LUKA 24
24
Duunooda
(Mat 28:1-10; Mar 16:1-8; Yoh 20:1-10)
1Iimuchu eaweeda madeeda bea wiikajeanda, nea ghaghar gayeew, gaweay heeda bung'eeda, nea ghwaat geediga ng'andidi nisin. 2Hean sihita geadaah lagheaneedida nea sisheagiida ghuuta shoomanda bung'eeda, 3iidu nea gaweay jeeda shoomanda bung'eeda ea mwadaaha musta. 4Damani duu ghahamng'eanyi aba ng'asheanjiin, hean ghamiinaada fih iyeenya aba murdeenyaawa nea gookwa hang'weaka meeng'meeng'i; 5damanda duu ghang'uda muuwda nea ghwahiiy geat googeal iheenga nyaawa ng'eanyi, gwayeesha sih saawa, “Ghwasaan anda googaseadayi siida majeek aba jeeda fuga nimeewa? 6Oapkaada gidaghayi rukuneegwa, damanda duu gwandeewa Galilaya, 7gideaba, Orjeeda Siida gajeayiin geatinga fuga riing'eega, ak geengoor, ak gwaduudu eaweeteaba samwagu.” 8Hean geapkaat ng'asheagaaschi, 9biikna hooweani bea bung'eedean gaweay ghoadaw iita giinealangiga atamwanagiin ea buuneeda suurja. 10Nea Mariya Magdalena gil, ea Yoana ea Mariya gheamata Yakobo, ea gadeemga suurja gwachi mideawean suh fuga rukusa giijasoodiga iiteaba ng'asheesuun gil; 11gawuurji ng'asheesu aba heanyaawa duguuga mwadaagha, ak ghanyea meamwasa. 12Ak gawuurji ng'asheega nyaawa aba heanyaawa duguuga mwadaagha, nea ghanyea mamwasa. Ng'ata ghang'eat Betaro ak ghafwach ea ghwahita heeda bung'eeda, ak ghwahiiy geaw goong'weersa jeeda, ghwadaah weageakiga sibung'dean ak ghwahit; hean ghang'eat gawa nea ghahamng'eanyi aba ng'asheega bunu.
Beata Emau
(Mar 16:12-13)
13Eaweedida gaweay fih iyeenya aba jeenyaawa gharang'i siguura Emau, nea sheageewa Yerusalemu jea ghoahiita aseeta iyeenya hiteayda, 14gabalooleadawa iiteaba ng'asheegiga indeareedida bunuun. 15Aba damani balooleadawa nea goonyeari geadiin, gawa Yesu ea gwaneekiisa ak goodeayi. 16Geedukuta gheanyanga nyaawa ea mwanala siida was. 17Hean gwayeesha saawa, “Ng'asheespa naaha oobalooleadawi nea gooweayiin?” Ghamiinaada nea niikaroomnyi gheamamuunatka nyaawa. 18Ghwasha Siyagi aba jeenyaawa, siguura Gleopa ak gwayeesha, “Neada ang'iing'i guwoosi rabascheanda nea gibwaageaw aba Yerusalemu mwanala ng'asheega sisiin aba hiji askwearjoojisu?” 19Hean gwayeesha saawa, “Ng'asheespa naaha?” Geeyeesha niny, “Ng'asheega Yesuheeda Nasareti, ghayi was sibaneeda mideawa uurda sinooda ea baloolda aba madeeda ASEETA ea dea buuneesean, 20ea gidahaaktaayda ashoohoodigaasa hees ea fuga ahaaghwa ng'eanyiida ak ghoadayda eergweaksiina miyeeda, ak geengoor. 21Nea abeeda aseasa geararji gideaba niny siichea ghoaghu Israeli gil. Gilinuut gicha askweareani ea deaba samwagu aba ng'eeta ng'eada ng'asheesu. 22Gabiissa gwanda gadeem bea ng'eang'deanya gwachi nung' eabeala. Weay bung'eeda sakteayda duu 23ea mwadaaha mustaanyi; ak ghwahidu ak gwarugu gideaba niroonyi sea malaykajeanda eesha ea majeek. 24Eara fih suuk gicha gwachi sindeawi gaweay hoowa bea bung'eedean ak ghwadaakta gidagwachi rugu gadeemgiga; nea niny ea meadaaha.” 25Ng'ata gwayeesha saawa, “Ea fuga dasheahi, mideawa gurooruunatka hang'oonyi ak ea mamwasa eara ng'asheega ghayi rugu sibanga! 26Mamiisiina gideaba Gristo gayghwanyas sawanadeeda ama ng'ata gawa jeeda giigheambiitaanyi?” 27Hean ghoang'eada Musa ea sibanga sean, ak gwarukusa saawa ng'ooruutka sean bea ng'asheega badaydaanyi. 28Gaweay ea gwaneekiisa gharang'dida gwachi weayiin. Ak gwahinda geaw giligasa ghang'ata, 29hean geemearmearani nea geeyeesha, “Shinya eendeayeena, aba gideaba niisha aseeta ak ea nihidu eaweeda.” Hean gawa jeeda gheeda ak gwandeayi. 30Damandida mideayeewa aba agiischoodean gageanu mukaate ak gang'usha ak ghabwanach ak ghoadaw saawa. 31Ghwajaada gheanyanga nyaawa, deagu ghwanal gideaba niny, ama ng'ata gwarooda gheanyanga nyaawa. 32Goonyeari geat nea gwayeena, “Neada jeesingaasa ea mwayeadana beasta damandida gwachi abaloolaneasa aba naweedean, nea gang'acha iiteanya aba gidaghayi nyaah ng'ooruutka?” 33Ghang'eatng'eat damandida ak gabiikta Yerusalemu, ak ghwanyasa hoowa giika atamwanagiin nea gwandeawa giika eawoojisu mideaydooschiin, 34nea gwayi, “Huumwa gil niduudu Ng'utamiida, geabwada niihiimsa geaw Simon!” 35Hean ghoadayda iiteaba ng'asheegiga bussa aba naweedean, ea gida siyi bwak ea ghwanalda saawa gideaba niny damanda bwanaja mukaate.
Yesu gwaroonyi sea ginealangaaschi
(Mat 28:16-20; Mar 16:14-18; Yoh 20:19-23; Gad 1:6-8)
36Damani duu gwandeawa jeedeaba balooliin, ghamiinaada Yesu aba bugusta nyaawa. 37Ghahamng'eanyi ak ghabeal muuchi, nea ghaghay gili dea maloonghajeanda. 38Gwayeesha saawa, “Ghwasaan anda ning'udeagwa muuwda, ak ghwasaan anda goonyearayi geat ng'asheesu aba jeesingeagwa? 39Oong'weersiina geatingeasu ea geeshangeasu, gideaba aniini gil; oang'waanya eara saseedeanyu ak ghoadaayi; aba gideaba maloonghajeanda mandeawana saseeda ea geeka gawuurji gidoadaaktanaan ghamneawa.” 40Iidu nea ning'ata rukunoodeaba ng'asheesu goohiimsa geatingaaschi ea geeshangaaschi. 41Damani mii ghamwas aba hooseaneegean, nea ghahamng'eanyi nea gwayeesha saawa, “Goondeawi gichea ayaaga aba hiji?” 42Geataw banajaneeda ghweayeanda sibeash. 43Gageanu ak ghwaak aba madeanyaawa.
44Hean gwayeesha saawa, “Suh ng'asheegeasu ghayi earukuneegwa, damanda sindeaydooscheewi, ak abeeda ng'asheega aba badaydeanyu aba jeeda deaweedeeda Musa ea sibanga ea gitaabooda Nyiigheega gajeahiit.” 45Ng'ata ghwajaat fughareenga nyaawa ghwanal ng'ooruutka. 46Ak gwayeesha saawa, “Nih gidaghayi sing'waarda gil gideaba Gristo gayghwanyas hang'weanidooda ak gwaduuna miyeeda eaweeteaba samwagu, 47ea gideaba duukuunooda ea samsiinda riing'eega gajeerukwiida aba gheawungaaschi, aba jeeda eemoojiga sean, ghang'eada Yerusalemu. 48Nea agooga goowooschi mushoodigeaba ng'asheesu. 49Ang'ula, geayeaneegwa heeleeda Bwaabwa; asi oopiidana mujiineani ea eegooneegwa uurda leabu humng'eeda.”
Yesu geayaat humng'eeda
(Mar 16:19-20; Gad 1:9-11)
50Ghoadoabiiw ea ghoahiita ng'eanyiida Betaniya, ak gagatkat geatingaaschi ak gang'usha. 51Damani ng'ushiinean gooheeli geaw ak geetiing'da eayaat humng'eeda. 52Ama ng'ata gabiigu Yerusalemu nea gahoosan muuchi, 53goobiita jeeda gheeda sibata ASEETA nea gwaduumsheesa ASEETA.
S'ha seleccionat:
LUKA 24: BG15
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
The Bible in Datooga © Bible Society of Tanzania, 2015.