MATIUS 7
7
Mnuk ḇaḇemankara
7:1-5
(Luk. 6:37-38, 41-42)
1“Mkoḇe ḇaḇemankara awer snonkaku, insa sakḇe mankara awer mko. 2#Mrk. 4:24 Snar kuker ḇaḇemankara mkobuki ḇyemankara, nari ssḇuki ḇyemankara mko kako ma warnkyara mkobuki ḇyewarnkyara, nari ssḇuki ḇyewarnkyara mko kako. 3Snaro mam faro ai muḇen ro naek bedi mka ḇyedi, ḇoi ai mnuk ḇeba ro mka ḇedi wafawi i ḇa? 4Rariso wakofen faro naek bedi: Iḇye yer ai muḇen ḇero mka bedi, ḇoi ai mnuk ḇeba ḇero mka bedi baḇir i ḇa. 5Ne, snonkaku ḇeḇarḇor, wasasyar ḇepon ari ai mnuk ḇeba ro mka ḇedi, insape nari mka ḇedi myam fa buki ryer ai muḇen ani ro naek bedi mka ḇyedi.”
Roi ḇesren ma ḇeḇemaeja
7:6
6“Mkoḇuk awer roi ḇesren faro make sya ma mkosawen awer inkin mor faro randib sya, insa saref apepen awer i, raimnai i warye fa kyar sawek mko.”
Kankarem ro nadi
7:7-11
(Luk. 11:9-13)
7“Mkore, nari sḇuk faro mko; mkosewar, ma nari mkosma; mkonuk, nari kedwa ya ḇyeḇeseḇen faro mko. 8Snar snonkaku mansei ḇeyor, isma ma snonkaku mansei ḇesewar, isrow ma snonkaku mansei ḇenuk faro i kedwa ya ḇyeḇeseḇen. 9Isyake snon oso ro mko ḇyuk karui faro romawa ḇyedi, rofyor dor ifen, 10roḇaido ḇyuk ikak rofyor dor in? 11Inja rofyor ḇeḇarḇor mko ya, mkofawi mkoḇuk roi ḇeḇye faro romawa mkoḇesi, isyadi wer kuker Kma mkoḇedi ro boiyaswa! Nari ḇyuk roi ḇeḇye faro ḇeyor faro I sya.”
Nyan ḇefyos
7:12-14
12 #
Luk. 6:31
“Roi ḇeḇor mkomarisen insa snonkaku sifrur faro mko, rarirya mkakfrur faro si kako. Irya sasoser ḇeyufur Refo Yahudi ma syap nabi sya.
13 #
Luk. 13:24
Mkosun ro kedwai ḇefyos ya, snar kedwai ḇeḇam ma nyan ḇemgkeiya dun faro for ḇembrerḇa, ma kawasa sibor ssun ro i; 14snar kedwai ḇefyos ma nyan ḇemkei ḇa ḇeyun faro kankenem ya, kawasa ḇesma i sya sibor ḇaḇeri.”
Farkarkor ninyan
7:15-23
15“Mkoḇesasor mko ro nabi-nabi sararer, ḇerama faro mko ḇefrur farari domba, ḇape kaku ḇeri sikada randip arḇur ḇermomen. 16Nari mkomam bir si ro bon sena. Rariso snonkaku srokem awai bon ro aser borekke roḇa imyui bon ro manḇines borek? 17Rarirya ai knam ḇeḇye na nbuk bon ḇeḇye, mḇoi ai knam ḇeḇyeḇa na nbuk bon ḇeḇyeḇa. 18Rarisyaḇa ai knam ḇeḇye ipok imarem bon ḇeḇyeḇa maroḇa, ma ai knam ḇeḇyeḇa ipok imarem bon ḇeḇye ono ḇa. 19#Mat. 3:10; Luk. 3:9 Inja ai knam ḇemarem bon ḇeḇyeḇa, nari sroḇen na ma sisawen na ro for ya dori. 20#Mat. 12:33 Inja nari mkomambir si ro bon sena.
21Nari mkoḇo snonkaku ḇeyor Ayaḇe: Manseren, Manseren! siso nari ḇesun ro Ḇaḇesasoser Boiyaswa, roḇa kaku, mḇoi ḇeḇeuser Kma Yedi marisen ḇyena ro boiyaswa sikada. 22Ro ras ḇepupes ya snonkaku sibor kaku sor Aya, ḇo soḇo: Manseren, Manseren, mḇoi nkoiso ḇeḇardi snonsnon Bedi, ma ḇeyaw Ibiris kuker snonsnon Bedi ma ḇefrur aḇyair kanandor kuker snonsnon Bedi kako? 23#Mzm. 6:9 Rofyor ani nari yawos isnai faro si ma Yakofen: Yamam ḇaḇir mko ḇaḇeri! Mko bur Aya, mko kaem ḇefrur ḇarḇor!”
Knam risuru
7:24-27
(Luk. 6:47-49)
24“Manseisi ḇemnaf wos Ayenane ma ḇeḇeuserna sya, simnis kuker snonkaku ḇefawi nananem ḇefrur rum ḇyedi ro saprop ḇepnas. 25Ḇarpur mekem ya imyun ma daf ya myun, ma wam ya ifnak rum ani, ḇape rum ani kyarḇaken ḇa snar ḇyeḇeḇawes ro saprop ḇepnas.
26Ḇape mansei si simnaf wos Ayenane ma ḇeḇeuserna ḇa sya, simnis kuker snonkaku ḇefawi nananem ḇa, ḇefrur rum byedi ro karyen. 27Ḇarpur mekem ya imyun ma daf ya ryama, ma wam ya ipok ḇo ifnak rum ani, isof rum ani kyarḇaken ma imkokbos beri.”
Ḇemnaf sya karkara sena
7:28-29
28 #
Mrk. 1:22; Luk. 4:32 Ma Yesus dawos rarirya posa kwar, kawasa ḇeḇor ḇemnaf farkarkor ḇyena sikam sikandor, 29snar fyarkor si imnis snonkaku ḇena papoik, mḇoi imnis kuker ḇefawinananem Refo Yahudisya ḇa.
S'ha seleccionat:
MATIUS 7: LAIBHW
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió