MATIUS 2
2
Snon ḇefawinananem mak ḇeraker Wamurem
2:1-12
1Yesus ḇyeḇeaḇen kwar ro Betlehem ro sup Yudea ro awar Wairek Herodes, snon ḇefawinananem mak ono srama ker ḇar Wamurem ḇe Yerusalem ma sifuken: 2“Wairek Yahudi ḇeaḇen baboya Isyaro, moḇo? Nkomam kwar mak ḇyedi ro ḇar Wamurem ma nkorama fa nkaksyom I.”
3Fafisu wairek Herodes ma mnu Yerusalem ḇesiper simnaf rarirya sikandor kam. 4Inja iryur mananir imam ma ḇefawinananem Refo Yahudisya ro er Yahudi, ma ifuken ro si, moḇ rosaiso nari Wairek ḇyeḇeaḇen roya.
5Sikofen faro i ḇo soḇo: “Ro Betlehem sup Yudea snar raris nabisya sfas kwar bosoḇo:
6 #
Mi. 5:1
‘Ma au Betlehem, wabaḇa syadi mnu-mnu ro sup Yehuda,
ḇape nari manfarkin oso isasyar ro au,
fa nari ḇyefarandows er Yesi Israel.’ ”
7Ramnai kuker fasasis Herodes dor snon ḇefawinananem mak ansi ma kuker aḇaḇen kaku ifuken kuker aunos faro si, fafisu rosai makya ḇyairya. 8Raimnai iwansi ḇe Betlehem, doḇo: “Mkora, mkosewar pyum kaku insa mkofawi roi ḇekur Romawa ani ma rofyor mkosrow i kwar, mko ḇaryas fasau ma ḇeaya insa aya kako yara fa yaksyom I.”
9Simnaf wairek ani wos ḇyena kwar, sra beri. Indo mam kada, mak smam ro Wamurem ani pyon si isof imnai ro moḇ rosai Romawa ani, isya ro ya. 10Fafisu smam mak ani, simarisen kaku. 11Ma ssun ro rum ani ma smam Romawa ani fnoḇek snari Maria, inja sḇansuba ma si syom I. Sikam sḇas kamon papus sena ma ssḇuk samsom farsarser faro I, isoine brawen, mamḇoḇo ma manispum. 12Snar snon ḇefawinananem mak ansi sismai ananun ro malaikat oso insa skaḇer awer faro Herodes, inja sibur ḇe mnu sena siso nyan ḇese.
Yusuf ma Maria sufrar kuker romawa ani ḇe Masir
2:13-15
13Snon ḇefawinananem mak ansi sibur kwar, Manseren malaikat ḇyesi oso fyasnai faro Yusuf ro mafu ma doḇo: “Wakḇok wun Romawa anine kuker snari, mko frar ḇe Masir ma mkokain ro diwa isof Yakofen wer faro au, snar Herodes iḇesyewar Romawa ani fa myun I.”
14Inja Yusuf ikbok, ma dun Romawa ani kuker snari ro roḇ ani beri, ma sskobur ḇe Masir, 15#Hos. 11:1 ma skokain ro diwa isof Herodes imar. Roi nane nesya insa Manseren wos Ikofen kuker sḇayo nabi: “Ro Masir Yor Romawa Yedi.”
Romawa-romawa mkun ro Betlehem sḇeḇemun
2:16-18
16Fafisu Herodes ifawi, mḇoi snon ḇefawinananem mak ansi seankar i kwar, imsor kaku. Inja iwan fa smun romawa-romawa mkun ro Betlehem ma fanam Betlehem sya kam, isoine romawa ḇeḇewampasi wambarek risuru ḇesop imnis kuker rosai isma ma ifawi kwar ro snon ḇefawinananem mak ansi.
17Rarirya wos Manseren Ikofen kuker sḇayo nabi Yermia isrow:
18 #
Yer. 31:15
“Komnaf mkaren ro Rama,
ḇarop ma kankanes ḇekum ḇarmor;
Rakhel kyanes romawa ḇyesi ma imewer sawos sneprei indi,
snar romawa ḇyesi sisyaḇa kwar.”
Yusuf ma Maria sukaḇer kuker romawa ani ḇe Nazaret
2:19-23
19Rofyor Herodes imar kwar, Manseren malaikat ḇyesi oso fyasnai mankundi ro mafu faro Yusuf ro Masir, doḇo: 20“Wakḇoke, wun romawa ani kuker snari ma mkokaḇer ḇe sup Israel, snar beaw fa ḇemun Romawa anisya simar kwar.” 21Inja Yusuf ikbok ma dun Romawa ani kuker snari ma skora ḇesup Israel.
22Rofyor imnaf kwar mḇoi Arkhelaus ḇyewairek ro Yudea fa syadwer Herodes, kmari, inja imkak ryaḇe Betlehem. Snar sisma ananun ro mafu, inja Yusuf ryaḇe sup Galilea. 23#Mrk. 1:24; Luk. 2:39; Yoh. 1:45 Skora kwar ro diwa, Yusuf kyain ro mnu oso snori Nazaret. Roi nanekam ndarirya insa nasrow wos nabi-nabisya sikofen, nari sap Iḇe: “Snon Nazaret”.
S'ha seleccionat:
MATIUS 2: LAIBHW
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió