KISAH 12
12
Herodes hwen bit yo di inggre kin mbusyamei
1Ei nijam dima ne Nibou Ndig Herodes#12:1: Nibou Ndig Herodes ndo tut Herodes Agripa I di ninyeng tak kep mben Yahudi itimieisi nisurti-nipekti. sindi hwen bit yo di inggre kin mbusyamei. 2Noni kes nihyet bak tentara gom ba, tentara dima ba nide simeda biyai nimai bak Yakobus di Yohanes nikindig. 3Tirigi noni ngat lo, mben Yahudi ijoi sut niyaisi dima lene noni kum eisi bu nok gima ba, cuk tentara nya bikat Petrus cem. Mun dini cut igkep yok mem Njap Ndig Midut Roti Dwoi Bi. 4#Kel. 12:1-27 Ikat Petrus lene icom noni ug ei ig bui nsi. Tentara nimpung bitai igya ser noni. Nimpung gom imangti ibou bitai bikwop nok. Herodes pi bikes hukum ei Petrus dip brei ei tungwatu yahagom igyai him niabiati tirigi Njap Ndig Paskah tun leu ug e. 5Gima rino Petrus sima ei ig bui nsi noro yo di inggre kin mbusyamei iba ingon comti buhuk nadi kikau bak Allah tindei noni.
Allah de malaikati buwak Petrus leu ig bui nsi
6Himmun dapi binjapti kui tirigi Herodes pi bibuwak Petrus kwei bou tungwatu igyai him lene Petrus bong mai ei yo di igya ser nya ibou can ikieti. Iba lante can biteu ninda kin yo cin dima inda ba, nindigsi nya igya ngkiem ser dimbou huigya. 7Nok rino Allah de malaikati gom kwei kros biya niyati ei mpia dima ba, ninjeng piga digai nghim nsi. Malaikati tak Petrus ninghat biwin lene pai binoni “Akiju ba, aya haninyai.” Pai nok rino lante nonti pas hak leu Petrus ninda. 8Gima leu lene malaikati pai binoni “Akri ade bang kep antig bou ba, ajuk srop ser amig jou.” Gima rino Petrus yai hagom bit leu nok malaikati nicuk noti leu api malaikati pai bu “Attin ade sinsun ndok di jei ba, akwei bit da.” 9Gima rino Petrus bit malaikati ba, yehei leu ig bui nsi. Noro ningon kiowi tut malaikati niyaisi di bitimon noni. Petrus kan bipia noni ngat-hi-ngat he. 10Tirigi yehei binjiriek tentara nimpung gi nigom di igya ser kin gi nican cem leu api igya hon dimbou ngkimom nitu di jo ser puig di ibehei ug ei nisai. Dimbou dima nonti kau leu yok lene yehei hak ba, yahacem ikak simpak gom. Leu api malaikati kes Petrus ei bipror kros leu noni.
11Niabiati lene Petrus ningon hukti tut mun di pek kep mem noni lene pai “Nogindini jo nibreisi mem sa tu! Allah pinak Nide malaikati gom kwei leu binhyepo noni teu sa leu Herodes de nisindemti kin mben Yahudi di itin ei mem imbuk tut sa cem.”
12Niabiati Petrus ningon hukti tut mun di pek kep mem noni tu lene noni ug ei Maria di Yohanes-Markus nipmem de biyati. Tungwatu nya ningot ndig induk yam ei ig dima ba, yuhuk nadi kikau. 13Petrus ya bisai bipuk dimbou lene misop di ninyeng Rode kwei ba, pi bikau dimbou leu noni. 14Noro miap igbit Petrus nihyet lene ba ningon di llei bibor bingkwei hanyen ug ei ig bei leu ba, kau dimbou leu noni bi. Lene pai sut bak nindigsi nya bipia Petrus no ya kui dimbou nisai ma kwei. 15Noro isrep “Mirei ya angonti.” Noro Rode nihyet jo kep bipia Petrus ningat ri. Noro ibuhup “Gima ne njungwes he.”
16Petrus puk dimbou bijo ninno. Tirigi ikau dimbou bingat lo, Petrus ningat rin lene inggap leu tut nindig bibor. 17Petrus kimut ninda kep yok ser nhyema imbrap au. Leu api noni pui sut notou Allah buwak noni biningwes ngun leu ig bui nsi. Lene pai biyok “Ma jipui sut mun dini bak Yakobus kin yo di ingon jo kep nindigsi nya cem.” Pai nok leu lene noni kes yok ei buug ei minu ttou nsi hi bu leu yok.
18Njap di hyep bu lene tentara pima yok ighyet ngwig kep yam nindig bibor ba, ingon kiowi nindig bibor tut mun di bindei dino Petrus pror hak leu yoni. 19Lene Herodes cuk tentara nya binggok ser Petrus noro ingat ningat bi. Gima rino noni cuk nibou gom bihig pus tentara pima yok leu api itug ndei nimai drek dip hak.
Niabiati bu lene Herodes jo leu hanjop Yudea buug ei minu ndig Kaisaria bibong ei sirima.
Herodes nimaisi
20Herodes ningon sibui sut timiei minu ndig Tirus kin Sidon nindig bibor. Gima rino yo dima induk yam ei nimpung gom biyuug ngat noni. Noro yuug ngat Blastus nipou bibrim ingkek kep noni leu api noni tti kin yok. No dini nok nibou mem Herodes de ig bei nsi nya yahagom. Leu api yahagom yuug ngat Herodes ba, yahara noni bikrau yam nda ser. Yahara noni lewo yo dima ide minu mbum apino suar ipek ide njita hagom leu Herodes ninyeng tak kepti.
21Ei njap gom di itto yam dima lene Herodes juk nide sinsun nibou ndig di kei-kau-kei leu api kui bigwam ei nide banggo mbrei dip leu api mbrap ei nide limwa nya yoho bei. 22Nide limwa nya di imiap kep nihyet yahagom ikon ighyet nok gom bijo ninno bipai “Nihyet dima ne tungwatu dihyeisi nihyet rin bi noro nung hi nihyet ri!” 23Hammi tirigi ikon ighyet nok rino Tuhan de malaikati gom tot Herodes kros lewo noni nggei sut Allah Nongkom he bi. Apino nji nya isui ningut bibindei ba, mai hak ug.
24Leu api Allah nihyet kieng kep minu dima nisurti-nipekti lene Allah nihyet bindei ba, tungwatu imang bibor ingon jo kep.
25Niabiati Barnabas kin Saulus igyai mun di mbusyamei nya ipinak ei yok dip pima biyok tu lene ijo leu minu ndig Yerusalem bingkwei hanyen ba, ibuwak Yohanes-Markus cem bit yok.
S'ha seleccionat:
KISAH 12: HAD
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió