KISAH 10
10
Petrus ug ngat Kornelius
1Mpe dima lene andigpoi di ninyeng Kornelius no rima ei minu ndig Kaisaria. No dini ninyeng tak kep tentara ibou sratus muhwindagom di ijem inyeng “Nimpung Italia.” 2No dini kin nide ig bei nsi nya yahagom iba ingon gom bikuk yok bak Allah. Noni singat tut mben Yahudi di yuhui mbum nya bingat nadi bak Allah bikwop njap ngwa hagom cem. 3Mpe di gom mem jam ningai di mpia caisi lene noni ngat-hi-ngat bingat lo, Allah de malaikati gom tau kep noni bihig noni “Kornelius e?”
4Kornelius tou kep malaikati dima nggilun ba, ninghuisi mpig sut lene buhup “Andigpoi e, anggo?”
Malaikati dima buhup “Allah joi sut na drek dip ade nadi kin ade nisingat tut tungwatu nyati cem. Gima rino Noni tin ei mem birop bina. 5Nogindini ma apinak ade awak nya ibou poi biyuug ei minu ndig Yope leu binhyepo ihig Simon kwei. No dini ninyeng titut yam rino Simon Petrus. 6Noni bong bit Simon nikak mindhe-ndhe ngkek cig ei muk nintig dip.” 7Lene malaikati di mbrap bit noni pror hanyen. Leu api Kornelius hig nide awak nya ibou can kin nisut tentara gom di kuk no bak Allah cem kwei, 8bipui sut mun di bitimon noni biyok leu api pinak yok biyuug ei minu ndig Yope.
9Njapti kui tirigi yo dima imbut biyuug krau puig sinon dideu minu ndig Yope lene Petrus kui bigwam ei ig bou njek dip hu kwei mem mpia huk pijum leu binhyepo ngat nadi. 10Lene noni sindi nggum bibor bijoi sut yem njita. Yo di ig bei ingei njita mem Petrus lo, noni sindi ngat-hi-ngat, 11bingat lo, mpia-bbed him kau leu lene mun di nok mai nghas di nyan bibor gom son nyahan tut mun di bikri kep ninghas yenti bitai juk kwei ei dihyeisi. 12Mai nghas dima juk tut mindhe-ndhe nya di bon nimig-ninda kin mindhe-ndhe di iba inghop bijjei dihyeisi kin ha di dimba-mba nyen nya bikwop ninyeng hagom. 13Lene nihyet gom tibim kwei bipai binoni “Petrus e, akiju ba, abui mikwau dima yok hak ba, ayem ug.”
14Lene Petrus srep “Tuhan e, nok bi! Diyem kep mun di nipigig ser di ugwai-gwai ba, nirom kuisi cem hi bi sren.” 15Noro nihyet dima tibim hanyen kwei bipai “Tut mun di Allah pai sut bipia dia-diau ne ma ajem nok mun di nirom kuisi au.” 16Ningat-hi-ngat dima bitimon Petrus mbiningai leu lene mai nghas dima kui hanyen ug ei mpia-bbed him bihigom.
17Petrus ningon kiowi tut ningat-hi-ngat dima bitut nimbot kepti cem. Tirigi noni gwam nyahan bikan-kan nyen tut lene yo di Kornelius pinak yok kwei pima ihig-hig nyen ser bingat Simon de ig leu api ikwei ya kui dimbou huigya. 18Lene ihig ser yo di ig bei nya “Simon Petrus bong bit jeni e?”
19Mpe dima lene Petrus ba ningon srip bram ningat-hi-ngat pima bitut nimbot kepti cem lo, Allah Ninnei pai binoni “Petrus e, ibou ningai ikwei binggok ser na. 20Akiju ba, ajuk um yok leu api ahig angon eisi tut gino abit yok au. Lewo dipinak yok kwei.” 21Gima rino Petrus juk um yok bipai biyok “Disut bat jen, dani ne no di jinggok ser ri. Nggon rino jikwei nggok ser da i?”
22Ibuhup “Kornelius di Nibou tentara pinak nye kwei. Noni ba ningon gom bikuk no bak Allah ba, mben Yahudi yahagom ikon ninyeng cem. Allah birop Kornelius de nadi bipinak Nide malaikati gom kwei bipai binoni bipia ma noni sok nihyet bak na di Andigpoi leu binhyepo abit nye biyuug ei nide ig bei leu binhyepo noni miap mun di tibim ei na di Andigpoi ahui him.” 23Gima rino Petrus cigit yok kui ig leu api ibit bong mem mmun gom.
Njapti kui bu lene Petrus kiju bibit yok ba, yo di ingon jo kep nya ibou poi leu minu ndig Yope cem ibit. 24Njapti kui bu lene Petrus nya yuug krau minu ndig Kaisaria. Mpe dima lene Kornelius cem kep puig ser ikweisi binduk nide bat nya kin nisut bat di ingon ce yam bi nya yahagom ba, ikwei dem yam ei su. 25Hammi tirigi Petrus kwei krau rino Kornelius ya um noni bikuk no ei Petrus nimig him. 26Noro Petrus brim Kornelius ninda kui bipai ser “Akiju kui lewo dani cem tungwatu dihyeisi he.” 27Petrus mbrap bit noni bicoi kikau ug ei ig bei lene ngat lo, tungwatu ningot ndig idem yam ei su. 28Lene noni pai biyok “Jo nibreisi mem je bipia mben Yahudi ide nicukti ggai ser nye bipai bipia harin dima nuug cem kep ngkiai nya ide ig ba, nisrig ikieti cem a. Noro Allah pingok dingonti leu binhyepo dimbus nggok tungwatu nya ba, dingat bihi nok yo di nirom kuisi au. 29Gima rino tirigi na di Andigpoi asok ahyet hwou mem da lene dingon buhun tut gi dikwei cem kep na di Andigpoi bi. Gima rino nogindini dihig ser na tut nggon rino ahig da kwei i.”
30Kornelius buhup “Njap ningai gi pini jug lene dingat nadi mem jam ningai di mpia caisi leu api tungwagom di juk sinsun di jinjit kei kwei ya kros ei doho bei. 31Noni pai bida ‘Kornelius e, Allah joi sut na drek dip ade nadi kin ade nisingat tut tungwatu nyati cem. Gima rino Noni tin ei mem birop bina. 32Ma apinak tungwahi ug ei minu ndig Yope leu binhyepo noni nggok ser Simon Petrus. No dima bong bit Simon nikak mindhe-ndhe ngkek cig ei nide ig bei ei muk nintig dip.’ 33Gima rino disok dihyet haninyai hwou ndam na di Andigpoi a. Jo nibreisi bipia angon nggriu sut nye jit-jau lewo akwei su. Nogindia nahagom ninduk yam kwei ei Allah niyai him biningon ya mem nihyet di Allah mipai tug hon na di Andigpoi ahui him.”
Petrus tri tut nihyet bak Kornelius nya
34 #
Ul. 10:17
Lene Petrus pai biyok “Nogindini dikan tut mungkun bipia Allah mbus nggok tungwatu nya bi. 35Mbro nok gino tungwagom nimbier kim timiei dihyeisi dini lo, no di kuk no bak Allah ba, niyai munti nya hagom kei bibor cem ne Allah joi sut noni. 36Disut bat jen, jikan tut nihyet di Allah sok bak mben Israel. Nihyet Di Kei dima bie ndam ingon di kwes kin Noni tug hon Yesus Kristus di nok Tuhan mem tungwatu yahagom. 37Jikan tut mun di pek kep mem tungwatu nya ei hanjop Yudea nisurti-nipekti. Ba, nitriti ei hanjop Galilea niabiati Yohanes tri nihyet tut nitur tungwatu nya ei minyeiti. 38Jikan tut bipia Allah dimig Yesus di timiei minu ndig Nazaret leu api kes Allah Ninnei bigwam ei Noni dip bisindem tut Noni cem. Jikan tut bipia Yesus mbut nimig bidem hanjop nsi dima yok hagom bingondut tungwatu nya. Noni bindei ba, yo di Bilis ninyeng tak kep yok ikei hanyen lewo Allah ningat rin kin Noni. 39Nyeni ningat Nide midyai di Noni yai nya ei minu ndig Yerusalem kin mben Yahudi itimieisi nindigsi cem bou nyeni niyai him tu. Mbro nok gima lo, tungwatu ipek Noni bigyai nimai biNoni ei biei salibti. 40Noro Allah win Noni hanyen leu nimai eisi mem njap gi niningai leu api ndo Noni brei bak tungwatu nya. 41Noni ndo Yesus brei bak tungwatu yahagom bi noro bak nye dino Allah dimig nye ei nimbie him leu binhyepo ningat Noni bou niyai him. Niyem njita bit Noni niabiati Allah win Noni hanyen leu nimai eisi. 42Lene Noni cuk nye bipia nuug tri tut Nihyet Di Kei bak tungwatu nya ba, nisimbot dat bipia Allah ndo Yesus Nongkom nok Nikei di mbus yo di igyaijo nya kin yo di imai su nya ingonti. 43Nabi nya yahagom ipui sut Noni nipou su. Ba, itri tut ‘Bikwop tungwatu tou rino ningon jo kep Yesus lene Allah mikos ser nide sisar tug hon Yesus de nisindemti.’ ”
Allah Ninnei srek kwei ei ngkiai nya ingonti
44Lo bi lene tirigi Petrus kes nihyet bigyo lene Allah Ninnei srek kros kwei ei yo di imiap Nihyet Di Kei dima ingonti. 45Mben Yahudi ibou poi di ingon jo kep Yesus di ibit Petrus kwei leu minu ndig Yope pima inga leu sut gino Allah bindei ba, Ninnei srek kwei ei ngkiai nya cem ingonti. 46Lewo imiap ngkiai nya ighyet tirigi imbrap ngkiai nya ighyet binggei sut Allah de nisindemti cem. Lene Petrus pai, 47“Yo dini igyai Allah Ninnei dem kep gi po nyeni niyai Allah Ninnei nipou su. Tou rima bigen ser yok tut gima itur yok ei minyeiti i?” 48Gima rino noni cuk yok bitur yok ei minyeiti tug hon Yesus Kristus ninyenga. Gima ngwig leu lene yahara mem Petrus leu binhyepo bong bit yok mem njap poi.
S'ha seleccionat:
KISAH 10: HAD
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió