Lucas 11
11
Ja Jesusi, sje'a sk'umajel ja Dyosi
(Mt 6:9-15; 7:7-11)
1Jun k'ak'u ja Jesusi, sle'a b'a oj waj sk'umuk ja Dyosi. Yajni ch'ak sk'umuki, june ja sneb'umani ti yala'a:
—Kajwal, je'aki'tikon jastal oj k'umuktikon ja Dyosi, ja jastal sje'a yi ja sneb'uman jumasa ja Juan it wax ya'a yi'jel ja'i, —xchiye.
2Ti yala ja Jesusi:
—Yajni oj ja k'umukex ja Dyosi, jach' oj a wal'ex jastal iti:
—Tat, spetsanile
a sna'e a b'aj yuj ja we'n ja Dyos meranili.
La', kechani we'n jmandaranuma kujtikona.
3A' ki'tikon ja jwa'eltikon
ja ya'ni.
4—Ch'ayaki'tikon ja multikoni,
Jach'ni ja ke'ntikoni,
spetsanil ja ma' wa
sk'u'lanki'tikon b'a mi sb'ejuki mix ka'tikon stup'e.
—Yajnix jak ja wokol jumasa,
Mok a wa' b'a ye'n oj ya jpilb'atikon a mok.
5Ti cho yala ja Jesusi:
—La kaltik, junuk ja we'nlexi, b'a nalan a'kwal oj waj b'a snaj junuk ja ma' mojan yi'oji, ti oj yala —Jmoj alijel, a jmajt'an oxuk wa wo'oti. 6Wantox jul jun kula b'a jnaji; —sok mi jas ki'oj b'a oj ka yab'i— 7La cho kaltik ja ma' waj k'umajuki, tik'a yala jachuka: —Aktayon mokxa jas a wal kab'i, jlutunexa ja jnaji, sok wa'ntikonxa wayel. Ja'yuj mixa oj b'ob' k'e ka eluk a wi ja jas waxa k'ana —oj k'a chi'uk b'a. 8Jaxa juni, ta mi k'ax waji, ti'ni k'a wa'n sk'anjela, ojni k'e ya' elyi spetsanil ja jas wa'n k'anjel yi'a, mi ja' ti sk'u'lan jachuk yuj ja lek wax yila sb'aje'i, miyuk, ja'yuj ja b'a mi oj ya' sb'aj sk'ixweli.
9—Ja'yuj wax kala wabyex ja iti: k'anawik yi ja Dyosi, ja ye'n ojni ya' wi'exa, k'umanik ja Dyosi, ojni a ta'ex ja jas wa'nex sle'jela, wan k'axa jama wa ti'exi ojni smaklayexa. 10Ja ma' wa sk'u'an ja Dyosi, wani sta' ja jas wa sk'ana'a, ja jas wa sle'a wani sta'a, ta wan k'ax k'umani, wanix maklaji'a.
11¿Jaxa we'nlexi, ta yuj k'a wa sk'ana wa wuntikilex jun chay oj ma a wa'wex yi jun b'its'il chan b'a? 12¿Ta wa sk'ana a wi'ex jun nolob' oj a ma a wa'wex yi jun tsek b'a? 13Ja we'nlexi jel malo'ex, pero wanixa na'awex b'a jas lek oj ja wa'wex yi wa wuntikilexi, ja'uktoma wa tatex tey b'a satk'inali, ojni ya'yi ja Yespiritu Santo ja ma' wax k'anji yi yuji.
Ja Jesús sok ja ma' niwan ya'tel yuj ja tantik pukuji
(Mt 12:22-30; Mr 3:20-27)
14Ja Jesusi, snutsu jun tan pukuj b'a jun winik yuj mix ya k'umanuk ajyi. Yajni el ja tan pukuj jawi, ti'xa och k'umanuk ja winiki.
Jaxa kristyano'i jel cham sk'ujole yuj ja jas k'u'lan ja Jesusi. 15Jasa ay chab' oxe ti yalawe'a: —Ja Jesusi, wax ya eluk ja tantik pukuj tey sok kristyano jumasa, yujni ja wax a'ji yip yuj ja tan Beelzebuj it ma' niwan ya'tel yuj ja tantik pukuj jumasa, ye'n wax a'ji yuj ja yip b'a oj sk'u'luki, xchiye.
16Jaxa tuk jumasa wa sle'awe jastal oj sta'e yi smul ja Jesusi. Ja'yuj ti yalwe yab' a'b'i sk'ul jun niwan milagro'a. 17Jaxa Jesusi, sna'a ja jas wa'n ek'el sk'ujol'e'i, ja'yuj ti yal yabye'a:
—B'a jun chonab' ta ye'n ita k'a oj och k'e'uke tiro'anel ja swinkil jumasa, ja chonab' jawi ojni ch'ay sna'jela. Jach'ni b'a jun na'its ta ye'n ita k'a oj och k'e'uke tiro'anel, ojni cho ch'ay sna'jele'a. 18Cho jach'ni ja tan pukuji, yuj k'a ye'n ita oj ochuke tiro'anel ojni sch'ay sna'jel ja jas wax yalawe'a. Jaxa we'nlexi waxa walawex ke ja ti wax b'ob' nuts ja tan pukuj yuj ye'n wax ya'a kipi. 19Jel lek ja jachukuk meran jastal jawi, ¿Ma' wax a'ji yi yipe yuj ja wa neb'uman we'nlex b'a oj snuts ja tan pukuj b'a? Yuj k'a waxa walawex kab' Dyos ja ma' wax a'ji yi'e yuj ja yipe'i, ja jachuki ti oj na'xuk yuj jomel a olom ja we'nlexi. 20Yuj k'a wax nutsu ja tan pukuj ja ke'n, ja'yuj ja yip ja Dyosi, ja ti wax na'xi yujni wa'nxa a'tel ja Dyos ja ili.
21—Jel wokol oj b'ob' elk'anan b'a snaj jun tsatsal winik b'a chapan lek. 22Pero ta ay ka otro jun winik mas ay yip ja ye'n, ojni sk'u'l ganara, oj ya elyi ja stujk'anub'i, oj ch'ak ya el yi spetsanil ja jastik sb'aji oj sk'ep sb'a sok ja smoj jumasa.
23—Jaxa we'nlexi, yuj k'a mi lek xa wilawex ja jas wax k'u'lani, yuj k'a jach' jastal jawi, yujni lek waxa wilawonexa. Ta yuj k'a mixa koltayonex b'a oj i'xuk jan ja tuk jumasa b'a oj jak snochoni, lajan sok kechan wa'nex sxiwtajel ele.
Ja tan pukuj it kumxi
(Mt 12:43-45)
24Yajni wax el ja tan pukuj b'a skwerpo jun kristyano, ti wax waj b'a jun chayan lugar wa sle'a b'a oj jijluka. Yajni mi sta'a b'a oj jijluki, ti wax yala'a: —Mas lek oj kumxukon ja b'a ajyiyoni, oj ochkon otro bwelta ja tiwi. 25Yajni wax k'oti, mesan lek wa sta'a ja snaji sok tojb'el lek. 26Ja'yuj ja ye'n wax waj sle' jan otro juke mas ja smoj jumasa, ja it jumasa yujni mas tsatse'a, spetsanile ti wax ch'ak ochuke ja b'a winik jawi, ti'xani wax kanye'a. —Jaxa ala winik jawi, jelxa tuk waji, ja ajyi lektoni ay t'unuka ja yajni kechanto jun tan pukuj tey sok ajyi.
¿Ma'chun sb'aj ja slekilal jumasa?
27Ti'to wa'n lo'il ja Jesús ja yajni k'ot jun ixuki, tsats lek awaji yuj:
—Jel lek oj yil ja ixuk ma' yalintaya sok ja ma' ya chu'nani—.
28Jaxa Jesusi, ti yala'a:
—Ja ma' mas lek oj yili ja ma' wa smakla ja yab'al ja Dyosi, sok wa sk'u'ani.
Jun niwan milagro
(Mt 12:38-42; Mr 8:12)
29Jitsan kristyano ochye mojan smaklajel ja jas wax yala ja Jesusi. Ja'yuj ti yal yabye'a:
—Ja we'nlexi, waxa k'anawex oj k'u'l jun milagro, b'a oj ja lo'layonex yuj ja mini t'un lekuk ja jastal ayexi sok mixa k'u'anex ja Dyosi. Kechan ja oj je'awi'ex ja jas ek' yuj ja Jonasi. 30Ja jas ek' yuj ja ye'ni, jun milagro je'a yi'ile ja swinkil ja chonab' Ninive, jachuk ja ke'n yuninon ja winiki, jun milagro wax yila ja kristyano ja ya'n k'ak'u.
31—Ja ixawalal b'a ko'el k'inali,#11:31 Ja yixawalil b'a ko'el k'inali: Ja wa sk'ana yal ja yixawalil ja niwan chonab' b'a Sabaji, ja chonab' iti, lajan sok tey b'a lado ko'el k'inal b'a chonab' Arabia. oj stul sb'aj ja k'ak'u oj sk'el ja Dyos ja b'a lek sok b'a mi leki, b'a oj ya'wex b'a sk'ab' ja Dyos b'a oj ya a tup wa mulexi. Ja ye'n najat lek jaki, b'a jak smakla ja jas jel tsamal sje'a ja mandaranum Salomoni, —Jaxa we'nlexi mixa k'ana oj ja maklayex ja jas wax je'a awi'exi, a'nima mas niwan wala iljiyon ja ke'n yuj ja Salomoni.
32—Ja k'ak'u oj sk'el ja Dyos b'a lek sok b'a mi lek b'a stik'anali, ja kristyano jumasa b'a chonab' Ninive oj ch'ak k'e'uke, mini jun sb'ej oj sta'ex ti' ja we'nlexi. Yuj ja kristyano jumasa jawi, sutxini meran ja sk'ujole ja yajni yabye ja jas wa'n yaljel ja Jonasi. —Jaxa we'nlexi a wabyex ja jas wax kala minix sutxi wa k'ujolexa, iday mas niwanon ja ke'n, yuj ja ye'n—.
Ijlab'ani ja skwerpo ja Jesusi
(Mt 5:15; 6:22-23)
Ti cho yala ja Jesusi:
33—Mi ma' oj ya ajluk jun kandil b'a oj snak'e cho mini b'a oj snuj sok jun kajon. Ja jachuki toj spakaxil: ti oj a'xuk b'a cha'an, b'a jach' oj yil k'inal spetsanil ja ma'tik oj och b'a na'itsi. 34Ja sat ja kristyano'i lajan sok jastal jun kandil wax ya' ijlab'an ja skwerpo. Ja'yuj ta tsamal k'a wa sje'a sb'aj ja kristyano'i, ja k'ak' jawi wanix a'ji sta' sak'anila. Kechan ta ja k'a wa'jel sk'ujol ja ilk'ujol sok ja stoyjel sb'aji, yujni tey yoj k'ik'inala, 35Ja'yuj talna lek a b'ajex mok a wa'wex tupuk ja k'ak' tey a mokexi. 36Yuj k'a spetsanil wa kwerpo'ex wa'n ijlab'aneli, mixani b'a xen k'ik'inal aya, ja'yuj ja b'a wa sak'anil we'nlexi chikan b'a ayex ek'a ojni ijlab'anuka, jach' jastal jun kandil wax ijlab'ani.
Jel wokol oj ek' a wujilex
(Mt 23:1-36; Mr 12:38-40; Lc 20:45-47)
37Yajni ch'ak k'umanuk ja Jesusi, ti lokji wa'el yuj jun fariseo'a. Yajni k'ot ja Jesús b'a snaj ja winik jawi, ti och kulan b'a mesa. 38Jaxa fariseo jawi, cham yab' ja yajni yila mi sak'a ja sk'ab ja Jesús ja yajni och wa'uki. 39Ti yala ja Jesusi:
—Ja we'nex fariseo jumasa, ja wa kwerpo'exi wanixa sak'awex leka, jaxa b'a wa wojolexi, mi ik'b'en sb'ej, mi ma'x b'ob' a koltayex sok ja swokoli, ja' jel wajel a k'ujolex ja elk'aneli. 40—Mi max jak a k'ujolex. Ja Dyosi, ye'n sk'u'lan wa kwerpo'exi cho ye'nani b'a yojoli. 41Ja sb'ej b'a tsamal oj ajyaniki, ja' oj ja k'ep a b'ajex sok wa jas a b'ajex ja ma' ajula sb'aji.
42—Jel wokol oj ek'uk a wujilex— Ja we'nlex yuj ja cham k'ujolxta ayex oj ja wa'wex yi b'a oj smajtanuk ja Dyos ja araweno, ja ruda, sok waxa wa'wex kan patikajel ja syajtajel wa mojexi, sb'ejni waxa wa'wex yi ja smajtan ja Dyosi, ja mas t'ilani ja mi oj ja wa'wex kan syajtajel wa mojexi.
43—Jel wokol oj ek'uk awujilex ja we'nlex fariseo jumasa, yuj ja yajni wala wajyex b'a snajtsil waxa tsomo b'ajexi, ja' mas jel gusto waxa wabyex ja jel niwan oj iljaniki, sok ja oj a'juk awi'ex dyosi.
44—Jel wokol oj ek'uk a wujilex— Ja we'nlexi ja lajanex sok ja sk'ejnal cham winik b'a mixa chikanuki, ti wa sb'atalan ja kristyano'i, mi wa sna'awe ta yuj ay jas ay.
45Ja'yuj jun je'uman ja mandar it a'ji yi ja Moisesi, ti yal yab' ja Jesusi:
—Je'uman, spetsanil ja jastal waxa wal yab' ja fariseo jumasa, lajan sok ke'n waxa wal kab'tikon.
46Ti yala ja Jesusi:
—Jachuk ja we'nlexi, jel wokol oj ek'uk a wujilex— Yuj ja jastal jel tsats sok jel wokol sk'u'lajel ja jas waxa walawexi, jaxa we'nlexi mini ja b'a jel ch'ini mixa tsatsal k'ujolan a b'ajex b'a oj ja k'u'lukex.
47—Jel wokol oj ek'uk a wujilex yuj ja waxa k'u'lanex cha'anil ts'akab' ton b'a ti'to oj ja na'ex ja aluman Dyos jumasa snajtsil ja sk'ejnal ja aluman Dyos jumasa, ma' ye'n ch'ak smile'i ja ma' ek' paxta awujilexi. 48Ja'yuj we'n wa'nex yiljel ja slekilal ja jas sk'u'luneje kan ja ma' ek' paxta'a ye'n smilawe ja aluman Dyos jumasa, jaxa we'nlexi we'n a tojb'esex ja scha'anil ts'akab' toni.
49—Ja'yuj ja Dyosi toj lek yala wabyex: —Ke'n oj jek a wi'ex aluman Dyos sok jekab'anum jumasa, jaxa we'nlexi ojni a mil'ex chab' oxe ja ye'nle'i, pilan ma' oj cho snuts b'a spetsanil ja chonab' jumasa. 50Ja'yuj we'nani a mulex ja jastal ch'ak chamuke ja aluman Dyos jumasa b'a slechanal ja lu'uma. 51Ti stuluyi masan jastal cham ja Abeli, ti waj ch'ak man jastal cham ja aluman Dyos Zacariasi, ja ye'n ti milji mojan b'a snajtsil tsomjel b'a wax tsikxi ja smajtan ja Dyosi, toj lek wax kala wabyex ojni a tup'ex, yuj ja jas a k'u'lanex yi ja ye'nle'i.
52—Jel wokol oj ek'uk a wujilex, ja we'nlex je'uman ja mandar it a'ji yi ja Moisesi— yuj ja waxa na'awex lek ja jas wa sk'ana yal ja sna'jel sb'aj ja Dyosi, mi jas waxa k'u'lanex yuj ja waxa na'awexi, cho mixa k'anawex ma' oj sna' pilan waxa timawex ja ma wa sk'ana oj sna' pilani.
53Jaxa ma'tik wa sje'a ja mandar it a'ji yi ja Moisesi, sok ja fariseo jumasa, yajni el ja Jesús b'a na'its jawi, snochowe' b'a wa sjob'talane yi jitsan lo'il, 54a'nima yuj ja smeranili, kechan ita wa'ne sle'jel jastal oj sta'e yi smul, ta yuj ay jas mi lek oj yale, b'a jach' oj sta'e jastal oj b'ob' syam'e'.
S'ha seleccionat:
Lucas 11: YABD
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México 2021