YOËL 1
1
1Naa in koyow i Tuhan kon i Yoël, ki adí i Petuel.
Norobonoḷ in gina in umat Israel popisí in bungai in boyó monia nodait kinaan in pangkoḷá
2Indongogaidon, ei guhanga mita in ḻipú;
taridiaidon, ei bayongan intau in Yohuda.
Nokoimontandon degá in ná tanaa in nobaḻí kon singgai kinobiaganmu,
andeka kon dodai in mogoguyangmu?
3Oumandon onu inta nobaḻí tatua kon i adímu mita;
sinbá oumanon doman monia intua kon i adí mita monia in ouman tatua.
Buí moiduduimai in musti mokidongog doman kon tua,
bo mopotaau doman kon buí moiduduimai.
4Paanan in pangkoḷá inta diá koiyapan in kobayongnea,
dinumompá kon gobá mita bo nokaan kon pinomuḷanea.
Onu in sinaḷáan in paanan tanaa,
inindaitan in paanan ibanea doman.
5Ei intau mita inta nongoḷoḷangu, pobangondon!
Ei mongonginum mita, pongombaḷdon!
Sin anggur inta mobagu
inagowdon nongkon bibigmu.
6 #
Why. 9:8
Tontara in pangkoḷá nonubu kon butá naton;
mosia in moropot bo diá koiyapan in kobayongnea,
ingiponnea in ná koḷanit in uwaḷa in singa kobaayan.
7Mosia in noyompat kon pangkoi in anggur naton,
bo pangkoi in ara naton, dongkadon tuodnea.
Pangkoinea mita iningkuḻitandon monia,
nodapot in tanganea mita nobudódon.
8Pongombaḷdon, ei umat, naonda bo mongodeaga inta norobonoḷ in dodob
inta nongombaḷ kon kinopatoian i kantangnea inta kinotabinea.
9Gandum bo anggur in diádon
nongkon Baḷoi i Tuhan.
Dá ponogumatoidon imang mita,
inta motoḷutui in mogundoi kon i Tuhan.
10Gobá mita nogoguyaatdon in tanaa.
Butá nonogumatoi;
sin minatoidon in bayongan in gandum,
noingkagdon in bungai in anggur,
bo nodaitdon in ḷana in zaitun.
11Ei monononggobá, pogamuidon!
Ei monononggobá kon anggur, pongombaḷdon!
Sin gandum, makoya bo bayongan in bungai in boyó nogoguyaatdon.
12Pangkoi mita in pinomuḷa kon rawang noingkagdon komintan:
pangkoi in anggur, apel, ara, kurma bo delima.
Dá rayat in diádon in ḷunganga in gina.
13Ei imang mita inta nogundoi kon mezbah,
pakédon in kaeng karong, bo pongombaḷdon.
Tuotdon kon bonu in Baḷoi Tuhan sin mogamui kinoouput in doḷom,
sin diádon in kuruban anggur bo gandum kon i Allahmu.
14Parentaaidon in umatmu mopuasa,
Potaaudon in poyodungkuḷan moḷoben!
Oinídon in itoi mita bo guhanga mita in ḻipú
bo bayongan in intau inta nogutun kon Yohuda,
sinbá mamangoi kon Baḷoi i Allah,
sin mokuani mokituḷung kon i-Nia.
15 #
Yes. 13:6
Singgai i Tuhan in nodiugdon, singgai inta mokokoningkim;
wakutu ki Inta Totok in Mokawasa morimumud.
16Kokaanon in nodaitdon noyompat
kon tayowon in mata naton
kon Baḷoi i Allah naton
diádon in giow pia in gina.
17Batoḷ minatoi kon butá inta nobota-botak.
Diá in gandum tagúon,
dá ontag mita in diá in bonunea bo nobaḻídon apug.
18Bobiagon mogamui bo mogagawang;
diádon in rawang in bonok pongaanannea.
Paanan in domba mororiga domandon.
19Akuoi in mokituḷung kon ini-Mu, o Tuhan
sin rawang mita in bonok nopokak in poninggai
nodapot in pangkoi mita in kayu noingkag bo minatoi
naonda bo kinaan in tuḷú.
20Nodapot in biag mita ḻindong kon kayuon
nokuani kon ini-Mu mokituḷung.
Mosia in diá mokoguḻí kon rogang,
sin ongkag mita nongoingkagdon komintan.
S'ha seleccionat:
YOËL 1: INOMOG
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Alkitab Singog In Mongondow Masa In Tanaa © Indonesian Bible Society, 2016.