Luki 9
9
Jesu soani o piiga n tondiliediba
(Mat 10.5-15; Mrk 6.7-13)
1Jesu den yini ki taani bi piiga n niliediba, ki puni ba u paalu leni li bali ban yaa paani mu cicibiadimu, ki go paagidi bi niba ban yia yaa yianbuoli kuli. 2O den soani ba ke ban yaa wangi U Tienu diema maama, ki go yaa paagidi a yiama moko. 3O den yedi ba: «Yin da taa liba li sancenli po, ba gbiamu, ba sancenboagili, ba jiema, ba ligi, ki da taa liadalie mo. #Luk 10.4-11; JTT 13.51. 4Yin kua yaa diegu nni kuli, yin yaa ye lankani hali yin baa n fii. 5Bi yàá tuo ki gaa yi cangu naankani, yin ña laa dogu nni yaa yogunu, yin kpia ba yi taatama, lan tua siedi bi yiema po.» 6Lani, bi ŋoadikaaba den fii ki gedi ki goadi i dowaali nni ki wangi o Laabaaliŋamo, ki paagidi a yiama i kaani kuli.
Herodi yanlengidima
(Mat 14.1-12; Mrk 6.14-29)
7 Herodi yua n den die Galile diema den gbadi yaala n tiendi kuli. O yama den lengidi kelima bi tianba den tua ke Jan Batisi fii bi tinkpiba siiga. #Mat 16.14; Mrk 8.28; Luk 9.19. 8Bine n yaa tua ke o saawalipualo Eli n go doagidi o yuli. Bine mo ke bi saawalipua-kpeliba siiga yendo n fii bi tinkpiba siiga. 9Wani Herodi mo den tua: «N den teni ke bi jia Jan yuli, lanwani min gba ke bi maadi yua yaa po li naa bonla kuli tie ŋme?» O den moandi ki baa le o.
Jesu dini niba tudamuu
(Mat 14.13-21; Mrk 6.30-44; Jan 6.1-14)
10Jesu tondiba den guani o kani ki togidi o ban den tieni yaala kuli. Lani, o den taa ba bi bebe, ke bi gedi Betisayida dogu kunu po. 11Bi niba boncianla den bandi ki ŋoadi o. Jesu den biali ba, ki waani ba U Tienu diema maama, ki go paagi yaaba n ki pa.
12U yienu n bua ki kua, bi piiga n niliediba den nagini Jesu kani ki yedi o: «Cabi ku niligu ban yadi ki gedi yaa dobila leni yaa koajaana n kuu, ki ban baa u duankaanu leni li bonjekaala, kelima tin ye naani na tie fuali.» 13Jesu den yedi ba: «Pa ba mani yiba ban je.» Bi den guani ki yedi o: «Tii pia liba, kali dupen bonbimuu leni jamilie, li yàá tie ke ti baa gedi tiba ki ban daa li bonjekaala yaa niba n ye ne kuli po yaa ka.» 14Bi jaba bebe den bua ki pundi tudamuu (5 000). Jesu den yedi o ŋoadikaaba: «Teni mani ban boagidi nani niba piimuu muu yeni, ki kali caga caga.» 15Bi den tieni yeni ki kaani bi niba kuli. 16Jesu den taa bi dupenmuudiba leni i janliedi yeni, ki yaadi ki noanli tanpoli po ki jaandi ki seligi la. Lani, o den cabidi cabidi ki teni o ŋoadikaaba ban boagidi ku niligu. 17Yuakuli den dini ki guo. Bi den wodi ban dini ki sieni yaala ki gbieni piiga n baabuodilie.
Pieli kadi ki waani ke Jesu tie Kilisiti
(Mat 16.13-20; Mrk 8.27-30)
18Dayenli, Jesu den piadi ki jaandi ke o ŋoadikaaba bebe ye leni o. O den buali ba: «Bi niba boncianla tua ke n tie ŋme?» 19Bi den guani ki yedi o: «Boncianla tua ke a tie Jan Batisi, bine Eli, bine mo ke bi saawalipuaba siiga nni yendo n fii bi tinkpiba siiga.» #Mat 14.1-2; Mrk 6.14-15; Luk 9.7-8. 20O go den yedi ba: «Yimo te, yimo nan yedi ke n tie ŋme yo?» Pieli den guani ki yedi o: «A tie U Tienu n Gandi Yua.» #Jan 6.68-69.
21Jesu den maadi leni li bali ki yedi ke ban da waani la niloba kuli.
Jesu pua saawali ke o baa kpe ki go fii
(Mat 16.21-23; Mrk 8.31-33)
22O go den yedi ke li tie tiladi o Joa Bijua n le fala boncianla, ke Jufinba nikpela, bi kopadicianba yudanba leni li bali maama banda n yie o, ki kpa o. Ama ke li dataali daali o baa fii bi tinkpiba siiga.
O nilo n baa ŋoadi Jesu maama
(Mat 16.24-28; Mrk 8.34—9.1)
23Lani, Jesu den yedi bi niba kuli: «Yua n bua ki yaa ŋua nni kuli, wan yie o yuli, ki yaa bugi o dapoanpoanli daali kuli ki nan yaa ŋua nni. #Mat 10.38; Luk 14.27. 24Yua n bua ki gaa o miali kuli, o baa biani li. Ama yua n baa biani o miali kelima mini yaa po kuli, baa faabi li. #Mat 10.39; Luk 7.33; Jan 12.25. 25O nilo yaa baa ki diedi ŋanduna kuli ke o miali nan bodi, bi ki bolini o yuli, li baa ŋanbi o po be? 26Yua n jie i fe mini leni n maama po, o Joa Bijua moko baa ti jie o po i fe o yaa cua leni o kpiagidi leni Baa yaa kpiagidi ki yegi leni yaa malekinba n gagidi ki ŋani. 27N waani yi i moamoani, yaaba n ye nekanba, bi tianba kan kpe kaa laa U Tienu diema.»
Jesu lebidi cain
(Mat 17.1-8; Mrk 9.2-8)
28Jesu n den maadi laa maama ke dananii pendi, o den taa Pieli, Jan leni Jaki ki doni li juali po ki baa n jaandi. #2Pie 1.17-18. 29Wan den jaandi yaa yogunu, o nunga den lebidi, o tiayiekaadi moko den lebidi ki pendi hali ki ñuliti. 30Jabilie den maadi leni o. Li den tie Musa leni Eli. 31Bi den doagidi tanpoli kpiagidi nni, ki maadi leni Jesu wan baa kpe yaa kuuma Jerusalemi nni po. 32Mi guama den gbadi Pieli leni o lieba. Ama bi den fundi ki laa Jesu kpiagidi leni yaa jaliediba n se leni o. 33Bi jaba yeni n den ña Jesu kani yaa yogunu, Pieli den yedi o: «Canbaa, li ŋani tin yaa ye ne. Tin tii sugataa, fini yenli, Musa yenli, Eli mo yenli.» Waa den bani wan maadi yaala. 34Wan den maadi yeni yaa yogunu, ku tawaligu den jiidi ki libini ba. Bi ŋoadikaaba n den laa ke bi kua ku tawaligu nni, ti jawaandi den cuo ba. 35U nialu den maadi ku tawaligu nni, ki yedi: «One n tie n Bijua, min gandi yua, cengi mani o.» #Esa 42.1; Mat 3.17; 12.18; Mrk 1.11; Luk 3.22. 36U nialu yeni n den maadi ki gbeni, bi sua ke Jesu ye obebe. Bi ŋoadikaaba den muubi bi ñoana, kaa togidi oba lanyogunu ban laa yaala.
Jesu ñani ki cicibiadiga o jawaalo niinni
(Mat 17.14-18; Mrk 9.14-27)
37Lan den fii ki faa, bi den jiidi li juali po. Yaa niligu n yabi den tuogi Jesu. 38O joa den kpaani ku niligu siiga ki yedi: «Canbaa, n mia ŋa ŋan diidi n po n bijua na, kelima o tie n bonjayenyenga. 39Ki cicibiadiga n fii o po yaa yogunu kuli, lanyogu liga o yen kuudi, kan yaa digini o leni u paalu ki kpalini o ti ñinsanpunpudi ki faligidi o. Ki ñama o niinni pa o po. 40N bi mia a ŋoadikaaba ke ban deli ki ñani ga o kani, ke baa fidi.» 41Jesu den guani ki yedi: «Yinba, yaa nibuolu n luo li dandanli ki go bia, n baa yaa taa ki ye leni yi ki go juuni yi po ki pundi u laa yogunu? Cuani a bijua na.» 42Ki biga n den nagini Jesu kani yaa yogunu, ki cicibiadiga den guli o ki go digini o leni u paalu. Jesu den funi leni ga, ki paagi ki biga, ki teni o o baa. 43U Tienu kpiagidi leni o paalu den paki yaaba n ye likani kuli.
Jesu go pua o kuuma saawalo
(Mat 17.22-23; Mrk 9.30-32)
Bi niba n den laa Jesu n tieni yaala kuli, ke li fangicianli leni li pakili cuo ba, o den yedi o ŋoadikaaba: 44«Yinba, yin diadi mani yi tuba ki cengi mi naa maama bonŋanla: Bi niba baa janbi o Joa Bijua, ki cuo o ki mubini o bi nisaaliba nuu nni.» 45Ama bi ŋoadikaaba ki den gaa laa maama n bua ki yedi yaala. Li den duagi bi po ke ban da gaa ma. Bi den jie, baa buali Jesu li po.
Yua n tugi li yuli Jesu ŋoadikaaba siiga
(Mat 18.1-5; Mrk 9.33-37)
46Mi niama den fii bi ŋoadikaaba siiga, ke ban bandi bi siiga yua n tugi li yuli. #Luk 22.24. 47Jesu den bani ban maliti yaala bi pala nni, ki taa ki biga ki sieni o kani 48ki yedi ba: «Yua n gaa ki naa biga cangu n yeli nni, o gaa mini n ba yaa cangoe. Yua n gaa mini mo yaa cangu, o gaa yua n soani nni yaagoe. Yi siiga yua n wa ki cie yikuli, wani n tugi li yuli.» #Mat 10.40; Luk 10.16; Jan 13.20.
Yua n kaa yie Jesu kuli tie ti yua
(Mrk 9.38-40)
49Jan den yedi: «Canbaa, ti den laa yaa joa n deli mu cicibiadimu a yeli nni ke ti yie o po, kelima waa taani leni ti ki ŋua ŋa.» 50Jesu den guani ki yedi o: «Da go yie mani, kelima yua n kaa yie yi po kuli taa yi po.»
Jesu ñani Galile ki gedi Jerusalemi
9.51—19.27
Samari diema doyendu yaaba naa gaa Jesu cangu
51U yogunu n den nagini ke U Tienu baa ñani Jesu ŋanduna nni ki duoni o tanpoli, Jesu den jagi ki bili ke o baa gedi Jerusalemi. 52O den soani bi tondiba ke bi kua o liiga. Bi den gedi ki ban kua Samari diema doyendu nni ki baa lingi o po ku candiegu. 53Ama baa den tuo Jesu cangu, kelima wan caa Jerusalemi yeni yaa po. 54O ŋoadikaaba Jaki leni Jan n den laa lani, bi den yedi: «Ti Daano, a bua tin yedi u mu n ña tanpoli po ki bolini ba bi?» #2Bad 1.9-16. 55Jesu den jigidi ki noanli ba ki funi leni ba#9.55 A titiama nni li pugini ki yedi: «Yii bani yaa yantiali n die yi, kelima o Joa Bijua naa cua ki baa bolini ka, ama ki baa faabi.» Diidi 19.10.. 56Bi den suagi liiga ki gedi dotogu.
Yaaba n bua ki ŋoadi Jesu
(Mat 8.19-22)
57Ban den ye u sanu nni o nilo den yedi Jesu: «N baa yaa ŋua ŋa ŋan caa naani kuli.» 58Jesu den guani ki yedi o: «I coli pia i fali, ti bonyugiditi mo pia a tiana, ama o Joa Bijua wani naa pia wan baa yaa dua naani.» 59Jesu den yedi nitoa mo: «Ŋoadi nni.» O den guani ki yedi o: «N Daano, pa nni min da kpa gedi ki ban piini n baa no.» 60Jesu den yedi o: «Cedi bi tinkpiba n piini bi tinkpiba, ama fini, gedi ki ban yaa wangi U Tienu diema maama.» 61Nitoa go den yedi o: «N Daano, n baa ŋoadi a, ama pa nni min da kpa gedi ki ban cabi n denpo yaaba.» #1Bad 19.20. 62Jesu go den yedi o: «Yua n mubini li naakuuli ki baa yaa ko, ki go gbagidi ki nua puoli, waa dagidi U Tienu diema po.»
S'ha seleccionat:
Luki 9: BGP
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Gulmancema Protestant Bible © Bible Society of Burkina Faso, 2013.