LUKAS 11
11
Atakam Allah bajanim atakam
(Mat. 6:9-13, 7:7-11)
1Emesare. Era bare ere, Yesus, wan asan aememen. Are atakam Allah ajanimen. Atakam bajanim akariemerawa, abajamkai ipit taka atakam akoromen. “Tuhan! Atakam, Allah, bajanim, baememtamaro— Yohanes abajamkai owe aememtame emes tamena.” Emes atakam aesimen. 2Armat Ipit arawa, atakam era owe akoromen. “Tare atakam Allah ajanimtakam, emes atakam akoromay:
‘DaDot! Allah ere, Wo taka are. Owe tere Wo taka baeomtanis. Owe Wo taka basitimtanis. Wore dara baomep Ipit.
3Me ju afaafeto, daobajapenda banda pak patetamaro.
4Dare, owe aemaroas pota pak, bimak binip ajanimemtammarom. Emesare, Wonom dadosa, bimak binip ajanimemtamkoromaro.
Wore, Bii Kapar Ipit dare Wora bamesem apok atatapimtaaportaro, dare Wora bajamkai bamompim-ombar.’ Emes atakam ajanimay.”
Yesus emes atakam aesimen. 5Armat Ipitam atakam era owe aokoromen. “Tare wan ipit taka eamnak ere ajoo ipit tame aesosto, wanam emes atakam akoreto, ‘Deipite! Amos jise bamintep atetaman. 6Dejoo ipit waut amsisim. Are detame emapa. Dere ara batetam amos, ere apoknak,’ emes atakam aesimto, 7era amos armat ipit atakam era ipit akoromtem. ‘Wore dera bajurusum bas. Jimsap etekapimapomey. Denom, dejiiam, ise. Dere ere, baemewasit asan apok. Dere pak wora baemeotetam asan apok.’ Emes atakam aesimtem. 8Baporay! Armat ipit, era pak atakam bajanim ipit, ajoo ipit aportem. Me, are bawasit wanam era ipit pak batetam, ere apok. Me, armat ipit, era ipit atakam bare tanane aijanima aijanima ajito aportem. Erarawa are era atakam ajanimto pak takes atetamtem. 9Baporay! Atakam ajanimay. Allahrawa, era atakam ajanimtakam pak aemtamteman. Bandimarporay. Tararawa, era andimarportakam pak ataertemakam. Jimsap akokomay. Allahrawa, jimsap tara apaimtamteman. 10Era atakam ajanimmas owe takes, era atakam ajanimmas pak ataertemas. Era andimarmas owe, era andimarpormas pak ataertemas. Allah, era jimsap bakokom owe, jimsap apaimtamtem. 11Tare jii aptam owe, tajii amos atakam tara ajanimtan apaye, tare eka tajii batetam ape? Are enamo atakam tara ajanimtan apaye, tare amber tajii batetam ape? 12Are ajomo oka atakam ajanimtan apaye, tare ande tajii batetam ape? 13Tare takes jokoman owe. Tare ere, tajii akot pak batetam tamsam. Emesare, Taritipit Surga oup aapeta. Armat Ipitam, Allah Jip, era atakam ajanimtas owe, atetamtem.” Yesus emes atakam aesimen.
Beelsebul atakam
(Mat. 13:22-30; Mrk. 3:20-27)
14Emesare. Okor bii, jipit taka jak bomon aemapaaririn. Erarawa era ipit okor ipit aememaaririn. Era bare, Yesus era bii era ipit jak bomon ambirimjisimen. Era bii ara ipit jak bomon aejise, ara ipit atakam aokoren. Era owe tanane emes apores, are jinim daytu aeesen. 15Wan owe ere, atakam akoresen. “Beelsebul, bii takes akapar ipit arare. Beelsebul, afiak pak ara aemema Ipit atetamum. Erarawa ara Ipit bii ambirimjisimum.” Emes atakam aesimesen. 16Wan owerawa, Armat Ipit fiaknak apaye baempor aemesen. Erarawa are Armat Ipit, Surga oup jinim bae pak, ara baporomtam, atakam fiak ajanimesen. 17Armat Ipit ere, era owe bimak binip amsamen. Erarawa Are atakam era owe aokoromen. “Samane taka owentakam armamon ajamomtas, are ajaniostemas. Tame oweam owentakam armamon ajamomtas, anom apatakuostemas. 18Tare atakam akoremakam, ‘Beelsebul afiak pak ara aemema Ipit atetamum. Erarawa era Ipit bii ambirimjisima.’ Emes atakam aesimmakam. Me, Bii Kapar Ipit, arereis ambirimjisimto apaye, ere owentakam armamon ajamomtemas. Erarawa owe baomep pak ajaniostem. 19Tare ere, ‘Beelsebul afiak pak ara aemema Ipit atetamum. Erarawa are bii ambirimjisimum.’ Emes atakam aesimmakam. Me, tabajamkai owe era bii ambirimjisimemas. Me bii bamirimjisim fiak pak era owe tao tetame? Emesare, tabajamkai owe era akoremakam atakam, atakamnak apok aporomtammas. 20Dere ere, Allah fiak pak aptam, bii ambirimjisimmin apaye, ere Allah owe aobaomep taasan emeememe.
21Fiak ipit, fero pak takesnak aemomemto, wanam atame banamek ataito, ere aapak takes asan akot aemapmas. 22Me, fiaknak ipit, era ipit owentakam aemto, wanam are era ipit akumimosomto, are era ipit jiirey aeeme fero pak takes ataerem. Are era ipit pak tasa aetaerem, wanam era pak takes, wan owe asaietamum.
23Me Dera bames apok owe, deatakam aoomas. Owe wan owe Dera bajamkai baememtam apok aemtas, are dekarai ajurusumtemas.”
Bii, asamot ipit jak bomon bojiiap atakam
(Mat. 12:43-45)
24“Bii, owe jak bomon aejisto, era wasen atawejarem. Are kais banda asan andimarem. Are era kais banda asan baporomtaer apok aemto, are atakam akorem. ‘Dere era ajiso tame aojiiaptemin.’ Emes atakam aesimum. 25Era asan aofasito, are era jak bomon ajise ipit, tame tamen aporem. Owe era tame bomon awaramjisimes. Are era tame pak takes ataakenemapomes. 26Me biirawa, aoesose, wanam wan bii poman ban jamnuk ametetoomjinaoeme. Era bii poman ban jamnuk, ere jokoman daytinak. Me bonak bii, ere jokoman daytu apok. Erarawa era bii takes, era ipit jak bomon ajiiemas. Are era asan aemapemas. Era ipit arawa, asan potanak aememem. Bonak ere, asan pota kopeepe aemapaarir.” Yesus emes atakam aesimen.
Asan akot owe atakam
27Yesus emes atakam akorome ere, taot taka, era owe tanane damon, atakam akoromen. “Me wora ajisipetiien wanam ao andamen taot, ere asan akot!” Emes atakam aesimen. 28Yesus ere, atakam akoromen. “Era asan akotnak owe, ere Allah atakam jane ajimas wanam ji aemas owe erare!” Emes atakam aesimen.
Jinim bae pak bapor atakam bajanim bas atakam
(Mat. 12:38-42)
29Emesare. Era owe tanane, Yesus damo setepkope aememes ere, Armat Ipit, atakam akoromen. “Ara ajaniemmas owe, ere jaos owe arare. Are jinim bae pak bapor, atakam ajanimmas. Allah ere, wan jinim bae pak, ara aemapes owe baporomtam apok aemtem. Are Yunus aeme pak, emes tamen jinim bae pak taka aporomtamtem. 30Allah Yunus Niniwe baesos atakam asakamtamen. Me Yunus aeme pak, jinim bae pak eraren. Era jinim bae pak, Allah Yunus atakam asakamtame atakam, Niniwe owe emes baporomtam pak eraren. Emesare, Asamot Anakot Ajaoreme Ipit, Yunus aeme pak, waa jaos owe emes tamen aemtem. 31Wanam, selatan tapirmi raja taot, Solomo bimak binip baso atakam jane bajie, setep apok tapirmi aejinaoen. Me Solomo, ere juas apok. Ara asan ere, juas aptamnak ipit aometa. Emesare, Allah ara ajaniemmas owe adosa atakam basakamtii era Ju Ajiire aemamesto, era taotam awasittem, wanam ara aemapes owe, owe jaos, emes atakam akoretem. 32Me Niniwe oweam, Yunus era akoretame atakam jane ajies, wanam adosa ambakemesen. Me Yunus ere juas apok. Ara asan ere, juas aptamnak ipit aometa. Emesare, Allah ara ajaniemmas owe adosa atakam basakamtii era Ju Ajiire aemamesto, Niniwe oweam awasittemas, wanam ara aemapes owe, owe jaos, emes atakam akoretemas.”
Pelita atakam
(Mat. 5:15, 6:22-23)
33“Owe pelita asaramapomtas, are era pelita tame bomon apaye, ember bomon apaye basaimapom apok. Me, are era pelita meja ten ataapomemas. Erarawa era tame ajiitas owe, era sare aporemas. 34Me tabanamek ere, tadamo apelita emes tamen are. Tabanamek akot apaye, ere tabimak binipam baso takes. Me, tabanamek pota apaye, ere tabimak binipam jiiti takes. 35Emesare, tanom turuar. Era sare jiiti boem-ombar. 36Me tadamo takes sare apaye, wanam jiiti apok apaye, ere sare anakot aemtem. Are, pelita, tara asaramtiiman emes tamen are.” Yesus emes atakam aesimen.
Yesus Parisi owe anama Musa Basakamtam Atakam baememtam owe, jaos owe, akore atakam
(Mat. 23:1-36; Mrk. 12:38-40)
37Yesus, emes atakam akorekoromerawa, Parisi ipit, atakam Armat Ipit akoromen. “De! Amos takan andasey.” Emes atakam aesimen. Yesus arawa, atame ajiie, wanam amos banda apakiapen. 38Me Parisi ipit ere, Yesus ban bwi bonak batakameosom apok aporen. Erarawa jinim aeen. 39Me Tuhan, atakam era ipit akoromen. “Tare Parisi owe, mbok anama piring tasan atet, bwi aeosomemakam. Me tajak bomon ere, jokoman pak daytinak. Tanom pakanam daytinak. 40Janda owee! Allah, era tasani pakam aokenemapome. Anom bomon pakam aokenemapome. 41Tare ere, era bomon pak, era pak apok owe, atetamay. Ere tabomon pak takes arawa, atet apok aemaptemas. 42Parisi owee! Tare ajirisapmakam. Tare sere anama irit, era atat kupis sayuram, persepuluhan Allah atetamemakam. Tare ere, turu owe baememam, Allah bafaimam, era bimak binip batetaram apok aememakam. Era pak ere, bimak binip atetaramteteray. Me, wan pakam bimak binip bajanimem bas. 43Parisi owee! Tare ajirisapmakam. Era Yahudi owe samayen tame bomon ere, tare era bonak owe baemap asan jak aseseromemakam. Era pasar asan ere, tanom owe, “selamato” tara bajie, jak aseseromemakam. 44Parisi owee! Tare ajirisapmakam. Tare pisuu apok dambir asan emes tamen are. Era dambir asan bai ajipiremtas owe, era dambir asan bapor apok aememas.” Yesus emes atakam aesimen.
45Musa Basakamtam Atakam baememtam ipit takarawa, atakam Armat Ipit akoromen. “Guru! Emes atakam akoremmarem ere, Wonom dare tame atakam akorommaroam.” Emes atakam aesimen. 46Yesus arawa, “Musa Basakamtam Atakam baememtam owee! Tanom ajirisapmakam. Tare wuturunak pak tai atakam owe asakamtamemakam. Tare ere, era asakamtamemakam pak tai baem, pi bajat apoknak aememakam. 47Tare bajirisap owee! Me tarfais Allah atakam bakoretam owe atatiies. Tararawa atatiies owe dambir asan tame aeapomemakam. 48Emesare, tare tarfais owe aemes pak, akot ajimakam. Are era owe atatiies. Tanom era dambir owe asan tame aeapomemakam. Emesare, tare aateman batamomat owe, tarare. 49Allah ere, bimak binip baso taka. Are atakam akore ere, ‘Dere deatakam bakoretam oweam, deatakam bakoretam bamirimemom oweam, era owepu ambirimemomtemin. Era owerawa, wan ambirimemomtey owe atatiitemas. Are wan ajurusumtemas.’ Emes atakam aesimen. 50Allah ara tapirmi akenemtiie bare ajiire, owe Allah atakam bakoretam owe atatiia ajaies. Emesare, Allah, era owe ajokoman pak jipu, asan pota bajirisem pak ara ajaniemmas owe aemtem. 51Bonak ere, era owe Habel atatiiesen. Asep arawa, are Sakaria atatiiesen. Are Sakaria, Allah Pitini Tame anama Allah pak jis bajaatam joo waut, atatiiesen. Baporay! Allah, era owe aoemaaris jokoman pak jipu, waa ara ajaniemmas owe asan pota ajurusumtem.
52Musa Basakamtam Atakam baememtam owee! Tare ajirisapmakam. Tare atakamnak jane ajiekem. Me, tare era atakamnak bai ajipiremmakam. Tanom era atakam ji bae pota ajimakam. Tararawa era atakam jane bajie akot ajimas owe, tare era owe wis tamen aokoromepmakam.” Emes atakam aesimen.
53Yesusam era asan beken ajiose ere, Musa Basakamtam Atakam baememtam owe anama Parisi owe, Yesus atakam pota aikoroma aikoroma ajaiesen. Are Armat Ipit aijatepora aijatepora ajaiesen. 54Ere, Armat Ipit pir aeomesen. Are apota pak atakam apaye jane bajie aemesen.
S'ha seleccionat:
LUKAS 11: LAIASC
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió