लूका 23
23
पिलातुसा रै सामनै यीशु
1तैबै सभा रै सारै लोका खड़ै हुऐ होर यीशु पिलातुस राज़पाल हागै नेऊ। 2ते लोक यीशु पैंधै दोष लादैं लागै, कि “ऐ मांहणु आसरै लोका बै बैहकाँदा लागा सा, होर रोमी सरकारा बै कर नी देणै री गैला केरा सा होर आपणै आपा बै मसीह होर राज़ा बोला सा।” 3तैबै पिलातुस राज़पाल यीशु न पुछ़ू, “तू कि आपणै आपा बै यहूदी रा राज़ा बोला सा?” यीशुऐ बोलू, “तुसै आपै ता बोलदै लागै सी।” 4ऐसा गैला पैंधै पिलातुसै मुख्यपुरोहिते होर राज़ै भीड़ा न खड़ै लोका बै बोलू, “हांऊँ ऐई मांहणु न कोई भी दोष नी हेरदा।” 5राज़ै री गैल शुणिया लोका बोलदै लागै, “कि गलील ज़िला न लेइया सारै यहूदिया प्रदेशा तैंईंयैं ज़ौखै बी ऐ मांहणु ज़ा सा तौखै ऐ लोका बै भड़काणै री शिक्षा देआ सा।” 6लोकै री गैला शुणिया पिलातुस राज़पाल पुछ़ू, “कि ऐ मांहणु गलीली सा?” 7ज़ैबै लोकै बोलू, ऐण्ढा शुणीऐ पिलातुस राज़पाल यीशु हेरोदेस राज़ै हागै भेज़ू किबैकि ऐ इलाका हेरोदेस राज़ै हागै ती ज़ुण तदीकाल यरूश्लेम शैहरा न रौहा ती।
हेरोदेसा रै सामनै यीशु
8यीशु बै हेरिया हेरोदेस राज़ा बोहू खुश हुआ किबैकि हेरोदेसै यीशु रै बारै न शुणु ती होर तेइरै चमत्कारा बै हेरनै री आशा रखा ती। 9हेरोदेस राज़ा यीशु न बोहू सारी गैला पुछ़दा रौहू पर यीशुऐ राज़ै बै कोई ज़वाब नी धिना। 10तैबै तेई बौगतै शास्त्रियै होर मुख्यपुरोहिते खड़ै होईया यीशु पैंधै दोष लांदै लागै। 11तैबै हेरोदेस राज़ा आपणै सपाई सैंघै मिलिया यीशु रा मज़ाक उड़ांदै लागा होर यीशु बड़ै च़ोगै लाइया वापस पिलातुस राज़पाल हागै भेज़ै। 12हेरोदेस राज़ा होर पिलातुस आपु न एकी दुज़ै रै दुश्मन ती तिन्हां ध्याड़ै न ते एकी-दुज़ै रै सैंघी बणै।
पिलातुस यीशु बै मौऊती री सज़ा शणा सा
13तैबै पिलातुसै, मुख्यपुरोहिते, यहूदी नेता होर सारै लोका शाधै, 14“पिलातुस राज़पाल तिन्हां सैभी बै बोलू, तुसै ऐई मांहणु बै लोका बै भड़काणु आल़ा बोला सी, पर मैं तुसा सामनै ऐईरी शोभली तैरहै जाँच केरी, होर मैं ऐईन ऐण्ढा कोई दोष नी हेरू। 15हेरोदेसै राज़ै भी ऐई मांहणु न कोई दोष नी हेरू तैबै ता तेइयै ऐ मांहणु आसा हागै भेज़ू, किबैकि ऐई मांहणुऐ ऐण्ढा किछ़ बी नी केरू कि ऐईबै मौउती री सज़ा मिलली। 16मूँ ऐ कोड़ै लाइया मारिया छ़ौड़ी देणा।” 17हर साल फसह रै त्यौहारा ध्याड़ी न पिलातुस राज़पाल बै एक कैदी छ़ौड़ना पौड़ा ती। 18तैबै सैभी लोकै मिलिया ज़ोरा सैंघै बोलू, “ऐई मांहणु बै मार, होर आसरी तैंईंयैं बरअब्बा बै छौड़।” 19बरअब्बा लड़ाई-झ़गड़ै होर लोहू केरनै रै इल्ज़ामा न कैद ती। 20पिलातुस राज़ा यीशु बै छौड़ न चाहा ती, होर तेइयै लोका भी समझाऐ। 21पर लेरा मारिया बोलदै लागै, कि “ऐई मांहणु बै क्रूसा पैंधै च़ढ़ा!” 22तैबै पिलातुस राज़पाल त्रीजी घेरै तिन्हां बै बोलू, “ऐई मांहणु कि जुल्म केरू सा, कि ऐईबै मौऊत री सज़ा मिलली, मूँ ऐ कोड़ै मारिया छ़ौड़ी देणा।” 23पर लोका होर भी लेरा मारिया बोलदै लागै कि ऐई मांहणु बै क्रूस दैआ, ऐईबै क्रूसा पैंधै च़ढ़ा। 24पिलातुस राज़पाल आदेश धिना कि ज़ैण्ढा ऐ लोक बोला सी, तैण्ढाऐ ऐई मांहणु सैंघै केरा। 25पिलातुस राज़पाल तिन्हरी इच्छै रै मुताबक बरअब्बा नाँ रा सौ डाकू छ़ौड़ू, होर यीशु तिन्हरै हवालै केरै।
यीशु बै क्रूसा पैंधै च़ढ़ा सी
26ज़ैबै ते यीशु बै नेंदै लागै ती, ता तिन्हैं शमौन नाँ रा एक कुरेनी मांहणु ज़ुण ग्राँ न ऐन्दा लागा ती ढौकु होर तेई पैंधै क्रूस लादिया यीशु पिछ़ै औंढणै बै बोलू। 27लोकै री बड़ी भीड़ तिन्हां पिछ़ै औंढदी लागी ती, ज़ुणीन बोहू सारी बेटड़ी यीशु री तैंईंयैं रौंदी लागी ती होर दु:ख केरदी लागी ती। 28यीशुऐ तिन्हां धिराबै बै हेरिया बोलू, “ओ यरूश्लेम शैहरा री बेटिओ, मेरी तैंईंयैं मता रोंदी; आपणै तैंईंयैं होर आपणै बच्च़ै री तैंईंयैं रोआ। 29किबैकि ऐण्ढै ध्याड़ै ऐन्दै लागै सी, ज़ैबै लोका बोलणा, ‘धन्य सी ते ज़ुणा बांढै सी, होर ते कोख ज़ुणियै बच्च़ै नी जौणै, होर ते माँई ज़ुणियै दुध नी प्याऊ।’
30 तेई बौगतै
‘लोका ढौगा बै बोलणा, आसा पैंधै औल़,
होर धारा बै बोलणा कि आसाबै खौट।’
31 “ज़ैबै लोका होरै बूटै सैंघै ऐण्ढा केरा सी ता सोच़ा तिन्हां शूकै बूटै सैंघै कि नी केरना।” 32यीशु सैंघै दुई होर मांहणु सपाईए नेणै लाऐदै ती किबैकि ते डाकू ती होर तिन्हां बै बी मौऊत री सज़ा हुई ती। 33ज़ैबै तै खोपड़ी नाँ री ज़ैगा पैंधै पुजै ता तिन्हैं ते दुऐ डाकू यीशु सैंघै एक दैहिणी धिरै होर दुज़ा बांऊँई धिरै क्रूसा पैंधै च़ढ़ाऐ। 34तैबै यीशुऐ बोलू, “ओ बापू जी, इन्हां लोका बै माफ केर, किबैकि ऐ नी ज़ाणदै कि एकी केरदै लागैदै सी?” होर तिन्हैं चिट्ठी पाईआ तेइरै झिकड़ै बोंडै।
35लोका खड़ै-खड़ै हेरदै लागै ती, होर तौखै खड़ै यहूदी नेतै यीशु रा मज़ाक उड़ांदै लागै होर बोलदै लागै, “ऐईयै होरा ता बच़ाऐ अगर ऐ परमेश्वरै भेज़ूदा मसीह सा होर परमेश्वरा रा चुनुआदा सा ता आपणै आपा बै भी बच़ाला।” 36सिपाहियै बी तिन्हरा ठठा केरू होर पीणै री तैंईंयैं कड़वा अँगूरा रा रस धिना। 37“अगर तू यहूदी रा राज़ा सा ता आपणै आपा बै बच़ा।” 38तिन्हैं यीशु रै क्रूसा पैंधै एक पौटी टाँगी, ज़ुणी पैंधै ऐ लिखु ती, “ऐ यहूदी रा राज़ा सा।”
39ज़ो डाकू यीशु सैंघै क्रूसा पैंधै लटकाऐ दै ती, तिन्हां न एकियै यीशु री निन्दा केरिया बोलू, “कि तू मसीह नी ऑथि? तू आपणै आपु बै होर आसाबै बच़ा!” 40ऐथा पैंधै दुज़ै तेई डाकुऐ पैहलै तेई डाकू बै बोलू, कि तू परमेश्वरा न नी डौरदा? तु बी ता ऐसा सज़ा पाँदा लागा सा। 41आसाबै ता आपणै अपराधै री सही सज़ा मिलदी लागी सा पर ऐई मांहणुऐ ता कोई बी अपराध नी केरूदा ऑथि। 42तैबै तेई डाकुऐ बोलू, “ओ यीशु ज़ैबै तुसै राज़ा सांही आपणै राज्य न ऐलै ता तैबै मुँभै बी याद केरेइत्।” 43यीशुऐ तेइबै बोलू, “हांऊँ तौभै सच़ बोला सा तौ औज़ मूँ सैंघै स्वर्ग लोका न हौंणा।”
यीशु मौरा सा
44तेई ध्याड़ै न बारा बाज़ै न लेइया त्रा बाज़ै तैंईंयैं सारै देशा न निहारै हुआ, 45सूरज़ा रा च़मकणा बन्द हुआ होर मन्दिरै रा पर्दा बीच़ा न च़िरूआ दुई टुकड़ै हुऐ। 46यीशुऐ ज़ोरा सैंघै बोलू, “ओ बापु ज़ी, हांऊँ आपणी आत्मा तुसरै हौथा न देआ सा।” होर ऐ बोलिया आपणै प्राण छ़ौड़ै। 47सूबैदारै ऐ सैभ किछ़ हेरिया परमेश्वरै री प्रशंसा केरी होर बोलू, “सच़िऐ ऐ मांहणु धर्मी ती।” 48ज़ो लोका क्रूसा री सज़ा हेरनै री तैंईंयैं कठा हुऐ ती ते ऐ हेरिया छाती पीटदै-पीटदै आपणै घौरा बै वापस नौठै। 49ते सैभ ज़ो यीशु बै जाँणा ती, होर ज़ो बेटड़ी गलील ज़िला न तेई सैंघै आई ती दूर खड़ै होईया ऐ सैभ हेरदी लागी ती।
यीशु बै कब्रा न रैखा सी
50तौखै यूसुफ नाँ रा एक मर्द ती सौ यहूदी महासभा रा एक सदस्य ती। सौ एक शोभला होर धर्मी मर्द ती। 51सौ धर्मगुरू होर राज़ै रै ऐई फैसलै न खुश नी ती ऑथि। सौ यहूदिया रै एकी शहर अरिमतियाह ग्राँ रा रौहणु आल़ा ती। सौ परमेश्वरै रै राज्य री गैला केरदा रौहा ती। 52तेइयै पिलातुसा राज़ै हागै ज़ाइआ यीशु री लाश मुँगी। 53तेइयै लाश क्रूसा पैंधै न उतारी होर च़ादरी न सौ लपेटी। होर सौ कब्रा न रैखी, ज़ो पात्थरा न कोती दी ती। तेसा कब्रा न पैहलै कोई निती रखू दा ती। 54सौ शुक्रवारा रा ध्याड़ा ती होर बशाँ रा ध्याड़ा शुरू हौणु आल़ा ती। 55ज़ैबै यीशु री लाश नेईणी लाई ती, तैबै तिन्हैं बेटड़ियै ज़ो गलीला न आई ती पिछ़ै-पिछ़ै ज़ाइआ सौ कब्र हेरी होर ऐ बी हेरू कि लाश कैण्ढै तैरहै रैखी ती। 56ते आपणै घौरा बै नौठी होर यीशु री लाशा पैंधै लाणै री तैंईंयैं कीमती खुशबूदार तेल त्यार केरू होर बशाँ रै ध्याड़ै ता हुक्मा रै मुताबक तिन्हैं कोई कोम नी केरू।
S'ha seleccionat:
लूका 23: KFX-NT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
This work is licensed under Creative Commons Attribution-ShareAlike 4.0 License.