YOHANA 4
4
Yesu Yalomoloma nu Mukhali Musamaria
1Lwa Vafarisayo vahulila likhuva ndi Yesu anyolanga valondi vanyishi khandi abatisanga veechi vanyishi khuvira Yohana 2(khali niiva Yesu mwene shiyabatisa mundu tawe; navutswa veechi veve vonyene navo vabatisanga vandu.), 3Yesu yarula mu lusomo lwa Yudeya nakalukha khandi mu lusomo lwa Galilaya. 4Lwa yali nali khu luchendo lwelwe, yakhalakanyila mu litaala lia Samaria.
5Khulwa yako, yatukha mu litaala lia Samaria havundu halaangwangwa Sikari, himbi khu mulimi kwa Yakobo yali niyaha mwana wewe Yosefu. 6Shisima shia Yakobo shiali shiayevwa mu litaala lienelo. Lwa Yesu yavwa tsingulu shichila luchendo, yikhala himbi ha shisima shienesho. Tsiali himbi tsisaa sita tsiu mbasu.
7Mukhali Musamaria yitsa khuteeha matsi, Yesu namuvoolela, “Mbekhu matsi ku khung'wa.” ( 8Veechi veve vali nivatsile mu litaala khukuula shiukhulia.)
9Mukhali Musamaria mwenoyo yavoola, “Uli Muyahudi, ninzi ndi mukhali Musamaria. Undevanga matsi ku khung'wa munjila shina?” (Vayahudi shivahaambananga na Vasamaria mu likhola liavo tawe.)
10Yesu yamuchipa, “Uva nu wamanyakhu shihanwa shia Nyasaye ahaananga, khandi mundu ukhureevanga matsi ku khung'wa, wakhamureevi, naye yakhakhuheele matsi kahaananga vulamu.”
11Mukhali mwenoyo yamuvoolela, “Mwami, uvula shindu shiu khuteehela; khandi shisima yishi shiatsia hasi muno. Ni hena ha nunyole matsi kahaananga vulamu? 12Uli nu vunyali muno khuvira kuuka weru Yakobo wakhuha shisima yishi; shichila khali ye mwene yangw'etsamu halala na vaana veve nende tsing'ombe tsietsie?”
13Yesu yamuchipa, “Shia mundu wosi ung'wakhu matsi yaka alatsililila khandi khuva nu vuluhu; 14navutswa mundu ung'wakhu matsi ka nzitsanga khumuha shianyala khutsililila khandi khuva nu vuluhu tawe. Matsi ka nzitsanga khumuha kaliitsa khuva muye khuli shirula shia matsi kahaananga vulamu vwi mihika ni mihika.”
15Mukhali mwenoyo yamuvoolela, “Mwami, mbekhu matsi kenako, khu mbuli khuva nu vuluhu; khandi mbuli khutsililila khwitsa khukateeha hanu.”
16Yesu yamuvoolela, “Rula hanu. Tsia uvoolele musatsa wowo yitse hanu.”
17Mukhali mwenoyo yachipa Yesu, “Mbula musatsa.” Yesu yamuvoolela, “Uvooli katoto, ‘Mbula musatsa’; 18shichila wali wahilwa na vasatsa varanu; khandi musatsa wa uli naye nunundi ni kilikali shiali musatsa wowo tawe. Umbolele katoto.”
19Mukhali mwenoyo yavoolela Yesu, “Mwami, mali khulola ndi uli muprofeti. 20Vakuuka veru vasaalilanga khu shikulu yishi; navutswa munyi Vayahudi muvoolanga ndi Yerusalemi, naho havundu ha vandu vatsia khusaala khu Nyasaye.”
21Yesu yamuvoolela, “Mukhali yivi, suuvila mwinzi, isaa iliitsa khutukha lwa vandu valiitsa khuvula khusaala khu Tata khu shikulu yishi inoho mu Yerusalemi. 22Munyi Vasamaria musaalanga khu vindu via mwakorwa; navutswa khutsi Vayahudi khusaalanga khu woyo wa khwamanya, shichila vuhonyinyi vurulanga khu Vayahudi. 23Navutswa isaa ili himbi khutukha, khandi yamala katukha khale, lwa vandu valiitsa khusaala khu Tata khuvirila mu Roho khandi munjila yatoto, shichila Tata akhavanga vandu vanyala khusaala khuye khuli venavo. 24Nyasaye ni Roho; khandi vandu vasaalanga khuye, khutukha vasaale khuye khuvirila mu Roho khandi munjila yatoto.”
25Mukhali mwenoyo yavoola, “Manyi ndi Masiha ulaangwangwa Kristo aliitsa khwitsa; khandi lwa aliitsa khwitsa, aliitsa khukhuvoolela shia shindu shiosi.”
26Yesu yamuvoolela, “Inzi ulomolomanga khu yivi, ninzi ye.”
27Isaa yeneyo, veechi va Yesu vakalukha, nivali nilichenya lwa vamunyola nalomolomanga nu mundu mukhali. Navutswa mundu avulakhuho khali mulala khuvo wamureeva, “Ni shina shia wenyanga?” Inoho wareeva Yesu, “Shichila shina ulomolomanga naye?”
28Mukhali mwenoyo yalekha inyungu ya matsi, nakalukha mu litaala, navoolela vandu viweneyo, 29“Hambi mulole mundu umbolele shia shindu shiosi shia nakholanga. Anyala khuva neye Kristo?” 30Vandu varula mu litaala lienelo nivatsia khulola Yesu.
31Mutsisaa tsienetso, veechi vamuhomba nivavoola, “Mwechitsi, liakhu shiukhulia shitititi!”
32Navutswa Yesu yavavoolela, “Ndi ni shiukhulia shiandia, shia munyi mwakorwa shindu khulondokhanakhu.”
33Khulwa yako, Veechi veve varaanga khureevana vene, “Kanyala khuva mundu umulerele shiukhulia?”
34Yesu yavavoolela, “Shiukhulia shianje nu khukhola lienya lia woyo wanduma; khandi khurweshitsa muhinzilu kwekwe kwa yamba. 35Muli ni livoola, ‘Chirikale mieli chine khutukha khu lichesa.’ Navutswa muvoolelanga ndi muheenzekhu vulahi mu milimi; viraakwa viakhomeela khandi viayirechekha khucheswa! 36Muchesi uchesanga aheelwangwa murungu, khandi avunjelitsanga viraakwa viachesi shichila vulamu vwi mihika ni mihika; khu muraachi nende muchesi nivikhoyele khulala. 37Livoola yili ni liatoto, ‘Mundu mulala araakanga, na wundi achesanga.’ 38Mali khumuruma khutsia khuchesa mu mulimi kwa mwakharaakamu; vandi vakhola mihinzilu mu mulimi kwenoko; khandi munyolanga vukhala mu muhinzilu kwavo.”
39Vasamaria vanyishi khurula mu litaala lienelo vasuuvila mu Yesu, shichila mukhali Musamaria mwenoyo yali uvooli, “Ambolele shia shindu shiosi shia nakholanga.” 40Lwa Vasamaria vatsia khu Yesu, vamuvoolela amenye navo; ma Yesu namenyayo khumatukhu kavili.
41Vandu vandi vanyishi vasuuvila shichila likhuva lia Yesu yali navooli; 42nivavoolela mukhali mwenoyo, “Shikali makhuva kukhuvoolele, nako kachilanga nu khusuuvila tawe; navutswa khutsi vene khumali khuhulila ka ye mwene avooli, khandi toto khumanyi ndi neye Muhonyinyi wa vandu mu shivala.”
Yesu Yahonyinya Mwana wu Mulala khu Vimilili va Vayahudi
43Matukhu kavili nikakhavira, Yesu yarulayo natsia mu lusomo lwa Galilaya. 44Yesu yali uvooli mwene, “Muprofeti shianyala khuheelwa luyali na vandu mu shivala shieshie tawe.” 45Lwa Yesu yatukha mu lusomo lwa Galilaya, Vagalilaya vamwinjilitsa vulahi, shichila vali vamanyi shia shindu shiosi shia yali nakholi mu Yerusalemi khulitukhu liu Mulukha kwa Pasaka; khandi vo vali vatsia khwikhoyela mulukha kwenoko.
46Yesu yakalukha mu litaala lia Kana lili mu lusomo lwa Galilaya, mwa yali niyakalukhanyinya matsi khukwa idivai. Mulala khu vimilili va Vayahudi yali naliho wu mwana wewe yali nalwalanga mu litaala lia Kaperenamu. 47Lwa mundu mwenoyo yahulila ndi Yesu uruli mu lusomo lwa Yudeya utushi mu lusomo lwa Galilaya, yasimukha natsia khuye namuvoolela atsi mu litaala lia Kaperenamu khuhonyinya mwana wewe, wali nali himbi khukhutsa.
48Yesu yamuvoolela, “Mundu avulakhuho khali mulala khu munyi unyala khusuuvila nakhaloli viloleshitsu nende vindu viu khuchenyinya.”
49Mundu mwenoyo yavoolela Yesu, “Mwami, hamba khutsi nivi, mwana wanje nashili khukhutsa.”
50Yesu yamuvoolela, “Rula hanu utsi; mwana wowo alahona!”
Mundu mwenoyo yasuuvila mu makhuva ka Yesu yamuvoolela, narulaho. 51Lwa yali nali khu muhaanda, varumishi veve vamwakanila, nivamuvoolela, “Mwana wowo uhoni!”
52Khulwa yako, mundu mwenoyo yavareeva isaa yu mwana wewe yali nahoni; nivamuvoolela, “Ahoni tsisaa saba mukolovo.” 53Tata wu mwana mwenoyo yitsushitsa ndi nayo isaa ya Yesu yali namuvoolele, “Mwana wowo uhoni”. Ye nende vandu voosi vi inzu yeye vasuuvila.
54Yishi nashio shiali shiloleshitsu shia khavili shia Yesu yakhola, niyakharula mu lusomo lwa Yudeya khutsia mu lusomo lwa Galilaya.
S'ha seleccionat:
YOHANA 4: LLLPRO
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© The Bible Society of Kenya, 2013