लूका 16
16
चलाक कामदारक आहान
1तब येशू आपन चेलन फे आहान कल, “एकठो धनी मनैयक धनसम्पत्तिक हिसाबकिताब ढरुइया एकठो मुख्य कामदार रलहन। ओहीह मालिकक् धनसम्पत्ति उरैलक दोष लग्लस। 2धनी मनैया उ कामदारह बलाक पुछ्ल, ‘टैँ त म्वार सम्पत्तिम मनपरी करट्या कैक गाँइयगुँइय हल्ला सुनमिल्ठा। महीह सब हिसाबकिताब बुझा ओ आबठेसे टैँ यी काममसे हट्।’
3“उ कामदार मनमन विचार करल, ‘आब मै का करुँ? महीह यिहाँसे हटुइय हुइल। हर जोत्क खैना म्वार जंग्र नैहो, भीख मङ्ग्ना महीह लाज लग्ठा। 4एकठो जुक्ति मै जन्नु। मनैनसे मजा सम्बन्ध बनारखम त, यिहाँसे खेड्वापाडर्लसे फे, हुँक्र आपन घरम महीह स्वागत कैडरहीँ।’
5“तबदोस्र उ कामदार मालिकक् हरेक ऋणीन् बलाइल ओ हिसाब माङ्गल। ऊ एकठो ऋणीह पुछल्, ‘टुँ मालिकक् कठ्याक ऋण लेरख्लो?’
6“ऊ कहल, ‘तीन हजार लिटर जैतूनिक त्याल।’
“कामदार कहल, ‘आपन तमसुक लेओ ओ बैठ्क झट्ट पन्ध्र सय लिटर केल लिखो।’#१६:६ उ कामदार असिक फे कहल हुइसेक्ठा: पुरान तमसुक चिँठ्क पन्ध्र सय लिटरक लौव तमसुक झट्ट बनाओ या पुरान तमसुकम तीन हजारह मेटाक पन्ध्र सय झट्ट लिखो।
7“ऊ द्वासर ऋणीह पुछल्, ‘टुँ कठ्याक ऋण लेरख्लो?’
“ऊ कहल, ‘तीन सय पचास क्वीन्टल गोहूँ।’
“कामदार कहल, ‘आपन तमसुक लेओ ओ तीन सय क्वीन्टल केल लिखो।’
8“मालिक यी बात थाहाँ पैल त, चलाक तरिकाले काम कर्लकओर्से,#१६:८ हुइना त मालिक आपन कामदार बेइमान हुइलकम खुशी नैरलह, तर फे हुँकहार कामदार आपन जातसे बिग्रल अवस्थह एकदम मजा अवस्थम परिवर्तन कैराखल कैक ऊ थाहाँ पैल। धनी मनैया उपकार कैक आपन ऋणीन्हक ऋण घटादेलकम ऋणीहुँक्र हुँकहीन धन्यवाद देहलहुहीँ ओ हुँकहार प्रशंसा करलहुहीँ, उहओर्से मालिक आपन कामदारह उ काम कर्लकम खुलेआम दण्ड देना मुस्किल (या असम्भव) हुइलहुहीन। ऊ आपन बेइमान कामदारक प्रशंसा कर्ल।” तब येशू कल, “परमेश्वरम विश्वास नैकर्ना मनै परमेश्वरक् बुद्धि पाइल मनैनसे धेर चलाक बाट, काकरकि हुँक्र आपन भलाइक लाग और मनैन कसिक फाइदा पुगाइ सेक्जैठा कना बात जानरख्ल। 9उहओर्से संसारक धनसम्पत्तिले औरजन्हक उपकार कैक सम्बन्ध बह्राओ, त टुन्हक सम्पत्तिक काम ओरागैलसे फे, हुँक्र#१६:९ हुँक्र: हुँक्र कलक के हुइट कना बात ग्रीक भाषक स्रोतम स्पष्ट नैहो। धेर बाइबल विद्वानहुँकन्हक विचारम हुँक्र कलक उपकार कैक सम्बन्ध बह्रागैल् मनै हुइट। और विद्वानहुँकन्हक विचारम हुँक्र परमेश्वरह जनैना यहूदी कहाइ हो। कुई-कुई विद्वानहुँकन्हक विचारम हुँक्र कलक स्वर्गदूतन हुइट। टुँहन स्वर्गक घरम स्वागत करहीँ।
विश्वासयोग्य कामदार
10“छुटी बातम विश्वासयोग्य रहुइया, बर बातम फे विश्वासयोग्य रठा। छुटी बातम बेइमान रहुइया, बर बातम फे बेइमान रठा। 11यदि यी संसारक धनसम्पत्तिम टुह्र विश्वासयोग्य नैहुइटो कलसे, स्वर्गक धनम टुँहन कसिक विश्वास कर्ना? 12यदि टुँहन जिम्मा देगैल् परमेश्वरक धनसम्पत्तिम विश्वासयोग्य नैहुइटो कलसे, टुह्र पाइपर्ना स्वर्गक धनक जिम्मा टुँहन के दी? 13कौनो नोकर फे एक्क समयम दुइठो मालिकन्हक सेवा कर नैस्याकट्। ऊ एकजहन हेल्हा करी, एकजहन प्रेम करी, कि जुन एक जन्हक कहल मानी, एक जन्हक मतलब नैकरी। टुह्र फे परमेश्वर ओ धनक सेवा कर नैसेक्नेहुइटो।”#मत्ती ६:२४
14यी बात सुन्क धनक लोभी फरिसीहुँक्र उहाँह हँस्ल। 15तब येशू हुँकन कल, “टुह्र मनैन्हक आघ त अपन्हेह ठीक जीवन जिलक देखैठो, तर टुन्हक मन कत्रा दुष्ट बा कना बात परमेश्वर जन्ठ। काकरकि जौन बात मनैन्हक बीचम आदरयोग्यक मानगैलबा उ परमेश्वरक आघ रद्दी बा।
16“बप्तिस्मा देहुइया यूहन्ना प्रचार सुरु कर्नासे आघ मोशक देहल ब्यवस्था ओ अगमवक्तन्हक बात चल्तीआइल रह। तर आब परमेश्वरक राज्यक बारेम खुशीक खबर प्रचार कैजैटीबा, धेर मनै उहाँक राज्यम जोरसे भित्तर जैटीबाट।#मत्ती ११:१२-१३ 17तर परमेश्वरक व्यवस्थमसे एकठो विन्दु हेरैनासे त, स्वर्ग ओ पृथ्वी बित्क जैना सजिलो बात हो।#मत्ती ५:१८
18“जे आपन गोसिन्यह छोर्क औरजहनसे भ्वाज कर्ठा, ऊ व्यभिचार कर्ठा, ओ जे छ्वारल गोसिन्यह भ्वाज कर्ठा, ऊ फे व्यभिचार कर्ठा।”#मत्ती ५:३२; १ कोर ७:१०-११
धनी मनैया ओ गरीब लाजरस
19येशू कल, “एकठो धनी मनैया रह। ऊ महङ-महङ झुल्वा घाल, ओ सड्ड ऐसआरामक जीवन बिताए। 20लाजरस नाउँक एकठो गरीब मनैया फे रह। वाकर जीउभर खाटी-खाटी केल रलहस। धनी मनैयक गेटठे ओहीह बैठादेहस। 21धनी मनैयक अँराइल टुक्रिटुक्रा खाइ पाडर्ठुं कि कैक आश लग्लरह। कुक्कुर फे आक वाकर खाटी चाटदेहस।
22“उ गरीब लाजरस मुवल् त, स्वर्गदूत ओहीह अब्राहामकठे#१६:२२ ग्रीक भाषक स्रोतमसे शाब्दिक अनुवाद, “ऊ अब्राहामक क्वारम बैठागिल्।” यी आलङ्कारिक कहाइ हो ओ याकर अर्थ आदर ओ सुखक ठाउँ हो। अब्राहाम यहूदी मनैन्हक पुर्खा हुइट। लैगैल। उ धनी मनैया फे मुवल ओ मनै ओहीह गर्लस। 23जब ओहीह नरकम कष्ट भ्वागपर्लस, तब ऊ उप्पर ह्यारल त, अब्राहामह ओ हुँकाहारठे लाजरसह आरामसे बैठल द्याखल। 24धनी मनैया अब्राहामह कर्रसे कहल, ‘बाबा, महीह दया करी। लाजरसह यिहाँ पठादी त ऊ आपन अङ्ग्री पानीम चोप्क म्वार जिभीम चुवादे। काकरकि यी आगीम मै भयङ्कर यातना भ्वागटुँ।’
25“तर अब्राहाम कल, ‘छावा, पैल्हक बात सम्झो त, जियट्घरीसम टुँ सुखसुखम रलो। लाजरस दुःखदुःख केल पाइल। आब लाजरस म्वारसँग सुखशान्तिम बा, टुँ जुन दुःख भ्वागटो। 26अत्र केल नैहोक, यिहाँसे टुँहारठे उपार जाइ चहुइयन जाइ नैसेकहीँ ओ उहाँसे हमारठे यिपार आइ चहुइयन फे आइ नैसेकहीँ कैक टुन्हक ओ हमार बीचम एकठो भारीनक गञ्ज्री बा।’
27“तब धनी मनैया कहल, ‘बाबा, दया कैक लाजरसह म्वार बाबक घर पठाई।’ 28म्वार पाँचठो भैयन बाट। हुँकन्हकठे लाजरस जाक चेतावनी देक कही कलसे, हुँक्र मुहीँ त, यी दुःख भोग्ना ठाउँम हुँकन नैआइपरहीन।
29“अब्राहाम कल, ‘हुँकन्हकठे मोशक ओ अगमवक्तन्हक किताब बाटन। उह बात मन्लसे फे धेर हो।’
30“धनी मनैया कहल, ‘नाही बाबा, मुवल मनैया जिक हुँकन्हकठे गैलसे हुँक्र आपन पापी मन परिवर्तन कैक परमेश्वरकठे घुमहीँ।’
31“अब्राहाम कल, ‘मोशा ओ अगमवक्तन्हक बात नैमनुइयन्हकठे मुवल मनैया जिक गैलसे फे, हुँक्र विश्वास नैकरहीँ।’”
S'ha seleccionat:
लूका 16: thl
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2020, Wycliffe Bible Translators, Inc. All rights reserved.