Zɔ̃̀ɔ̃́ 10
10
Pĩ̀ã̀ lɛ́ à gbɛ̃̀ɛ̃̀ lɛ ɓáá-gàlà mɔ̀ɔ
1“Wánà-wɔ̃́ kpó-kpó lɛ́ m̀ gèe ka lɛ̀ɛ ɓɛ. Mi lɛ́ lɛ̀ɛ́ ló kpɔ́ɔ̀ ɓáá gàlàa lé kɛ é wàà gàlàa yí, lɛ́ è lo tɛ̀nɛ̀ gàlàa mɔ̀ kɛ é gbɛ̃̀ gàlàa yí zi gbɛɛ káa, kɛɛ lɛ kã̀ã-mì wà dà-kã̀ã̀-ɓo-mì ká. 2Gɔ̃ lɛ́ è lo wàà gàlàa lé káa, kɛɛ lɛ nyìɛ-kɛ̀-ɓáá-vɔ̀ɔ-mɔ̀-mì ká. 3Mi lɛ́ è e nyìɛ kɛ̀ gàlàa lé mɔ̀ɔ, lɛ́ɛ̀ gàlàa lé ɓo à lɛ̀ɛ. Ƃáá vɔ̀ɔ óò à wéè ma. Lɛ́ɛ̀ e dìè là ɓááa súo kɛ̀ o tɔ́ ká, tó áà o líé sì, wà ye nì wáà kàà pɛlɛí. 4Yé aà e zìa séĩ́ káá pɛlɛía, lɛ́ɛ̀ dɔ o líé. Ƃáá vɔ̀ɔ óò to à píé, ɓii óò à wéè dɔ. 5Òó ló tóò mi gbɛɛ píé. Kɛɛ óò lo wàà à mɔ̀, ɓii òó à wéè dɔ.”
6Zízɛ̀ e pĩ̀ã̀ e kéa vɔ o lɛ̀ɛ, kɛɛ òó gbaa wɔ̃́ lɛ́ e kɛ à gèepìà o lɛ̀ɛ yí ma.
Zízɛ̀ lɛ nyìɛ-kɛ̀-ɓáá-mɔ̀-mì kpeĩ ká
7Lɛ̀ e kɛ kília, Zízɛ̀ a gèe zeĩ́, “Wánà-wɔ̃̀ lɛ́ m̀ gèe ka lɛ̀ɛ ɓɛ. Ma lɛ́ m ɓáá vɔ̀ɔ wà gàlà-lé káa. 8Mia yé o dɔ m mɔ̀ líéa, o kã̀ã-mìà wà dà-kã̀ã̀-ɓo-mìà ká. Kɛɛ ɓáá vɔ̀ɔ òó gbaa o tóó dɔ o mɔ̀. 9Ma lɛ́ m gàlà-lé káa. Mí è lo kpɔ́ɔ̀ m là, lɛ́ è wàà gàlàa yía, lɛ́ɛ̀ lo la-ɓo sɔ̀lɔ̀ ɓoò. Lɛ́ɛ̀ lo wàà kɛ́ì, tó áà ɓɔ̀ pɛlɛí, ɛ̃́ɛ̃́ lɛ́ɛ̀ lo sùu lɔ́ɔ́-lɔ̀ɔ̀ gɛ̃̀ɛ̃̀ áà ɓèlè. 10Kã̀ã-mì zì nú à ɓoa, lɛ́ɛ̀ nu kɛɛ é kã̀ã ɓo, ɛ̃́ɛ̃́ é mi zɛ, e bɛ̀i, é pɛ yí sìè. Ma yee, m nuù lɛ kɛ ó kɛ̀ɓe sɔ̀lɔ̀ ɓo, ɛ̃́ɛ̃́ zeĩ́ ó à sɔ̀lɔ̀ ɓo yí gbùò zɛ̀.
11“Ma lɛ́ m nyìɛ-kɛ̀-ɓáá-mɔ̀-mì kpeĩ káa. Nyìɛ-kɛ̀-ɓáá-mɔ̀-mì kpeĩ lɛ́ɛ̀ e zì kɛ̀ɓe nɔ ɓáá vɔ̀ɔ mɔ́ɔ̀ wɔ̃̀ mɔ̀. 12Yɛɓo-kɛ̀-mi-mɔ̀-mì, lɛ́ ye wá nyìɛ-kɛ̀-ɓáá-mɔ̀-mì ká, ɛ̃́ɛ̃́ lɛ́ là pɛ wá ɓáá vɔ̀ɔ káa, lɛ́ɛ̀ ɓáá vɔ̀ɔ to kàá, e là ló ɓo yé aà wìì nyaàa gɛ̃̀, áà nùa ká. Yé aà kɛ kília, wìì nyaàa lɛ́ɛ̀ nu, tó e wí ɓáá vɔ̀ɔ dò mɔ̀, tó o kã́ o kíe mɔ̀. 13Yɛɓo-kɛ̀-mi-mɔ̀-mìa lɛ́ɛ̀ là sí ɓo luú, ɓii lɛ nɔ́ ɓɔ̀ɔ yɛɓo-kɛ-mì ká. Lɛ̀ɛ́ kpàa ɓáá vɔ̀ɔ wɛ̃́ĩ̀. 14-15Ma lɛ́ m nyìɛ-kɛ̀-ɓáá-mɔ̀-mì kpeĩ káa. Zí mia Dàa è m dɔ à ká, lɛ́ ma bɛ̃̀ɛ̃ m̀ dɔ à káa, zi nɔ́ doóa lɛ́ m̀ m̀ ɓáá vɔ̀ɔ dɔ à ká, tó o bɛ̃̀ɛ̃ wáà m dɔ̀ à káa. Ɛ́ɛ̃́ ḿm̀ m zì kɛ̀ɓe nɔ o mɔ́ɔ̀ wɔ̃̀ mɔ̀. 16Ƃáá vɔ̀ dò lɛ́ m̀ pɛ lɛ o ká, lɛ́ o wá ɓáá-gàlà e kéa yía, o ɓe. Lɛ m mɔ̀ ḿ nu o ká nɔ́ kíli. Óò lo o tóó dɔɔ̀ m wéè mɔ̀. Yé aà kɛ kília, ɓáá séĩ́ lɛ́ɛ̀ lo kɛɛ̀ gbaa ɓáá kù doó ká. O líé-sí-mì lɛ́ɛ̀ lo kɛɛ̀ nɔ́ ɓe doó.
17“M lɔ̀ kpɔ́ɔ̀ lɛ mia Dàa mɔ̀, ɓii ḿm̀ m zì kɛ̀ɓe nɔ, kɛɛ ḿ sɔ̀lɔ̀ ɓo zeĩ́. 18Mi gbɛɛ lɛ̀ɛ́ m zì kɛ̀ɓe kṹ m kɛ̀lɛ̀. Ma nɔ m dìè kɔ̀ ká. Yíkɛ̀ gáàa lɛ m kɛ̀lɛ̀ kɛ ḿ nɔ, ɛ̃́ɛ̃́ yíkɛ̀ gáàa lɛ m kɛ̀lɛ̀ kɛ ḿ sí zeĩ́. Pɛ́ m Dàa aà à gèe ḿ kɛɛ, lɛ́ ɓɛ.”
19Zúù-mìà nì kã́ã̀ e kɛá o kíe mɔ̀ zeĩ́ wɔ̃́ nì a gèe kília mɔ́ɔ̀ wɔ̃̀ mɔ̀. 20O búnùzɛ̀ o kɛ à gèepìà kélɛ̀, “Pɛ yɔɔ lɛ à píé. Bè lɛ à mɔ̀. Mɛ́ e kɛ lɛ́ kà ka tóó dɔ à mɔ̀?”
21Kɛɛ mia dò bɛ̃̀ɛ̃ o kɛ à gèepìà kélɛ̀, “Mi lɛ́ pɛ yɔɔ lɛ à píéa, lɛ̀ɛ́ mɛ́ĩ́ ɓo kíli. Kéa, pɛ yɔɔ lɛ́ɛ̀ bɛ̀i à mɔ̀ é mi nyìɛ káàa zɛ̀ nyìɛ fóló kàáà?”
Zúù-mìà o o wũ ɓo Zízɛ̀ wì
22Kpílì lɛ́ è o zò vùò lúó lɛ́ o Wálà là káa nɔ à lɛ̀ɛ à káa káa, lúó e ɓɔ Zùlúsàlɛ̀. E kɛ nɛ́nɛ́-pɛ̃́ ká. 23Zízɛ̀ e kɛ táápìà gbùlù lɛ́ ò si Sɔ́lómɔ̀ yàlà-pìè, lɛ́ e kɛ Wálà-kàa lɛ̀ dò káa wì. 24Zúù-mìà o pá o kíe mɔ̀ Zízɛ̀ sɔ́nɔ́ píé, wáà gèè kélɛ̀, “Íì lo yɛ́lɛ́-táá tóò ko mɔ̀ lúó wɛ̀ɛɛ̀ píé? É kɛ̀á ɓi lɛ́ i Kɛ́lɛ́ìa káa, ì à gèe ko lɛ̀ɛ kpéú le.”
25Zízɛ̀ a là nìɛ̀ weeá kélɛ̀, “Maà à gèe ka lɛ̀ɛ. Kɛɛ kàá gbaa m wúú gɛ̃̀ wánà ká. Yɛɓo lɛ́ m̀ kɛ̀ m Dàa tɔ́ yía, óò m̀ kélá-wè ɓo. 26Kɛɛ ka zò dɔɔ̀ wá m mɔ̀, ɓii ka wá m̀ ɓáá vɔ̀ ká. 27M̀ ɓáá vɔ̀ óò o tóó dɔ m wéè mɔ̀. Ḿm̀ o dɔ, ɛ̃́ɛ̃́ óò to m píé. 28Ḿm̀ kɛ̀ɓe wɔ́lɔ́-wɔ́lɔ́ nɔ o lɛ̀ɛ. Òó ló gaà gbɛɛ ɓo. Ɛ́ɛ̃́ mi gbɛɛ lɛ̀ɛ́ bɛ̀i o sɔ̀nɔ́ɔ̀ m kɛ̀lɛ̀. 29Pɛ lɛ́ m Dàa aà nɔ m lɛ̀ɛ, lɛ kpànazɛ̀ é dieá pɛ séĩ́ là. Mi gbɛɛ lɛ̀ɛ́ bɛ̀i o sɔ̀nɔ́ɔ̀ mia Dàa kɛ̀lɛ̀. 30Ma yeeò, e bɛ̀i mia Dàa ɓɛ, ko nɔ́ doó.”
31Lɛ̀ e kɛ kília, Zúù-mìà o bɛ̀i o gɛ̀lɛ̀ sí, kɛ ó pá à ká. 32Zízɛ̀ a gèe o lɛ̀ɛ, “Maà yɛɓo yiè búnùzɛ̀ lɛ́ mia Dàa aà nɔ m lɛ̀ɛ ḿ kɛɛ, kɛ ka nyìɛ mɔ̀. À lɛ̀ kpɛɛ̀ lɛ́ kà mɔ́ɔ̀ à naa ɓo ká m pá gɛ̀lɛ̀ ká ɓɛ?”
33Zúù-mìà wa là nìɛ̀ kélɛ̀, “Kòó naa kó i pá gɛ̀lɛ̀ ká yɛɓo yiè nɔ́ɔ fé dò wɛ̃́ĩ̀. Kɛɛ kóò kɛ̀ kíli wɔ̃́ yɔɔ lɛ́ ɓà gèe Wálà gbĩ mɔ̀ɔ mɔ́ɔ̀ wɔ̃̀ mɔ̀. I mi gbunu ɓɔ̀ɔ ká, kɛɛ i i dìè kɛpìà Wálà ká.”
34Zízɛ̀ a gèe o lɛ̀ɛ, “À bɛ̃̀ɛ̃ɛ̃̀ lɛ ka dìè kà Lɔ́ɔ̀ɔ yí kélɛ̀ Wálà aà gèe kélɛ̀, ‘Ka wálà vɔ̀ ká.’ 35Kóò à yí dɔ kélɛ̀ wɔ̃́ lɛ́ Wálà kiia à gèea lɛ wánà zɛ̀ tòá kíli ká. Ɛ́ɛ̃́ Wálà e mia lɛ́ e e lé-wè nɔ o lɛ̀ɛ sí wálà vɔ̀. 36Kɛɛ ma yee, mia Dàa e yíí suo m mɔ̀, e m vɔ kpóṹ là zèe. Yé lɛ kília, mɛ́ e kɛ lɛ́ kà gèe kélɛ̀ m wɔ̃́ yɔɔ gèe Wálà gbĩ mɔ̀, à gèe ma ɓo m Wálà Gbe káa mɔ́ɔ̀ wɔ̃̀ mɔ̀ ɓɛ? 37É kɛ̀á ma wá m Dàa là yɛɓo kɛpìàa, yékɛ̀ ká m mɔ́ɔ̀ wɔ̃̀ gɛ̃̀ wánà ká. 38Kɛɛ é kɛ̀á m m Dàa là yɛɓo kɛpìàa, yé bɛ̃̀ɛ̃ kàá m mɔ́ɔ̀ wɔ̃̀ gɛ̃̀ wánà káa, kpɛ-kpɛ lea lɛ ka mɔ̀ ká yɛɓoa yee mɔ́ɔ̀ wɔ̃̀ gɛ̃̀ wánà ká, kɛɛ ká à yí dɔ, ɛ̃́ɛ̃́ ká à yí ma kélɛ̀ mia Dàa lɛ m yí, ɛ̃́ɛ̃́ ma bɛ̃̀ɛ̃ m mia Dàa yí.”
39O bɛ̀i, wa kɛ-zì naa zeĩ́ kɛ ó à kṹ. Kɛɛ e wàà o kɛ̀lɛ̀.
40Zízɛ̀ e Zɔ́dã̀-yììa kã́ zeĩ́, e ló lɛ̀ lɛ́ Zɔ̃̀ɔ̃́ e mia bàtáì kɛ yía mɔ̀. E kɛ yí. 41Mia búnùzɛ̀ o nu à píé, wáà gèè kélɛ̀, “Zɔ̃̀ɔ̃́ lɛ̀ɛ́ gbaa lé-pa-wɔ̃̀ gbɛɛ kɛ. Kɛɛ wɔ̃́ séĩ́ lɛ́ a gèe gɔ̃́ e kéa gbĩ mɔ̀ɔ, e kɛ wánà zɛ̀.” 42Mia búnùzɛ̀ o o zò dɔ à mɔ̀ à lɛ̀ mɔ̀.
S'ha seleccionat:
Zɔ̃̀ɔ̃́ 10: MNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Mann New Testament © Bible Society in Liberia, 1978.