Luki 19
19
Sake maama
1Lani n pendi, Jesu den kua Jeriko dogu nni ki cuoni ki poandi u niinni. 2O joa den ye likani ki tie piado, ke bi yi o Sake, ki tie bi lubigaaba yudanba siiga nni yendo. 3O den moandi ki baa bandi yua n tie Jesu, ama wan koabi maama, ke ku niligu mo nan yabi yeni, waa den fidi ki laa Jesu. 4Lani, o den sani ki gaa liiga ki doni yaa tibu n yi sikomori, ke o baa le Jesu, kelima o den baa tagi ki pendi lankane. 5Jesu n den pundi likani, o den yaadi ki diidi o ki yedi: «Sake, jiidi tontoni kelima li tie tiladi min tundi a denpo dinla.» 6O den jaligi ki jiidi ki gaa o cangu leni li pamanli. 7Bi niba kuli den laa lani, ki yenbidi ki tua: «O joa na gedi ki ban cani u tagibiadu daano.» 8Sake den sedi o Diedo nintuali ki yedi o: «Canbaa, diidi, n baa pa a luoda n piama boagidima. N yaa den janbi yua ki gaa o kani bonliba mo, n baa guani o la taaliminaa.» 9Jesu den yedi o: «Mi tindima kua ku naa diegu nni dinla, kelima one moko tie Abalahama puoliŋuanu yo. 10O Joa Bijua cua ki baa lingi ki go faabi yaaba n yaadi.» #Mat 18.11.
Naacenbitaa kpanjama
(Mat 25.14-30)
11Bi niba n den cengi laa maama, Jesu go den pua mi kpanjama, kelima o den nagi leni Jerusalemi ke bi niba tama ke U Tienu diema baa doagidi lanyogunu lige. #Mat 25.14-30. 12Lani yaa po, Jesu den yedi: «O badijoa den gedi yaa dogu n foagi, ki baa n je li bali ki guani ki kpeni. 13Hali ke o daa gedi, o den yini o naacenba siiga bonba piiga, ki teni ba wula kujapiena piiga, ki yedi ba: ‹Yaa tiendi mani u kpendu, hali min baa guani ki kpeni ne.› 14Ama o dogu nni yaaba den nani o ki yuandi ki soani o puoli bi tondiba ke ban ban yedi o: ‹Tii bua yaa joa n tie ne n yaa die ti.› 15To, bi den dini o badijoa yeni li bali, ke o guani ki kpeni o dogu nni. O den yini bi naacenba yaaba ke o den teni i ligi yeni, ki baa bandi ban den kpendi ki baa yaala. 16O nikpialo den cua ki yedi: ‹N daano, a wula kujapienli cuani ti ñuadi wula kujapiena piiga.› 17O bado yeni den yedi o: ‹Li ŋani, n naacenŋamo, a teni ke n fidi dugi a po li bonwaala nni, lanwani, n dini a li bali ŋan yaa die dociami piiga.› 18O naacenlielo den cua ki yedi: ‹N daano, a wula kujapienli cuani ti ñuadi wula kujapienamuu.› 19O canbaa den yedi o: ‹N dini amoko li bali, ŋan yaa die dociamimuu.› 20Naacentoa moko den cua ki yedi: ‹N daano, gaa a wula kujapienli, n den gbini li li cabili nni ki bili. 21N den jie ŋa, kelima a pia ki mabinga, ki taani ŋan kaa bili yaala, ki yendi ŋan kaa buli yaala.› 22O bado den yedi o: ‹O naacenbiado na, n cuo ŋa a maceli nni. A den bani ke n tie yaa nilo n pia ki mabinga, ki taani min kaa bili yaala, ki go yendi min kaa buli yaala. 23Be nan teni ke ŋaa den bili n ligi ku ligidiegu nni, ke n yaa guani ki kpeni, min bi gaa yi leni ti ñuadi?› 24Lani, o den yedi yaaba n ye likani: ‹Gaa mani o kani li wula kujapienli yeni, ki teni yua n pia wula kujapiena piiga yeni.› 25Bi den guani ki yedi o: ‹Ti daano, o peli ki pia wula kujapiena piiga.› 26O den guani ki yedi: ‹N waani yi i moamoani ke bi baa pa ki pugini yua n pia kuli, ama yua n ki pia, bi baa gaa o kani ba wan pia yaala. #Mat 13.12; Mrk 4.25; Luk 8.18. 27N yibalinba mo, bani yaaba n kaa den bua nni leni li bali yeni, cuani ba mani ki kpa ba n nintuali.› »
Jesu tuonli Jerusalemi dogu nni
19.28—21.38
Jesu kua Jerusalemi
(Mat 21.1-11; Mrk 11.1-11; Jan 12.12-19)
28Jesu n den maadi laa maama, o den gaa liiga ki do ki caa Jerusalemi. 29Wan den nagidi Betifase leni Betani yaa dobila, ki kuu Olivie Tiidi juali, o den soani o ŋoadikaaba siiga nibilie ki yedi ba: 30«Suagi mani ki gedi yaa dobiga n ye liiga na. Yi yaa baa kua lienni yaa yogunu, yi baa le yaa ŋunbisaagili ke oba daa jagini li, ke li luo. Yin lodi li ki cuani na. 31Nilo yaa buali yi: ‹Be n teni ke yi lodi o?› Yin yedi o: ‹Ti Daano n bua o.› »
32Bi tondiba yeni den gedi ki ban sua ke likuli tie nani Jesu n bi yedi ba maama. 33Ban den lodi li ŋunbisaagili yaa yogunu, li danba den yedi ba: «Be n teni ke yi lodi li ŋunbisaagili na?» 34Bi den guani ki yedi: «Ti Daano n bua o.» 35Lani, bi den cuani o Jesu kani, ki maani bi kpaliti o po, ki teni ke Jesu jagini. 36Jesu n den jagi ki cuoni ki suagi liiga, bi niba ladi bi tiadi u sanu nni. 37Wan den nagidi Jerusalemi ki ji Olivie Tiidi juali, o ŋoadikaaba yaaba n yabi den ye leni li pamanli ki kpaani ki pagi U Tienu, kelima ban laa yaa bancianma kuli po. 38Bi den tua:
U Tienu n seligi o bado
Yua n kpendi wani o Diedo yeli nni.
Mi yanduanma n yaa ye tanpoli po.
U Tienu yua n ye hali tanpolijoma n baa ti kpiagidi. #Ps 118.26.
39Ama Farisieninba bi tianba yaaba n den ye ku niligu siiga den yedi Jesu: «Canbaa, fu leni a ŋoadikaaba ban suoni.» 40Jesu den guani ki yedi ba: «N waani yi, bi yaa suoni, a tana baa kpaani.»
Jesu buudi Jerusalemi po
41Jesu n go den nagidi Jerusalemi ki laa u, o den buudi upo, 42ki yedi: «Ŋain, amoko yaa bi bani dinla ŋan baa tieni maama ki baa mi yanduanme...! Ama moala li nan duagi a nuni po. 43Fala dana baa cua a po, a yibalinba baa kpaa li toanagili ki lindi ki cebini a, ki baa ŋa, 44ki bolini a, fini u dogu yeni leni a niba kuli, ki mudi a diena, ki kan ŋaa ba tanyenli n yaa maa liyali po. Lani kuli baa tieni, kelima ŋaa den bandi U Tienu n cua ki baa faabi a yaa yogunu.»
Jesu kua U Tienu diegu nni
(Mat 21.12-17; Mrk 11.15-19; Jan 2.13-22)
45Jesu den kua U Tienu diegu nni, ki deli ki ñani yaaba n kuadi, 46ki tua ba: «Li diani ki yedi: ‹N diegu baa yaa tie li jaandieli, ama yinba wani teni ke li tua a suuda wuonkaanu.› » #Esa 56.7; Jer 7.11. 47Daali kuli Jesu den bangi bi niba U Tienu diegu nni. Bi kopadicianba yudanba, li bali maama banda leni bi yudanba den lingi ki baa kpa o. #Luk 21.37. 48Ama baa den bani ban baa gaa maama ki kpa o, kelima bi niba kuli den cengi o maama leni li fangili boncianla.
S'ha seleccionat:
Luki 19: BGP
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Gulmancema Protestant Bible © Bible Society of Burkina Faso, 2013.