KISAH 23
23
1Paulus niyai bong kep Nikei Puig Yahudi Nya lene pai biyok “Disut bat jen, dingon mien kwes kin Allah tut diyai munti nya habiei dimien kwei bipek ammani kep.” 2Pai nok rino Ananias di Imam Nibou Ndig cuk yo di igya dideu Paulus bittem ser nuhuigya. 3#Mat. 23:27-28 Gima rino Paulus pai binoni “Ningat ne Allah mittem nani cem lewo angon can lo, aluei atta binok no di ningon sren. Gino abon nanti nok nikei lene suar ambus dingonti bit leu nok Puig Yahudi nicuk nati. Noro tirigi abindei ba, yo dini ittem ser duhui njiriek nicukti dima lene apigau hanjop!”
4Yo di igya dideu Paulus ibirop nihyet bipai “Ahyet kinei sut Allah de Imam Nibou Ndig ri.” 5#Kel. 22:28 Paulus buhup “Aye! Disut bat jen, dikan tut bipia no dima ninyeng Imam Nibou Ndig bi. Ningat ne Allah Nihyet cuon ser nye ‘Ma jihyet wer mpiahi tut jide nibou di ninyeng tak kep nide limwa nya au.’ ”
6 #
Kis. 26:5; Flp. 3:5 Tirigi Paulus ngat lo, Nikei Puig Yahudi Nya ibou poi inggre kin nimpung Saduki lo, nindigsi nya inggre kin nimpung Farisi lene noni ba nihyet nindig bipai biyok “Disut bat jen, dinggre kin nimpung Farisi ba, dicig bat nya cem inggre kin nimpung Farisi. Jimbus dingonti drek dip gi dingon jo kep bipia Allah miwin nimai nya hanyen leu imai eisi.” (7Tirigi Paulus pai nok rino Farisi nya kin Saduki nya ighyet srep yam leu api ikwas yam ei nimpung can. 8#Mat. 22:23; Mrk. 12:18; Luk. 20:27 Lewo Saduki nya ingon jo kep mun nyeng ningai. Nigom rino bit bon tungwatu ikiju hanyen leu imai eisi kan bi. Nican rino malaikati nya yo rinaha bi. Niningai rino ninnei nya yo rinaha bi. Noro Farisi nya ingon jo kep mun nyeng ningai dima yok hagom.) 9Ighyet hwen yam nindig bibor nok rino guru Puig Yahudi Nicukti nya ibou poi di inggre kin nimpung Farisi nya ikiju bigya leu api iba ighyet di ten bipai “Bit leu nyeni ningon kanti ne no dini yai mun tunggwei hi bi. Jo nibreisi bipia malaikati kin ninnei hi cem mbrap bit noni tu!”
10Iba ighyet di ten bisrep tut yam nindig bibor nok rino nibou tentara krau ningon leu ma ibrim Paulus bibindei ba, nimig-ninda bitun. Gima rino noni cuk nide limwa nya biba yo dek Nikei Puig Yahudi Nya bipos Paulus leu ikieti bibuwak noni hanyen ug ei tentara nibousi di igya coi.
11Himmun di gwam dip bu lene Tuhan Yesus kwei ya simiak Paulus bipai binoni “Ma ata abou ei ade ningon ngkiemti. Atri tut Dani ei minu ndig Yerusalem tu. Noro ma atri tut Dani ei minu ndig Roma bu.”
Mben Yahudi igyok ingon gom mem Paulus
12Njap bigyoti lene mben Yahudi igyok ingon gom ba, yeheng biyam ser bipia igyem njita bidut ndia ngei bi kikau bibou ihwen Paulus bimai leu ug e. 13Yo di igyok ingon gom mem dima imangti njiriek ibou ningot bitai. 14Yoni yuug mbot kep tut ingon kanti dima bak imam nindig nya kin nibou mben Yahudi nya bipai “Neheng biyam ser bipia miniyem njita binidut ndia ngei bi kikau bibou nihwen Paulus bimai leu ug e. 15Gima rino ma jeni kin Nikei Puig Yahudi Nya jisok jihyet bak nibou tentara leu binhyepo noni buwak Paulus hanyen kwei ei joho bei. Ma jicom biei mpup ris noni bipia jijoi sut jimbus Paulus ningonti mungkun tut nide mun hyet mbigom kin bu. Lene nyeni miniyon ser puig binihwen Paulus hapuig tirigi noni kwei ei sirini bigyo.”
16Noro Paulus ninggwo miap tut yo di igyok ingon gom mem Paulus dima tu. Gima rino noni ug ei tentara nibousi di igya coi bimbot kep tut bak Paulus. 17Lene Paulus hig kompi gom kwei bipai binoni “Ma abuwak mot dini ug ei nibou tentara noho bei leu binhyepo mbot kep tut mimun bak noni.” 18Kompi buwak mot dima ug ei nibou tentara noho bei bipai binoni “Paulus di sima hukum cuk da bipia dibuwak mot dini kwei ei na di Andigpoi aho bei lewo noni joi sut mbot kep tut mimun bina.”
19Nibou tentara krau mot dima ninda bibuwak noni biyuug ya ter biyongkom leu api hig ser noni “Ajoi sut gima ambot kep tut mimun bida e?”
20Mot dima ce bipai “I, nibou mben Yahudi nya igyok ingon gom mem gima misok ighyet kwei bak na di Andigpoi leu binhyepo abuwak Paulus hanyen ug ei Nibou Puig Yahudi Nya yoho bei mem njap di hyep. Noro yo dima icom biei mpup ris na. Yoni mipai bina bipia ijoi sut imbus Paulus ningonti mungkun tut nide mun hyet mbigom kin bu. 21Noro ma ace tut ighyet au. Lewo tungwatu imangti njiriek ibou ningot bitai ikos dik sir simpak mem gima ihwen Paulus hapuig. Yo dima yeheng biyam ser bipia igyem njita bidut ndia ngei bi kikau bibou ihwen Paulus bimai. Nogindini itin ei su ba, ibet ingon mem gima na di Andigpoi abuhup ighyet hanyen.” 22Nibou tentara pai binoni “Ma akimut ahui tut mimun di ambot kep bida dini leu binhyepo hiter kan tut au.” Lene cuk mot dima bingkwei hanyen ug ei nide ig.
Nibou tentara pinak Paulus bak nibou Feliks
23Leu api nibou tentara hig nide kompi nya ibou can kwei bipai biyok “Jidimig tentara nitu nya ibou sratus can kin tentara di ibri kuda kan ibou ningot muhwindacan kin tentara di isrer micim kan ibou sratus can bu. Ma yahagom itin ei mem gima yuug ei minu ndig Kaisaria mem mmun jam muhwindatai. 24Ma jitin ei kuda hi mem Paulus cem bibri leu api jinyohou buwak noni ba, ningwes ngun kikau ug ei nibou Feliks noho bei.” 25Lene nibou tentara pima pas srat gom ba, nibokti pai,
26“Srat dini leu da di Klaudius Lisias. Mem nibou Feliks di ninyeng jei. Acem! 27Mben Yahudi ikat no dini bipi bihwen noni bimai noro dimiap ninghapti tut bipia noni ne nibou ndig Roma de limwa ri. Gima rino diya tut ditde limwa nya ba, niteu noni biningwes ngun leu yo dima indati. 28Dipi bidihig ser mben Yahudi tut nide mun di yai tunggwei di yoni ipai kep noni tut. Gima rino dibuwak noni ug ei ide Nikei Puig Yahudi Nya yoho bei. 29Noro jo nibreisi mem da bipia noni yai mun tunggwei di bindei ba, tug ndei nimai e, he sima ei ig bui nsi e, drek dip cem bi. Yo dima ipai kep noni drek dip ide Puig Yahudi niggai serti he. 30Tirigi tungwagom mbot kep bida tut mben Yahudi di igyok ingon gom mem gima ihwen noni bimai lene dibrim dingkek bidipinak noni hwou ndam na di Andigpoi. Ba, dicuk yo dima bipia suar ipai kep noni ei na di Andigpoi aho bei.”
31Gima rino tentara igyai hagom bit leu nok nibou tentara nicuk yokti. Ibuwak Paulus biyuug sut noni ug ei minu ndig Antipatris mem mmun dima. 32Njap di hyep bu lene tentara di ibri kuda nya ibuwak Paulus kikau lo, tentara nitu nya ingkwei hanyen ug ei tentara nibousi di igya coi. 33Tirigi tentara di ibri kuda nya ikwei krau minu ndig Kaisaria lene isu srat dima bak nibou Feliks leu api ikes Paulus cem ei nindati. 34Niabiati nibou dima kwop srat dima lene hig ser Paulus “Atimieisi leu hantou i?” Paulus buhup “Ditimieisi leu hanjop Kilikia.” 35Buhup nok rino nibou Feliks pai “Nnaba dimbus angonti mpe dino yo di igyok ingon gom mem na ikwei krausi.” Lene noni cuk tentara nya bibuwak Paulus ug ei ig di Nibou Ndig di Herodes de bigyok igyai kep noni ei mpia dima.
S'ha seleccionat:
KISAH 23: HAD
Subratllat
Comparteix
Copia

Vols que els teus subratllats es desin a tots els teus dispositius? Registra't o inicia sessió