Máfìù 11
11
Zɔ̃̀ɔ̃́ mia bàtáì‐kɛ‐mì là vɔ‐mìà
(Lúù 7.18-35)
1Lɛ̀ Zízɛ̀ e nyɛ wɔ̃́ kɛ‐zì e kéa zɔ̃̀ɔ̃ɔ̃̀ mɔ̀ là tòà‐píé‐mìà vũ̀ doó wɛ́lɛ́ pèèlɛɛ lɛ̀ɛ, e gó gbaa yí, e ló pɛ́lɛ lɛ́ e kɛ yía yí píé, kɛ é pɛ zɔ̃̀ɔ̃̀ áà wɔ̃́ gèè lòũ̀ ká.
2Lɛ̀ Zɔ̃̀ɔ̃́ e tó bĩ́‐kɛ̀ì, lɛ́ e wɔ̃́ lɛ́ Kɛ́lɛ̀ì e kɛ à kɛpìàa làṹ maa, Zɔ̃̀ɔ̃́ e là tòà‐píé‐mìàa dò vɔ Zízɛ̀ píé, 3ó à wɛ̃́ĩ́‐lɔ̀ɔ kɛ weeá kélɛ̀, “Ƃi lɛ́ i mi lɛ́ è lo nuùa káa, ɛ̃́ɛ̃́ kɛ̀ lɛ ko mɔ̀ ko nyìɛ é kɛ zuú mi gbɛɛ nuù wɛ̃́ĩ̀?”
4Zízɛ̀ e o wéè yí zṹ kélɛ̀, “Kà lo ká wɔ̃́ lɛ́ kà ma, ɛ̃́ɛ̃́ lɛ́ kà à gɛ̃̀ɛ, gèe Zɔ̃̀ɔ̃́ lɛ̀ɛ. O lɛ́ o kélɛ̀, 5nyìɛ‐káá‐mìà óò lɛ̀ gɛ̃̀. Mia kpɔ́lɔ̀ɔ zɛ̀ óò tàà, tó mia lɛ́ gbéè lɛ o mɔ̀ɔ, wáà là, tó wáà kɛ̀ dà‐o‐ɓɛ́ĩ̀‐bà mìà ká. Mia lɛ́ o tóó taà lɛɛ, óò wɔ̃́ ma. Mia yé o gaà lɛɛ, o wɛ̀lɛɛ̀ lɛ ga kɛ̀lɛ̀. Ɛ́ɛ̃́ zeĩ́, wɔ̃́ làṹ yièa gèeè lɛ mia lɛ́ pɛ wá o kɛ̀lɛ̀ɛ lɛ̀ɛ. 6Mi lɛ́ lɛ̀ɛ́ ló tèáà lò líé m mɔ́ɔ̀ wɔ̃̀ yí mɔ̀ɔ, zò géli lɛ à kɛ̀lɛ̀.”
7Lɛ̀ o kɛ lópìà o mɛ̀ĩ́a, Zízɛ̀ e gbɛ̃̀ gbaa, áà Zɔ̃̀ɔ̃́ mɔ́ɔ̀ wɔ̃̀ gèè mia gbũa lɛ̀ɛ kélɛ̀, “Lɛ̀ lɛ́ ka ló Zɔ̃̀ɔ̃́ píé yɛ̀í làa, mɛ́ ka naa ká gɛ̃̀? Ka naa ká sùu lɛ́ fã̀ã̀ aà lááa gɛ̃̀? 8Mɛ́ ka ló yi ká gɛ̃̀? Ka ló yi kɛ ká gɔ̃ lɛ́ à mɛ́ síì lɛ sɔ yiè káa gɛ̃̀? Tó ḿ gèe ka lɛ̀ɛ, mia lɛ́ ò o mɛ́ si kília, o kɛ‐pìà lɛ́ nɔ́ e mia kpànazɛ̀ kɛ‐pìà káa. 9Pɛ lɛ́ ka ló à gɛ̃̀ wɛ̃́ĩ̀a, kà tɔ́ gèe m lɛ̀ɛ. Ka ló dɔ̀‐Wálà‐lé‐là‐mì gɛ̃̀ wɛ̃́ĩ̀? Kà tó ḿ gèe ka lɛ̀ɛ, lɛ kíli. Ɛ́ɛ̃́ pɛ lɛ́ ka gɛ̃̀ɛ, à diè lɛ bɛ̃̀ɛ̃ dɔ̀‐Wálà‐lé‐là‐mì là. 10Ƃii Zɔ̃̀ɔ̃́ lɛ́ à wɔ̃̀ bɛ̃̀ɛ̃ɛ̃̀ lɛ Wálà kiia yía. A gèe kélɛ̀, ‘Lɛ̀ gɛ̃̀, ma Wálà ḿm̀ lo m̀ vɔ‐mì vɔɔ̀ i wɛlɛ mɔ̀, à ye lɛ́ è lo lóò i líé, kɛ é i gɛ̀nɛ̀ bɛ̀ia.’ 11Wánà‐wɔ̃̀ lɛ́ m̀ gèe ka lɛ̀ɛ ɓɛ. Zɔ̃̀ɔ̃́ mia bàtáì‐kɛ‐mì lɛ dóo kpànazɛ̀, é dieá gɔ̃à séĩ́ lɛ́ loà waà o ye kpóṹ là zèea là. Kɛɛ mi yé yíkɛ̀ gáàa léĩ́‐tó‐mɔ̀ lɛ à kɛ̀lɛ̀ mia lɛ́ Wálà lɛ́ e lɛ̀ía tóò lɛ o làa bàa, lɛ kpànazɛ̀, é dieá Zɔ̃̀ɔ̃́ bɛ̃̀ɛ̃ là. 12É kã́ lúó lɛ́ Zɔ̃̀ɔ̃́ e kɛ mia bàtáì kɛpìà à káa mɔ̀, é ɓɔá pɛ́nɛɛ mɔ̀ɔ, mia waà gèlè gbini kpó‐kpó ɓo lɛ̀ lɛ́ Wálà lɛ́ e lɛ̀ía tóò lɛ mia là yia mɔ̀ɔ mɔ̀. Ɛ́ɛ̃́ gèlè‐kúlá vɔ̀ waà à kɛ‐zì naa kɛ ó à kṹ. 13Dɔ̀‐Wálà‐lé‐là‐mìà séĩ́, wà Móózè là Lɔ́ɔ̀ɔ, o kɛ à wɔ̃̀ gèepìà teele e tóá kíli Zɔ̃̀ɔ̃́ e nu. 14Ɛ́ɛ̃́ yé kaà wéé à mɔ̀ kɛ ká ka kɔ̀ yà wɔ̃́ lɛ́ ò gèea wìa, Zɔ̃̀ɔ̃́ lɛ́ mɔṹ e Iláyà lɛ́ lɛ à mɔ̀ é nua káa. 15Mi lɛ́ à tóó è wɔ̃́ maa, è e tóó dɔ.
16“Kɛɛ mɛ́ m̀ bɛ̀i à mɔ̀ ḿ míá o ɓe yà kɔa ɓoa yía gɔ̃́ à mɔ̀? O kélɛ̀ nɔ́ɔ̀ɓé lɛ́ ɓe yàá lɔ́ɔ́ kpánà. O kù doó‐mì lɛ́ɛ̀ gbɛ̀ɛ̀ e ɓɛ́ĩ̀ nì là, áà gèè, 17‘Ko ɓɔ̀ɔ̀ pìè ka lɛ̀ɛ. Kɛɛ kàá gbaa naa ká tã́ kɛ. Ko ga‐là‐gbòò ɓo. Kɛɛ kàá gbaa naa ká yà yéĩ̀zɛ̀.’ 18Lɛ̀ Zɔ̃̀ɔ̃́ e nu, lɛ́ lɛ̀ɛ́ gbaa kɛ pɛ ɓèlèpìà, tó lɛ̀ɛ́ wã́ã́ĩ̀ gbɛɛ mia, wa gèe kélɛ̀, ‘Pɛ yɔɔ lɛ à píé.’ 19Lɛ̀ Mi Gbe e nu, áà pɛ ɓèlè, ɛ̃́ɛ̃́ áà pɛ mìa, wa gèe, ‘Kà gɔ̃́ɔ gɛ̃̀. À gé‐zì wɔ̃̀ lɛ à mɔ̀, ɛ̃́ɛ̃́ lɛ zeĩ́ wã́ã́ĩ̀ mi‐mì ɓɔ̀ɔ ká. Ɛ́ɛ̃́ lɛ ɓo‐pɛ̀ ɓo‐mìà wà kɛ‐wɔ̃̀ yɔɔ kɛ‐mìà ɓɛ́ɛ ká.’ Kɛɛ wɔ̃́ lɛ́ è kɛ̀ Wálà zì gíkã́ kolo làa, lɛ́ɛ̀ à zɔ̃̀ɔ̃̀ kélɛ̀ Wálà zì gíkã́ lɛ wánà zɛ̀.”
Sɛ́lɛ́ lɛ́ òó gbaa o zò dɔ Zízɛ̀ mɔ̀ à yía
(Lúù 10.13-15)
20Lɛ̀ e kɛ kília, Zízɛ̀ e gbɛ̃̀ gbaa, áà mɛ́ĩ́ ɓò pɛ́lɛ nì lɛ́ aà wɔ̃́ lé‐pa‐zɛ̀ búnùzɛ̀ kɛ o yía lɛ̀ɛ, ɓii òó gbaa o sɔ̃̀ɔ̃ yɔɔ mɛ́ vɔ̀ɔ mɔ́ɔ̀ wɔ̃̀ mɔ̀. A gèe kélɛ̀, 21“Kɔ̀lézĩ̀‐sɛ̀lɛ̀, zi sùu kpɛɛ̀ lɛ́ wɔ̃́ yéĩ̀zɛ̀ è lo kɛɛ̀á i ká ké. Bɛ̀sádà‐sɛ̀lɛ̀, zi sùu kpɛɛ̀ lɛ́ wɔ̃́ yéĩ̀zɛ̀ è lo ɓɔɔ̀á i là ké. É kɛ̀á wɔ̃́ kpàlézɛ̀ lɛ́ wa kɛ i yía, o wɔ̃́ nɔ́ doóa kɛ Táyà wà Sádã̀a, míá o yía wáá kɛɛ̀ o sɔ̃̀ɔ̃ yɔɔ mɛ́ vɔ̀ɔɔ̀ɔ zɛ̀ ká mɔ́ pɛ́lɛ̀, wáà dà‐yéĩ̀‐yí sɔ̀ dà o mɔ̀, wáà yàá tã́ã̀ yúé bà. 22Kà tó ḿ gèe ka lɛ̀ɛ, lúó lɛ́ ò lo mɛ̀ĩ́‐sà dɔɔ̀á mia mɔ̀ɔ, Táyà wà Sádã̀ mɔ́ɔ̀ wɔ̃̀ lɛ́ɛ̀ lo kɛɛ̀ fia ka mɔ̀. 23Kàpɛ́nìɛ̀‐sɛ̀lɛ̀ ɓi bɛ̃̀ɛ̃, ɓa naa kɛ í i dìè sí lɛ̀í í ɓɔ Wálà‐pà? Óò lo i dùò lɛ̀ lɛ́ mia yé o gaà lɛɛ, o à mɔ̀ɔ lɛ̀ mɔ̀. É kɛ̀á wɔ̃́ kpàlézɛ̀ lɛ́ wa kɛ i yía o wɔ̃́ nɔ́ doóa kɛ Sɔ́dɔ̃̀ɔ, áá kɛɛ̀ tĩã́ ɓe pɛ́nɛɛ. 24Tó ḿ gèe i lɛ̀ɛ, lúó lɛ́ ò lo mɛ̀ĩ́‐sà dɔɔ̀á mia mɔ̀ɔ, Sɔ́dɔ̃̀‐sɛ̀lɛ̀ mɔ́ɔ̀ wɔ̃̀ lɛ́ɛ̀ lo kɛɛ̀ fìa i mɔ̀.”
Kà nu m píé ká ka fĩ́ĩ́ dɔ
(Lúù 10.21-22)
25Lúó e kília káa, Zízɛ̀ a gèe kélɛ̀, “M Dàa, lɛ́ i lɛ̀í wà tã́ã̀ o Dàa‐mì káa, ḿm̀ i zúo ɓo, ɓii pɛ lɛ́ ɓaà à bĩ̀ĩ̀ mia lɛ́ ò kii dɔ gbùò, ɛ̃́ɛ̃́ o yé o gíkã́ã̀ lɛɛ o mɔ̀ɔ, à zɔ̃̀ɔ̃̀ lɛ́ ɓa ɓo mia yé òó pɛ gbɛɛ dɔɔ lɛ̀ɛ, ḿm̀ i zúo ɓo à mɔ́ɔ̀ wɔ̃̀ mɔ̀. 26M̀m̀, m Dàa, e kɛ i dìè i zì zò‐wèèà‐mɔ̀ wɔ̃̀ ká lɛ́ i wɔ̃́ e kéa kɛɛ.
27“M Dàa aà pɛ séĩ́ nɔ m lɛ̀ɛ. Mi gbɛɛ lɛ̀ɛ́ má m à Gbe káa dɔ, é kã́ m Dàa mɔ̀ɔ ká. Ɛ́ɛ̃́ mi gbɛɛ lɛ̀ɛ́ m Dàa dɔ, é kã́ má m à Gbe ká, ɛ̃́ɛ̃́ mia lɛ́ má m à Gbe káa, m̀ nàà ḿ m Dàa zɔ̃̀ɔ̃̀ o lɛ̀ɛ mɔ̀ɔ ká.
28“Mia séĩ́ lɛ́ kà yɛɓo kɛ̀ gágà, ɛ̃́ɛ̃́ lɛ́ pɔɔ̀ gbííni lɛ ka wĩĩ́a, kà nu m píé. Ḿm̀ lo à kɛɛ̀ ká ka fĩ́ĩ́ dɔ. 29Kà m kpɛɛ‐mɔ̀ kálá sí ká dà ka kpɛɛ mɔ̀. Ɛ́ɛ̃́ kà pɛ dã́ m kolo là. Ƃii m kpóló‐kpɔ̀‐mɔ̀ zɛ̀, ɛ̃́ɛ̃́ dìè‐sì‐péĩ́ zɛ̀. Ká kɛ̀á kília, káà lo fĩ́ĩ́‐dɔ sɔ̀lɔ̀ ɓoò. 30Ƃii kálá lɛ́ m̀ lo à dàà ka kpɛía, à vũũ̀ wá wɔ̃́ gáàa ká. Ɛ́ɛ̃́ pɔɔ̀ lɛ́ m̀ lo à yàà ka wĩĩ́a, ye wá gbííni.”
S'ha seleccionat:
Máfìù 11: MNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Mann New Testament © Bible Society in Liberia, 1978.