शधाणूं 13
13
बरनबास और शाऊल छ़ाडणैं
1सिरीया लाक्के अन्ताकिया नगरीए विश्वासीए मंडल़ी दी तै परमेशरे कई गूर और शिक्षा दैणैं आल़ै, मतलब-बरनबास और शमौन ज़हा लै निगर बोला; और लुकियुस कुरेन नगरी का आसा त, चौथाई देशे राज़ै हेरोदेस राज़ैओ दुधभाई मनाहेम और शाऊल। 2ज़ांऊं तिंयां ब्रता डाही करै प्रभूए भगती करदै तै लागै दै, ता पबित्र आत्मां बोलअ, “मुल्है करा बरनबास और शाऊला मेरै तेऊ कामां लै ज़ुदै ज़ेता लै मंऐं तिंयां शादै दै आसा।”
3तेखअ डाहै तिन्नैं ब्रत और प्राथणां करी करै तिन्नां दी हाथ और तिंयां किऐ बिदा।
खुशीए समादा खोज़णा लै पल़सीए पैहली हांढ
4तिंयां छ़ाडै पबित्र आत्मां सलुकिआ नगरी ज़िधी ज़हाज़ो आडअ आसा त और तिधा का ज़हाज़ा दी बेशी करै नाठै तिंयां कुप्रास टापू लै। 5सालामिस नगरी पुजी करै खोज़अ परमेशरो बैण यहूदी लोगे आराधना कोठी दी और युहन्ना मरकुस त तिन्नों सेऊआ-च़ाकरी करदअ।
6तेऊ सारै टापू फेर फिरी पुजै तिंयां पाफुस नगरी। तिधी भेटअ तिन्नां बार ईशू नांओं एक यहूदी ज़ादू करदअ और सह आसा त झ़ुठअ गूर। 7सह आसा त सिरगिउस पल़सी सुबैदारा संघा, ज़ुंण समझ़कार मणछ त; और सह च़ाहा त बरनबास और शाऊला आप्पू सेटा शादी करै परमेशरो बैण शुणनअ। 8पर इलिमास ज़ादू करनै आल़ै, किल्हैकि अह आसा तेऊए नांओं मतलब तेऊ किअ बरोध और तेऊ की बडी भारी कोशिश कि हाकम ईशू दी विश्वास नां करी सके।
9तेखअ शाऊलै, ज़सरअ नांअ पल़सी बी आसा, पबित्र आत्मां करै भर्हुई तेऊ लै कोहरअ भाल़ी करै बोलअ, 10“तूह आसा राख्सा पिछ़ू नाठअ द और तूह आसा हर भली गल्लो दुशमण! तूह बोला हर बगत लोगा का झ़ुठअ और तिन्नां लै करा तूह कई बूरै काम। ज़ुंण तूह इहअ बोला कि प्रभू परमेशरे बारै ईंयां गल्ला निं सच्च़ी आथी एही झ़ुठी गल्ला पाआ लोगा का खोज़णें छ़ाड़। 11परमेशरै लाई ताल्है ऐबै सज़ा दैई! और तूह रहणअ थोल़ै धैल़ै कांणअ और ताखा निं सुरज़ शुझणअ।”
तेखअ हुई तेभी तेऊए आछी कांणी और तेऊ का शुझुअ न्हैरअ और सह लागअ ओर्ही-पोर्ही ठणाखदअ कि तेऊओ कुंण हाथ ढाके।
12तेखअ सुबैदार हुअ प्रभूए शिक्षा शूणीं रहैन और ज़ुंण तिधी हुअ त तेता भाल़ी करै किअ तेऊ प्रभू दी विश्वास।
पिसदिया लाक्के अन्ताकिया दी
13पल़सी और तेऊए साथी पाफुस नगरी का ज़हाज़ खोल्ही करै पुजै पंफूलिआ लाक्कै पिरगा नगरी और युहन्ना नाठअ तिन्नां छ़ाडी करै येरुशलेम नगरी लै बापस फिरी। 14पिरगा नगरी का आजू डेऊई करै पुजै तिंयां पिसदिया लाक्के अन्ताकिया नगरी।
बशैघे धैल़ी बेठै तिंयां आराधना कोठी दी डेऊई। 15परमेशरे बधान और परमेशरे गूरे कताबा पहल़णैं बाद बोलअ तिधी आराधना कोठीए कारदारै तिन्नां लै, “भाईओ, ज़ै लोगा लै शिक्षा दैणा लै थारै मनैं किज़ै आसा तै बोला।”
16तेखअ बोलअ पल़सी खल़ै उझ़ुई करै हाथा करै शारअ करी करै, “हे इस्राएली लोगो और परमेशरा का डरनै आल़ैओ, शूणां।
17“इना इस्राएली लोगे परमेशरै छ़ांटै म्हारै पित्तर और ज़धू ईंयां मिसर देशै परदेसी हई करै रहा तै, ता तिन्नें की बडी भारी बढोतरी; और आपणीं तागती आल़ी बाहा करै आणै तिधा का छ़ड़ैऊई। (लुआह 6:1; 12:51) 18च़ाल़्ही साला तैणीं रह सह तिन्नें बणैं ज़िरदअ लागी। (लुआह 16:35; गणांई 14:34; बधान 1:31)
19“कनान देशै साता ज़ातीओ बरैबाद करी करै तिन्नों देश कोई 450 साला लै दैनअ इना लै रहणा लै। (बधान 7:1; यहोशू 14:1)
20“तेखअ बणांऐं परमेशरे शमूएल गूरा तैणीं न्यायी। (न्यायियों 2:16; 1 शमूएल 2:16)
21“तेखअ मांगअ तिन्नैं एक राज़अ। परमेशरै दैनअ च़ाल़्ही साला तैणीं बिन्यामीने गोत्रा का तिन्नां लै एक मणछ किशूओ शोहरू शाऊल तिन्नां लै राज़अ बणांईं। (1 शमूएल 8:5,19; 10:20-21,24; 11:15)
22“तेखअ किअ सह दूर और तेऊ बाद बणांअ दाबेद राज़अ, ज़सरै बारै परमेशरै इहअ बोलअ, ‘यिशैओ शोहरू दाबेद आसा मेरी आछी दी राज़अ तेऊए सोठ आसा तेही ज़ेही मेरी आसा। तेऊ करनी सोभै गल्ला तेही ज़िहअ हुंह च़ाहा।’ (1 शमूएल 13:14; 16:12-13; भज़न 89:20; याशायाह 44:28)
23“राज़ै दाबेदे ई खांनदानी संघै आसा परमेशरै करार की दी और तेते साबै छ़ाडअ इस्राएली लोगा सेटा एक उद्धार दैणैं आल़अ, मतलब ईशू मसीहा। (2 शमूएल 7:12-13; याशायाह 11:1)
24“मसीहा एछणैं का पैहलै किअ युहन्ना सोभी इस्राएली लै मना बदल़णें डुबकी लणेंओ प्रच़ार। 25ज़ांऊं युहन्ना आपणैं तेऊ कामां पूरै करनै आल़अ त ज़ुंण परमेशरै तेऊ का सभाल़अ त, ता तेऊ बोलअ इहअ, ‘तम्हैं मुंह किज़ै समझ़ा? हुंह निं मसीहा आथी! हेरा, ज़ुंण मुंह बाद एछणैं आल़अ आसा, सह आसा सोभी का महान और इधी तैणीं कि हुंह निं तेऊ सेटा एता जोगी बी आथी कि हुंह तेऊए पोलल़ै खोल्हणैं च़ाकरी करनै आल़अ टैहलू बणीं सकूं।’
26“भाईओ, तम्हैं ज़ुंण आजू आबरामे लुआद आसा और ज़ुंण तम्हैं परमेशरा का डरा, तम्हां सेटा आसा हेरअ द सह उद्धार दैणैं आल़अ बैण पजैल़ी। 27येरुशलेम नगरी दी रहणैं आल़ै और मुखियै निं सह बछ़ैणअ, और परमेशरे गूरै बोली दी गल्ला निं समझ़ी ज़ुंण तिंयां हर बशैघे धैल़ै पहल़ा। इहअ करै की तिंयां गल्ला तेऊ लै दोश लाई पूरी। 28तिन्नां निं मारनै जोगी तेऊ दी किछ़ै दोश भेटअ, तैबी की तिन्नैं राजपाल पिलातुसा का अरज़ कि एऊ पाआ मारी।
29“ज़ांऊं तिन्नैं तेऊए बारै लिखी दी गल्ला पूरी की, ता सह डाहअ तिन्नैं क्रूसा का थुआल़ी घोरी दी बंद करी। 30पर परमेशरै किअ सह मरी करै भी ज़िऊंदअ। 31सह रहअ तिन्नां आपणैं च़ेल्लै संघै खास्सै धैल़ै तैणीं खांदअ-पिंदअ और शुझदअ लागी ज़ुंण गलील लाक्कै का तेऊ संघै तै येरुशलेम नगरी आऐ दै; ज़ुंणी ईंयां गल्ला आपणीं आछी भाल़ी तिंयां आसा ऐबै लोगा का इना गल्ला खोज़दै लागै दै।
32“हाम्हैं आसा एभै परमेशरे खुशीए समादा खोज़दै लागै दै ज़ेते करार परमेशरै म्हारै पित्तरा का आसा ती की दी। 33परमेशरै की प्रभू ईशू ज़िऊंदै करी करै सह ई करार म्हारी लुआदा लै पूरी, ज़िहअ भज़ने कताबा दी दुजै भज़ना दी मसीहे बारै आसा लिखअ द, (भज़न 2:7)
‘तूह आसा मेरअ शोहरू
आझ़ दैनअ मंऐं ताल्है ज़ल्म।’
34“परमेशरै किअ मसीहा मरी करै ज़िऊंदअ और सह निं तेऊ भी कधि मरनै दैंदअ। परमेशरै आसा म्हारै पित्तरा का इहअ बोलअ द, (याशायाह 55:3)
‘मुंह दैणीं तम्हां लै सोभ भली गल्ला और बर्गत
ज़ुंण मंऐं दाबेद राज़ै संघै करार की ती।’
35“तैही आसा तेऊ एकी होरी भज़ना दी बी मसीहे बारै बोलअ द, ‘ताह निं आपणैं पबित्र मणछे देही चिजणैं दैणअ।’ (भज़न 16:10)
36“दाबेद राज़ै किअ तिहअ ई ज़ेही परमेशरे मरज़ी ती। मरी करै डाही तेऊए देही घोरी दाबी और ज़िहै तेऊए पित्तर दाबै और तेऊए देही बी चिजी। भज़ना दी ईंयां गल्ला दाबेद राज़ै आपणैं बारै ता बोली निं आथी। (न्यायियों 2:10; 1 राज़ा 2:10) 37पर ईशू ज़ुंण परमेशरै मरी करै ज़िऊंदअ किअ तेऊए देही निं चिजी आथी।
38“तैहीता भाईओ, एसा गल्ला लऐ तम्हैं समझ़ी! एऊ ई करै भेटा तम्हां पाप माफ हणैंओ खुशीओ समाद। 39ज़हा गल्ला करै मुसा गूरे बधाना करै नर्दोश निं हई सकदै तै। तिन्नां सोभी का हआ ईशू दी विश्वास करनै आल़अ मणछ धर्मीं।
40“तैही रहा चतैन, इहअ निं हआ कि ज़ुंण परमेशरे गूरे कताबा दी आसा बोलअ द कि तेऊ तिन्नां लै किज़ै करनअ सह तम्हां लै बी होए, (हबक्कूक 1:5)
41‘हे निंदा करनै आल़ैओ,
भाल़ा, और झशकिआ और मरा।
किल्हैकि मुंह करनअ थारै धैल़ै एक काम,
इहअ काम कि, ज़ै तम्हैं तेते च़रच़ा शुणें,
ता तम्हैं निं कधि तेतो भरोस्सअ करनअ।’”
42ज़ांऊं पल़सी और बरनबास यहूदी सभा का बागै निखल़ै ता लोग लागै एही अरज़ करदै कि आगलै बशैघे धैल़ै खोज़ै हाम्हां का इना गल्ला भी। 43ज़ांऊं आराधना सभा उझ़ुई ता यहूदी और यहूदी पक्षा दी आऐ दै भगता मांझ़ै हुऐ कई बरनबास और पल़सी पिछ़ू। तिन्नैं समझ़ाऊऐ इहअ बोली करै कि परमेशरे जशा दी रहा बणीं।
पल़सीओ होरी ज़ाती मांझ़ै प्रच़ार शुरू करनअ
44आगलै हबतै बशैघे धैल़ी हुऐ नगरीए सोभ लोग परमेशरे बैणा शूणैं कठा। 45पर यहूदी मुखियै मनैं हुई तिन्नां खास्सै लोगे छ़ुंडा भाल़ी ज़ल़ण और तिंयां लागै निंदा करदै और पल़सीए खलाफ बोलदै।
46तेखअ बोलअ पल़सी और बरनबासै नडरै हई करै, “अह त ज़रूरी कि परमेशरो बैण खोज़णअ पैहलै तम्हां का। पर ज़ै तम्हैं तेता नांईं मना और आपणैं आप सदा रहणैं आल़ी ज़िन्दगी जोगी नांईं बणां, ता हेरा, हाम्हां डेऊणअ तम्हां छ़ाडी होरी ज़ाती बाखा लै ज़ुंण यहूदी निं आथी। 47किल्हैकि प्रभू आसा दैनअ द हाम्हां लै अह हुकम, (याशायाह 49:6)
‘मंऐं आसा तूह होरी ज़ाती लै प्रैशअ बणांअ द,
ताकि तूह पृथूई दी हर ज़ैगा उद्धार दैणैं आल़अ दूआर होए।’”
48इहअ शूणीं करै हुऐ होरी ज़ातीए लोग खुशी ज़ुंण यहूदी नांईं तै आथी, और तिंयां लागै परमेशरे बैणे बड़ाई करदै और ज़ेतरै सदा रहणैं आल़ी ज़िन्दगी लै छ़ांटै तै तिन्नैं किअ सोभी विश्वास। 49तेखअ लागअ प्रभूओ बैण सारै देशै कई ज़ैगा पुजदअ।
50पर यहूदी लोगा मांझ़ै भली भगत बेटल़ी, भगत और नगरीए बडै लोगा लै दैनी कई एही च़ुघ कि ईंयां लोग निं ठीक आथी और पल़सी और बरनबास काढै उपद्रभ करी करै तेऊ लाक्कै का बागै।
51तेखअ नाठै तिंयां तिन्नें सम्हनै खूरा का धूल़अ ठुल़्हकी करै इकुनिम नगरी लै 52प्रभूए च़ेल्लै रहै नंद और पबित्र आत्मां करै भरपूर हंदै लागी।
S'ha seleccionat:
शधाणूं 13: OSJNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
This work is licensed under Creative Commons Attribution-ShareAlike 4.0 License.