Jɔ̃́ɔ́ 18
18
Wa kpɔ̃ Jízɛ̀
(Máfíò 26:47-56; Máà 14:43-50; Ɖúù 22:47-53)
1Ti Jízɛ̀ ɖǎ ma ɓaà hwɔɛɛ, ɔ kè ɔ ɖeín-nà-nyɔ̀ ɓěɔ̀ sɔ̀ ma ɓó dyí, ké wa mu ma ɖé Kídɔ̀nɔ̀-nìɔ̀ ɖeín. Ɓáá-ɖɛ̀-gbǎ ɖò nì ma ɖé, ké Jízɛ̀ kè ɔ ɖeín-nà-nyɔ̀ ɓěɔ̀ mu ma ɖé. 2Júdà ɓɛ́ ɔ mɔ̀ nyɔ mu ma kà Jízɛ̀ ɔ mú-nyɛ́-nyɔ̀ ɓěɔ̀ xwáɖáún zàìn nyɛɛ dyuò ma ɖé, sepóɛɖé Jízɛ̀ kè ɔ ɖeín-nà-nyɔ̀ ɓěɔ̀ poìn ma ɖé dyí ɓó ti pàɖǎ xwíníín. 3Ɓó tia ɓaɖaa, Júdà mu ma ɖé. Ɔ kè sójà ɓě ɔ kè nyɔ tɔ̀ɔ̀ ɓě ɓɛ́ sáa-zà-nyɔ̀ kpa ɖɛ ɓěɔ̀ kè Fáɖòsíì-nyɔ̀ ɓěɔ̀ tò ma kɛɛ mu ma. Wa kpa ma ɖáùnpò kè dɔ̀ɔ̀-kpà ɔ kè toún-vɔ̃̀ìn-ɖɛ̀ ɓě. 4Jízɛ̀ dyuò ma ɖɛ séín ɓě ɓɛ́ wa mu ma ɔ gbo kpáùn wɛ̃ɛ dyí. Ɔ jèɛɛ, ɔ mu ma nyɔ ɓěɔ̀ gbo, ké ɔ diè ma wa dyi, ké ɔ ɖá, “Nyɛ́ ɓě nìà dyi mɔ́uń wɛ̃́?”
5Ké wa ɖá, “À mɔ́ Jízɛ̀ sɔ̀à Názɛ̀ɖɛ̀-hwɔ̀ɖɔ̀ɔ̀ múɛɛ dyi.”
Ké Jízɛ̀ zà ma ɖé wuɖu, ké ɔ ɖá, “Ḿ mɔ̀ ɔ mɔ̀.”
Júdà mɔ̀à ɔ peɖe-nyɔ̀ɔ̀ kɛɛ nyànà ma ɓó wa gbo dyi. 6Ti ɓɛ́ Jízɛ̀ cɛ̃ɛ ma wa gbo, ké ɔ ɖá, “Ḿ mɔ̀ ɔ mɔ̀” kɛɛ, púɛɛ, wa nàìn ma kɔ̃ ɖei, ké wa ɓùɖùìn ma ɖé ɖe. 7Ké Jízɛ̀ diè ma wa dyi ɖe, ké ɔ ɖá, “Nyɛ́ ɓě nìà dyi mɔ́uń wɛ̃́?”
Ké wa ɖá, “À mɔ́ Jízɛ̀ sɔ̀à Názɛ̀ɖɛ̀-hwɔ̀ɖɔ̀ɔ̀ múɛɛ dyi.”
8Hwɛ̀ ké Jízɛ̀ zà ma ɖé wuɖu, ké ɔ ɖá, “Ḿ ɖǎa máa ɓě gbo cɛ̃ kà ḿ mɔ̀ ɔ mɔ̀ kɛ. Ɔ jǔ ké ɓě dyi ḿ dyi mɔ́uń nìǐn, nìí, ɓě nyuɛ ɓɛ́ nyɔ ɓě nìà kɛ ké mu.” 9Ɔ cɛ̃ ma ɖɛa, ɓɛ́ ɖɛ ɓě ɓɛ́ ɔ cɛ̃ ma kà kɛɛ ké jǎà kpá. Ɖɛɔ̀ mɔ̀, ɔ cɛ̃ɛ ma, ké ɔ ɖá, “Nyɔǔn séín ɓě ɓɛ́ m̀ nyí ma ḿ wɛ̃ɛ dyúáɖò se ma xwáɖáún sè dyɛ mɔ̀ùn.”
10Sã́ɓò Píɖɛ̀ ɓéɖé ma gàsíà ɖò. Ɔ zàà ma kpaɖaún, ké ɔ cɛ̃ ma sáa-zà-nyɔ̀ vɛ̀nɛ̀ɔ̀ gǐìɔ̀ ɖiaún-ɖùǔɔ̀ dú. Gǐìɔ̀ nyɛ́nɛ́ mɔ̀ Mákù. 11Ké Jízɛ̀ cɛ̃ɛ ma Píɖɛ̀ gbo, ké ɔ ɖá, “Po nì gàsíàɔ̀ kpaɖaún. Kópò mɔ̀à gǎ-dyé-tì ɓɛ́ ḿ Ɓǎ nyíà ḿ wɛ̃ɛ, ḿ se ɖé ɖɛ náǐn muù?”
Wa kpa Jízɛ̀ Ánàsì dyúa
12Ɓó tia ɓaɖaa, sójà ɓěɔ̀ kè waà nàìn-nyɔ̀ɔ̀ ɔ kè nyɔ ɓě ɓɛ́ Júù-nyɔ̀ ɓěɔ̀ ɖǎ ma kà tòɛɛ kpɔ̃ ma Jízɛ̀, ké wa sã ma ɔ. 13Ké wa kpa ma ɔ ɖé Ánàsì gbo kĩ́ín. Ánàsì mɔ̀ ma Kádyáfà ɓɛ́ ɔ mɔ̀ ma kà sáa-zà-nyɔ̀ vɛ̀nɛ̀ ɓó zɔ̃a xwíníín nyɛɛ gmààɔ̀ ɓǎ. 14Ɔ mɔ̀ ma Kádyáfà ɓɛ́ ɔ po ma kà Júù-nyɔ̀ ɓěɔ̀ náún kà ɓɛ́ ɔ nɔ̀mɔ̀ ma dyíin ɓɛ́ nyɔ dyúáɖò ké ma nyɔǔn ɓěɔ̀ bìì mɛ́ɛ.
Píɖɛ̀ doìn Jízɛ̀ jè mú
(Máfíò 26:69-70; Máà 14:66-68; Ɖúù 22:55-57)
15Ti ɓɛ́ wa nì ma kà Jízɛ̀ kpauń wɛ̃ɛ, Sã́ɓò Píɖɛ̀ kè ɖeín-nà-nyɔ̀ tɔ̀ɔ̀ ɓěɔ̀ ɖò sí ma ɔ kíɖíí. Sáa-zà-nyɔ̀ vɛ̀nɛ̀ɔ̀ dyuò ma ɖeín-nà-nyɔ̀ɔ̀ dyɛ mɔ̀ɔ̀ dyí. Ɔ jèɛɛ, ɔ kè Jízɛ̀ mu ma ɖé sáa-zà-nyɔ̀ vɛ̀nɛ̀ɔ̀ kɔ̃̀pã́ùnɔ̀ hwòɖǒǔn. 16Píɖɛ̀ sè ma ɖé píé ɖé gmɔ-wɔ̃̀ɔ̀ gbo. Ɖeín-nà-nyɔ̀ɔ̀ dyɛ mɔ̀ ɓɛ́ sáa-zà-nyɔ̀ vɛ̀nɛ̀ɔ̀ dyuò ma kà dyíɛɛ sí ma píé, ké ɔ wùɖù ma gbo-nì-màà ɖò ɓɛ́ ɔ nì ma ɓó gmɔ-wɔ̃̀ɔ̀ gboɛɛ gbo, ké ɔ dyáìn ma ɖé Píɖɛ̀. 17Ké gbo-nì-màà ɓɛ́ ɔ nì ma kà ɓó gmɔ-wɔ̃̀ɔ̀ gboɛɛ diè ma Píɖɛ̀ dyi, ké ɔ ɖá, “M̀ se gàa nìà kɛ ɖeín-nà-nyɔ̀ ɓěɔ̀ ɖòò?”
Ké Píɖɛ̀ ɖá, “Ḿ se ɖò.”
18Sɔ̃̀ɔ̀ nì ma dyiɛń jèɛɛ, gbo-nì-nyɔ̀ ɓěɔ̀ kè sójà ɓěɔ̀ po ma nyɛ dyí, ké wa nyanaìn maa ɖei, ké wa nì ma wíàǔn. Píɖɛ̀ mu, ké ɔ nyànà ma ɓó dyi, ké ɔ nì ma wíàǔn ɖekè.
Sáa-zà-nyɔ̀ vɛ̀nɛ̀ɔ̀ diè Jízɛ̀ dyi
(Máfíò 26:59-66; Máà 14:55-64; Ɖúù 22:66-71)
19Ɓó tia ɓaɖaa, sáa-zà-nyɔ̀ vɛ̀nɛ̀ɔ̀ diè ma Jízɛ̀ dyi ɓá ɔ ɖeín-nà-nyɔ̀ ɓěɔ̀ kè ɖɛ ɓě ɓɛ́ ɔ tɛ̀mɛ̀ìn ma nyɔ ɓěɔ̀ kɛɛ jè dyí. 20Ké Jízɛ̀ zà ma ɖé wuɖu, ké ɔ ɖá, “Ḿ wùɖù ma nyɔǔn ɓě gbo ɖé nyɔǔn séín dyúa. Ḿ tɛ̀mɛ̀ìn ma nyɔ ɓě ɖɛ tee ɖé Júù-nyɔ̀ ɓěɔ̀ cɔ́cì-gbò ɓěɔ̀ mú kè ɖé Gèɖèpɔ́ɔ̀ gbǒ kɔ̃̀ mú ɓɛ́ Júù-nyɔ̀ séín ɓěɔ̀ poìn kà dyí kɛɛ mú. Ḿ se ma ɖɛ ɖò gã gbo cɛ̃̀ìn. 21Ɖɛ́ kɔ̃̀ jè m̀ dièà ḿ dyiɛ́? Diè nyɔ ɓě ɓɛ́ wa wɔ̃́ ma ní wuɖu ɓěɔ̀ kɛɛ dyi. Diè wa dyi ɓó ɖɛ ɓě ɓɛ́ ḿ cɛ̃ ma wa gboɛɛ jè. Gmɔ̀ nɔ̄, wa dyuò ɖɛ ɓě ɓɛ́ ḿ cɛ̃ maa dyí.”
22Ti Jízɛ̀ cɛ̃ ma ɖɛa kɛɛ, sójà ɓě ɓɛ́ wa nyànà ma ɓó dyiɛɛ ɖò taɓa ma ɔ kpá, ké ɔ ɖá, “Kà m̀ wùɖù kǎà sáa-zà-nyɔ̀ vɛ̀nɛ̀ɔ̀ gboò?”
23Ké Jízɛ̀ zà ma ɖé wuɖu, ké ɔ ɖá, “Ḿ dyi ɖɛ gbà ɖò cɛ̃ ní, nìí, cɛ̃ɛ nyɔǔn séín ɓěà gbo. Kɛɛ ɖɛ ɓě ɓɛ́ ḿ cɛ̃à kɛɛ dyi jǎà jǔǐn, ɖɛ́ kɔ̃̀ jè m̀ taɓaà ḿ kpáá?”
24Ti Jízɛ̀ gã̀ ma ɖúúɔ̀ mú dyiɛɛ, Ánàsì tò ma ɔ Kádyáfà mɔ̀à sáa-zà-nyɔ̀ vɛ̀nɛ̀ɔ̀ kɛɛ gbo.
Píɖɛ̀ doìn Jízɛ̀ jè mú ɖe
(Máfíò 26:71-75; Máà 14:69-72; Ɖúù 22:58-62)
25Ɓó tia ɓaɖaa, Sã́ɓò Píɖɛ̀ nyànà ma ɓó dyi, ké ɔ nì ma wíàǔn ke. Wa diè ma ɔ dyi, ké wa ɖá, “M̀ se gàa nìà kɛ ɖeín-nà-nyɔ̀ ɓěɔ̀ ɖòò?”
Ké ɔ doɛ̀n ma mú, ké ɔ ɖá, “Ḿ se ɖò.”
26Kɛɛ sáa-zà-nyɔ̀ vɛ̀nɛ̀ɔ̀ gǐì ɓěɔ̀ ɖò ɓɛ́ ɔ mɔ̀ ma gàa kɔ̃̀ ɖùǔ ɓɛ́ Píɖɛ̀ cɛ̃ ma kà ɓóɛɛ nyɔ ɖòɛɛ ɖá, “Má, ḿ dyéɔ́ má m̀ ɖé ɓáá-ɖɛ̀-gbǎɔ̀ mú ɖé ɔ gboe?”
27Kɛɛ Píɖɛ̀ doɛ̀n ma mú ɖe. Ké wàɖà cá kɛɛ, sòò ɖò zoɖo ma ní.
Jízɛ̀ nì Páɖè dyúa
(Máfíò 27:1-2; Máà 15:1-5; Ɖúù 23:1-5)
28Ɓó zɔ̃ wĩín vɛ̀nɛ̀ kɛɛ, wa zà ma Jízɛ̀ ɖé Kádyáfà ɓíɖí-taún, ké wa kpa ma ɔ ɖé gɔ̌mànà-gbòɔ̀ zɔ̃̌. Júù-nyɔ̀ ɓěɔ̀ mɔ̀ùn se ma ɖé gɔ̌mànà-gbòɔ̀ mú dyá, sepóɛɖé wa se mɔ́ ɓɛ́ wa ké ma wa mìɔùn se-mú-hwɛ̀-nyɔ̀ mú nyu, hwɛ̀ ɓɛ́ wa ké ma Zĩ̀ìn-Kɔ̃in-hwɔ̀ɔ̀ pa. 29Ɔ jèɛɛ, Páɖè mu ma ɖé wa gbo ɖé píé, ké ɔ ɖá, “Ɖɛ́ mɔ̀ ɖɛ gbà ɓɛ́ ɓě ɖá gàa nìà kɛ nyuɛ́?”
30Ké wa cɛ̃ɛ ma ɔ gbo, ké wa ɖá, “Ɔ jǔ ké ɔ seɔ́ ɖɛ gbà ɖò nyuín, nìí, à seɔ́ má ɔ m̀ gbo dyàǎ mu.”
31Ké Páɖè cɛ̃ɛ ma wa gbo, ké ɔ ɖá, “Ɓě mìɔùn mɛ ɖú ɔ dyí, ɓɛ́ ɓě ké ɔ zaa wɔ̃ po kà ɓɛ́ ɓěɛ̀ gmaɔ̀ nyuà cɛ̃ɛ kɛ.”
Kɛɛ Júù-nyɔ̀ ɓěɔ̀ cɛ̃ɛ ma ɔ gbo, ké wa ɖá, “À se kpé ɓéɖé ɓɛ́ à ké nyɔ ɖò ɖáɓá.” 32Ɖɛ nìà kɛ kpá, ɓɛ́ ɖɛ ɓɛ́ Jízɛ̀ cɛ̃ ma kà ɓá ɔ mɛ́-mɛ́ ɓɛ́ ɔ mu ma kà nyuùn wɛ̃ɛ jè dyíɛɛ ké jǎà kpá.
33Ké Páɖè mu ma ɖé gɔ̌mànà-gbòɔ̀ zɔ̃̌ ɖe, ké ɔ ɖá ma Jízɛ̀, ké ɔ diè ma ɔ dyi, ké ɔ ɖá, “Mɔ̀ mɔ̀à Júù-nyɔ̀ ɓěɔ̀ kã́áɔ̀ kɛɛ̀?”
34Ké Jízɛ̀ jǔ ma ɔ gɔ̃̌, ké ɔ ɖá, “M̀ mìɔùn diè ḿ ɖɛ nìà kɛ dyiì, mɔɔ nyɔ tɔ̀ɔ̀ ɓě cɛ̃ ɖɛ nìà kɛ m̀ gbo ɓá ḿ dyíì?”
35Hwɛ̀ ké Páɖè zà ma ɖé wuɖu, ké ɔ ɖá, “Ḿ mɔ̀ Júù-nyɔ̀ ɓěɔ̀ ɖòò? M̀ mìɔùn nììn nyɔ ɓěɔ̀ kè waà sáa-zà-nyɔ̀ kpa ɖɛ ɓěɔ̀ tòà m̀ ḿ dyíɛ̀. Ɖɛ́ m̀ ɖǎ nyuɛ́?”
36Ké Jízɛ̀ ɖá, “Ní kã́á-ɓòɖòɔ̀ se ɓóɖó-kpà nìà kɛ dyí ɓá. Ɔ jǔ ké ní kã́á-ɓòɖòɔ̀ dyiɔ́ ɓóɖó-kpà nìà kɛ dyí ɓáín, nìí, ní gbo-nì-nyɔ̀ ɓěɔ̀ muɔ́ má vɔ̃ùn, ɓɛ́ ḿ ké seɔ́ má Júù-nyɔ̀ ɓěɔ̀ xwaún kpá. Kɛɛ ní kã́á-ɓòɖòɔ̀ se ɓóɖó-kpà nìà kɛ dyí ɓá.”
37Ɔ jèɛɛ, Páɖè diè ma ɔ dyi, ké ɔ ɖá, “Nìí, m̀ mɔ̀ kã́á ɖòò?”
Ké Jízɛ̀ ɖá, “M̀ ɖá ḿ mɔ̀ kã́á. Ɖɛ kɔ̃̀ jè ḿ wóɖó ma ɔ kè ɖɛ kɔ̃̀ jè ḿ dyi ma ɓóɖó-kpàà kɔ̃ɛɛ, ɔ mɔ̀ ɓɛ́ ḿ ké jǎàɔ̀ jè cɛ̃. Nyɔ mɔ̀ nyɔ ɓɛ́ ɔ mɔ̀ jǎà-nyɔ̀ kɛɛ tò ní wuɖuɔ̀ ɖùǔ gbo.”
38Púɛɛ, Páɖè diè ma ɔ dyi, ké ɔ ɖá, “Ɖɛ́ mɔ̀ jǎàɔ̀ kɛ́?”
Wa ɖá Jízɛ̀ ɓéɖé ɓɛ́ ɔ ké mɛ́
(Máfíò 27:15-31; Máà 15:6-20; Ɖúù 23:13-25)
Ti ɓɛ́ Páɖè hwɔ ma Jízɛ̀ dyi dièɛ̀ kɛɛ, ɔ mu ma píé ɖé Júù-nyɔ̀ ɓěɔ̀ gbo ɖe, ké ɔ cɛ̃ɛ ma wa gbo, ké ɔ ɖá, “Ḿ se ɔ ɖɛ gbà ɖò mú dyé. 39Kɛɛ ɔ mɔ̀ ɓěɛ̀ kpeɖe, ɓɛ́ ḿ ké kpɔɖɔ-ɖeín-nì-nyɔ̀ dyúáɖò buɛ̀ ɓó ɓě bìì, ɓó Zĩ̀ìn-Kɔ̃in-hwɔ̀ɔ̀ tiín. Ɓě mɔ́ ɓɛ́ ḿ ké Júù-nyɔ̀ ɓěɔ̀ kã́áɔ̀ buɛ̀ ɓó ɓě bìì?”
40Ké wa páná ma mú, ké wa ɖá, “Gbào, à se gàa nìà kɛ mɔ́. À mɔ́ Bàwáɖáɓà.” Bàwáɖáɓà nìà kɛ mɔ̀ ma nyɔ-ɖɛ-gana-xwa-zàìn-nyɔ̀.
S'ha seleccionat:
Jɔ̃́ɔ́ 18: ƁB02
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Bassa Bible © Bible Society Liberia, 2002.