Zɔ̃̀ɔ̃́ 8
8
1Kɛɛ Zízɛ̀ e ló Ɔ́lè-tɔ̃̀ũ̀ wĩĩ́. 2E sòló làapíé, e ló e mɛ̀ĩ́ sálà-ɓò-Wálà-lɛ̀ɛ-kà wì. Mia séĩ́ o nu à píé yi. E yà tã́ã̀, e gbɛ̃̀ gbaa áà pɛ zɔ̃̀ɔ̃̀ o lɛ̀ɛ. 3Wálà kii-dɔ-mìà wà Fálásíì-mìà o nu lee doó lɛ́ wa kṹ nɛ́ĩ̀ zɛɛ̀ mɔ̀ɔ ká Zízɛ̀ píé. O lééa kɛ e dɔ o séĩ́ o wɛlɛ mɔ̀. 4Wa gèe Zízɛ̀ lɛ̀ɛ, “Tísɛ̀, léé e kéa wa kṹ nɛ́ĩ̀ zɛɛ̀ mɔ̀. 5Móózè a gèe Lɔ́ɔ̀ kiia yí kélɛ̀ lee sùua laa mɔ̀ ó tó à pápìà gɛ̀lɛ̀ ká, é ga. Kɛɛ ɓi bɛ̃̀ɛ̃, ɓáà gèe kpɛ?” 6O wɔ̃́ e kéa gèe kíli à yí dã́ã̀ ká, kɛ ó zi gɛ̃̀ à mɔ̀ ó à kṹ e wéè bà. Kɛɛ Zízɛ̀ e kɔ̃̀nɔ, e pɛ bɛ̃̀ɛ̃ tã́ã̀ e kɔ̀-wɛ́nɛ́ ká. 7Lɛ̀ o kɛ dɔ̀á yi, wáà Zízɛ̀ wɛ̃́ĩ́-lɔ̀ɔ kɛ̀ɛ, Zízɛ̀ e dɔ e gã̀ mɔ̀, áà gèè o lɛ̀ɛ, “Mi lɛ́ lɛ ka bà, lɛ́ lɛ̀ɛ́ kɛ-wɔ̃̀ yɔɔ kɛ doa, à bèĩzɛ̀ è lééa pá gɛ̀lɛ̀ ká.” 8Lɛ̀ e kɛ kília, e bɛ̀i, e kɔ̃̀nɔ áà pɛ bɛ̃̀ɛ̃̀ tã́ã̀. 9Lɛ̀ o wɔ̃́ e kéa maa, o séĩ́ o gó lɛ̀ e kília mɔ̀ doó doó. Mia dìè-dìè vɔ̀ o ló bèĩzɛ̀. Zízɛ̀ doó tóò e kɛá yi. Lééa bɛ̃̀ɛ̃ dɔɔ̀ e kɛá tĩã́ yi nɔ́ kíli. 10Zízɛ̀ e dɔ e gã̀ mɔ̀, áà gèè à lɛ̀ɛ, “Lee, míáa o mɛ́ɛ̀ zàá? O dò nɔ́ɔ fé tóò wá, kɛ ó mɛ́ĩ́ káá i wĩĩ́?”
11Lééa a gèe kélɛ̀, “M dàa-mì, o dò nɔ́ɔ fé wá gbaa nɔ̀ɔɔ̀.”
Zízɛ̀ a gèe à lɛ̀ɛ, “Ma bɛ̃̀ɛ̃ m̀ḿ ló mɛ̀ĩ́-sà káà i wĩĩ́. Ƃà ló ɓo. Kɛɛ yékɛ̀ í kɛ-wɔ̃̀ yɔɔ kɛ gbaa.”]
Zízɛ̀ lɛ kpóṹ là zèe zì lɛ̀ fɔ̀nɔɔ̀ɔ ká
12Zízɛ̀ e mɛ́ĩ́ ɓo o lɛ̀ɛ zeĩ́ weeá kélɛ̀, “M kpóṹ là zèe zì lɛ̀ fɔ̀nɔɔ̀ɔ ká. Mí è lo tóò m píéa, lɛ́ɛ̀ lo kɛ̀ɓe zì lɛ̀ fɔ̀nɔɔ̀ɔ sɔ̀lɔ̀ ɓoò. Lɛ̀ɛ́ ló gbaa táà bĩ́ tii bà.”
13Fálásíì-mìà wa gèe à lɛ̀ɛ, “I gbaa i dìè ɓà kélá-wè ɓopìà. Wɔ̃́ ɓà gèea ye wá mia lɛ̀ɛ wánà zɛ̀.”
14Zízɛ̀ a là nìɛ̀ weeá kélɛ̀, “Ḿ m dìè m̀ kélá-wè ɓoá bɛ̃̀ɛ̃, wɔ̃́ m̀ gèea lɛ wánà zɛ̀. Ƃii ḿm̀ lɛ̀ m gó yia, wà lɛ̀ m̀ lo yía dɔ. Kɛɛ ka yee kàá lɛ̀ m gó yia, wà lɛ̀ m̀ lo yía dɔ. 15Káà mɛ́ĩ́ ɓo mia ɓéèe zì mɛ́ĩ́-ɓo-kɔ̀ ká. Kɛɛ m̀ḿ mɛ̀ĩ́-sà dɔ mi nɔ́ɔ fé mɔ̀. 16Kɛɛ è kɛ̀á m mɛ̀ĩ́-sà dɔ̀-mia-mɔ̀-mì káa, m̀ mɛ̀ĩ́-sà dɔ̀-mia-mɔ̀ kɔ̀ áá kɛɛ̀ wánà zɛ̀, ɓii ma wá m doó ká à kɛɛ̀ yí. Mia Dàa lɛ́ e m vɔɔ, lɛ m píé. 17À bɛ̃̀ɛ̃ɛ̃̀ lɛ kà Lɔ́ɔ̀ɔ yí kélɛ̀ yé kélá vɔ̀ pèèlɛ waà kɛ mɛ́ĩ́ yí, lɛ́ o pèèlɛɛ o wúú lɛ doóa, kɛɛ wɔ̃́ ò gèea lɛ wánà zɛ̀. 18Ḿm̀ m dìè m̀ kélá-wè ɓo. Ɛ́ɛ̃́ mia Dàa lɛ́ e m vɔɔ, lɛ́ɛ̀ m̀ kélá-wè ɓo nɔ́ kíli.”
19Wa gèe à lɛ̀ɛ kélɛ̀, “I dàa lɛ mɛ́ɛ̀ zàá?”
Zízɛ̀ a là nìɛ̀ weeá kélɛ̀, “Kàá m dɔ, kɛ bɛ̃̀ɛ̃ ká m Dàa dɔ. Kà m dɔ̀áa, káá m Dàa dɔɔ̀ nɔ́ kíli.”
20Zízɛ̀ e wɔ̃́ e kéa séĩ́ gèe lɛ̀ lɛ́ e kɛ pɛ zɔ̃̀ɔ̃̀pìà sálà-ɓò-Wálà-lɛ̀ɛ-kà wì lɛ̀ lɛ́ pɛlèe dàà-yí-pɛ̀ e kɛ yía mɔ̀. Mi gbɛɛ lɛ̀ɛ́ gbaa à kṹ, ɓii là lúó ɓɔɔ̀ lɛ̀ɛ́ gbaa kɛá.
Kàá bɛ̀i lóò lɛ̀ lɛ́ m̀ lo yía mɔ̀
21Zízɛ̀ a gèe o lɛ̀ɛ zeĩ́ kélɛ̀, “Ḿm̀ lo lóò lɛ̀ dò mɔ̀. Káà lo m naà, kɛɛ ka kɛ-wɔ̃̀ yɔɔ lɛ́ɛ̀ lo tóò ka mɔ̀, tó ka ga à ká. Kàá bɛ̀i lóò lɛ̀ lɛ́ m̀ lo yía mɔ̀.”
22Lɛ̀ e kɛ kília, Zúù-mìà wa gèe kélɛ̀, “Láà gèe kélɛ̀, kòó bɛ̀i lóò lɛ̀ lɛ́ è lo yía mɔ̀. Ɛ́ɛ̃́ láà nàà á gèe ko lɛ̀ɛ kélɛ̀ lɛ́ɛ̀ lo e dìè zɛɛ̀?”
23Zízɛ̀ a gèe o lɛ̀ɛ, “Káà go tã́ã̀ zèe. Kɛɛ ma yee ḿm̀ go lɛ̀í. Ka kpóṹ là zèe mìà ká. Kɛɛ ma yee, ma wá kpóṹ là zèe mi ká. 24Pɛ́ à kɛ̀ lɛ́ ma gèe ka lɛ̀ɛ kélɛ̀ ka kɛ-wɔ̃̀ yɔɔ lɛ́ɛ̀ lo tóò ka mɔ̀, ka gaáa lɛ́ ɓɛ. Ɛ́ɛ̃́ ka kɛ-wɔ̃̀ yɔɔ lɛ́ɛ̀ lo tóò ka mɔ̀ ka ga à ká, yé kàá gɛ̃̀ wánà ká kélɛ̀ m mí maa káa káa ká.”
25Wa gèe à lɛ̀ɛ, “Dé e i ká?”
Zízɛ̀ a gèe o lɛ̀ɛ, “M zi lɛ́ maà gèe à ká ka lɛ̀ɛ wɔ̃́ gã̀-gbɛ̃̀pìàa ká. 26Wɔ̃́ búnùzɛ̀ lɛ m lé kɛ ḿ gèe ka gbĩ mɔ̀. Ɛ́ɛ̃́ wɔ̃́ búnùzɛ̀ lɛ ɓe kɛ ḿ mɛ̀ĩ́-sà dɔá ka mɔ̀. Kɛɛ mí e m vɔɔ lɛ wánà zɛ̀. Ɛ́ɛ̃́ wɔ̃́ nɔ́ lɛ́ maà ma à léa, lɛ́ m̀ gèe kpóṹ là zèe mìà lɛ̀ɛ.”
27Kɛɛ̀ kɛ mia Dàa lɛ́ Zízɛ̀ e kɛ à wɔ̃̀ gèepìà o lɛ̀ɛ, òó gbaa à yí dɔ. 28À mɔ́ɔ̀ wɔ̃̀ mɔ̀ɔ, Zízɛ̀ a gèe kélɛ̀, “Yé kaà Mi Gbe sí lɛ̀ía, lɛ́ kà lo à yí dɔɔ̀ kélɛ̀ lɛ mí e à káa káa. Lúó e kília káa, lɛ́ kà lo à yí dɔɔ̀á kélɛ̀ m̀ḿ wɔ̃́ nɔ́ɔ fé dò kɛ m doó káa. Kɛɛ pɛ nɔ́ lɛ́ mia Dàa aà zɔ̃̀ɔ̃̀ m lɛ̀ɛ, lɛ́ m̀ gèea. 29Ɛ́ɛ̃́ mí e m vɔɔ lɛ m píé. Lɛ̀ɛ́ m tó do m doó ká. Ƃii ḿm̀ wɔ̃́ è à zò dàa kɛ̀ teele.”
30Mia búnùzɛ̀ lɛ́ o Zízɛ̀ gɛ̃̀ áà wɔ̃́ nì e kéa gèèa, o o zò dɔ à mɔ̀.
Mia lɛ́ o tóò lɛ o dìè kɔ̀ mɔ̀ɔ, e bɛ̀i lùò vɔ̀
31Lɛ̀ e kɛ kília, Zízɛ̀ a gèe Zúù-mìà yé waà o zò dɔ à mɔ̀ɔ lɛ̀ɛ kélɛ̀, “Yé kaà ló líé wɔ̃́ m̀ gèea kɛɛ̀ káa, kɛɛ ka tò-m-píé-mìà kpó-kpó ká. 32Ɛ́ɛ̃́ káà lo wánà-wɔ̃̀ɔ dɔɔ̀. Wánà-wɔ̃̀ɔ lɛ́ɛ̀ lo à kɛɛ̀, tó ka tó ka dìè kɔ̀ mɔ̀.”
33Wa là nìɛ̀ weeá kélɛ̀, “Ko Éɓɔ́lɔ́hã́ã̀ sùu-là-mìà ká. Kòó kɛ do mi gbɛɛ là lùò ká. Yé ɓaà gèe kélɛ̀ kóò lo tóò ko dìè kɔ̀ mɔ̀ɔ, à yí lɛ́ mɛɛá?”
34Zízɛ̀ a gèe o lɛ̀ɛ, “Wánà-wɔ̃̀ kpó-kpó lɛ́ m̀ gèe ka lɛ̀ɛ ɓɛ. Mi nɔ́ɔ fé lɛ́ è kɛ-wɔ̃̀ yɔɔ kɛ̀ɛ, lɛ kɛ-wɔ̃̀ yɔɔ là lùò ká. 35Lùò lɛ̀ɛ́ tó ká lɛ́ lɛ à wì lùò káa wì teele. Kɛɛ ká e kília wì ye-nɛ́ lɛ́ɛ̀ to yí teele. 36Yé Wálà Gbe aà i wũ mɛ́ ɓoa, kɛɛ i ɓoò lɛ wɔ̃́ yí fɛ́fɛ́ le. 37Ḿm̀ ka dɔ Éɓɔ́lɔ́hã́ã̀ sùu-là-mìà ká. É kɛ bɛ̃̀ɛ̃ kília, ka m zɛ-zì naapìà. Ƃii m lé-wè lɛ̀ɛ́ e dɔ̀lɔ̀ gbɛɛ gɛ̃̀ ka yí. 38Pɛ lɛ́ m Dàa aà zɔ̃̀ɔ̃̀ m lɛ̀ɛ, lɛ́ m̀ gèea. Kɛɛ ka yee, káà wɔ̃́ lɛ́ ka dàa a gèe ka lɛ̀ɛ kɛ̀.”
39O à là nìɛ̀ weeá kélɛ̀, “Éɓɔ́lɔ́hã́ã̀ lɛ́ e ko dàa káa.”
Zízɛ̀ a gèe o lɛ̀ɛ, “È kɛ̀á ka kpó-kpó ɓo Éɓɔ́lɔ́hã́ã̀ là nɔ́ɔ̀ káa, káá wɔ̃́ nɔ́ doó lɛ́ Éɓɔ́lɔ́hã́ã̀ a kɛɛ kɛɛ̀. 40Wɔ̃́ lɛ́ maà kɛɛ, lɛ́ e kélɛ̀, m wánà-wɔ̃̀ lɛ́ ma ma Wálà léa gèe ka lɛ̀ɛ. Ḿ kɛ bɛ̃̀ɛ̃ kília, ka m zɛ-zì naapìà. Éɓɔ́lɔ́hã́ã̀ lɛ̀ɛ́ gbaa wɔ̃́ sùua kɛ. 41Ka wɔ̃́ lɛ́ ka dàa a kɛɛ kɛpìà.”
Wa gèe à lɛ̀ɛ, “Wálà lɛ́ e Dàa doó nɔ́ e ko kɛ̀lɛ̀ɛ káa. Ko wá gbũ̀-là-nɛ̀ ká.”
42Zízɛ̀ a gèe o lɛ̀ɛ, “È kɛ̀á Wálà lɛ ka dàa kpó-kpó káa, m lɔ̀ áá kpɔ́ɔ̀ ka mɔ̀, ɓii m gó Wálà píé, lɛ́ m dɛɛ káa mɔ̀ zèea. M̀ḿ gbaa nu m dìè zì yíkɛ̀ gáàa ká. Kɛɛ à ye lɛ́ e m vɔɔ. 43Mɛ́ e kɛ lɛ́ kàá wɔ̃́ m̀ gèea yí ma? Pɛ́ à kɛ̀ɛ lɛ́ e kélɛ̀, kàá naa ká ka tóó dɔ m wéè mɔ̀. 44Míá ka kéa, ka ka dàa lɛ́ e Dɛ́ɓò káa là nɔ́ɔ̀ ká. Ɛ́ɛ̃́ káà nàà ká wɔ̃́ lɛ́ à kɛ-lɔ̀ è ka dàa kɛ̀ɛ kɛ. E kɛ mi zɛ-mì ká wɔ̃́ séĩ́ gã̀-gbɛ̃̀pìà. Ɛ́ɛ̃́ lɛ̀ɛ́ dɔ do wánà-wɔ̃̀ píé, ɓii wánà-wɔ̃̀ wá à yía mɔ́ɔ̀ wɔ̃̀ mɔ̀. Yé aà kɛ nɛ̀ kɛpìàa, kɛ lɛ wɔ̃́ lɛ́ e à zì kɛ̀ɓe làa kɛpìà, ɓii lɛ nɛ̀ kɛ-mì ká. Ɛ́ɛ̃́ lɛ nɛ̀ séĩ́ dàa ká. 45Ḿm̀ wánà-wɔ̃̀ gèe ka lɛ̀ɛ. Pɛ́ à kɛ̀ lɛ́ kàá m wéè gɛ̃̀ wánà káa lɛ́ ɓɛ. 46Ka ye kpɛɛ̀ zɛ̀ lɛ́ è bɛ̀i wɔ̃́ yɔɔ kɛ-wɔ̃̀ kã́ã̀ e lé m gbĩ mɔ̀? Yé mɔṹ m̀ wánà-wɔ̃̀ gèe ka lɛ̀ɛ, mɛ́ e kɛ lɛ́ kàá m wéè gɛ̃̀ wánà ká? 47Mí è go Wálà píéa, lɛ́ɛ̀ e tóó dɔ Wálà lé-wè mɔ̀. Kɛɛ ka yee, kàá gó Wálà píé. Pɛ́ à kɛ̀ lɛ́ kàá ka tóó dɔ à lé-wè mɔ̀ɔ, lɛ́ ɓɛ.”
Zízɛ̀ wà Éɓɔ́lɔ́hã́ã̀
48Zúù-mìà wa gèe Zízɛ̀ lɛ̀ɛ, “Kéa, à gèe kɔa ɓo i Sɛ̀mɛ́lìà mi ká, lɛ́ pɛ yɔɔ lɛ i píéa, lɛ nɛ̀ ká lɛ́ kɔa kɛɛ?”
49Zízɛ̀ a là nìɛ̀ weeá kélɛ̀, “Pɛ yɔɔ wá m píé. Ḿm̀ ɓɛ̀lɛyà nɔ m Dàa lɛ̀ɛ. Kɛɛ ka nyìɛ fɔ̃́ɔ̃̀ lɛ m yí. 50Ma wá m dìè tɔ́-ɓɔ wàà ɓèlèpìà. Mi lɛ́ è m tɔ́-ɓɔ wàà ɓèlèa lɛ ɓe. À ye lɛ́ è lo mɛ́ĩ́ ɓoòa. 51Wánà-wɔ̃̀ kpó-kpó lɛ́ m̀ gèe ka lɛ̀ɛ ɓɛ. Mi nɔ́ɔ fé lɛ́ è lo m wéè kɛɛ̀ɛ, lɛ̀ɛ́ ló gaà gbɛɛ ɓo.”
52Zúù-mìà wa gèe à lɛ̀ɛ, “Kóò à yí dɔ wánà kpó-kpó ká gbaa kélɛ̀ pɛ yɔɔ lɛ i píé. Éɓɔ́lɔ́hã́ã̀ e ga, ɛ̃́ɛ̃́ dɔ̀-Wálà-lé-là-mìàa nì o ga nɔ́ kíli. É kɛ bɛ̃̀ɛ̃ kília, ɓi yee, ɓáà gèe mí è lo i wéè kɛɛ̀ɛ, lɛ̀ɛ́ ló gaà gbɛɛ ɓo. 53Ko dàa Éɓɔ́lɔ́hã́ã̀ e ga. Kéa, íì i dìè si kpànazɛ̀, é dieá Éɓɔ́lɔ́hã́ã̀ là kàáà? Dɔ̀-Wálà-lé-là-mìà o ga nɔ́ kíli. Kéa, íì i dìè gɛ̃̀ deĩ̀ ká?”
54Zízɛ̀ a là nìɛ̀ weeá kélɛ̀, “È kɛ̀á ḿm̀ m dìè kɛ̀ kpànazɛ̀ɛ, kɛɛ m zì kɛ̀ kpànazɛ̀ yí lɛ̀ɛ́ gɔ̃̀ kɛɛ̀ à mɔ̀. Mí è m kɛ̀ kpànazɛ̀ɛ lɛ́ e m Dàa nɔ́ lɛ́ kà gèe lɛ kà Wálà káa káa. 55Kàá à dɔ do. Kɛɛ ma yee, ḿm̀ dɔ. È kɛ̀á ma gèe kélɛ̀ m̀ḿ dɔɔ, máá kɛɛ̀ nɛ̀ kɛ-mì ká lɛ̀ ka lɛ́ ɓe. Kɛɛ ḿm̀ à dɔ, ɛ̃́ɛ̃́ ḿm̀ à wéè kɛ̀. 56Ka dàa Éɓɔ́lɔ́hã́ã̀ gé kpó-kpó e li, ɓii e kɛ à mɔ̀ é m kɛ̀à-yí-lùò gɛ̃̀. E à gɛ̃̀, ɛ̃́ɛ̃́ à gé e li.”
57Zúù-mìà wa gèe à lɛ̀ɛ, “Ƃí i kɛ̀ɛ̀ wá fèle ɓo vũ̀ sɔ́ɔ́lia, ɓáà gèe i Éɓɔ́lɔ́hã́ã̀ gɛ̃̀?”
58Zízɛ̀ a gèe o lɛ̀ɛ, “Wánà-wɔ̃̀ kpó-kpó lɛ́ m̀ gèe ka lɛ̀ɛ ɓɛ. Kɛɛ Éɓɔ́lɔ́hã́ã̀ é tĩã́ kɛɛ̀ ɓea, m à ká.”
59Lɛ̀ e kɛ kília, o gɛ̀lɛ̀ sí kɛ ó à pá à ká. Kɛɛ Zízɛ̀ e e bĩ̀ĩ̀, e gó sálà-ɓò-Wálà-lɛ̀ɛ-kàa wì.
S'ha seleccionat:
Zɔ̃̀ɔ̃́ 8: MNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Mann New Testament © Bible Society in Liberia, 1978.