लूका 24
24
येशू मुवलमसे फेदोस्र जिलक
मत्ती २८:१-१०; मर्कूस १६:१-८; यूहन्ना २०:१-१०
1अट्वारक दिन बिहान्नी उ जन्नीमनै आपन तयार पारल वास अइना त्याल लेक येशूक गर्या रहल ठाउँम गैल। 2हुँक्र गर्यमसे पत्थ्रा उस्टाइल भेँटैल। 3हुँक्र गर्यम पैँठ्ल त, प्रभु येशूक लाश नैदेख्ल। 4हुँक्र कवाइअस करबेर, उज्जर झुल्वा घालल् दुइ जन#२४:४ उज्जर झुल्वा घालल् दुइ जन:यी दुइ जन स्वर्गदूतन रलह। मनै हुँकन्हक पञ्ज्र ठह्र्याइल देखपर्ल। 5उ जन्नीमनै डरकमार टर मुन्टा करालेल। तब उ दुइठो मनै हुँकन कल, “टुह्र जिटी मनैयह मुवल मनैन ढर्ना ठाउँम काजे ख्वाजटो? 6उहाँ मुवलमसे फेदोस्र जिरल, यिहाँ नैहुइट। गालील क्षेत्रम रहलब्याला येशू टुँहन का कलह, सम्झो-सम्झो?#मत्ती १६:२१; १७:२२-२३; २०:१८-१९; मर्क ८:३१; ९:३१; १०:३३-३४; लूक ९:२२; १८:३१-३३ 7‘मै मनैयक छावा, पापी मनैन्हक हाँठम परम, क्रूसम टङ्गावापाक मुवापैम ओ तीसर दिनम मुवलमसे फेदोस्र जिजैम।’” 8तब हुँक्र येशूक कहल बात सम्झल।
9हुँक्र गर्यमसे घुम्क आपन द्याखल सब बात एघार चेलन ओ और सब चेलन सुनैल। 10गर्या रहल ठाउँम जउइया जन्नीमनै मगदाला सहरक मरियम, योअन्ना, याकूबक डाई मरियम ओ और जन्नीमनै रलह। चेलन यी सब खबर देहुइयन हिँक्रहे रलह। 11तर चेलावँ हुँकन्हक देहल खबरह फोगट्या गफ मान्क नैपत्यादेल। 12पत्रुस जुरुक्क उठ्क दगुर्टी गर्या रहल ठाउँम गैल ओ लिहुर्क हेर्ल त, कफन केल देख्ल। यी देख्क अचम्म मन्टी पत्रुस घुमगैल।
येशू इम्माउस गाउँ जैना डगरिम
मर्कूस १६:१२-१३
13उह दिन दुइठो चेलन यरूशलेमसे एघार किलोमिटर दूर रहल इम्माउस कना गाउँम जाइटलह। 14ओ यरूशलेमम घटल घटनक बारेम हुँक्र बात बट्वाइटलह। 15असिक बात बट्वैटी न्याङ्गबेर येशू हुँकन्हकठे अइल ओ सँगसँग नेङ्ग्ल। 16तर हुँकन्हक आँख येशूह चिन्ह नैसेक्ना बनागैल् रलहन।
17येशू हुँकन कल, “टुह्र नेङ्टीनेङ्टी का बात बट्वाइटो?”
हुँक्र ठह्र्यागैल, हुँकन्हक अनुहार मलिन हुइलन। 18हुँक्रमध्ये क्लेओपास कल, “यरूशलेमम घटल घटना थाहाँ नैरलक परदेशी अप्न केल हुइटी।”
19येशू पुछ्ल, “का घटना?”
हुँक्र कल, “नासरत सहरक येशूक घटना। उहाँ परमेश्वर ओ मनैन्हक सामुन्नेम वचन ओ कामम एक शक्तिशाली अगमवक्ता रलह। 20मुख्य पूजारीहुँक्र ओ अगुवन उहाँह मृत्युदण्डक लाग रोमी सरकारक हाँठम सुम्पदेलन ओ सिपाहीहुँक्र उहाँह क्रूसम टङ्गाक मुवैलन। 21उहाँ हम्र इस्राएलीहुँकन शत्रुन्हक हाँठमसे छुट्कारा देहहीँ कना हमार आशा रह। उहाँह क्रूसम टङ्गैलक आज तीसर दिन हो। 22अत्र केल नैहोक हमार बगालिक जन्नीमनैन्हक कहल बात सुन्क हम्र छक्क परगैली। हुँक्र बिहान्नी गर्यम गैल, 23तर हुँक्र प्रभुक लाश नैभेटैल। हुँकन्हकठे स्वर्गदूत देखपर्ल ओ ‘येशू मुवलमसे जिगैल’ कल हुँ। 24यी सुन्क हमार बगालिक कुई-कुई गर्या रहल ठाउँम गैल। हुँक्र जन्नीमनैन्हक कहलअस केल भेँटैल, तर येशूक लाश जुन नैदेख्ल।”
25येशू हुँकन कल, “टुह्र कसिन अबुझ मनै हुइटो, अगमवक्तन्हक कहल बातम विश्वास कर्ना फे टुह्र धौ मन्ठो। 26महिमा पैनासे आघ का ख्रीष्टह यी सब दुःख भ्वागपर्ना नैरलहन नि?” 27येशू मोशक ओ सब अगमवक्तन्हक लिखल बातसे सुरु कैक आपन बारेम धर्मशास्त्रम लिखल बातक अर्थ खोलदेल।
28उहाँहुँक्र इम्माउस गाउँक लग्घ पुग्ल त, येशू आघ जाइ खोज्ल। 29तर हुँक्र येशूह असिक कटी कर लगैल, “रात हुइलागल, आज हमारसँग रात रहजाई।” तब येशू हुँकन्हकसँग रात रह गैल।
30उहाँहुँक्र खाए बैठ्ल त, येशू रोटी लेल ओ परमेश्वरह धन्यवाद देल, ओ रोटी खन्टाक हुँकन देल। 31तब हुँकन्हक आँख येशूह चिन्ह सेक्ना हुइलन त हुँक्र उहाँह चिन्ह्ल। हुँक्र चिन्ह्टीकि उहाँ हुँकन्हक नजरमसे अलप होगैल। 32हुँक्र अप्न-अप्न कल, “येशू हमारसँग डगरिम नेङ्टी धर्मशास्त्रक अर्थ ख्वालबेर का हमार मन आनन्दले भरल नैरह नि?”
33हुँक्र उठ्ल ओ तुरुन्त यरूशलेम घुम्ल। तब हुँक्र एघार चेलन ओ हुँकन्हकसँग रहल और मनैन् असिक कहट् भेँटैल, 34“प्रभु जाट्टीसे मुवलमसे फेदोस्र जिरल। सिमोन पत्रुस उहाँह देख्ल।” 35तब उ दुइठो चेलावँ डगरिम हुइल् घटना ओ येशू रोटी खन्टाक हुँकन देहबेर उहाँह चिह्न्लक बात और चेलन्हकठे बट्वादेल।
येशू चेलन्हकठे देखपर्लक
मत्ती १८:१६-२०; मर्कूस १६:१४-१८; यूहन्ना २०:१९-२३; प्रेरित १:६-८
36हुँक्र बट्वैटीरलह त, येशू हुँकन्हक बीचम ठह्रेइल ओ कल, “टुँहन शान्ति ह्वाए।”
37हुँकन भूत्वा द्याखलअस लग्लन। उहओर्से हुँक्र सबजन डरैल। 38येशू हुँकन कल, “काजे टुह्र असिक डरैठो? काजे टुह्र शङ्का कर्ठो? 39म्वार हाँठ ओ ग्वारा हेरो। मैहे हुइटुँ। महीह छुव त थाहाँ पैबो। काकरकि भूतन्हक हारमास नैरटन तर टुह्र म्वार हारमास देख्टीबाटो।”
40अत्रा कैक येशू आपन हाँठ ओ ग्वारा हुँकन देखैल। 41हुँक्र येशूह जिटीह देख्क अत्रा खुशी हुइल ओ छक्क पर्ल कि हुँकन आपन द्याखल बातम विश्वास कर्ना फे मुस्किल हुइलन। येशू हुँकन कल, “टुन्हकठे कुछु खैना चिज बा कि?” 42हुँक्र उहाँह पकाइल मच्छी देल। 43येशू हुँकन्हक्के आघ मच्छी खैल।
44ओ कल, “टुन्हकसँग रहलम म्वार कहल बात यिह हो: मोशक व्यवस्थम, अगमवक्तन्हक किताबम ओ भजनसंग्रहम म्वार बारेम लिखल सब बात पूरा हुइहीपरी।”
45तबदोस्र येशू धर्मशास्त्र बुझ्ना हुँकन्हक समझशक्ति खोलदेल। 46उहाँ हुँकन कल, “ख्रीष्ट दुःख भोगहीँ ओ तीसर दिनम मुवलमसे फेदोस्र जिजैहीँ कैक धर्मशास्त्रम लिखल बा। 47ख्रीष्टक नाउँम आपन-आपन पापी मन परिवर्तन कैक पाप कर छोर्लसे, पाप क्षमा हुइना बात सब जातिन सुनाजाई। यी काम यरूशलेमसे सुरु हुई। 48यी सब बातक साक्षी टुह्रहे हुइटो। 49म्वार परमेश्वर बाबक करल पवित्र आत्मा पठैना प्रतिज्ञा मै टुन्हकठे पठादेहम्। तर परमेश्वरसे शक्ति नैपाइट्सम टुह्र यिह यरूशलेम सहरम पलरहहो।”#प्रे १:४
येशू स्वर्गम उठागैलक
मर्कूस १६:१९-२०; प्रेरित १:९-११
50तबदोस्र येशू हुँकन बेथानिया गाउँक लग्घ लैगैल ओ हाँठ उठाक हुँकन् आशिष देल। 51हुँकन आशिष देटी-देटी येशू हुँकन्हकठेसे स्वर्गम उठागैल। 52हुँक्र उहाँक आराधना कर्ल ओ खुशी होक यरूशलेम सहरम घुम्ल। 53हुँक्र सड्ड मन्दिरम जाक परमेश्वरक प्रशंसा कर्टिरहँट्।
S'ha seleccionat:
लूका 24: thl
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2020, Wycliffe Bible Translators, Inc. All rights reserved.