यूहन्ना 6
6
पँज हजार मणु जो खुआणा
(मत्ती 14:13-21; मरकुस 6:30-44; लूका 9:10-17)
1इआं गल्ला थऊँ बाद यीशु गलील री अक्क झील तिबिरियास रै पारीयें कनारै चली गो। 2मणु री अक्क बडी भारी भीड़ तसेरै पिचो चलुरी थी, क्ओकि सो मणु तसेरै करूरै सामर्थ रै कम्मा जो हेरदै थियै, जैड़ै सो बमारा पुर करदा थू। 3ता यीशु तैठी अक्की पहाड़ी पुर चड़ी करी अपणै चेलै सोगी बैही गो। 4यहूदी रा फसह रा त्यौहार नेड़ै छूरा थू।
5जैहणै यीशुऐ नजर दिती ता अक्क बड़ी भीड़ जो अपणी कनारी इन्दै हेरू, ता फिलिप्पुस सितै वलु, “अहै इन्यारै खाणै तांयें करा थऊँ रोटी खरीदी लैईन?” 6सो तैसिओ परखणै तांयें ऐह बल्लू करदा थू, क्ओकि तैसिओ पता थू कि तैस कै करना।
7फिलिप्पुसे यीशु जो जवाव दिता, “दो सौ दीनार री रोटी भी लेई इल्लै ता ईयां तांयें पूरी ना भूणी, कि सबीओ थोड़ी थोड़ी भी मुळा।”
8तसेरै अक्की चेलै शमौन पतरसा रै भाई अन्द्रियास तैस सोगी बल्लू, 9“ऐठी अक्क गोबरू हा जैस बलै पँज जौआ री रोटी अतै दोई मच्छली हिन, पर ऐतनै मणु तांयें सो कै हिन?”
10यीशुऐ वलु, “मणु जो बहाली देय्आ।” तैहा जगह बडा भारी घा थू, अतै लगभग पँज हजार मर्द ही मर्द तैठी थियै। 11ता यीशुऐ सो रोटी लेई, अतै प्रमात्मां रा धन्यवाद करीके तियां जो जैड़ै बैहुरै थियै बण्ड़ी दिती। अतै मच्छली जो भी तियां ही बन्डी दिता।
12जैहणै सो खाई करी रजी गै ता यीशुऐ अपणै चेलै सोगी बल्लू, “बचुरै रोटी रै टुकड़ै जो बटोरी लेआ कि कुछ बर्बाद ना भोआ।” 13ता तियैं जौआ री तियां पँज रोटी रै टुकड़ै जो खाणै थऊँ बाद भी बचुरी रोटी रै टुकड़ै री बारह टोकरी भरी। 14जैहणै मणुऐ ऐह सामर्थ भरै कम हेरै ता तियैं बल्लू, “सच मन्ज ही ऐह सो ही भविष्यवाणी करनै बाळा हा जैडा ऐस संसारा मन्ज ईणैबाळा थू।”#मत्ती 21:11. 15फिरी यीशु जो पता लगी गो कि ईयां सबी तैसिओ राजा बणाणै तांयें लेई गाणा ता सो फिरी अकेला पहाडा जो चली गो।
यीशु पाणी पुर चलै
(मत्ती 14:22-33; मरकुस 6:45-52)
16जैहणै सझं भूई ता यीशु रै चेलै झीला रै कनारै गै, 17अतै कफरनहूम जो गाणै तांयें तसेरै चेलै किस्ती पुर चड़ी करी झीला पार करना लगै। नैहरा भूच्ची गच्छुरा थू अतै यीशु हालि तिकर तियां बलै ना छूरा थू। 18ता तेज हवा चलनै री वजह थऊँ झीला मन्ज लैहरा चलना लगी पैई। 19जैहणै सो त्राई-चंऊर मील ही चलै भोलै ता तियैं यीशु जो पाणी पुर चलदै किस्ती री कनारी इन्दै हेरू, अतै सो डरी गै। 20ता यीशुऐ तियां जो बल्लू, “अऊँ हा; डरा मत।” 21ता तियैं सो किस्ती पुर चढ़ाई लैऊ अतै किस्ती तैहा जगह पुजाई दिती जैठिया जो सो चलुरै थियै।
मणु यीशु जो तोपणा लगै
22दूये दिन तियैं मणुऐ जैड़ै झीला पार रैई गच्छुरै थियै ऐह हेरू कि अक्की किस्ती जो छड़ी करी तैठी होर किस्ती ना थी, अतै तियां जो ऐह भी पता लगु कि यीशु अपणै चेलै सोगी तैहा किस्ती पुर ना चढुरा, पर सिर्फ चेलै ही किस्ती मन्ज गच्छुरै हिन 23ता तिबिरियास शहर री कनारी थऊँ होर हल्की हल्की किस्ती तैहा जगह जो आई, जैड़ी तियैं प्रभु रा धन्यवाद दिणै थऊँ बाद रोटी खाई थी। 24ठेरैतांये जैहणै भिड़ै हेरू कि यीशु तैड़ी निय्आ, अतै ना ही तसेरै चेलै हिन, ता सो अप्पू भी किस्ती पुर चड़ी गै अतै यीशु जो तोपदै-तोपदै कफरनहूम ग्राँ ईच्ची पुजै।
यीशु जिन्दगी री रोटी
25जैहणै तियैं यीशु जो झीला रै ऐस पार हेरू, ता तैस सोगी बलणा लगै, “हे गुरू तू ऐठी कैहणै आ?”
26यीशुऐ तियां जो जवाव दिता, “अऊँ तूसु सोगी सच बलदा, तुहै मिन्जो ठेरैतांये ना तोपू करदै कि तुहै कोई चमत्कार हेरू, पर ठेरैतांये कि तुहै रोटी खाई अतै रजी गै। 27तैस खाणै तांयें मेहनत मत करा जैडा खत्म भूच्ची गाणा, पर तैस खाणै तांयें मेहनत करा जैडा अनन्त जिन्दगी तक वणी रैहणा, जैतियो मणु रा पुत्र तुसिओ दिन्दा, क्ओकि पिता प्रमात्मैं तैस पुर ही अपणी मोहर लाऊरी हा।”
28ता तियैं यीशु सोगी बल्लू, “प्रमात्मैं रै कम्मा करनै तांयें अहै कै करन?”
29यीशुऐ तिंआरैं जवावा मन्ज बल्लू, “प्रमात्मैं रा कम ऐह हा कि जिनी तैसिओ भैजुरा तुहै तैस पुर विस्वास करा।”
30ता तियैं तैस सोगी बल्लू, “ता तू कुण जिन्ना चमत्कार दसदा कि अहै तैतिओ हेरी करी तिजो पुर विस्वास करन? तू कुण जिन्नै कम करदा? 31इन्दै स्याणैं बणा मन्ज मन्ना खाऊ, जियां कि पवित्रग्रन्थ मन्ज लिखुरा, ‘तिनी तियां जो खाणै तांयें स्वर्गा थऊँ रोटी दिती’।”#भज. 78:24. 32यीशुऐ तियां सोगी बल्लू, “अऊँ तूसु सोगी सच बलदा, मूसै सो रोटी तुसिओ स्वर्गा थऊँ ना दिती, पर सो मेरा पिता ही हा जैडा स्वर्गा थऊँ तुसिओ सच्ची रोटी दिन्दा। 33क्ओकि प्रमात्मां री रोटी सो हा जैड़ी स्वर्गा थऊँ ओसदी हा, अतै ऐस संसारा जो जिन्दगी दिन्दी हा।”
34ता तियैं यीशु सितै बल्लू, “हे प्रभु, ऐह रोटी असिओ सदा दिच्छु कर।”
35यीशुऐ तियां सोगी बल्लू, “जिन्दगी री रोटी अऊँ हा; जैडा मिन्जो बलै इन्दा सो कदी भी भूखा ना रैहन्दा, अतै जैडा मिन्जो पुर विस्वास करदा सो कदी भी त्रिहणा ना रैहन्दा। 36पर मैंई तुसिओ बलुरा थू कि तुहै मिन्जो हेरी लैऊरा हा पर फिरी भी विस्वास ना करदै। 37सो सब जैडा पिता मिन्जो दिन्दा मिन्जो बलै ईन्दा, अतै जैस कसी मिन्जो बलै ईणा तैस जो मुँ सदा अप्पू बलै रखणा। 38क्ओकि अऊँ अपणी ना पर अपणै भैजणै बाळै री मर्जी पूरी करनै तांयें स्वर्गा थऊँ छूरा। 39अतै मेरै भैजणै बाळै री मर्जी ऐह हा कि जैडा कुछ तिनी मिन्जो दितुरा, तैत थऊँ कुछ भी ना गुवाऊँ, पर तैतिओ आखरी दिन मन्ज फिरी जिआऊ। 40क्ओकि मेरै पिता री ऐह मर्जी हा कि जैडा कोई पुत्रा जो हेरला अतै तैस पुर विस्वास करला, सो अनन्त जिन्दगी पा अतै अऊँ आखरी दिन फिरी जीयाऊ।”
41ऐह हुणी करी यहूदी बैंहसणा लगी पै क्ओकि तिनी बल्लू थू कि, “जैड़ी रोटी स्वर्गा थऊँ छुरी हा सो, अऊँ हा।” 42अतै सो मणु कणैणा लगै “कै ऐह यूसुफ रा पुत्र यीशु निय्आ, जसेरै माता-पिता जो अहै जाणदै हिन? अबै ऐह कियां बलदा कि अऊँ स्वर्गा थऊँ छूरा?”
43यीशुऐ तियां जो जवाव दिता, “अप्पू मन्ज मत बैंहसा। 44मिन्जो बलै मेरै पितै री मर्जी रै बगैर कोई ना ईच्ची सकदा जिनी मिन्जो भैजुरा तैसिओ खिन्जी ना लेय्आ; अतै मुँ सो अन्त रै टैमैं फिरी जी उठाणा। 45भविष्यवक्ता रै पवित्रग्रन्था मन्ज ऐह लिखुरा, ‘सो सब प्रमात्मैं री तरफा थऊँ सिखाऊरै भूणै।’ सो हरेक जिनी पिता थऊँ हुणुरा अतै सिखुरा सो मिन्जो बलै इन्दा हा।#यशा. 54:13. 46ऐह गल्ल निय्आ कि कुणकी पितै जो हेरूरा; पर जैडा प्रमात्मां री तरफा थऊँ हा सिर्फ तिनी ही पितै जो हेरूरा। 47अऊँ तूसु सोगी सच बलदा जैडा कोई विस्वास करदा, अनन्त जिन्दगी तसेरी ही हा। 48जिन्दगी री रोटी अऊँ हा। 49तून्दै स्याणैं बणा मन्ज मन्ना खाऊँ अतै मरी गै। 50ऐह सो रोटी हा जैड़ी स्वर्गा थऊँ ओसुरी हा, ताकि मणु ऐत थऊँ खा अतै सो ना मरा। 51जिन्दगी री रोटी जैड़ी स्वर्गा थऊँ ओसुरी हा, सो अऊँ हा। अगर कोई ऐसा रोटी थऊँ खान्दा, ता तैस सदा जिन्दै रैहणा; अतै जैड़ी रोटी मुँ संसारा जो जिणै तांयें दिणी हा सो मेरा मांस हा।”
52ऐसा गल्ला पुर यहूदी अप्पू मन्ज बैंहसणा लगै कि, “ऐह मणु अपणा मांस खाणै जो कियां दि सकदा?”
53यीशुऐ तियां जो बल्लू, “अऊँ तूसु सोगी सच-सच बलदा कि, जैहणै तक तुहै मणु रै पुत्रा रै मांस जो खान, अतै तसेरै खूना ना पिन तैहणै तक तूसु मन्ज अनन्त जिन्दगी निया। 54जैडा मेरा मांस खान्दा अतै खून पिन्दा अनन्त जिन्दगी तसेरी ही हा; अतै आखरी टैमां मन्ज मुँ तैसिओ फिरी जिन्दा करी दिणा। 55क्ओकि मेरा मांस ता सच मन्ज ही खाणा हा अतै मेरा खून सच्ची पीणै री चिज हा। 56जैडा मेरा मांस खान्दा अतै खूना पिन्दा, सो मिन्जो मन्ज बणी रैहन्दा, अतै अऊँ तैस मन्ज। 57जियां जिन्दै पितै मिन्जो भैजुरा, अतै अऊँ पितै री वजह थऊँ जिन्दा हा, तैस ही तरह जैडा मिन्जो खान्दा मेरी वजह थऊँ जिन्दा रैहणा। 58ऐह ही सो रोटी हा जैड़ी स्वर्गा थऊँ ओसुरी हा, ना कि सो जैड़ी स्याणैं खाई अतै मरी गै; ऐसा रोटी जैडा खान्दा तैस सदा जिन्दै रैहणा।” 59तिनी ऐह सब गल्ला कफरनहूम रै अक्की यहूदी रै सभागार मन्ज शिक्षा दिन्दै टैमैं कणैई।
सदा काल रै जिन्दगी रै बचन
60तसेरै चेलै मन्ज कईये जैहणै ईयां हुणु ता सो कणैणा लगै, “ऐह ता अक्क सख्त बोल हा; ईयां कुण हुणी सकदा?”
61यीशु जो पता लगी गो कि तसेरै चेलै कहा गल्ला पुर बैंहसु करदै हिन, तियां सोगी बल्लू, “कै तुसिओ ऐह गल्ल मिन्जो पुर विस्वास करनै जो रोकदी हा? 62अगर तुहै मणु रै पुत्रा जो स्वर्ग गान्दै हेरन जैड़ी सो पैहलै थू, ता तुहै कै करलै?#भज. 47:5. 63प्रमात्मां री आत्मा ही हा जैड़ी जिन्दगी दिन्दी हा, शरीरिक जोर थऊँ कुछ भी फायदा निय्आ। जैड़ै बचन मैंई तूसु सोगी बलै सो आत्मा अतै जिन्दगी हिन। 64पर तूसु मन्ज कुछ ऐसै हिन जैडा विस्वास ना करदै।” क्ओकि यीशु शुरू थऊँ जाणदा थू कि विस्वास ना करनै बाळै कुण हिन, अतै सो कुण हा जैस तैसिओ पकड़वाणा भी हा। 65यीशुऐ बल्लू, “ठेरैतांये मैंई तुसिओ बल्लू कि कोई मिन्जो बलै तैहणै तक ना ईच्ची सकदा, जैहणै तक तैसिओ पितै री तरफ थऊँ वरदान ना भोआ।”
पतरस रा विस्वास
66ईयां गल्ला रा परिणाम ऐह भुआ कि तसेरै चेलै थऊँ मतै चेलै उलटै पैरै फिरी गै अतै फिरी तैस सोगी ना चलै।
67ता यीशुऐ तियां बारह चेलै सितै बल्लू, “कै तुहै भी चली गाणा चाहन्दै?”
68शमौन पतरसै तैसिओ जवाव दिता, “हे प्रभु अहै कस वलै गान? अनन्त जिन्दगी रै बचन ता तिजो बलै हिन। 69अहै तिजो पुर विस्वास करू हा अतै जाणी लैऊ हा कि तू ही प्रमात्मैं रा पवित्र पुत्र हा।” 70यीशुऐ तियां जो जवाव दिता, “मैंई अप्पू ही तूसु बारह चेलै जो चुणुरा, ता फिरी भी तूसु मन्ज अक्क शैतान रै वशा मन्ज हा।” 71तसेरा कणैणै रा मतलब शमौन इस्करियोती रै पुत्र यहूदा इस्करियोती रै बारै मन्ज थू, क्ओकि तियां बारह चेलै मन्ज अक्क सो ही तैसिओ पकड़वाणै बाळा थू।
S'ha seleccionat:
यूहन्ना 6: GBKNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
This work is licensed under Creative Commons Attribution-ShareAlike 4.0 License.