यूहन्ना 11
11
लाजर री मौत
1मरियम अतै मार्था दोई बैहणी थी। तंयारा भाई लाजर बीमार थू सो बैतनिय्याह ग्राँ मन्ज रैहन्दै थियै। 2ऐह सो ही मरियम थी जैसै प्रभु पुर इत्र मळी#11:2 ऐह इत्र ऐसा गल्ला थऊँ बाद मळणा हा हालि तक ऐसै ऐह कम ना करूरा थू। करी तसेरै पैरा जो अपणै बाळा सितै पुजूंरा थू, तंयारा ही भाई लाजर बीमार थू। 3ता तसेरी बैहणीये तैसिओ सेनेहा भैजु कि, “हे प्रभु, हेर, जैस सोगी तुहै प्यार करदै हिन, सो बीमार हा।”
4ऐह हुणी करी यीशुऐ बल्लू, “ऐसा बमारी रा अन्त मौत ना भूणा; पर प्रमात्मैं री महिमा तांयें हा, कि तसेरी वजह थऊँ प्रमात्मैं रै पुत्रा री जय जयकार भोआ।”
5यीशु मार्था, तसारी बैहणी अतै लाजर सोगी प्यार रखदा थू। 6फिरी भी जैहणै यीशुऐ हुणु कि लाजर बीमार हा, ता जैसा जगह पुर सो थू, तैड़ी दोई दिन होर रूकी गो।
7दूँ दिना बाद तिनी अपणै चेलै सोगी बल्लू, “अईआ, अहै फिरी यहूदिया परदेस रै बैतनिय्याह ग्राँ जो गान।”
8चेलै तैस सोगी बल्लू, “हे गुरू, यहूदी अगुवै ता तिजो पुर पत्थर मारना चाहन्दै थियै, अतै कै तू फिरी तैड़ीओ गाणा चाहन्दा?”
9यीशुऐ जवाव दिता, “कै दिना मन्ज बारह घंटै ना भुन्दै? अगर कोई दिय्आ चला ता ठोकर ना लगदी, क्ओकि सो सूरजा री लौई मन्ज चलदा हा। 10पर अगर कोई राती चला ता ठोकर लगदी ही हा, क्ओकि तैत मन्ज लौ ना भुन्दी।”
11तिनी ऐह गला करी, अतै ऐत थऊँ बाद तियां सोगी बलणा लगु, “इन्दा मित्र लाजर सोई गो हा, पर अऊँ तैसिओ जगाणा चलु हा।”
12ता तसेरै चेलै बल्लू, “हे प्रभु, अगर सो सोई गो हा ता तैस उूठी भूणा।” 13यीशुऐ ता तसेरी मौती रै बारै मन्ज बल्लू थू, पर सो समझै कि तसेरै निन्द्रा मन्ज सूणै रै बारै मन्ज बल्लू हा।
14ता यीशुऐ तियां सोगी साफ साफ बली दिता, “लाजर मरी गो हा; 15अतै अऊँ तुन्दी वजह थऊँ खुश हा कि अऊँ तैड़ी ना थू जैत थऊँ तुहै विस्वास करन। पर अबै अईआ, अहै तैस बलै चलन।” 16ता थोमा जैसियो दिदुमुस भी बलदै थियै, अपणै साथी चेलै सोगी बलणा लगु, “अईआ, अहै भी ऐस सोगी मरना चलन।”
यीशु ही पुनरूत्थान अतै जिन्दगी हा
17बैतनिय्याह ग्राँ पुजणै पुर यीशु जो ऐह पता लगु कि लाजर को कब्र मन्ज रखुरै चंऊर दिन भूच्ची गच्छुरै हिन। 18बैतनिय्याह यरूशलेम थऊँ कोई दोई मील री दूरी पुर थू। 19मतै सारै यहूदी मार्था अतै मरियम बलै तंयारै भाई रै मरनै पुर तैहा जो तस्सली दिणा छुरै थियै। 20जैहणै मार्था यीशु रै ईणै री खबर हुणी ता तैस सोगी मुळना गई, पर मरियम घरै ही बैही रैई।
21मार्था यीशु सोगी बल्लू, “हे प्रभु, अगर तू ऐठी भुन्दा ता मेरा भाई कदी भी ना मरदा। 22अतै अबै अऊँ भी जाणदी हा कि जैडा कुछ तुद प्रमात्मैं थऊँ मँगणा, प्रमात्मैं सो तिजो दि दिणा।”
23यीशुऐ तैहा सोगी बल्लू, “तेरै भाई फिरी जी भूणा।”
24मार्था तैस सोगी बल्लू, “अऊँ जाणदी हा कि न्याय रै दिना मन्ज दोबारा जी उूठणै रै टैमैं तैस जी भूणा।”#चेलै. 24:15.
25यीशुऐ तैहा सोगी बल्लू, “दोबारा जीणा अतै जिन्दगी अऊँ ही हा; जैडा कोई मिन्जो पुर विस्वास करदा सो अगर मरी भी गच्छा ता तैस जी भूणा, 26अतै जैडा कोई जिन्दा हा अतै मिन्जो पुर विस्वास करदा हा, सो सदा तक ना मरना। कै तू ऐसा गला पुर विस्वास करदी हा?”
27तैहै तैस सोगी बल्लू, “हाँ हे प्रभु, अऊँ विस्वास करदी हा कि प्रमात्मैं रा पुत्र मसीह जैडा संसार मन्ज ईणैबाळा थू, सो तू ही हा।”
यीशु रोऊ।
28ऐह बली करी सो चली गई, अतै अपणी बैहणी मरियम जो हैदी करी चुपचाप बल्लू, “गुरू ऐठी ही हा अतै तिजो हैदु करदा।” 29ऐह हुणी करी सो झट उूठी करी तैस बलै आई। 30यीशु हालि तिकर ग्राँ मन्ज ना पुजुरा थू पर तैसा जगह ही थू जैड़ी मार्था तैसिओ मुळुरी थी। 31ता तैड़ी जैड़ै यहूदी तैस घरा मन्ज थियै अतै तैहा जो शान्ती दिच्छु करदै थियै। तियैं ऐह हेरू कि मरियम झट उूठी करी बाहर गई हा ता सो समझै कि ऐह कब्रा पुर रूणै तांयें गई हा, ता सो भी तसारै पिचो चली पै।
32जैहणै मरियम तैड़ी पुजी जैड़ी यीशु थू, ता सो तैसिओ हेरी करी तसेरै पैरा मन्ज पैई गई अतै बलणा लगी, “हे प्रभु, अगर तू ऐठी भुन्दा ता मेरा भाई ना मरदा।” 33जैहणै यीशुऐ तैहा जो अतै तियां यहूदी जो जैड़ै तैहा सोगी आये थियै, रूंदै हेरू ता सो आत्मा मन्ज बडा उदास अतै दौक्ळी नकैऊ, 34अतै बल्लू, “तुहै तैसिओ कड्ड़ी दफनाऊरा?” तियैं तैस सोगी बल्लू, “हे प्रभु चली करी हेरी लै।”
35यीशु रोऊ।
36ता यहूदी बलणा लगै, “हेरा, ऐह तैस सोगी कैतना प्रेम रखदा थू।”
37पर तियां मन्ज कुछ बलणा लगै, “कै ऐह जिनी अंधे री हाख्री खोली, ऐह भी ना करी सकू कि ऐह मणु ना मरदा?”
लाजर रा दोबारा जीणा
38यीशु मना मन्ज बडा ही उदास भूच्ची करी फिरी कब्रा पुर आ। सो अक्क गुफा थी अतै अक्क पत्थर तैस पुर रखूरा थू।
39यीशुऐ बल्लू, “पत्थरा जो घेरा।” तैस मरूरै री बैहण मार्था बलणा लगी, “हे प्रभु, ऐस मन्ज ता मुसक चलुरी भूणी हा, क्ओकि ऐसिओ मरूरै ता चंऊर दिन भूच्ची गच्छुरै हिन।”
40यीशुऐ तैस सोगी बल्लू, “कै मैंई तिजो सोगी ना बल्लू थू कि अगर तू विस्वास करली ता प्रमात्मैं री महिमा हेरली।”
41ता तियैं तैस पत्थर जो घेरू। यीशुऐ अपणी हाख्री चुकी करी बल्लू, “हे पिता, अऊँ तेरा धन्यवाद करदा कि तैंई मेरी प्रार्थना हुणी लेई हा। 42अऊँ जाणदा थू कि तू सदा मेरी हुणदा, पर जैड़ी भीड़ अखै ब्रखै खडूरी हा, तंयारी वजह थऊँ मैंई ईयां बल्लू हा, कि ऐह मणु विस्वास करन कि तैंई मिन्जो भैजुरा हा।”
43ऐह बली करी तिनी जोरा सितै हक्क पाई, “हे लाजर निकळी आई!” 44जैडा मरी गच्छुरा थू सो कफणा थऊँ हथ पैर बनुरा निकळी आ, अतै तसेरा मुँह कपड़ै सितै लपेटुरा थू।
यीशुऐ तियां सोगी बल्लू, “ऐसिओ खोली देय्आ अतै गाणा देय्आ।”
यीशु रै वरोधा मन्ज षड्यन्त्र
(मत्ती 26:1-5; मरकुस 14:1,2; लूका 22:1-2)
45ता जैड़ै यहूदी मरियम बलै छुरै थियै अतै तसेरा ऐह कम हेरू थू, तियां मन्ज मतै तैस पुर विस्वास करू। 46पर तियां मन्ज कुछ मणुऐ फरीसी जो गिचीकरी यीशु रै कम्मा री खबर हुणाई। 47ऐह हुणी करी प्रधान याजकै अतै फरीसीये यहूदी महासभा करी, अतै बल्लू, “अहै करदै कै हिन? ऐह मणु ता मतै चमत्कार दसदा। 48अगर अहै ऐसिओ ईयां ही छड़ी दिन, ता सबी मणु ऐस पुर विस्वास करी लैणा, अतै रोमी ईच्ची करी इन्दी जगह अतै जाति दूनी पुर हक्क जमाई लैणा।”
49ता तियां मन्ज काइफा नां रै अक्की मणुऐ जैडा तैस साला रा महायाजक थू, तियां सितै बल्लू, “तुहै कुछ भी ना जाणदै, 50अतै ना ऐह समझदै कि तूसु तांयें ऐह भला हा कि असु तांयें अक्क मणु मरा, अतै सब जाति नष्ट ना भून।”
51ऐह गल तिनी अपणी तरफा थऊँ ना बली, पर तैस साला रै महायाजक भूच्ची करी भविष्यवाणी करी, कि यीशु तैहा जाति तांयें मरना; 52अतै ना सिर्फ तैहा जाति तांयें, पर ठेरैतांये भी कि प्रमात्मैं री तितर बितर बच्चै जो अक्क करी देय्आ। 53ता यहूदी अगुवै तैस दिन थऊँ ही तैसिओ मारनै री योजना बणाणा लगै।
54ठेरैतांये यीशु तैस टैमां थऊँ लेई करी यहूदी रै सामणै ना आ, पर तैड़ी थऊँ बणा रै अक्की परदेसा इफ्राईम नां रै अक्की नगरा जो चली गो, अतै अपणै चेलै सोगी तैड़ी ही रैहणा लगु।
55यहूदी रा फसह रा त्यौहार नेड़ै थू, अतै मतै भारी मणु फसह रै त्यौहारा थऊँ पैहलै पूरै देशा थऊँ यरूशलेम जो गै कि अपणै आपा जो शुद्ध करन।#2 इति. 30:17. 56प्रधान याजकै अतै फरीसीये मन्दरा मन्ज सबी जो ऐह हूक्म दी रखूरा थू कि अगर कसकि जो पता लगी गाला कि यीशु कड़ी हा ता सो असिओ दसी देय्आ ताकि अहै तैसिओ पकड़ी सकन। 57ता फरीसी यीशु जो तोपणा लगै अतै मन्दरा मन्ज खड़ी करी अप्पू मन्ज कणैणा लगै, “तुहै कै सोचदै हिन? कै सो त्यौहारा मन्ज ना ईला?”
S'ha seleccionat:
यूहन्ना 11: GBKNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
This work is licensed under Creative Commons Attribution-ShareAlike 4.0 License.