LUKAS 8
8
Yesus ajamkaies tapes atakam
1Yesus era pak aemkoromerawa, Are bajateemem apoken. Are wan kota tananeam, wan samane tananeam, ajasasiomasen. Armat Ipit Allah owe baomep Akot Atakam akoretamen. Me abajamkai owe 12am takan aemesen. 2Wan tapesam takan aemesen. Bonak ere, bii era tapes jak bomon aemapteteresen. Era tapesam damo aemansesen. Yesus ere, era tapes ajaoromtaeren. Me wan taot juas Marian. Are wan juas Magdalenan. Bonak ere, bii poman ban jamnuk era taot jak bomon aemjisesen. 3Wan taot arawa, juas Yohanan. Are Kusa aremon. Kusa, Herodes pak banamek batai ipitin. Wan taot arawa, juas Susanan. Wan tapesam tananeen. Era tapes, wan pak, Yesusam, abajamkai oweam, atetamesen.
Eek bapatakum baetaa atakam
(Mat. 13:1-9; Mrk. 4:1-9)
4 Kota tanane owe, Armat Ipitpu ambaromesen. Era owe tananenakam ajarisiemesen. Me Armat Ipitam baetaa atakam era owe akoretamen. 5“Kebun karai baem ipit, eek bapatakum ajisen. Era eek apatakume, wan bai asanpu andaeamesteteresen. Owe era eek bai ajipipirjaresen. Sakaorawa, era eek andakoromesen. 6Wan eek ere, eka tapirmipu andaeamesteteresen. Era tapirmi ere, butu apoken. Era eek ajitteteres, wanam sa asapteteresen. 7Wan eek ere, fa aptam wus akene bomon andaeamesteteresen. Era eek akeneam, era fa aptam wus akeneam, takan ajitesen. Era fa aptam wus akene ere, era eek akene apurimompesen. Are era eek akene asanamimompesen. 8Wan eek ere, tapirmi akotpu andaeamesteteresen. Are ajitteteres, wanam era eek wus taka eek 100 apeomtepteteresen.” Yesus emes atakam aesimen. Yesus emes atakam aesimerawa, atakam akoren. “Jane fero owe, ara atakam jane bajitas.” Emes atakam aesimen. 9Me abajamkai owerawa, Armat Ipit ajateporesen. “Ara baetaa atakam, awar wama pakem?” Emes atakam aesimesen. 10Armat Ipit arawa, atakam aokoromen. “Me Allah owe aobaomep andaeto bare atakam, ere bomonnak atakam. Era bomonnak atakam jane bajiekorom, ere taatakam. Dere ere, baetaa atakamiin, ere wan owe akoretammin. Era owe era atakam apormas. Me, are baporkorom-ombar. Are era atakam jane ajimas. Me, are jane bajiekorom-ombar.”
Yesus era baetaa atakam basonak akoretame atakam
(Mat. 13:18-23; Mrk. 4:13-20)
11“Ara baetaa atakam emes tamen are: Era eek, ere Allah atakam tamen. 12Me bai asanpu andaeamesteteres eek, era atakam jane ajimas owe tamen. Era owe, ara atakam jane ajimas, Bii Kapar Ipit era owepu ajinaoemem. Are, era owe, era bimak binip atetaramemas atakam, ataerem. Era owe, Bajortaer Ipit atakam eemnak bamesemkorom-ombar. Are bajorem-ombar. 13Me eka tapirmi andaeamesteteres eek ere, wan owe era atakam jane ajimas emes tamen are. Era owe era atakam jane ajimas, are jak akot aemememas. Are bimi bafaap apok eek awar. Are era atakam karakope ambesemmas. Me Bii Kapar Ipit era owe dosa baem atatapimtaaporem. Era owerawa, ambompimmas. 14Me fa aptam akene bomon andaeamesteteres eek ere, wan owe era atakam jane ajimas emes tamen are. Asep bare era owe ara aemansa tapirmi pak bimak binip daytu atetaramemas. Are pak tanane bataat jak aseseromemas. Are Allah atakam bimak binip kope asatakekemomemas. Erarawa are eek pii bamwe apok aememas. 15Era tapirmi akot andaeamesteteres eek ere, wan owe era atakam jane ajimas emes tamen are. Are owe turuam, owe akotam aemememas. Are era atakam bimak binip atoomemas. Are bamompim apok aememas. Erarawa are jak jirao aptam Tuhan eek pii ambwemtamemas.”
Pelita baetaa atakam
(Mrk. 4:21-25)
16“Owe pelita asaramapomtas, are era pelita, ise asan bomon baemejiitaapom asan apok. Owe ere, era pelita, oup asan ataapomemas. Era tame ajiimas owe, era pelita sare bapor are. 17Era batukumapom pak takes, baso ataapomtemas. Era tiruu pak takesam, baso aemaptemas. (Era baetaa atakam takes emes taka are.) 18Emesare, era jane ajimakam pak turuar. Era atakam jane ajiekoromtas owe, wan atakamam jane aojitemas. Era atakam jane bajiekorom apok owe ere, ‘Dere era atakam jane kope ajimin.’ Emes atakam aesimtetertemas. Me, era jane ajies atakamam bimak binip ajanimemtemas.” Yesus emes atakam aesimen.
Yesus arsoot anama areotais atakam
(Mat. 12:46-50; Mrk. 3:31-35)
19Emesare. Yesus arsoot anama areotais Armat Ipitpu aemtinesen. Era asan ere, owe tanane aememesen. Me are, Armat Ipit, bamjiikaiem asan apoken. 20Owerawa, atakam Yesus akoromesen. “Worsoot anama woreotais tasana. Are Wora baporen.” Emes atakam aesimesen. 21Armat Ipit ere, “Wan owe Allah atakam jane ajimas, wanam era atakam ji aeemas. Era owe ere, deritapes anama dereotais.” Emes atakam aesimen.
Yesus kuur daytu akarime atakam
(Mat. 8:23-27; Mrk. 4:35-41)
22Emesare. Era bare, Armat Ipitam, abajamkai oweam, ti asojuuesen. Armat Ipit arawa, atakam era owe akoromen. “Era poman ajiramo.” Emes atakam aesimen. Emesare, are andaejuuesen. 23Era poman apiires ere, Yesus ti bomon ise aputamsen. Kuur daytinak arawa, awumomjinaoen. Woam era ti afaumjuumen. Erarawa are asan potanak aemesesen. 24Me abajamkai owerawa, Yesus ambaromes, wanam ajitinesen. “Guru! Guru! Dare bwi dambir aemtemarom apeno.” Emes atakam aesimesen. Emesare, Armat Ipit awasiten. Are atakam era kuur anama wo daytuam, asakamtamen. Emesare era kuur anama woam akariesen. 25Armat Ipit arawa, atakam, era owe akoromen. “Tare eemnak Dera bamesemkorom apok, wama tamenem?” Emes atakam aesimen. Era owerawa, ombare aememesen. Are jinim aeesen. Are atakam armamon ajamkoramesen. “Are ta ipitim? Are era kuur anama bwi atakam asakamtammar, wanam aatakam ji aeemas.” Emes atakam aesimesen.
Yesus, Gerasa ipit jak bomon aemapes bii ambirimjisime atakam
(Mat. 8:28-34; Mrk. 5:1-20)
26Emesare. Yesusam, abajamkai oweam, Gerasa tapirmi ajiritesen. Gerasa tapirmi Galilea tapirmi poman jamimin aemapes. 27Armat Ipit asokuen. Asokuerawa, jipit taka Yesus bimnuk aemamtaeren. Era ipit jak bomon, ere bii tananeen. Era ipit damo baso tarai bwikor aemapaaririn. Are tame bomon baemap apoken. Are dambir owe asan aemapaaririn. 28Era ipit Yesus bi apore, are akeen. Are Yesus bipu kuus fop andaejiapen. Atakamam afaketaeren. “Yesus! Wore oupnak Allah Andep. Wore wama pak emtanim? Dere atakam fiak Wora ajanimmin. Wore dera bajurusum bas.” Emes atakam aesimen. 29Era biiam, Yesus, are era ipit jak bomon bajis, atakam asakamtame aporen. Erarawa are emes atakam afaketaeren. (Bonaknak ere, bare tanane, era bii, era ipit aemoma ajaien. Emesare, oweam, era ipit, banamek ataiapaarisin. Are era ipit rantai banam ajikapomesen. Era ipit ere, abanam pak takes apipikimen. Era biiam, era ipit tame apok asan ajitinomasen.) 30Emesare, Yesus era ipit ajateporen. “Wore wama ipit juasem?” Emes atakam aesimen. Emesare, era ipit jak bomon bii tananeen. Erarawa are atep ajiten. “Dejuas ‘Tanane’.” Emes atakam aesimen. 31Era biirawa, atakam fiak Yesus ajanimesen. “Wore dare era asan pota owe bajurusum asan baesos, atakam basakamtam bas.” Emes atakam aesimesen.
32Emesare, era tapirmi, wo taso tanane, era fami takuepu, pak andesen. Era biirawa, era wo damo bomon bajiiapteter, atakam fiak Yesus ajanimesen. Yesus arawa, “Emes aemay!” Emes atakam aesimen. 33Emesare, era bii tanane, era ipit jak bomon awarimjisesen. Are era wo damo bomon ajaretukteteresen. Era wo tananerawa, era fami takuepu akukusendaesen. Are bwi akan ajakapua ajiesen. Are bwi dambir atesen. 34Era wo taso banamek batai owe emes aporesen. Emes apores arawa, ombare aesosesen. Are era pak kota oweam, era tamsan aemapes oweam, atakam aesimtamesen. 35Era owerawa, era pak bapor aesosesen. Are Yesuspu ambaromesen. Are bii jak awarimjises ipit, Yesus bipu aemape aporesen. Era ipit pakaian aptamam, bimak binip aptamam, aporesen. Era owe emes apores, are ombare aememesen. 36Yesus, jak bomon bii aemapaaris ipit, ere emejaoromtaeren. Era pak apores owe, era atakam, era andaes owe, akoromesen. 37Era Gerasa tapirmi owe takes ombare daytinak aememesen. Are Yesus beken ara bajiapom atakam ajanimesen. Emesare, Yesus baesos ti andaejuuen. 38Jak bomon bii awarimjises ipitam, Yesus bajamjuu, atakam ajanimen. Yesus ere, era ipit baesos atakam asakamtamen. 39“Wore wotame esosey. Allah daytinak pak wora aemtaman. Era pak atakam akoretamey.” Emes atakam aesimen. Era ipit arawa, aesosen. Are, Yesus daytinak pak ara aemtame, atakam, era kota owe takes akoretamen.
Yesus, Yairus arerep ajaoromtaere atakam
(Mat. 9:18-26; Mrk. 5:21-43)
40Emesare. Yesus fo daytu poman aojiriten. Owe takesam Armat Ipit banamek asirapesen. Erarawa era owe tanane Armat Ipit ataeresen. 41Yahudi owe samayen tame kapar ipitam juas Yairus andaen. Armat ipit, Yesus bipu kuus fop andaejiapen. Are Yesus atame baesos, atakam fiak ajanimen. 42Era ipit, taot jii takakopeen. Era jii aumur tahun 12en. Are era jii dambir baemtakan. Me Yesus ajare ere, owe tanane adamo akukurumtaaesen.
43Wan taotam tani esee tahun 12 bataipie apok aemapen. Oweam era taot damo baemejaoromtaer asan apoknaken. 44Era taot, ere Yesus baekpu ambarekaiemen. Ararawa, Armat Ipit baju aip, ban akurumtaeren. Emesare, era taot esee ametetaipien. 45Me Yesusam atakam akoromen. “Dere ban tao kurumtaerman?” Emes atakam aesimen. Era owe takes ere, apatimteteresen. Petrus arawa, “Guru! Owe tanane afojomanis. Are damo akukurumtaamanis.” Emes atakam aesimen. 46Yesus arawa, “Owe taka ban akurumtaerman. Owe damo bajaoromtaer fiak pak dedamo ajisim. Dere emes apormin.” Emes atakam aesimen. 47Era taot arawa, Yesus era aeme pak amsam aporen. Are ombare damo ditamen andien. Ararawa, ambaromen. Ambarome, Yesus bipu kuus fop andaejiapen. Are Yesus ban apa pakurumeye, atakam era owe takes aesimtamen. Are adamo ametejaoreme pakam atakam aesimtamen. 48Armat Ipit arawa, atakam akoromen. “Deparais! Eemnak Dera ambesemkorommanim. Erarawa wore damo ajaoremmarem. Ji baem jak aesosey.” Emes atakam aesimen.
49Yesus atakam taomekoremape, Yairus tame takan aemape ipit, andaen. “Worerep, ere dambir emeemar. Wonom ara guru bajurusum bas.” Emes atakam aesimen. 50Me Yesus ere, emes atakam jane ajie, wanam atakam akoromen. “Wore ombare bas. Allah eemnak ambesemkoromey. Era jii ajaorwasittem.” Emes atakam aesimen. 51Armat Ipit, Yairus tame ambareme, Are wan owe, era tame bajii atii aten. Are ere, Petrusam, Yohanesam, Yakobusam, era jii aritipit anama arsoot atii bata apoken. 52Era asan owe takes era jii bate daytu ambatomesen. Armat Ipit ere, atakam akoromen. “Bate bas! Ara jii dambir apok. Are ise.” Emes atakam aesimen. 53Era owerawa, Armat Ipit wote awotomesen. Are era jii dambir aeme apores are. 54Armat Ipit ere, era jii ban atapimomen. Are atakam daytu akoromen. “Deparais! Bawasitey!” Emes atakam aesimen. 55Era jiirawa, ajaorwasiten. Are ametewasiemen. Yesus arawa, amos era jii batetam, atakam asakamtamen. 56Era jii arsoot anama aritipit, jinim aeemisen. Armat Ipit ere, atakam era owe asakamtamen. “Tare era pak atakam wan owe baesimtam bas.” Emes atakam aesimen.
S'ha seleccionat:
LUKAS 8: LAIASC
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió