LUKAS 9
9
Yesus abajamkai owe 12 ambirimemome atakam
(Mat. 10:5-15; Mrk. 6:7-13)
1Emesare. Yesus abajamkai owe 12 ajaten. Are bii takes bakumimosom fiak pak era owe atetamen. Are damo pota owe baoromtaa fiak pak, era owe atetamen. 2Are era owe Allah owe aobaomep atakam bakoretam ambirimemomen. Are era owe damo pota owe baoromtaa ambirimemomen. 3Are atakam era owe akoromen. “Aesostakam, pak taertakam. Waku pak apaye, ese apaye, uang apaye, amos apaye, taertakam. Baju jamnukam taertakam. 4Tare tame ajiiemtakam, era tame emes ajamememay— ere era tapirmi beken ajiostakam bare ajiirea. 5Wan samane tara batoomjii apok aportakam apaye, tare era samane beken ajiosay, wanam atakam era owe akoromay. ‘Tare dara batoomjii apok aemmakam. Ere pota pak aemmakam.’ Emes atakam aesimay.” Yesus emes atakam aesimen. 6Emesare, era owe aesosesen. Are era samane tanane ajareosesen. Are Allah Akot Atakam era asan takes akoretamesen. Are era asan takes damo pota owe ajaoromtaaesen.
Herodes bimak binip arke atetarame atakam
(Mat. 14:1-12; Mrk. 6:14-29)
7,8Emesare. Era tapirmi raja kope juas Herodes, Yesus aemaarir pak takes, atakam jane ajien. Wan oweam, “Yohanes ateojaorwasite.” Emes atakam aesimesen. Wan ere, “Elia eteojiseme.” Emes atakam aesimesen. Wan ere, “Bonaknak Allah atakam bakoretam ipit ateojaorwasite.” Emes atakam aesimesen. Emesare, Herodes bimak binip arke atetaramen. 9Are atakam akoren. “Dere Yohanes kuus etesakamtaero. Ara aemema Ipit ere, ta ipitim? Dere, Are era daytu aemmar pak, atakam jane aijia ajimin.” Emes atakam aesimen. Are Yesus bi bapor aemporen.
Yesus, amos, owe 5.000 atetame atakam
(Mat. 14:13-21; Mrk. 6:30-44; Yoh. 6:1-14)
10Emesare. Yesus aatakam bakoretam ambirimemome owe aofasiesen. Are era aemes pak, atakam Armat Ipit aokoromesen. Armat Ipit arawa, era owe ataeren. Are kota Betsaidapu apa aesosesen. 11Era owe tanane ere, emes apores, wanam Armat Ipit fe asep asaramesen. Armat Ipit arawa, era owe tanane aotaeren. Are Allah owe aobaomep atakam era owe akoretamen. Are, era damo pota owe ajaoromtaaen. 12Emesare, ju atien. Abajamkai owe 12 arawa, Yesuspu ambaremesen. “Arapu tame apok. Wonom era owe setep tamsanam, setep kebunam, baesos atakam asakamtamey. Are ise baes asan bandimartaertas. Wanam are banda pak bajitintas.” Emes atakam aesimesen. 13Armat Ipit ere, atakam abajamkai owe akoromen. “Tare banda pak era owe tamba atetamay.” Emes atakam aesimen. Era owerawa, “Dare amos jise ban taka anama enamo jamnuk emes kope ara atoommarom. Dare ere, ara owe tananekor amos bajititam baesos ape?” Emes atakam aesimesen. 14Era aememes owe ere, 5.000 apaye. Armat Ipitam atakam abajamkai owe aokoromen. “Era owe janiapa janiapa tajitas. Are owe 50 apaye janiapa tajitas. Tare emes atakam asakamtamay.” Emes atakam aesimen. 15Abajamkai owerawa, emes taka aemesen. Are era owe ajanimapoma ajiesen. 16Armat Ipit arawa, era amos jise ban takaam, era enamo jamnukam, ataeren. Are banamek wonamo oup apemtemetemen. Are terima kasih atakam akoromen. Terima kasih atakam akoromerawa, era amos, era owe tanane basaietam, abajamkai owe atetamen. 17Emesare, era owe takes era pak andesen. Are jak andatukuapteteresen. Ararawa, era andaeremtiies amos, aotaajanimes, wanam ese 12 aoweapomesen.
Petrus, Yesus Allah Aeremtaere Ipit atakam afasime atakam
(Mat. 16:13-19; Mrk. 8:27-29)
18Emesare. Era bare, Yesus atakam Allah apa ajanimen. Abajamkai oweam, Armat Ipit takan aemapesen. Armat Ipit arawa, era owe ajateporen. “Dere ta ipitim? Era owe tanane wama tamen atakam koremas?” Emes atakam aesimen. 19Era owerawa, “Wan owe, Wore Yohanes Owe Bwi Bakupimtaer Ipit. Wan owe ere, Wore Elia. Wan owe ere, bonaknak Allah atakam bakoretam ipit eteojaorwasiten. Wore era ipit are.” Emes atakam aesimesen. 20Armat Ipit arawa, atakam era owe aokoromen. “Tare ere, wama bimak binip tetarammakam? Dere ta ipitim?” Emes atakam aesimen. Petrus arawa, “Wore Allah Aeremtaere Ipit Worare.” Emes atakam aesimen.
Yesus, adambir batem anama abojaorwasit atakam
(Mat. 16:21-28; Mrk. 8:31–9:1)
21Yesus arawa, emes atakam wan owe bakoretam bas, atakam fiak asakamtamen. 22Yesusam atakam aokoromen. “Asamot Anakot Ajaoreme Ipit bajirisem daytukor aemtem. Era duturu oweam, Allah Tame pak baem owe daytuam, Musa Basakamtam Atakam baememtam oweam, era Ipit awotapememomtemas. Oweam era Ipit atatiitemas. Bare bamintep arawa, Allah era Ipit ajaoromwasumtumtem.” Emes atakam aesimen. 23Armat Ipit arawa, atakam era owe takes akoromen. “Owe Dera bajamkai akot ajitanis, are aapak bimak binip bajanimomem bas. Are asalib bataatetertas, wanam Dera bajamkaitanis. 24Owe, adamo bajorem, jak aseseromemtas, are bajorem apoknak aemtemas. Wan owe ere, karai Dera aetamtemanis. Era owe dambir emes pak baem damon atemtas, are ajoremtemas. 25Owe, ara aemansa tapirmi pak takes ataatkoromtas apaye, me, bajorem apok aemtas apaye, ere ara asan akot baemeemap asan apok. 26Dere Asamot Anakot Ajaoreme Ipit, ere Derare. Owe damke Dera aememtas apaye, are deatakam damke aememtas apaye, Denom era owe damke akamemomtemin— ere aofasiendaetey bare are. Aofasiendaetey, Dere Deritipit aakotipitnak aememe pak anama turunak malaikat owe aakotipitnak aememes pak aptam andaetemin. 27Dere atakamnak tara akorommin. Wan ara aememmakam owe, Allah owe aobaomep aportemakam. Are era bare ajiire dambir baem apok aemtemas.” Emes atakam aesimen.
Yesus wan bi ajaoreme atakam
(Mat. 17:1-8; Mrk. 9:2-8)
28Yesus emes atakam akorerawa, bare poman ban bamintep apaye aemapen. Bare poman ban bamintep apaye aemape, Are atakam Allah bajanim, fami oup atemeten. Are Petrusam, Yohanesam, Yakobusam, atoomtemeten. 29Armat Ipit atakam Allah ajanime ere, wan bi ajaoremen. Apakaianam bwer fasarnak tamen, ambarampimen. 30,31Jipit amnukam sarenak bomon ajisememisen. Are atakam Armat Ipit akoromemisen. Ere Musa anama Elia. Are Yesus Yerusalem dambir atemto pak, atakam ajamkoramesen. Allaham, Yesus dambir batem, atakam ainam asakamtiien. 32Emesare, Petrusam, era takan aemanses ipit amnukam, ise manamesnak aemapesen. Aowasites ere, are Yesus aakotipitnak aememeam, era takan aemememis ipit amnuk aakotipitnak aemememisam, aporesen. 33Era ipit amnuk, Yesus beken bajios aemememis ere, Petrus, atakam Armat Ipit akoromen. “Guru! Dare arapu aememmarom, ere akotnak. Dare eetam bamintep tara baeapomtam akot. Wan taka Wor. Wan taka Musa. Me wan taka ere, Elia.” Emes atakam aesimen. Era akore atakam ere, amsam apoken. 34Emes atakam taokoremape wonamo fasar andaeemtepen. Are era owe apwirimompen. Me Musa anama Elia ere, era wonamo fasar ajiiememisen. Erapu aememes owerawa, ombare aememesen. 35Atakamam era wonamo fasar akorendaemen. “Ara aemema Ipit deTii! Era Ipit aeremtaero, atakam jane pajiay.” Emes atakam jane ajiesen. 36Emes atakam jane ajies arawa, are Yesus apa aememe aporesen. Abajamkai oweam atakam apok aememesen. Era bare ere, are era apores pak, atakam owe boesimtam apoknaken.
Yesus, jii jak bomon aemape bii ambirimjisime atakam
(Mat. 17:14-18; Mrk. 9:4-17)
37Emesare. Ajofe ere, are fami andaesen. Andaes arawa, owe tanane Yesus bimnuk aemamtaeresen. 38Era owe tanane bomon, jipit taka atakam daytu akoren. “Guru! Dere atakam Wora ajanimmin. Wore detii baporey. Ere dejii taka erare. 39Bii taka era jii aemomeme. Era biiam jane fef ajito, wanam are era jii jis apimtiieme. Erarawa era jii bwea besa apiramjisimeme. Era bii era jii beken bajie potan. Beken ajito, are era jii bonak ajurusumkoromeme. 40Denom wobajamkai owe, era jii jak bomon bii bamirimjisim, atakam ajanimey. Era owe ere, era bii baemebirimjisim asan apok.” Emes atakam aesimen. 41Yesus arawa, atakam akoromen. “Tare Dera bamesem apok ajaniemekem owe, tarare. Tanom owe jaos. Dere tare takan ete bare ajiire oememtey?. Dere jak jirao tara baem, ete bare ajiire emtey? Emesare, wondep arapu atoomdaey.” Emes atakam aesimen. 42Era jii Yesuspu setep taosisiemape, bii era jii bap andaebumtiien. Are era jii jis apimtiien. Yesus arawa, atakam fiak era bii asakamtamen. Yesus arawa era jii ajaoromtaeren. Are era jii, aritipit atetamen. 43Era owe takesam Allah fiaknak pak jinim aeesen.
Yesus dambir atemto atakam
(Mat. 17:22-23; Mrk. 9:30-32)
Emesare. Era owe takes Yesus aemaarir pak takes jinim aees ere, Armat Ipit, atakam, abajamkai owe akoromen. 44“Era akoremin atakam jane feroa. Jipit taka Asamot Anakot Ajaoreme Ipit era jokoman owe aotasimemomtamtem.” Emes atakam aesimen. 45Yesus ere, era atakam basonak bokore apok aemen. Era owe, era atakam jane bajie-ombaren. Emesare, era owe era atakam jane bajiekorom apoken. Are Ara bajatepor ombare aememesen.
Juas aptam owe atakam
(Mat. 18:1-5; Mrk. 9:33-37)
46Emesare. Yesus abajamkai owe atakam ajamkoramesen. “Ara aememom owe, juas aptam owe tanam?” Emes atakam aesimesen. 47Yesus ere, era owe bimak binip amsamen. Armat Ipit arawa jii koser ataeren. Are era jii adamopu ataemomen. 48Ararawa, atakam, era owe, akoromen. “Owe Dera afaimtanis, wanam are ara aemema jii tamen Dere atame atoomjiitamtanis, ere, era oweam Dere atame atoomjiiemmanis. Dere atame atoomjiiemmanis owe, ere Dera ambirimemen Ipitam atame atoomjiiemmas. Emesare, tadamon juas apok owe, ere juas aptam owe.” Emes atakam aesimen.
Owentakam tara baem apok owe, tajoo owe atakam
(Mrk. 9:38-40)
49Emesare. Yohanes atakam akoromen. “Guru! Dare jipit taka aporom. Era ipit, wojuas ajietaere, wanam owe jak bomon bii ambirimjisime. Era ipit ere, dara bajamkai ipit apok aporom. Erarawa dare era ipit era pak baem bakari, atakam asakamtamom.” Emes atakam aesimen. 50Yesus ere, atakam armat ipit akoromen. “Era ipit, era pak bakari, atakam basakamtam bas. Owentakam tara baem apok owe, ere tajoo owe erare.” Emes atakam aesimen.
Samaria tapirmi samane taka, Yesus, tame batoomjii apok atakam
51Emesare. Yesus Surga oup batemet bare setep aemansen. Yesus arawa, Yerusalem baesos atakam asakamtiien. 52Are atakam bakoretam owe bonak ambirimemomen. Era owerawa, Yesus ise baes asan atakam bajanim, Samaria tapirmi samane taka aesosesen. 53Era samane ere, Armat Ipit Yerusalem bin ajieme aporesen. Erarawa are Armat Ipit bataer potan. 54Abajamkai jipit amnuk juas Yakobus anama Yohanes, emes aporemis, wanam atakam akoremisen. “Tuhan! Wore, dare, jisimak era wonamo oup bandae, wanam era owe bamomtii, emes atakam basakamtam, akot ape?” Emes atakam aesimemisen. 55Armat Ipit arawa, era ipit amnuk bimin awaiome, wanam ajatemotaeren. 56Emesare, are takes wan samane atamsan aesosesen.
Yesus bajamkai owe atakam
(Mat. 8:19-22)
57Armat owe aemjares ere, jipit taka atakam Yesus akoromen. “Era samaniin samaniin aesostem, denom Wora ajamkaiaartemin.” Emes atakam aesimen. 58Yesus arawa, atakam, era ipit akoromen. “Wasen juuri, to aptam. Sakaoam to aptam. Me, Asamot Anakot Ajaoreme Ipit ere, baemames tame apok.” Emes atakam aesimen. 59Yesusam atakam wan ipit akoromen. “Dere jamkaian!” Emes atakam aesimen. Era ipit arawa, “Dere deritipit se ato batakamwuapom.” Emes atakam aesimen. 60Armat Ipit ere, “Era dambir owe, ere wan dambir owe se amba bawuapomtas. Wore ere, baesosey. Wore Allah owe aobaomep atakam bakoretamey.” Emes atakam aesimen. 61Wan ipitam atakam akoromen. “Dere Wora ajamkaitemin. Dere ere, detame owe, de baesos, atakam atotakamesimtama.” Emes atakam aesimen. 62Yesus arawa, “Owe, pak taso bajapom tapirmi andanaesumtas, wanam asep banep ajieportas, are Allah owe aobaomep karai baetam, ere awar apok.” Emes atakam aesimen.
S'ha seleccionat:
LUKAS 9: LAIASC
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
LUKAS 9
9
Yesus abajamkai owe 12 ambirimemome atakam
(Mat. 10:5-15; Mrk. 6:7-13)
1Emesare. Yesus abajamkai owe 12 ajaten. Are bii takes bakumimosom fiak pak era owe atetamen. Are damo pota owe baoromtaa fiak pak, era owe atetamen. 2Are era owe Allah owe aobaomep atakam bakoretam ambirimemomen. Are era owe damo pota owe baoromtaa ambirimemomen. 3Are atakam era owe akoromen. “Aesostakam, pak taertakam. Waku pak apaye, ese apaye, uang apaye, amos apaye, taertakam. Baju jamnukam taertakam. 4Tare tame ajiiemtakam, era tame emes ajamememay— ere era tapirmi beken ajiostakam bare ajiirea. 5Wan samane tara batoomjii apok aportakam apaye, tare era samane beken ajiosay, wanam atakam era owe akoromay. ‘Tare dara batoomjii apok aemmakam. Ere pota pak aemmakam.’ Emes atakam aesimay.” Yesus emes atakam aesimen. 6Emesare, era owe aesosesen. Are era samane tanane ajareosesen. Are Allah Akot Atakam era asan takes akoretamesen. Are era asan takes damo pota owe ajaoromtaaesen.
Herodes bimak binip arke atetarame atakam
(Mat. 14:1-12; Mrk. 6:14-29)
7,8Emesare. Era tapirmi raja kope juas Herodes, Yesus aemaarir pak takes, atakam jane ajien. Wan oweam, “Yohanes ateojaorwasite.” Emes atakam aesimesen. Wan ere, “Elia eteojiseme.” Emes atakam aesimesen. Wan ere, “Bonaknak Allah atakam bakoretam ipit ateojaorwasite.” Emes atakam aesimesen. Emesare, Herodes bimak binip arke atetaramen. 9Are atakam akoren. “Dere Yohanes kuus etesakamtaero. Ara aemema Ipit ere, ta ipitim? Dere, Are era daytu aemmar pak, atakam jane aijia ajimin.” Emes atakam aesimen. Are Yesus bi bapor aemporen.
Yesus, amos, owe 5.000 atetame atakam
(Mat. 14:13-21; Mrk. 6:30-44; Yoh. 6:1-14)
10Emesare. Yesus aatakam bakoretam ambirimemome owe aofasiesen. Are era aemes pak, atakam Armat Ipit aokoromesen. Armat Ipit arawa, era owe ataeren. Are kota Betsaidapu apa aesosesen. 11Era owe tanane ere, emes apores, wanam Armat Ipit fe asep asaramesen. Armat Ipit arawa, era owe tanane aotaeren. Are Allah owe aobaomep atakam era owe akoretamen. Are, era damo pota owe ajaoromtaaen. 12Emesare, ju atien. Abajamkai owe 12 arawa, Yesuspu ambaremesen. “Arapu tame apok. Wonom era owe setep tamsanam, setep kebunam, baesos atakam asakamtamey. Are ise baes asan bandimartaertas. Wanam are banda pak bajitintas.” Emes atakam aesimesen. 13Armat Ipit ere, atakam abajamkai owe akoromen. “Tare banda pak era owe tamba atetamay.” Emes atakam aesimen. Era owerawa, “Dare amos jise ban taka anama enamo jamnuk emes kope ara atoommarom. Dare ere, ara owe tananekor amos bajititam baesos ape?” Emes atakam aesimesen. 14Era aememes owe ere, 5.000 apaye. Armat Ipitam atakam abajamkai owe aokoromen. “Era owe janiapa janiapa tajitas. Are owe 50 apaye janiapa tajitas. Tare emes atakam asakamtamay.” Emes atakam aesimen. 15Abajamkai owerawa, emes taka aemesen. Are era owe ajanimapoma ajiesen. 16Armat Ipit arawa, era amos jise ban takaam, era enamo jamnukam, ataeren. Are banamek wonamo oup apemtemetemen. Are terima kasih atakam akoromen. Terima kasih atakam akoromerawa, era amos, era owe tanane basaietam, abajamkai owe atetamen. 17Emesare, era owe takes era pak andesen. Are jak andatukuapteteresen. Ararawa, era andaeremtiies amos, aotaajanimes, wanam ese 12 aoweapomesen.
Petrus, Yesus Allah Aeremtaere Ipit atakam afasime atakam
(Mat. 16:13-19; Mrk. 8:27-29)
18Emesare. Era bare, Yesus atakam Allah apa ajanimen. Abajamkai oweam, Armat Ipit takan aemapesen. Armat Ipit arawa, era owe ajateporen. “Dere ta ipitim? Era owe tanane wama tamen atakam koremas?” Emes atakam aesimen. 19Era owerawa, “Wan owe, Wore Yohanes Owe Bwi Bakupimtaer Ipit. Wan owe ere, Wore Elia. Wan owe ere, bonaknak Allah atakam bakoretam ipit eteojaorwasiten. Wore era ipit are.” Emes atakam aesimesen. 20Armat Ipit arawa, atakam era owe aokoromen. “Tare ere, wama bimak binip tetarammakam? Dere ta ipitim?” Emes atakam aesimen. Petrus arawa, “Wore Allah Aeremtaere Ipit Worare.” Emes atakam aesimen.
Yesus, adambir batem anama abojaorwasit atakam
(Mat. 16:21-28; Mrk. 8:31–9:1)
21Yesus arawa, emes atakam wan owe bakoretam bas, atakam fiak asakamtamen. 22Yesusam atakam aokoromen. “Asamot Anakot Ajaoreme Ipit bajirisem daytukor aemtem. Era duturu oweam, Allah Tame pak baem owe daytuam, Musa Basakamtam Atakam baememtam oweam, era Ipit awotapememomtemas. Oweam era Ipit atatiitemas. Bare bamintep arawa, Allah era Ipit ajaoromwasumtumtem.” Emes atakam aesimen. 23Armat Ipit arawa, atakam era owe takes akoromen. “Owe Dera bajamkai akot ajitanis, are aapak bimak binip bajanimomem bas. Are asalib bataatetertas, wanam Dera bajamkaitanis. 24Owe, adamo bajorem, jak aseseromemtas, are bajorem apoknak aemtemas. Wan owe ere, karai Dera aetamtemanis. Era owe dambir emes pak baem damon atemtas, are ajoremtemas. 25Owe, ara aemansa tapirmi pak takes ataatkoromtas apaye, me, bajorem apok aemtas apaye, ere ara asan akot baemeemap asan apok. 26Dere Asamot Anakot Ajaoreme Ipit, ere Derare. Owe damke Dera aememtas apaye, are deatakam damke aememtas apaye, Denom era owe damke akamemomtemin— ere aofasiendaetey bare are. Aofasiendaetey, Dere Deritipit aakotipitnak aememe pak anama turunak malaikat owe aakotipitnak aememes pak aptam andaetemin. 27Dere atakamnak tara akorommin. Wan ara aememmakam owe, Allah owe aobaomep aportemakam. Are era bare ajiire dambir baem apok aemtemas.” Emes atakam aesimen.
Yesus wan bi ajaoreme atakam
(Mat. 17:1-8; Mrk. 9:2-8)
28Yesus emes atakam akorerawa, bare poman ban bamintep apaye aemapen. Bare poman ban bamintep apaye aemape, Are atakam Allah bajanim, fami oup atemeten. Are Petrusam, Yohanesam, Yakobusam, atoomtemeten. 29Armat Ipit atakam Allah ajanime ere, wan bi ajaoremen. Apakaianam bwer fasarnak tamen, ambarampimen. 30,31Jipit amnukam sarenak bomon ajisememisen. Are atakam Armat Ipit akoromemisen. Ere Musa anama Elia. Are Yesus Yerusalem dambir atemto pak, atakam ajamkoramesen. Allaham, Yesus dambir batem, atakam ainam asakamtiien. 32Emesare, Petrusam, era takan aemanses ipit amnukam, ise manamesnak aemapesen. Aowasites ere, are Yesus aakotipitnak aememeam, era takan aemememis ipit amnuk aakotipitnak aemememisam, aporesen. 33Era ipit amnuk, Yesus beken bajios aemememis ere, Petrus, atakam Armat Ipit akoromen. “Guru! Dare arapu aememmarom, ere akotnak. Dare eetam bamintep tara baeapomtam akot. Wan taka Wor. Wan taka Musa. Me wan taka ere, Elia.” Emes atakam aesimen. Era akore atakam ere, amsam apoken. 34Emes atakam taokoremape wonamo fasar andaeemtepen. Are era owe apwirimompen. Me Musa anama Elia ere, era wonamo fasar ajiiememisen. Erapu aememes owerawa, ombare aememesen. 35Atakamam era wonamo fasar akorendaemen. “Ara aemema Ipit deTii! Era Ipit aeremtaero, atakam jane pajiay.” Emes atakam jane ajiesen. 36Emes atakam jane ajies arawa, are Yesus apa aememe aporesen. Abajamkai oweam atakam apok aememesen. Era bare ere, are era apores pak, atakam owe boesimtam apoknaken.
Yesus, jii jak bomon aemape bii ambirimjisime atakam
(Mat. 17:14-18; Mrk. 9:4-17)
37Emesare. Ajofe ere, are fami andaesen. Andaes arawa, owe tanane Yesus bimnuk aemamtaeresen. 38Era owe tanane bomon, jipit taka atakam daytu akoren. “Guru! Dere atakam Wora ajanimmin. Wore detii baporey. Ere dejii taka erare. 39Bii taka era jii aemomeme. Era biiam jane fef ajito, wanam are era jii jis apimtiieme. Erarawa era jii bwea besa apiramjisimeme. Era bii era jii beken bajie potan. Beken ajito, are era jii bonak ajurusumkoromeme. 40Denom wobajamkai owe, era jii jak bomon bii bamirimjisim, atakam ajanimey. Era owe ere, era bii baemebirimjisim asan apok.” Emes atakam aesimen. 41Yesus arawa, atakam akoromen. “Tare Dera bamesem apok ajaniemekem owe, tarare. Tanom owe jaos. Dere tare takan ete bare ajiire oememtey?. Dere jak jirao tara baem, ete bare ajiire emtey? Emesare, wondep arapu atoomdaey.” Emes atakam aesimen. 42Era jii Yesuspu setep taosisiemape, bii era jii bap andaebumtiien. Are era jii jis apimtiien. Yesus arawa, atakam fiak era bii asakamtamen. Yesus arawa era jii ajaoromtaeren. Are era jii, aritipit atetamen. 43Era owe takesam Allah fiaknak pak jinim aeesen.
Yesus dambir atemto atakam
(Mat. 17:22-23; Mrk. 9:30-32)
Emesare. Era owe takes Yesus aemaarir pak takes jinim aees ere, Armat Ipit, atakam, abajamkai owe akoromen. 44“Era akoremin atakam jane feroa. Jipit taka Asamot Anakot Ajaoreme Ipit era jokoman owe aotasimemomtamtem.” Emes atakam aesimen. 45Yesus ere, era atakam basonak bokore apok aemen. Era owe, era atakam jane bajie-ombaren. Emesare, era owe era atakam jane bajiekorom apoken. Are Ara bajatepor ombare aememesen.
Juas aptam owe atakam
(Mat. 18:1-5; Mrk. 9:33-37)
46Emesare. Yesus abajamkai owe atakam ajamkoramesen. “Ara aememom owe, juas aptam owe tanam?” Emes atakam aesimesen. 47Yesus ere, era owe bimak binip amsamen. Armat Ipit arawa jii koser ataeren. Are era jii adamopu ataemomen. 48Ararawa, atakam, era owe, akoromen. “Owe Dera afaimtanis, wanam are ara aemema jii tamen Dere atame atoomjiitamtanis, ere, era oweam Dere atame atoomjiiemmanis. Dere atame atoomjiiemmanis owe, ere Dera ambirimemen Ipitam atame atoomjiiemmas. Emesare, tadamon juas apok owe, ere juas aptam owe.” Emes atakam aesimen.
Owentakam tara baem apok owe, tajoo owe atakam
(Mrk. 9:38-40)
49Emesare. Yohanes atakam akoromen. “Guru! Dare jipit taka aporom. Era ipit, wojuas ajietaere, wanam owe jak bomon bii ambirimjisime. Era ipit ere, dara bajamkai ipit apok aporom. Erarawa dare era ipit era pak baem bakari, atakam asakamtamom.” Emes atakam aesimen. 50Yesus ere, atakam armat ipit akoromen. “Era ipit, era pak bakari, atakam basakamtam bas. Owentakam tara baem apok owe, ere tajoo owe erare.” Emes atakam aesimen.
Samaria tapirmi samane taka, Yesus, tame batoomjii apok atakam
51Emesare. Yesus Surga oup batemet bare setep aemansen. Yesus arawa, Yerusalem baesos atakam asakamtiien. 52Are atakam bakoretam owe bonak ambirimemomen. Era owerawa, Yesus ise baes asan atakam bajanim, Samaria tapirmi samane taka aesosesen. 53Era samane ere, Armat Ipit Yerusalem bin ajieme aporesen. Erarawa are Armat Ipit bataer potan. 54Abajamkai jipit amnuk juas Yakobus anama Yohanes, emes aporemis, wanam atakam akoremisen. “Tuhan! Wore, dare, jisimak era wonamo oup bandae, wanam era owe bamomtii, emes atakam basakamtam, akot ape?” Emes atakam aesimemisen. 55Armat Ipit arawa, era ipit amnuk bimin awaiome, wanam ajatemotaeren. 56Emesare, are takes wan samane atamsan aesosesen.
Yesus bajamkai owe atakam
(Mat. 8:19-22)
57Armat owe aemjares ere, jipit taka atakam Yesus akoromen. “Era samaniin samaniin aesostem, denom Wora ajamkaiaartemin.” Emes atakam aesimen. 58Yesus arawa, atakam, era ipit akoromen. “Wasen juuri, to aptam. Sakaoam to aptam. Me, Asamot Anakot Ajaoreme Ipit ere, baemames tame apok.” Emes atakam aesimen. 59Yesusam atakam wan ipit akoromen. “Dere jamkaian!” Emes atakam aesimen. Era ipit arawa, “Dere deritipit se ato batakamwuapom.” Emes atakam aesimen. 60Armat Ipit ere, “Era dambir owe, ere wan dambir owe se amba bawuapomtas. Wore ere, baesosey. Wore Allah owe aobaomep atakam bakoretamey.” Emes atakam aesimen. 61Wan ipitam atakam akoromen. “Dere Wora ajamkaitemin. Dere ere, detame owe, de baesos, atakam atotakamesimtama.” Emes atakam aesimen. 62Yesus arawa, “Owe, pak taso bajapom tapirmi andanaesumtas, wanam asep banep ajieportas, are Allah owe aobaomep karai baetam, ere awar apok.” Emes atakam aesimen.
S'ha seleccionat:
:
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió