लुका 14
14
फरीसी लोगे घरै ईशू
1तेखअ बेठअ ईशू बशैघे धैल़ी फरीसी लोगे कसा एकी मुखिये घरै रोटी खांदअ और तिंयां तै ईशू मारना लै ताखुऐ दै। 2तेखअ आअ एक मणछ ईशू सेटा, तेऊए हाथ खूर तै शुंआंऐं दै। 3एता भाल़ी ईशू शास्त्री और फरीसी लै बोलअ, “बधाने साबै एऊ मणछे बमारी बशैघे धैल़ी ठीक करनी राम्बल़ी गल्ल आसा कि माल़ी गल्ल?” पर तिंयां रहै च़ुप्पी।
4तेखअ लाअ ईशू तेऊ बमारा मणछा लै हाथ और सह हुअ राम्बल़अ और तेऊ दैनअ डेऊणैं। 5तेखअ बोलअ ईशू तिन्नां लै, “तम्हां मांझ़ै इहअ कुंण आसा ज़सरै गाभू या बाछ़ू कुंऐं दी पल़े और बशैघे धैल़ी सह बागा लै तेभी नांईं काढे?” 6तिंयां निं एसा गल्लो ज़बाब दैई सकै।
मानदारी और पाहुंणैंओ अदर
7ज़ांऊं ईशू भाल़अ कि छ़ांदै करी शादै दै लोग किल्है च़ाहा छ़ांटी करै बडी ज़ैगा दी बेशणअ, ता ईशू खोज़ी तिन्नां का एक कथ्या, 8“ज़ेभै तम्हां कुंण बैहे धामा लै शादे, ता बडी ज़ैगा निं बेशणअ इहअ निं हआ कि तेऊ होए तम्हां का बी बडै मणछा लै छ़ांदअ किअ द। 9तेखअ ज़ुंणी ताल्है और तेऊ बडै मणछा दुही लै आसा छ़ांदअ किअ द; ज़ै सह इहअ बोले कि एसा ज़ैगा दै एऊ लै बेशणा लै और तेभै लागणअ ता शर्मिंदै हई करै सोभी का होछ़ी ज़ैगा दी बेशणअ।
10 “पर ज़ेभै ताह शादे, तेभै बेश सोभी का होछ़ी ज़ैगा दी, ताकि सह ज़ुंणी ताल्है छ़ांदअ आसा किअ द, सह आप्पै इहअ बोले कि हे साथी, इधी बेश बडी ज़ैगा तेभै हणीं तिन्नां होरी मांझ़ै तेरी बड़ाई। (सैणीं गल्ला 25:6-7) 11ज़ुंण बी आप्पू बडअ समझ़े, सह करनअ होछ़अ और ज़ुंण आप्पू होछ़अ समझ़े, सह करनअ बडअ।”
12तेखअ तेऊ फरीसी मणछा लै बोलअ ईशू ज़ुंणी ईशू आपणैं घरा लै त शादअ द, “ज़ेभै तूह कलारी या बैल़ी खाए, तेभै निं तूह आपणैं बडै टबरा साथी भाई या नेल़ रहणैं आल़ै सेठा शधाणूं लागी, इहअ निं हआ कि तिंयां बी ताल्है छ़ांदअ करे और तिंयां लऐ तेतो बदल़अ। 13पर ज़ेभै तूह रोटी खाए, तेभै शादै गरीब, लाट्टै, कांणै और टुंडै। 14परमेशरा दैणीं ताल्है बर्गत, किल्हैकि तिन्नां का निं ताल्है बदल़ै लणा लै किछ़ै आथी। पर ज़ेभै धर्मीं मणछ ज़िऊई उझ़णै, तेभै भेटणअ ताह एतो हेस्सअ।”
बडी धामा खाणें बारै कथ्या
(मत्ती 22:1-10)
15ईशू संघै घेहल़ी बेठै दै एकी ज़ण्हैं इना गल्ला शूणीं करै ईशू का बोलअ, “परमेशर हआ तेऊ मणछा लै खुश ज़ुंण परमेशरे राज़ा दी रोटी खाए।” 16ईशू बोलअ तेऊ लै, “एकी मणछै दैनअ बडअ भोज़ और तेऊ शादै बडै भारी लोग। 17ज़ांऊं धाम खाणां लै तैर गई हई ता तेऊ दैनअ आपणैं टैहलू का सोभी लै छ़ांदअ कि ‘एछा, धाम गई तैर हई।’
18 “पर तिन्नैं निं तेसा गल्ले परबाह की। तिन्नां मांझ़ै बोलअ एकी इहअ, ‘मंऐं आसा लअ द एक खेच मोलै, ता मुंह लागा तेते हेर सभाल़ करनी ज़रूरी। हुंह निं तै एछी सकदअ!’
19 “दुजै बोलअ इहअ, ‘मंऐं आसा पांज़ ज़ोल़ी बल्द लऐ दै, और आझ़ आसा मंऐं लाऐ दै तिंयां खेचै ज़ुंडी? इहअ करै मुल्है छ़ाड माफी, हुंह निं एछी सकदअ।’ 20तेखअ बोलअ एकी होरी इहअ, ‘मंऐं आसा एभै बैह किअ द और हुंह निं एछी सकदअ।’
21 “बापस फिरी खोज़ी तेऊ टैहलू ईंयां सारी गल्ला आपणैं मालक का। तेखअ आई घरे मालक रोशै और तेऊ आपणैं टैहलू लै बोलअ, ‘नगरीए बज़ारै डेऊ हर ज़ैगा संघा आण गरीब, लाट्टै-टुंडै और कांणै टाट्टै इधा लै शादी।’
22 “तेऊ टैहलू बोलअ आपणैं मालका का भी इहअ, ‘हे मालक, ज़िहअ तंऐं बोलअ त मंऐं किअ तिहअ ई। पर अज़ी बी आसा ज़ैगा रित्ती।’ 23मालकै बोलअ टैहलू लै, बाता ‘हांढदै और ओरी-पोरी डेऊई करै आण लोगा ज़ोरा-ज़ोरी बी शादी मेरअ घर लोल़ी भर्हुअ। 24किल्हैकि हुंह बोला ताखा इहअ कि ज़हा लै छ़ांदअ किअ त तिन्नां मांझ़ै निं मुंह लोल़ी एक बी धामा खांदअ बेठअ।’”
च़ेल्लै हणैंओ मोल
(मत्ती 10:37,38)
25ईशू पिछ़ू तै बडै भारी खास्सै लोग लागै दै हांढदै। ईशू बोलअ पिछ़ू फिरी करै तिन्नां लोगा लै, 26“ज़ै कुंण मुंह सेटा लै एछे, सह आपणैं आम्मां-बाप्पू, बेटल़ी माठै, भाई बैहण, इधी तैणीं कि आपणैं प्राणा लै बी मुखा खास्सी झ़ूरी करे, तै निं सह मेरअ च़ेल्लअ बणीं सकदअ। (मत्ती 10:37; युहन्ना 12:25; बधान 33:9) 27ज़ुंण बी आपणअ क्रूस आप्पै च़की मुंह पिछ़ू एछे सह हणअ मेरअ च़ेल्लअ।
28 “तम्हां मांझ़ै इहअ कुंण आसा कि उछ़टी कोठी च़ाहा बणांणअ और पैहलै बेशी करै तेतो खर्च़अ नां ज़ोल़े कि एता हुंह पूरअ बी सका करी कि नांईं? 29किधी इहअ निं हआ कि आथरी लाई करै तेऊ च़िणीं निं सके और लोगा करनअ तेता भाल़ी करै सुहांग। 30तिन्नां बोल़णअ इहअ, ‘अह बणांदअ ता लागअ त पर बणांईं निं सकअ?’
31 “या इहअ कुंण राज़अ आसा कि दुजै राज़ै संघै जुधा करदअ ता नाठअ पर पैहलै बेशी करै इहअ बच़ार निं किअ कि ज़ुंण बिहा हज़ारा फौज़ी पाई करै मुंह संघै जुधा करना लै आअ, तेऊओ मकाबलअ हुंह इना दसा हज़ारा करै करी सका कि नांईं? 32नांईं ता दूरा ई का दूत छ़ाडी करै करनअ तेऊ संघै मेल़-ज़ोल़। 33ठीक इहअ ई तम्हां मांझ़ै ज़ुंण आपणीं संसारे सोभी गल्ला नांईं छ़ाडे सह निं मेरअ च़ेल्लअ हई सकदअ।
नसादअ लूंण
(मत्ती 5:13; मरकुस 9:50)
34 “लूंण आसा ठीक पर ज़ै लूंणो सुआद लूंणअ नांईं होए ता सह किज़ू करै करनअ लूंणअ? 35सह नां ता ज़िम्मीं लै और नां ता तेते खाद बणदी! तेखअ निं तेता ढेका शोटणै का सुआई किछ़ै काम रहंदअ। ज़ै तम्हैं एता समझ़णअ च़ाहा, तै दै एसा गल्ला दी धैन कि मंऐं एभै तम्हां का किज़ै बोलअ।”
S'ha seleccionat:
लुका 14: OSJNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
This work is licensed under Creative Commons Attribution-ShareAlike 4.0 License.