múɛ. Wa mɛ jǔ nyɔ dyúáɖò, ɓɛ́ ɓóɖó-kpàà nyɔ ɓě kéɛ jǎà po kà ɓɛ́ m̀ tò ma ḿ wɛ̃. 22Ḿ nyí wa dĩ́ín-dĩ̀ìn dyúáɖò ɓɛ́ m̀ nyí ma kà ḿ wɛ̃, ɓɛ́ wa ké nyɔ dyúáɖò jǔ kà ɓɛ́ ḿ kè mɔ̀ mɔ̀à nyɔ dyúáɖò kɛ. 23Mɔ́ún nì wa mú, ké mɔ̀ùn nì ɖé ḿ mú, ɓɛ́ wa ké nyɔ dyúáɖò jǔ cá, ɓɛ́ ɓóɖó-kpàà nyɔ ɓě kéɛ dyí dyuò kà ɓɛ́ m̀ tò ma ḿ, ké m̀ ɖɛ̀ɓɛ̀ wa mú kà m̀ ɖɛ̀ɓɛ̀à ḿ múɛ.
24“Ḿ Ɓǎ, m̀ nyí ma wa ḿ, ké ní mɔ́ ɓɛ́ wa ké dɛ̀ ɓɛ́ ḿ nìà kɛɛ nì, ɓɛ́ wa ké ní dĩ́ín-dĩ̀ìn ɓɛ́ m̀ nyí ma ḿ wɛ̃ɛ dyé. Sepóɛɖé m̀ ɖɛ̀ɓɛ̀ ma ḿ mú, hwɛ̀ ké ɓóɖó-kpàà dè ma gbɔ. 25Ḿ Ɓǎ, mɔ̀ mɔ̀à Dyí-sɛ́ɖɛ́ìn-nyɔ̀ɔ̀ kɛɛ, ɓóɖó-kpàà se m̀ dyí dyuò, kɛɛ ḿ dyuò m̀ dyí, ké nyɔ ɓě nìà kɛ dyuòɛ̀ dyí kà ɓɛ́ m̀ tò ma ḿ wɛ̃. 26Ḿ nyuɛ ké wa ɖǎ m̀ dyí dyuò, ké ní muɛ náa nyuùn kánáá pū, ɓɛ́ ɖɛ̀ɓɛ̀ǐn-ɖɛ̀ɓɛ̀ǐn ɓɛ́ m̀ ɓéɖéà ḿ bììɛɛ ké ɖé wa mú nì, ɔ kè ɓɛ́ ḿ ké ɖé wa mú nì.”
S'ha seleccionat:
Jɔ̃́ɔ́ 17: ƁB02
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bassa Bible © Bible Society Liberia, 2002.