Luke 20
20
Wobisa Tum a Jesus Wɔ
(Matthew 21.23-27; Mark 11.27-33)
1Na nda no mu kor a ɔrekyerɛkyerɛ nkorɔfo no wɔ asɔrfi no mu, na ɔreka asɛmpa no, asɔfompanyin nye kyerɛwfo nye mpanyimfo no baa no do, 2na wɔbɛkaa kyerɛɛ no dɛ, Ka tum kor a edze yɛ ndzɛmba yi, anaadɛ nyia ɔmaa wo tum yi, kyerɛ hɛn. 3Na obuae see hɔn dɛ, Mo so mibebisa hom asɛm, na hom nka nkyerɛ me; 4John enuma no, ofir sor anaa ofir nyimpa? 5Na wosusuu hɔn mu dɛ, Sɛ yɛka dɛ, Ofi sor a, ɔbɛse dɛ, Ɔyɛ dɛn na hom anngye no enndzi? 6Na sɛ yɛka dɛ, Ofi nyimpa a, nkorɔfo no nyina besiw hɛn abo, osiandɛ wɔgye dzi ampa dɛ John yɛ nkɔnhyɛnyi. 7Na wobuaa dɛ wonnyim mbrɛ ofi. 8Na Jesus see hɔn dɛ, Mo so mennkɛkyerɛ hom tum kor a medze yɛ iyinom.
Wenyinture no ho Bɛ
(Matthew 21.33-46; Mark 12.1-12)
9Na ɔhyɛɛ ase buu nkorɔfo no bɛ dɛ, Nyimpa bi yɛɛ wenyin ture, na ɔdze fɛɛm ekuafo bi, na ɔdɔɔ mu kɔr beebi kɛkyɛree. 10Na ber durii no, ɔsomaa akowaa bi wɔ ekuafo no hɔ dɛ wɔmfa wenyin ture eduaba no bi mma no: na ekuafo no hwee no, na wɔmaa ɔdze nsapan kɔree. 11Na ɔtoaa do somaa akowaa fofor so; ɔno so wɔhwee no, na woguu n’enyim ase, na wɔmaa ɔdze nsapan kɔree. 12Na ɔtoaa do somaa dza otsia ebiasa; na ɔno so wopiraa no na wɔtoow no fii hɔ kyenee. 13Na wenyin ture no wura no see dɛ, Mebɛyɛ dɛn? Mobɔsoma mo dɔba: annyɛ a ɔnodze wɔbɛfɛr no. 14Na ekuafo no hun no no, wosusuu hɔn mu dɛ, Nyia odzi adze no nye yi: hom mma yenku no, ama egyapadze no aayɛ hɛndze. 15Na wɔtoow no fii wenyin ture no mu kyenee, na wokum no. Dɛm ntsi ebɛnadze na wenyin ture no wura bɛyɛ hɔn? 16Ɔbɛba abɛsɛɛ ekuafo yi, na ɔdze wenyin ture no ama afofor. Na wɔtsee no, wɔsee dɛ, Nyame mmpa ngu. 17#Dwom 118.22 Na ɔhwɛɛ hɔn see hɔn dɛ, Ebɛnadze nye yi a wɔakyerɛw dɛ,
Ɔbo a adantofo powee no,
Ɔnoara na ɔabɛyɛ kutuwdo bo?
18 Obiara a ɔbɔhwe ɔbo yi do no bobubu, na obiara a ɔbo no bɔhwe no do no, ɔbɔdwow no dɛ isiam.
Tow Tua ho Asɛmbisa
(Matthew 22.15-22; Mark 12.13-17)
19Na asɔfompanyin nye kyerɛwfo no hwehwɛɛ dɛ wɔdze nsa suo no mu kyer no dɔn no ara mu, na wosuroo nkorɔfo no; osiandɛ wohun dɛ bɛ yi a obui no tsia hɔn. 20Na wɔweɔɔn no na wɔsomaa aserafo bi a wopetuuw dɛ wɔyɛ atseneneefo, dɛ wonkosuo no mu wɔ ne kasaa mu, ama woeeyi no ahyɛ ambrado ne mbra nye no tum nsa. 21Na wobisaa no dɛ, Kyerɛkyerɛfo, yenyim dɛ eka na ekyerɛkyerɛ yie, eso emmfɛr obi enyim, na ekyerɛkyerɛ Nyankopɔn kwan no wɔ nokwar mu: 22aso ɔfa mbra mu dɛ yɛma Kaesar ntoboa anaa? 23Na ohun hɔn adwembɔn no, ɔsee hɔn dɛ, 24Hom mfa sika denare mbɛkyerɛ me. Woana no mfonyi nye nkyerɛwee na ɔwɔ do yi? Na wɔsee dɛ, Kaesar dze a. 25Na ɔsee hɔn dɛ, Ɔno dze, hom ndan dza ɔyɛ Kaesar dze mma Kaesar, na dza ɔyɛ Nyankopɔn dze mma Nyankopɔn. 26Na woenntum ennsuo ne nsɛm mu wɔ nkorɔfo no enyim; na no mbuae no yɛɛ hɔn nwanwa na womuaa hɔn ano.
Wusoɛr ho Asɛm
(Matthew 22.23-33; Mark 12.18-27)
27 #
Ndwu 23.8
Na Sadusiifo no a wɔgye kyim dɛ wunyan nnyi hɔ no mu bi baa ne nkyɛn bebisaa no dɛ, 28#Deut 25.5 Kyerɛkyerɛfo, Moses kyerɛwee maa hɛn dɛ, Sɛ obi no nua wu, na ɔwɔ yer, na ɔannwo mba a, no nua no nwar ne yer no na ɔnwo mba mma no nua owufo no. 29Nna enuanom beesuon wɔ hɔ; nyia odzi kan no waaree, na oennya ba, na owui; 30na nyia otsia ebien no, 31na nyia otsia ebiasa no so waar no, na dɛmara so hɔn beesuon nyina enngyaa mba, na wowuwui. 32Na ekyir no, ɔbaa no so wui. 33Dɛm ntsi wunyan no mu no, ɔbaa no bɛyɛ hɔn mu woana ne yer? Osiandɛ beesuon no nyina awar no. 34Na Jesus see hɔn dɛ, wiadze yi mu mba war, na wɔdze hɔn ma awar: 35na hɔn a wobobu hɔn dɛ wɔfata dɛ hɔn nsa bɛka wiadze a ɔreba no, nye nyan a wonyan fi ewufo mu no dze, wɔnnwar, eso wɔmma awar; 36na eso wonntum nnwu bio, na wɔnye abɔfo no sɛ, na wɔyɛ Nyankopɔn mba, dɛ wɔyɛ owunyan mba ntsi. 37#Eks 3.6 Na dɛ ewufo nyan dze, Moses so kyerɛe wɔ Haban no mu dɛ, ɔfrɛɛ Ewuradze dɛ, Abraham Nyankopɔn, Isaak Nyankopɔn nye Jakob Nyankopɔn. 38Na ɔnnyɛ ewufo Nyankopɔn, na enyikamfo Nyankopɔn a: osiandɛ hɔn nyina tse ase ma no. 39Na kyerɛwfo no bi buaa dɛ, Kyerɛkyerɛfo, aka no yie. 40Na iyi ekyir, woennsi hɔn bo dɛ wobebisa no asɛm bi bio.
Messia no ho Asɛmbisa
(Matthew 22.41-46; Mark 12.35-37)
41Na ɔsee hɔn dɛ, Ɔyɛ dɛn na wɔka dɛ Kraest no yɛ David ba? 42#Dwom 110.1 Na David noara ka wɔ Ndwom Nwoma no mu dɛ,
Ewuradze see m’Ewuradze dɛ,
Tsena m’abanyimfa,
43 Kodu dɛ medze w’atamfo mebɛyɛ w’ananadzegua.
44 Na sɛ David frɛ no Ewuradze a, na ɔyɛ dɛn na ɔyɛ ne ba?
Jesus Bɔ Kɔkɔ fa Mbrakyerɛfo ho
(Matthew 23.1-36; Mark 12.38-40)
45Na nkorɔfo no nyina tsee no, ɔsee n’esuafo no dɛ, 46Hom nhwɛ yie wɔ kyerɛwfo a wɔpɛ ntar atsentsen mu nantsew, nye gua do nkyiakyia, ɔnye mpanyin gua wɔ nhyiamudan mu, nye mpanyin tsenabea wɔ edzidzi ase ho: 47hɔn na wɔbɔ ekunafo epoo, na wopetuw bɔ mpaa atsentsen kyerɛ. Mese, yinom benya afɔbu kɛsenara.
S'ha seleccionat:
Luke 20: MFANBRPC
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Mfantse Bible © Bible Society of Ghana, 2011.