यूहन्ना 4
4
सामरी जन्नीमनैयसे येशूक बातचित
1यूहन्नसे धेर चेला त येशू बनैटीबाट ओ बप्तिस्मा फे देटीबाट कना बात फरिसीहुँक्र सुन्ल। 2वास्तवम येशू अपन्हे बप्तिस्मा नैदेहँट्, तर उहाँक चेलाहुँक्र बप्तिस्मा देहँट्। 3फरिसीहुँक्र यी बात सुनरख्ल कना थाहाँ पैल त येशू यहूदिया क्षेत्र छोर्क फेदोस्र गालील क्षेत्रओर घुम्ल।
4गालील जाइबेर सामरिया क्षेत्र हुइटी जाइ परऽ। 5येशू सामरिया क्षेत्रक सुखार कना सहरम आपुग्ल। यी सहर याकूब आपन छावा योसेफह देहल जग्गक लग्घ रह।#उत ३३:१९; यहो २४:३२ 6उहाँ याकूबक खानल कुवाँ पलरह। येशू नेङ्ग्क डट्कर रलह ओ उह कुवँक किनारम बैठ्ल। उ ब्याला लगभग बाह्र बजल रह।
7एकठो सामरी जन्नीमनैया पानी भरक लाग उहाँ अइली। येशू हुँकहीन कल, “महीह पानी पियक लाग देओ।” 8उहाँक चेलाहुँक्रजुन सहरम खैना चिज किन गैरलह।
9सामरी जन्नीमनैया कली, “अप्न यहूदी होक फे कसिक मै सामरी जन्नीमनैयसे पिना पानी माङ्गटी?” काकरकि यहूदीहुँक्र सामरीहुँकनसे कुछु सम्बन्ध नैढरँट्।#एज्रा ४:१-५; नहे ४:१-२
10येशू हुँकहीन कल, “यदि टुँ परमेश्वरक वरदान ओ टुँहीनसे पानी मङ्ना व्यक्तिह चिह्न्टो कलसे, टुँ ओहीसे मङ्ग्ने रलहो, ओ ऊ टुँहीन जीवित पानी देने रह।”
11उ जन्नीमनैया कली, “हजुर, अप्नकठे पानी भर्ना बाल्टी त नैहो, ओ कुवाँ फे बर्का गहिँर बा। तब अप्न कहाँसे उ जीवित पानी अन्बी? 12यी कुवाँ त हमार पुर्खा याकूबक खानल हो। ऊ अपन्हे, हुँकहार लर्कापर्का ओ लालाबाला यिह कुवँक पानी पियँट्। का अप्न हमार पुर्खा याकूबसे फे महान् हुइटी नि?”
13येशू हुँकहीन कल, “यी पानी पिउइयन सबजहन फेदोस्र प्यास लागजहीन, 14तर म्वार देहल पानी पिउइयह फेदोस्र कबु फे प्यास नैलगहीँस। काकरकि म्वार देहल पानी वाकरम बहटी रना पानीक मूल होजउइया बाटस, ओ ओहीह अनन्त जीवन देहहीँस।”
15उ जन्नीमनैया उहाँह कली, “हजुर, ओसिन हो कलसे, महीह उह पानी दी, ओ महीह फेदोस्र कबु फे प्यास नैलागी, ओ यिहाँ पानी लेह फे अइटीरह नैपरी।”
16येशू हुँकहीन कल, “जाओ ओ आपन गोस्यह बलाक आनो।”
17उ जन्नीमनैया उहाँह कली, “म्वार गोस्या नैहुइट।”
येशू हुँकहीन कल, “‘म्वार गोस्या नैहुइट’ कैक टुँ ठीक कलो। 18टुँहार पाँचठो गोस्यन होसेक्ल। ओ आब जौन मनैयसे टुँ रठो, ऊ फे टुँहार आपन गोस्या नैहुइट। टुँहार कहल बात सत्य हो।”
19उ जन्नीमनैया उहाँह कली, “हजुर, अप्न पक्का फे अगमवक्ता हुइटी। 20हमार सामरी पुर्खाहुँक्र यी पर्वत्वम परमेश्वरक आराधना करँट्। तर अप्न यहूदीहुँक्रजुन परमेश्वरक आराधना कर्ना ठाउँ यरूशलेम केल हो कैक कठी।”
21येशू हुँकहीन कल, “हेरो बाबु, महीह विश्वास करो, उ ब्याला अइटीबा, जब टुह्र ना त यी पर्वत्वम ना यरूशलेमम परमेश्वर बाबक आराधना कर्बो। 22टुह्र सामरीहुँक्र परमेश्वरह नैचिह्न्टो तर फे आराधना कर्ठो। हम्र यहूदीहुँक्र परमेश्वरह चिह्न्क आराधना कर्ठी काकरकि मुक्ति देहुइया यहूदीन्हकमसे अइठ। 23तर परमेश्वर बाबह सत्य-सत्य हिसाबले आराधना करुइयन परमेश्वरक आत्मक अगुवाइ सहित सत्यताम आराधना कर्ना समय अइटीबा, ओ वास्तवम उ समय आब हो। वास्तवम परमेश्वर बाबा अस्तह आराधना कर्ना मनैन खोज्ठ। 24परमेश्वर आत्मा हुइट। उहओर्से उहाँक आराधना कर्ना मनै उहाँक आत्मक अगुवाइ सहित सत्यताम आराधना करपर्ठा।”
25उ जन्नीमनैया उहाँह कली, “महीह थाहाँ बा, ख्रीष्ट कैजिना मसीह अउइयाबाट। उहाँ अइहीँ त हमन सब बात बुझादेहीँ।”
26येशू हुँकहीन कल, “मै, जे टुँहीनसे बात बट्वाइटुँ, उह त हुइटुँ।”
चेलावँ घुम्क आपुग्ल
27उहब्याला उहाँक चेलावँ घुम्क आपुग्ल। हुँक्र उहाँह एकठो महिलसे बात बट्वाइट् देख्क छक्क पर्ल, तर “अप्न का चाहटी?” अथवा “अप्न उ महिलसे काजे बात बट्वाइटी?” कैक कुई फे नैपुछ्ल।
28तब उ महिला आपन गग्री ओठहेँ छोर्क सहरम गैली, ओ मनैन कली, 29“आओ, ओ एकठो मनैयह हेरो! उहाँ म्वार करल सब काम महीह कैदेल। कहोँ उहाँ जो ख्रीष्ट त नैहुइट?” 30तब हुँक्र सहरमसे निकर्क उहाँकठे जाइलग्ल।
बाली कटुइयन
31उह समयम चेलावँ उहाँह खैना चिज देटी “गुरुजी, कुछुकुछु खाई” कैक बिन्ती करटलह।
32तर उहाँ हुँकन कल, “म्वारठे खैना चिज बा, जौन चिज टुँहन थाहाँ नैहो।”
33उहओर्से चेलावँ अप्न-अप्न पुछीकपुछा कर्ल, “कुई उहाँक लाग खैना चिज आन्देहल कि का?”
34येशू हुँकन कल, “म्वार खैना चिज त महीह पठुइयक आज्ञापालन कर्ना ओ उहाँक काम पूरा कर्ना हो। 35टुह्र कठो, ‘बाली पक्ना आम्ही चार मैन्हा लगुइयाबा’ तर मै टुँहन कहटुँ, खेती निहार्क हेरो, बाली पाकस्याकल, कट्ना पूरा होरहल। 36बाली कटुइयन ज्याला पैठ, ओ काटल ओ जम्मा करल बालीजुन अनन्त जीवनम आनगैल् मनै हुइट। तब बीया बुउइयन ओ बाली कटुइयन सँगसँग आनन्द मनैठ। 37अठे ‘एकठो मनैया बीया बुइठा ओ और मनैया बाली कट्ठा’ कना उखान ठ्याक्क मिल्ठा। 38मै टुह्र मेहनत नैकरल ठाउँम टुँहन बाली काट पठैनु। और जन मेहनत कर्लह, ओ हुँकन्हक करल मेहनतक नतिजा टुह्र पारख्लो।”
सामरी मनैन्हक विश्वास
39“म्वार करल सब काम उहाँ बट्वादेल” कैक उ सामरी महिला कली। हुँकहार कहल उह गवाहीक कारण उ सहरक धेर मनै येशूम विश्वास कर्ल। 40हुँक्र उहाँह भ्याँट कर अइल ओ उहाँह “हमारसँग रही” कैक बिन्ती कर्ल। उहओर्से उहाँ हुँकन्हकसँग दुइ दिनसम रल। 41उहाँक ब्वालल् वचनक कारण झन् धेर सामरीहुँक्र उहाँकम विश्वास कर्ल।
42हुँक्र उ महिलह कल, “टुँहार बात सुन्क केल नाहीँ, तर हम्र अपन्हे उहाँक बट्वाइल बात सुन्क विश्वास कर्ली। उहाँ जाट्टीसे जो संसारक मुक्ति देहुइया हुइट कना बात आब हम्र थाहाँ पैली।”
उच्च कर्मचारीक छावा चोखैलक
43दुइ दिन पाछ येशू उहाँसे गालीलम गैल। 44आपन गाउँम कौनो अगमवक्तक आदर नैहुइट् कैक येशू अपन्हे कैरख्लह।#मत्ती १३:५७; मर्क ६:४; लूक ४:२४ 45जे होस, उहाँ गालीलम पुग्ल त मनै उहाँह स्वागत कर्ल। काकरकि यरूशलेमम मुक्ति-दिवसक टिहार मान गैल्म येशूक करल अचम्म-अचम्मक काम हुँक्र देखरख्लह।#यूह २:२३
46येशू गालील क्षेत्रक काना सहरम फेदोस्र गैल। उह सहरम उहाँ पानीह अङ्गूरिक मद बनारख्लह। येशू यी सहरम रहलब्याला कफर्नहुम सहरम रना एक जन राजदरवारक कर्मचारीक छावा बेराम रलह।#यूह २:१-११ 47येशू यहूदियासे गालीलम आरल कना बात सुन्ल त उ कर्मचारी येशूकठे गैल ओ येशूह “म्वार छावा मुवमुव होरहल, अप्न आक चोखादी” कैक बिन्ती कर्ल।
48येशू हुँकहीन कल, “टुह्र अचम्मक चिन्ह ओ काम नैद्याखट्सम कबु फे विश्वास नैकर्टो।”
49कर्मचारी कल, “हजुर, दया कैक म्वार छावा मुनासे आघहेँ आदी।”
50येशू हुँकहीन कल, “जाओ, टुँहार छावा बाँचजाई।” उ मनैया येशूक कहल वचन विश्वास कर्ल, ओ घरओर घुम्ल। 51जैटी-जैटी डगरिम हुँकहार नोकरहुँक्र हुँकहीन भेँटैल ओ कल, “अप्नक छावा त बाँचगैल।” 52ऊ हुँकन पुछ्ल, “म्वार छावा कत्रा ब्याला चोखाइल?”
हुँक्र कल, “काल दिनक एक बजे हुँकहीन जर छोर्लिन।”
53येशू हुँकहीन “टुँहार छावा बाँचजाई” कैक कहल ब्याला आपन छावा चोखाइल बात उ कर्मचारी थाहाँ पैल। उहओर्से ऊ ओ हुँकहार सलघरक मनै येशूम विश्वास कर्ल।
54यी काम यहूदियासे गालीलम आक येशूक करल द्वासर अचम्मक चिन्ह रह।
S'ha seleccionat:
यूहन्ना 4: thl
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2020, Wycliffe Bible Translators, Inc. All rights reserved.