KISAH 16
16
Timotius ba no bikum Paulus kin Silas kak imbutti
1 #
2Tim. 1:5
Paulus binut nimbutti buug ei minu ndig Derbe kikau ug ei minu ndig Listra cem. Timotius di ningon jo kep Yesus bong ei minu ndig dima. Nipmem ne sop Yahudi ba, ningon jo kep Yesus. Noro nicig mben Yunani. 2Yo di mbusyamei ei minu ndig Listra kin Ikonium yahagom ijoi sut Timotius drek dip niyai munti nya di kei bibor. 3Paulus kos tut ningon kanti bak Timotius leu binhyepo noni cem bit yok. Gima rino noni bindei ba, Timotius yai midut sunat lewo mben Yahudi yahagom ei hanjop nsi dima ikan tut bipia Timotius nicig ne mben Yunani ri. 4Tirigi Paulus nya igya bidem minu dima lene itri tut yo di igya kui Yesus kin nibou nya ei minu ndig Yerusalem ide nicuk ngkiai nyati pima bak yo di ingon jo kep nya. Leu lene Paulus nya isok kep yo di ingon kep nya leu binhyepo ice tut ibit nicuk ngkiai nyati dima. 5Gima rino yo di inggre kin mbusyamei igyai nisindemti apino ide ningon gomti bikum eisi bu. Ba, yo di sindi ingon jo kep Yesus imang bibor ibikum mbusyamei imangti bu bikwop njap-njap.
Paulus ngat-hi-ngat ei minu ndig Troas
6Allah Ninnei sindui sut gima Paulus kin Silas itri tut Allah nihyet ei hanjop Asia bi. Gima rino igya bidem hanjop Frigia kin Galatia. 7Tirigi yuug krau minu niya kwas yamti di bikkin hanjop Misia kin Bitinia lene ipi bimbut kikau ug ei hanjop Bitinia noro Yesus Ninnei cuon ser yok. 8Gima rino igya bidem#16:8: Nipas kep igya bidem cem kei lene nipas kep ikriau cem kei. hanjop Misia biyuug krau minu ndig Troas. 9Himmun di ingat rin ei Troas lene Paulus ngat-hi-ngat bingat lo, timiei hanjop Makedonia gom tau hak biya ei Paulus noho bei lene hara noni “Akwei ei Makedonia ba, ampu nye o!” 10Niabiati Paulus ngat ningat-hi-ngat dima lene nitin ei mem nimbut ug ei hanjop Makedonia lewo ningon jo kep bipia Allah cuk nye ug ei hanjop dima leu binhyepo nitri tut Nihyet Di Kei.
Lidia ningon jo kep Yesus ei minu ndig Filipi
11Nibri kibar minyei ei minu ndig Troas ba, nibitot minyei ngwa dip kikau ug ei Mios Samotrake. Njapti kui bu lene nibitot minyei ngwa dip ug ei minu ndig Neapolis. 12Nijo leu minu ndig dima binimbut nimig ug ei minu ndig Filipi. Minu ndig dima ne bon ninyeng ei hanjop Makedonia lewo nibou ndig minu Roma ninyeng tak kep timiei minu ndig Filipi nya yahagom. Nibong ei minu ndig dima mem njap poi. 13Lene nuug ya ei mam bei simiak minyei di biam sur dimbou pmem ei minu ndig dima. Njap dima ne njap di mben Yahudi ide Njap Nigwam Kep Ninghuisi ri. Nikan bipia mben Yahudi induk yam ei mpia ttou nsi dima mem ingat kikep nadi. Leu api nigwam jug binimbrap bit sop nya di induk yam ei su. 14Lidia di sop gom leu minu ndig Tiatira no rima bintu kep nihyet di nitri tut biyok. Sop dini tri minyas nghei nta di nibok kui bipek mitiei ba, kuk no kikep bak Allah cem. Tuhan bindei ba, Lidia ningon llei sut Paulus nihyet leu api ningon jo kep. 15Noni kin nide ig bei nsi nya yahagom igyai nitur yok ei minyeiti leu api cigit nye kui nide ig bipai binyeni “Gino jikan mungkun tut bipia dingon jo kep Yesus nijit-jau tu lene ma jikwei bong bit nye.” Cigit nye kui nide ig nok rino nice tut hak.
Paulus Silas nya isima ei ig bui nsi ei minu ndig Filipi
16Mpe di gom bu tirigi nuug ei mpia ttou nsi di ningat nadi eisi pima hanyen lene nuum awak sop gom. Ninnei rom kui noni ba, mbot kep tut mun di mipek kep ei nidipti bu igkei. Tug hon nisinati dima lene noni bipek mitiei nindig bibor bak niceu bat nya. 17Misop dini mig buwei kep Paulus nyeni ninno bahara “Yo dini ne awak mem Allah di ninyeng jei rin o! Ikwei tri tut nisinati bije leu binhyepo jiyai niteu leu sisarti kin niyaijo nijep o!” 18Sop dima hara nok kikau ei njap poi bibindei ba, bit bon Paulus om ningon tut kan bi. Gima rino noni tou kep ninghim dip bipai bak ninnei rom dima “Dicuk na tug hon Yesus Kristus ninyeng bipia ahei leu misop dima ningonti hak ug.” Hammi tirigi Paulus pai nok rino ninnei rom dima kes noni ei ba, hei leu ningonti bihigom. 19Tirigi jo nibreisi mem niceu bat nya bipia nituti mem iba misop dima bibrim mitiei nindig bibor pror leu yok tu lene ikat Paulus kin Silas bikri yok ug ei biyati bigya ei nibou nya yoho bei. 20Ikes yok bigya ei nibou Roma nya yoho bei bipai biyok “Tungwa cin dini ne mben Yahudi di ibindei ba, timiei minu ndig dini ingon buhun bibor ri. 21Yoni ingginau nye tut igyai kepti nya di srep tut nibou ndig Roma niggai serti. Nyeni ne timiei minu ndig Roma rin ba, bit bon nice tut binibit yo dini igyai kepti dima kan bi.” 22#2Kor. 11:25; 1Tes. 2:2 Tungwatu nindigsi imang bibor cem yahagom sindi ihwen bit Paulus kin Silas leu api nibou nya icuk ide limwa nya ba, irik Paulus kin Silas ide sinsun leu yok lene imbas yok. 23Imbas yok kinei-kinau leu api inggam yok ei ig bui nsi. Nibou pima yok isok kep nibou ig bui ngkiem bipia ma noni nggam yok bingkiem. 24Iba ighyet di ten bicuk gima rino nibou ig bui njei yok ug ei ninsi di dindi-kai lene ba biei ner bikibi kep imig bingkiem.
25Ug ei himmun mau rino Paulus kin Silas ingat nadi bipai doia lene inggei sut Allah. Yo di nindigsi di isima nya intu kep ide doia. 26Gi nok rino dihyei mun brim nindig bibor kros ba, ig bui nikiou ugwa-kwei ba, dimbou hagom kau hak leu yo di isima nya lene lante nya hagom pas bicut leu yok. 27Nibou ig bui drui sut niiman bingat lo, dimbou nya ei ig bui dima hagom kau su. Gima rino noni hit nide simeda lene pi bidat nonti bimai lewo kan bigya yo di isima nya yahagom inang bingwig leu ig bui nsi tu. 28Noro Paulus ba nihyet nindig bimbrua ser noni bipai “Adat nanti au! Nahagom rini yo!”
29Lene nibou ig bui cuk tungwagom bitin mini njeng kwei lene noni bipbur bicoi ug ei ig bui nsi leu api ba ninghuisi di mpig sut bikuk no ei Paulus kin Silas imig him. 30Leu api buwak yok kwei ei nisai bihig ser yok “Andigpoi jen, dibon mindei mem gima diyai niteu leu sisar kin niyaijo nijep i?”
31Paulus kin Silas ibuhup “Ma angon jo kep Tuhan Yesus leu api Noni miteu na leu sisar biyai niyaijo nijep bina kin ade ig bei nsi nya cem jahagom.” 32Lene Paulus kin Silas itri tut Tuhan nihyet binoni kin nide ig bei nsi nya cem yahagom. 33Himmun ndia nibou ig bui buwak yok leu isima eisi bipiap ibok hagom leu lene noni kin nide ig bei nsi nya yahagom igyai nitur yok ei minyeiti. 34Leu api noni cigit Paulus kin Silas kui nide ig bingei njita bak yoni bigyem. No dima kin nide ig bei nsi nya yahagom ingon llei bibor lewo nogindini ingon jo kep Allah.
35Njapti kui bu lene nibou pemerinta Roma isok ighyet ei ide yo di igya ser nya dip bak nibou ig bui bipai “Ma akau dimbou ig bui leu yo cin pima leu binhyepo yehei bimbut hak ug.”
36Gima rino nibou ig bui pai bak Paulus “Andigpoi e, nibou nya isok ighyet kwei leu binhyepo nikau dimbou ig bui leu je leu binhyepo jehei ba, jimbut hak. Gima rino ma jimbris nyahan bijimbut hak ug.”
37Noro Paulus pai bak yo di igya ser pima yok “Nyeni ne nibou ndig Roma de limwa nya ri. Mbro nok gino nikei nya imbus nyeni ningonti bigyo lo, tungwatu imbas nye brei ei timiei minu ndig dini igyai him leu api injei nye ug ei ig bui nsi mikuisi. Nogindini nibou nya isindui sut nye binimbris nyahan ba, nimbut hak leu yok e? Nok bi! Suar nibou nya yonti ikwei buwak nye leu ig bui dini.”
38Yo di igya ser pima yok ingkwei hanyen bindat kep Paulus nihyet di sok ei yok dip bak nibou nya. Tirigi imiap tut bipia Paulus kin Silas ne nibou ndig Roma nide limwa nya rin lene idigit tut. 39Lene ikwei tug ighyet bak Paulus kin Silas bibuwak yok leu ig bui bipai biyok “Ma jimbut hak leu minu ndig dini.” 40Paulus kin Silas yehei leu ig bui biyuug cem kep Lidia ei nide ig bei. Niabiati igwam bit yo di ingon jo kep nya ei mpia ttou nsi dima bibiwin kep ingonti leu lene Paulus kin Silas ikes yok bimbut leu yok.
S'ha seleccionat:
KISAH 16: HAD
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió